Tein tajtanij akin taixtajtoltiaj
¿Keyej tikijtouaj ke tajtolmej: “Tejua […] tikinpaleuis maj kuali yetokan” tein moajsi itech Salmo 12:7 ininka tajtoua “akin tajyouijtokej” (versículo 5), uan amo “tein Jehová kijtoua” (versículo 6)?
Tein ika tajtoua nejon capítulo kinextia ke tejuan toka tajtojtok.
Itech Salmo 12:1-4 kijtoua ke “akin takuaujtamatij ixpoliujkejya”. Uan Salmo 12:5-7 kijtoua:
“Jehová kijtoua:
‘Nimoketsas para nikinmakixtis akin tajyouijtokej
uan no pobres akin motsajtsiliaj maj kinpaleuikan,
uan nikinmakixtis ininmako akin amo kinyekitaj’.
Tein Jehová kijtoua chipauak;
tamati kemej plata tein chikojpa kichipaujkej itech horno.
Tejua, Jehová tikinpaleuis maj kuali yetokan;
tikinyekpias axkan uan nochipa”.
Itech versículo 5 kijtoua ke Jehová kinmakixtis akin tajyouiaj.
Itech versículo 6 no kijtoua: “Tein Jehová kijtoua chipauak; tamati kemej plata tein chikojpa kichipaujkej”. Uan tiitekitikauan Dios no ijkon titanemiliaj (Sal. 18:30; 119:140).
Itech okseki Biblias, Salmo 12:7 motajtolkepak ijkon: “Tejua tikinyekpias”.
Uan kemej versículo 6 kijtoua “tein Jehová kijtoua” sekin kinemiliaj ke kijtosneki ke Dios ‘kiyekpia’ iTajtol. Uan tikmatij ke kiyekpiani Biblia porin miakej kinekinij kiixpoloskej oso amo kikauaj maj kiixtajtoltikan nion maj kitajtolkepakan (Is. 40:8; 1 Ped. 1:25).
Sayoj ke Jehová no kinyekpia akin ininka tajtoua itech versículo 5. Yejuatsin kinpaleuiani “akin tajyouijtokej” uan kisentokas kinpaleuis uan kinmakixtis (Job 36:15; Sal. 6:4; 31:1, 2; 54:7; 145:20).
Yejua ika, ¿akoni kiyekpia Jehová kemej kijtoua itech versículo 7? ¿Tejuan oso tein kijtoua?
Keman okachi timomachtiaj tein kijtoua nejin Salmo, tikitaj ke toka tajtojtok.
Itech Salmo 12:1, 2 David ika tajtoua seki itekitikauan Jehová akin kinkajkayaujkej. Satepan, itech versículo 3 kijtoua ke Jehová kinixpolos akin kijtouaj tein amo kuali. Salmo kijtoua ke uelis titakuaujtamatiskej ke Dios kipaleuis ixolal, porin tein kijtoua chipauak.
Yejua ika, akin Jehová kinpaleuis maj kuali yetokan kemej kijtoua itech versículo 7, yejuan akin tajyouiaj porin akin amo yolkualmej kinchiuiliaj tein amo kuali.
Komo ijkon, ¿keyej itech okseki Biblias kitajtolkepaj nejin versículo ijkon: “Tejua tikinyekpias”? Nejin tajtolmej kinextiaj ke copias den tajkuilolmej itech tajtol Hebreo kuali ijkuiliujtokej uan uelis se kineltokas tein ompa kijtoua. Sayoj ke itech Septuaginta griega kijtoua nejin: “Yejua techyekpias”. Nejin kinextia ke ininka tajtojtok akin amo keman kikauaj Jehová uan kintajyouiltiaj. Uan no itech versículos 7 uan 8 kijtouaj ke Jehová amo kinkauas maj akin kichiuaj “tein tel panoua pitsotik” kinchiuilikan tein amo kuali itekitikauan (Sal. 12:7, 8). Itech tajtol arameo nejin versículo motajtolkepak ijkon: “Tejua, noTekotsin, tikinyekpias akin kichiuaj tein kuali yetok uan tikinpaleuis para maj amo kintajyouiltikan akin amo yolkualmej”. Nochi nejin kinextia ke tein kijtoua Salmo 12:7 amo ika tajtojtok iTajtol Dios.
Yejua ika, nejin versículo kinnextilia itekitikauan Dios ke yejuatsin kinpaleuis.
