1. Kemej kijtoua 1 Pedro 5:2, ¿toni tatiochiualis kipiaj tokniuan tayekananij?

 JEHOVÁ kinnauatijtok tokniuan tayekananij maj kinyekpiakan iichkauan akin semi kintasojta. Yejuan semi kiuelitaj kinpaleuiskej tokniuan uan mochikauaj yeskij kuali ichkatajpianij (Jer. 23:4; xikonixtajtolti 1 Pedro 5:2). ¡Semi kualtsin maj itech nechikolmej moajsikan tokniuan akin semi tekitij!

2. ¿Toni ouijkayomej kipiaj seki tokniuan tayekananij?

² Keman tokniuan tayekananij kichiuaj inintekiuj, seki taman ouij kinkisa porin moneki kichiuaskej miak taman para kinyekpiaskej tokniuan. Maj tikitakan tein kipanok Tony, se tokniuj tayekankej de Estados Unidos. Yejua kiitak ke monekia kiajsikamatis ke amo nochi ueliskia kichiuas keman kiseliskia se tekit itech nechikol. Tony kijtoua: “Keman peuak kokolis COVID-19, nikpiaya okachi tekit porin monekia nikitas keniuj mochiuaskiaj nechikolmej uan motanojnotsaskia. Sayoj ke maski semi nimochikauaya, nochipa onkaya miak tekit. Uan amo nikpiayaok tiempo para nikixtajtoltis Biblia, nimomachtis noselti uan nimotataujtis”. Ilir, se tokniuj tayekankej de Kosovo, kipanok okse taman. Yejua nemia kampa mochiujtoya neteuilis, yejua ika ouij kikisaya kichiuas tein tanauatiaya inechikol Jehová. Yejua kijtoua: “Keman sucursal nechnauatij maj nikinpaleui tokniuan akin nemiaj kampa mochiuaya tein amo kuali, semi nimouik. Ouij nechkisaya yeski niyolchikauak, uan tein nechnauatiayaj moitaya ke amo tapaleuiaya”. Tim se misionero de Asia semi ouij kikisaya kichiuas nochi tekit tein kipiaya. Yejua kijtoua: “Kemansa semi nisiouia uan amo kuali nimomachiliaya”. ¿Toni uelis kichiuaskej tokniuan tayekananij komo kipiaj ouijkayomej kemej nejin?

3. ¿Keyej tinochin moneki tikitaskej tein kichiuak Gedeón?

³ Tokniuan tayekananij uelis kinmachtis miak taman tein kichiuak juez Gedeón (Heb. 6:12; 11:32). Yejua kiyekpiaya uan kiixyekanaya ixolal Dios (Juec. 2:16; 1 Crón. 17:6).  Tokniuan tayekananij no moneki kinyekpiaskej tokniuan keman kipiaskej ouijkayomej ijkon kemej kichiuak Gedeón (Hech. 20:28; 2 Tim. 3:1). Uelis kinmachtis miak taman komo kiitaj ke Gedeón kiajsikamatia ke amo nochi uelia kichiuaya, katka yolyemanik, tatakamatia uan kixikouaya ouijkayomej. Tein kichiuak nejin juez no uelis kinpaleuis nochin tokniuan itech nechikol maj okachi kitasojkamatikan tein kichiuaj tayekananij uan maj kinpaleuikan (Heb. 13:17).

4. ¿Keniuj Gedeón kinextij ke kiajsikamatia ke amo nochi uelia kichiuaya uan ke katka yolyemanik?

⁴ Gedeón katka yolyemanik uan kiajsikamatia ke amo nochi uelia kichiuaya. b Keman se ángel kiluij ke Jehová kiixpejpenka maj kinmakixti israelitas porin madianitas kintajyouiltijtoyaj, Gedeón kinextij ke katka yolyemanik keman kijtoj: “Nochankauan amo ueyichiuanimej kemej oksekin ichankauan Manasés, uan nejua amo teyi nichiujkej ichan nopaj” (Juec. 6:15). Yejua kinemiliaya ke amo ueliskia kichiuas. Sayoj ke Jehová kimatia ke Gedeón kemaj ueliskia uan kemej kipaleuij, kuali kichiuak nejon tekit.

5. ¿Kemanian se tokniuj tayekankej ouij kikisas yeski yolyemanik uan kiajsikamatis ke amo nochi ueli kichiua?

⁵ Tayekananij nochipa mochikauaj kiajsikamatiskej ke amo nochi ueli kichiuaj uan yolyemankej (Miq. 6:8; Hech. 20:18, 19). Amo moueyinekij ika tein ueli kichiuaj uan tein kichiuanijya, uan amo moyolkokojtokej porin mopolojkej oso porin amo uelij teisa. Sayoj ke, kemansa ouij kinkisa yeskij yolyemankej uan kiajsikamatiskej ke amo nochi ueli kichiuaj. Maj tiknemilikan tein uelis panos, xa se tayekankej uelis kiselis miak taman tekit sayoj ke satepan kiitas ke amo nochi ueli kichiua. Xa kiluiskej ke kuali kemej kichiuak se tekit oso uelis kijijtoskej porin no taman kemej kichiuak teisa. Keman tokniuan tayekananij ijkon kinpanos, ¿keniuj uelis kinpaleuis tein kichiuak Gedeón?

6. ¿Keniuj tayekananij uelis kichiuaskej kemej Gedeón keman kiajsikamatiskej ke amo nochi ueli kichiuaj? (No xikonita taixkopin).

⁶ Xikiniluikan oksekin maj namechpaleuikan. Akin yolyemanik kiajsikamati ke amo  nochi ueli kichiua. Gedeón kinextij ke kiajsikamatia ke amo nochi uelia kichiuaya keman tajtanik maj kipaleuikan (Juec. 6:27, 35; 7:24). Tokniuan tayekananij akin tamatinij no ijkon kichiuaj. Tony, akin ika titajtojkej itech párrafo 2, kijtoua: “Kemej nechiskaltijkej, nimomattok nikselis okachi tekit ke tein ueli nikchiua. Yejua ika keman titaueyichiujkej kemej kalyetonij ika nitajtoj tein yekmelauj ueli se kichiua uan nikiluij nosiuatsin maj nechiluiani tein kinemiliaya. No oksepa nikitak se video tein yetok itech jw.org tein motokaytia Maj tikinmachtikan oksekin keniuj kichiuaskej teisa uan maj iniuan titakuaujtamatikan kemej Jesús”. Tony peuak kintajtania oksekin maj kipaleuikan, yejua techiluia keniuj tapaleuij nejon: “Nochi tekit tein onkak itech nechikol kuali mochiujtok uan nejua okachi nikpia tiempo para kuali nimouikas iuan Jehová”.

7. ¿Keniuj tayekananij uelis kichiuaskej kemej Gedeón keman aksa kinijijtos? (Santiago 3:13).

⁷ Amo xikualanikan komo namechijijtouaj. Keman tokniuan tayekananij kinijijtouaj monextis ox niman kualanij oso amo. Tein kichiuak Gedeón no uelis kinpaleuis. Yejua amo keman kielkauak ke katka tajtakolej, uan keman kijijtojkej seki takamej akin pouiaj iniuan ichankauan Efraín, amo yolijsiuik (Juec. 8:1-3). Gedeón amo kintauelnankilij, ta kinextij ke katka yolyemanik keman kuali kinkakik uan kinyolseuij keman kichiuak maj amo kualanikanok. Tayekananij akin tamatinij kichiuaj kemej Gedeón. Keman aksa kinijijtoua, kuali kikakij uan kinankiliaj ika nejmachkayot (xikonixtajtolti Santiago 3:13). Keman kichiuaj nejin, tapaleuiaj maj tokniuan itech nechikol kuali mouikakan.

8. ¿Toni uelis tanankiliskej tayekananij keman kinueyitaliskej? Xikonijto se neskayot.

⁸ Xikueyitalikan Jehová. Keman kiueyitalijkej Gedeón porin kintanik madianitas, yejua kichiuak maj xolal kiueyitaliani Jehová (Juec. 8:22, 23). ¿Keniuj tayekananij no uelis ijkon kichiuaskej? Komo kiueyitaliaj Jehová ika tein kichiuaj (1 Cor. 4:6, 7). Xa keman se tayekankej kiluiaj ke kualtsin kemej tamachtia, uelis kijtos ke kikixtij itech iTajtol Dios uan ke tinochin timomachtiaj porin techpaleuia inechikol Jehová. Semi kuali maj tayekananij motajtanikan ox kiueyitalia Jehová kemej tamachtiaj oso sayoj yejuan moueyitaliaj. Maj tikitakan tein kipanok se tokniuj akin monotsa Timothy, keman mochiuak tayekankej semi kiuelitaya kitemakas tanojnotsmej, yejua kijtoua: “Tel kuali nimomachtiaya keniuj nikpeualtis se tanojnots uan tein ika nitajtouaya tel kuali nikmelauaya. Yejua ika tokniuan nechiluiayaj ke tel kuali nitamachtiaya. Sayoj ke nejua noka tajtouayaj uan amo Jehová nion Biblia”. Satepan Timothy kiitak ke monekia kipatas kemej tamachtiaya para maj amo sayoj yejua kiitanij (Prov. 27:21). ¿Keniuj kipaleuij? Yejua kijtoua: “Axkan tokniuan nechiluiaj ke notanojnots kinpaleuij maj kiixnamikikan se ouijkayot, maj taxikokan keman kinyejyekouaj oso maj okachi motokikan iuan Jehová. Okachi niyolpaki keman nechiluiaj nejon ke keman nechueyitaliayaj”.

9. ¿Kemanian Gedeón monekik kinextis ke tatakamatia uan yolchikauak katka? (Xikonita taixkopin ipeujyan amaix).

⁹ Satepan ke Jehová kiixtalij Gedeón kemej juez, monekik kinextis ke tatakamatia uan ke katka yolchikauak. Yejua kiselij se tekit tein semi ouij katka: monekik kiuejuelos altar tein katka de itat kampa kiueyichiuayaj Baal (Juec. 6:25, 26). Satepan, Gedeón kinsentilij miakej tateuianij, sayoj ke  ojpa Jehová kiluij ke amo nochin yaskiaj tateuitiuij (Juec. 7:2-7). Uan Jehová kinnauatij maj yanij kinteuitij tajkoyouan akin kinixnamikiaj (Juec. 7:9-11).

10. ¿Keniuj se tayekankej uelis kinextis ox yekmelauj tatakamati?

¹⁰ Tayekananij moneki niman tatakamatiskej (Sant. 3:17). Keman se tayekankej tatakamati, mokaua maj kiixyekana tein kijtoua Biblia uan inechikol Dios, ijkon kinnextilia oksekin maj no kichiuakan. Sayoj ke kemansa xa amo ijsiujka tatakamatis, uan ouij kikisas kichiujtias nochi tein mopatatiuj. Kemansa uelis motajtanis ox tein kinauatiaj maj kichiua yejua tein okachi tapaleuis. Oso xa kitajtaniskej maj kichiua teisa tein ika uelis kitsakuaskej. Keman panos teisa kemej nejin, ¿keniuj tayekananij uelis tatakamatiskej kemej kichiuak Gedeón?

11. ¿Toni uelis kinpaleuis tayekananij maj tatakamatikan?

¹¹ Kuali xikakikan tein namechnauatiaj, uan xikchiuakan. Dios kiluijka Gedeón keniuj monekia kiixpolos altar tein iaxka katka itat, kani monekia kichijchiuas se altar para Jehová uan katiyejua tapial monekia kitemaktis. Gedeón amo omeyolouak nion kijijtoj tein Jehová kinauatijka, ta niman kitakamatik. Axkan inechikol Jehová kiniluia tayekananij toni moneki kichiuaskej keman kintitaniliaj cartas uan tanauatilmej. Nochi nejin techpaleuia maj kuali timouikakan iuan Jehová uan maj kuali tietokan. Semi tikintasojtaj tayekananij porin kichiuaj nochi tein inechikol Jehová kinnauatia uan kemej tatakamatij nochin tokniuan kinpaleuia (Sal. 119:112).

12. Keman inechikol Jehová tanauatia maj mopata kemej mochiua teisa, ¿keniuj tayekananij uelis kichiuaskej tein kijtoua Hebreos 13:17?

¹² Niman xitatakamatikan keman mopata teisa. Maj tikelnamikikan ke Jehová kinauatijka Gedeón maj tel miakej soldados mokepanij ininchan (Juec. 7:8). Xa kinemilij: “¿Yekmelauj moneki maj nikchiua nejin? ¿Tapaleuis?”. Maski ijkon, Gedeón tatakamatik. Tayekananij no uelis kichiuaskej kemej Gedeón keman kitakamatiskej inechikol Jehová uan kipataskej tein kinnauatis (xikonixtajtolti Hebreos 13:17). Itech xiuit 2014, Oloch Taojtokaltianij kipatakej kemej moixtauayaj Kalmej kampa tiMosentiliaj uan Kalmej kampa mochiuaj Uejueyi nechikolmej (2 Cor. 8:12-14). Ne uejkauj, komo se nechikol kinekia kichijchiuas se Kali kampa tiMosentiliaj, kitaneujtiayaj tomin para maj mochijchiua uan satepan monekia kikepas. Sayoj ke axkan inechikol Jehová kikui tomin tein kitemakaj nechikolmej itech nochi taltikpak, uan ika kinchijchiuaj Kalmej kampa tiMosentiliaj uan Kalmej kampa mochiuaj Uejueyi nechikolmej, nejin mochiua maski kampa mochijchiuas kali amo miak tomin kitemakas. Keman se tokniuj tayekankej akin monotsa José kimatik nejin, amo kineltokak  maj tapaleuiani tein moixtalijka. Yejua moiluij: “Nejon tapaleuis okseko, sayoj ke nikan amo. Tikitas ke amo mochijchiuas nion se”. Maski ijkon ipa tatakamatik. ¿Keyej? Yejua kijtoua: “Nikelnamik ke Proverbios 3:5, 6 kijtoua ke moneki maj nitakuaujtamati iuan Jehová. ¡Uan tein moixtalij mochiuas semi tapaleuijtok! Amo sayoj tikinchijchiuaj okachi Kalmej kampa tiMosentiliaj ta tikitanij ke maski titapaleuiskej sayoj tepitsin, tinochin timosenpaleuiaj”.

13. 1) ¿Toni kuali kimatia Gedeón? 2) ¿Keniuj tayekananij uelis kichiuaskej kemej Gedeón? (No xikonita taixkopin).

¹³ Xiyolchikaujkej keman nankichiuaskej tein Jehová kineki. Gedeón kitakamatik Jehová maski mouia uan ueliskia kimiktiskej (Juec. 9:17). Satepan ke Jehová kimatiltijka ke kipaleuiskia, Gedeón kuali kimatia ke Dios kipaleuiskia maj kiyekpia ixolal. Tayekananij akin nemij kampa amo kinkauaj maj tanojnotsakan, kichiuaj kemej Gedeón. Yejuan amo mouij uan yolchikaujkej. Kiixtaliaj keniuj mochiuaskej nechikolmej uan keniuj motanojnotsas maski ueliskia kintsakuaskej, kintatsintokiskej, kinkuiliskej inintekiuj oso kinmagaskej. c Keman ejkos tetsaujkatajyouilis, tayekananij monekis maj semi yolchikaujkej para kitakamatiskej tein kinnauatiskej maski uelis kinmiktiskej. Xa kinnauatiskej keniuj moteixmatiltis ke Dios kintatsakuiltiti akin amo yolkualmej, akin kimachiliskej ke inintech uetsi tesiuit tein kemej yeskia uejueyi tet. Oso toni moneki tikchiuaskej keman techixnamikis Gog akin ualeua Magog (Ezeq. 38:18; Apoc. 16:21).

14. ¿Keyej Gedeón ouij kikisak taxikos?

¹⁴ Kemej Gedeón katka juez de Israel, monekia chikauak tekitis. Keman nejon youak moteuijtoyaj uan madianitas cholojkej, Gedeón kisteuak de atauit Jezreel uan kintokatiajki hasta itech ueyiat Jordán, kampa tajtatenoj katka xiujtsalan uan uitstaj (Juec. 7:22). ¿Motsakuilij Gedeón keman ompa ajsik? ¡Amo! Maski yejua uan 300 takamej  akin iniuan yaya siujtoyajya, kipanauijkej ueyiat uan kisentokakej kintokatiajkej, kinajsitoj uan kintankej (Juec. 8:4-12).

15. ¿Keyej se tayekankej xa ouij kikisas taxikos?

¹⁵ Se tayekankej akin kiyekpia nechikol uan ichankauan, uelis semi siouis uan amo kuali momachilis. ¿Keniuj uelis kichiuas kemej Gedeón keman ijkon kipanos?

16, 17. 1) ¿Toni kipaleuij Gedeón maj taxiko? 2) ¿Toni uelis kimatiskej tayekananij? (Isaías 40:28-31; no xikonita taixkopin).

¹⁶ Xikneltokakan ke Jehová namechchikauas. Yejua nejon tein kineltokaya Gedeón, uan Jehová amo kisenkauak (Juec. 6:14, 34). Se tonal, Gedeón uan isoldados tsikuintiajkej kintokatiajkej ome tekiuanij madianitas akin xa cholojtiayaj ika camellos (Juec. 8:12, 21). Sayoj ke Jehová kinpaleuij nejon israelitas maj kinajsitij uan maj kintanikan. Axkan tayekananij no uelis takuaujtamatiskej iuan Jehová, Dios akin “amo keman sioui nion sotaui”. Yejuatsin kinchikauas nochipa keman monekis (xikonixtajtolti Isaías 40:28-31).

¹⁷ Maj tikitakan tein kipanok Matthew, semej tayekananij akin tetajtouiaj itech tapajtiloyamej. ¿Toni kipaleuia maj taxiko? Yejua kijtoua: “Nikitani ke yekmelauj tein kijtoua Filipenses 4:13. Miakpa keman nisioujtok uan nikmachilia ke amo niueliok, semi niktataujtia Jehová uan niktajtania maj nechchikaua uan maj kuali nimomachili para uelis nikinpaleuis tokniuan. Keman nikchiua nejin, nikmachilia ke ichikaualis Jehová nechpaleuia maj nitaxiko”. Ijkon kemej kichiuak Gedeón, maski tayekananij kipiaj ouijkayomej, no chikauak tekitij para kinyekpiaskej itekitikauan Jehová. Sayoj ke no moneki kiajsikamatiskej ke amo ueli kichiuaj nochi tein kinekiskiaj. Maski ijkon, tayekananij takuaujtamatij ke Jehová kinkakis uan kinpaleuis maj kisentokakan taxikokan (Sal. 116:1; Filip. 2:13).

18. Kemej tikitakejya, ¿keniuj tayekananij uelis kichiuaskej kemej Gedeón?

¹⁸ Kemej tikitakejya, tayekananij uelis kinmachtis miak taman tein kichiuak Gedeón. Keman kiseliskej se tekit, kinijijtoskej oso kiniluiskej ke kuali kichiujkej teisa, moneki yeskij yolyemankej uan kiajsikamatiskej ke amo nochi ueli kichiuaj. No moneki tatakamatiskej uan yeskij yolchikaujkej, okachiok axkan porin amo uejkaua ixpoliuisya nochi tein amo kuali. Uan moneki takuaujtamatiskej ke maski kipiaskej ouijkayomej, Jehová kichiuas maj taxikokan. Semi tiktasojkamatij tein kichiuaj tokniuan tayekananij uan nochipa tikintakachiuaj porin semi tekitij (Filip. 2:29).