Para uelis tikyolpaktiskej Jehová moneki titakuaujtamatiskej. Sayoj ke Biblia kijtoua ke “amo nochin takuaujtamatij” (2 Tes. 3:2). Keman tatitanil Pablo kijtoj nejin, ininka tajtojtoya “akin tel amo yolkualmej” katkaj, akin semi kitajyouiltijtoyaj. Sayoj ke nejin texto no kinnamiki oksekin akin amo takuaujtamatij. Kemej akin amo kineltokaj ke Dios kichijchiuak nochi (Rom. 1:20). Uan maski oksekin kijtouaj ke kineltokaj Dios, amo uelis kiyolpaktiskej Jehová sayoj porin kijtouaj nejon.

Para tikyolpaktiskej Dios moneki tikneltokaskej ke yejua nemi uan ke kintatiochiuia akin iuan takuaujtamatij (Heb. 11:6). Uan para uelis titakuaujtamatiskej moneki maj ichikaualis Dios techpaleui. Yejua ika moneki tiktajtaniskej Jehová maj techmaka ichikaualis (Luc. 11:​9, 10, 13). No semi moneki maj tikixtajtoltikan Biblia, tein moijkuiloj ika ichikaualis Jehová, uan satepan maj itech titanemilikan tein tikixtajtoltijkej uan maj timochikauakan tikchiuaskej tein timomachtiaj. Komo ijkon tikchiuaj, ichikaualis Dios techpaleuis maj ueli titakuaujtamatikan kemej Jehová kiyolpaktia.