1. ¿Toni kiuelitaj akin yekinika youij nechikol? (No xikonita taixkopin).

 XIKONNEMILI ke se takat iuan isiuatsin yekinika youij se nechikol itech Kali kampa tiMosentiliaj. Kimojkaitaj keniuj kualtsin kinseliaj uan keniuj tokniuan semi motasojtaj. Keman mokepaj ininchan, siuatsin kiluia itakatsin: “Nikuelita porin itaixpantijkauan Jehová semi tamamej”.

2. ¿Keyej sekin amo kitekitiliajok Jehová?

² Maski tiitaixpantijkauan Jehová yekmelauj timotasojtaj, no timopolouaj porin titajtakolejkej (1 Juan 1:8). Yejua ika, keman okachi tikinixmatij tokniuan, xa okachi tikitaj ininnepololuan (Rom. 3:23). Sayoj ke timoyolkokouaj keman tikmatij ke sekin amo kitekitiliajok Jehová porin semi kiitakej nejon nepololmej.

3. ¿Keniuj kimatiskiaj akonimej yekmelauj itatojtokakauan Jesús? (Juan 13:34, 35).

³ Maj oksepa tikitakan texto kampa mokixtia nejin tamachtilis (xikonixtajtolti Juan 13:34, 35). ¿Keniuj kimatiskiaj oksekin akonimej yekmelauj itatojtokakauan Jesús? Keman kiitaskiaj ke motasojtaj, Biblia amo kijtoua ke amo keman mopoloskiaj. Uan no, Jesús amo kijtoj: “Ijkon namejuan nankimatiskej ke namejuan nannomomachtijkauan”, ta kijtoj: “Ijkon nochin kimatiskej ke namejuan nannomomachtijkauan”. Tikitaj  ke Jesús kiyeknextij ke imomachtijkauan uan oksekin kimatiskiaj akonimej yekmelauj itatojtokakauan porin motasojtaskiaj se iuan okse.

4. ¿Toni uelis motajtaniskej sekin?

⁴ Akin amo itaixpantijkauan Jehová xa motajtaniaj: “¿Keniuj motasojtaj akin yekmelauj kichiuaj kemej Cristo? ¿Keniuj kinextij Jesús ke kintasojtaya itatitaniluan? ¿Uan keniuj uelis tikchiuaskej kemej yejua?”. Akin timoauijkejya no semi moneki maj timotajtanikan nejin. Komo ijkon tikchiuaj, techpaleuis maj okachi titetasojtakan uan okachiok keman oksekin mopolouaj (Efes. 5:2).

5. ¿Toni kijtosnekik Jesús itech Juan 15:12, 13?

⁵ Jesús kinextij ke kemej motasojtaskiaj itatojtokakauan semi kualtsin yeskia (xikonixtajtolti Juan 15:12, 13). Maj tikitakan tein Jesús kinnauatij. Yejua kijtoj: “Ximotasojtakan se iuan okse kemej nejua namechtasojta”. ¿Toni kijtosnekik Jesús? Ke kemej tokniuan semi motasojtaj hasta motemakaj mikiskej para kipaleuiskej se tokniuj. b

6. ¿Keniuj kinextia iTajtol Dios ke semi moneki maj se tetasojta?

⁶ ITajtol Dios techmachtia ke semi moneki maj se tetasojta. Miakej kijtouaj ke semi kiuelitaj textos kemej nejin: “Dios yejua tetasojtalis” (1 Juan 4:8), “Xiktasojta moknitsin kemej tejua timotasojta” (Mat. 22:39), “Akin tetasojta nochipa tetapojpoluia” (1 Ped. 4:8), uan “Tetasojtalis amo keman tapoloua” (1 Cor. 13:8). Nejin uan okseki textos kinextiaj ke semi moneki maj se tetasojta.

7. ¿Keyej Satanás amo ueli kichiua maj miakej kuali mouikakan uan maj motasojtakan?

 ⁷ Miakej motajtaniaj: “¿Keniuj uelis nikmatis katiyejua taneltokalis tein melauak? Nochi taneltokalismej kijtouaj ke tamachtiaj tein melauak, sayoj ke tataman tein tamachtiaj de Dios”. Satanás kichiuani maj moajsikan miak taneltokalismej, yejua ika miakej amo kimatij katiyejua tein melauak. Satanás amo ueli kichiua maj noyampa taltikpak miakej motasojtakan, nejon sayoj Jehová ueli kichiua. Tikmatij nejin porin Jehová tetasojta. Uan sayoj akin kintiochiua uan akin kinmaka ichikaualis ueli yekmelauj motasojtaj (1 Juan 4:7). Yejua ika Jesús kijtoj ke akin yekmelauj motasojtaskiaj, yejuan akin yeskiaj yekmelauj itatojtokakauan.

8, 9. ¿Keniuj kinpaleuiani miakej keman kiitaj ke itaixpantijkauan Jehová motasojtaj?

⁸ Ijkon kemej Jesús kijtojka, miakej kimatij akonimej yekmelauj itatojtokakauan Jesús porin motasojtaj. Ijkon kipanok tokniuj Ian. Yejua kielnamiki keman yekinika yajka se ueyi nechikol itech se estadio tein moajsia ompaka kampa nemi. Seki metsti achto ipa yajka ompa porin kinitato akin mauiltiayaj. Yejua kijtoua: “Semi taman tein nikitak. Itaixpantijkauan Jehová kuali takentiayaj, kuali teseliayaj uan konemej kuali takakiaj”. No kijtoua: “Semi nikmojkaitak maj nochin yolpaktonij uan yolseujtonij. Yejua nejon tein ipa niktemojtoya. Amo nikelnamiki nion se tanojnots tein motemakak, sayoj ke amo nikelkaua tein kichiuayaj akin yetoyaj itech ueyi nechikol”. c Ian uelik kiitak nejon porin yekmelauj timotasojtaj. Kemej semi tikintasojtaj tokniuan, tikualtakamej iniuan uan tikinpoujkaitaj.

⁹ Se tokniuj akin monotsa John no ijkon momachilij keman yekinika yajki nechikol. Kimojkaitak maj nochin kuali kiselianij uan maj kichiuanij tein kuali. Kijtoj: “Keman nikitak ke yekmelauj motasojtaj, nikmatik ke yejuan akin pouij itech taneltokalis tein melauak”. d Tein kinpanok nejin tokniuan uan oksekin, kiyeknextia ke itaixpantijkauan Jehová yejuan akin yekmelauj kichiuaj kemej Cristo.

10. ¿Kemanian okachi monekis tiknextiskej ke tikintasojtaj tokniuan? (No xikonita nota).

¹⁰ Kemej achto tikitakej, tinochin timopolouaj. Kemansa tokniuan kichiuaskej oso kijtoskej teisa tein techyolkokos (Sant. 3:2). e Keman panos nejon, monextis ox yekmelauj tikintasojtaj tokniuan. ¿Toni techpaleuis maj tiknextikan ke titetasojtaj? Techpaleuis komo tikitaj tein Jesús kichiuak (Juan 13:15).

11. ¿Toni kinextijkej Santiago uan Juan se tonal? (No xikonita taixkopimej).

¹¹ Jesús kimatia ke itatitaniluan mopoloskiaj porin katkaj tajtakolejkej.  Yejua ika, kinpaleuij maj kipatanij seki taman tein kichiuayaj para ueliskiaj kiyolpaktiskej Jehová. Se tonal, ome itatitaniluan, Santiago uan Juan, kiluijkej ininmomaj maj kitajtani Jesús maj kinmakani uejueyi tekimej keman taixyekantoskia (Mat. 20:20, 21). Nejin ome tatitanilmej kinextijtoyaj ke moueyimatiaj uan ke katkaj xijxikuimej (Prov. 16:18).

12. ¿Keniuj tikmatij ke amo sayoj Santiago uan Juan kinextijkej ke moueyimatiaj?

¹² Nejon tonal, amo sayoj Santiago uan Juan kinextijkej ke moueyimatiaj. Maj tikitakan toni kichiujkej okseki tatitanilmej: “Keman oksekin majtakti kimatkej nejin, kinkualantij tein kichiujkej nejon ome iknimej” (Mat. 20:24). Xa tiknemiliaj keniuj semi mokualantijkej. Okseki tatitanilmej xa kiniluijkej Santiago uan Juan: “¿Nankinemiliaj ke okachi nanueyichiuanimej? Amo sayoj namejuan semi nantekitinij iuan Jesús. Tejuan no technamiki titaixyekanaskej ijkon kemej namejuan”. Nejon tonal kielkaujkej ke nochipa monekia motasojtaskej.

13. ¿Toni kichiuak Jesús iniuan itatitaniluan maski mopolouayaj? (Mateo 20:25-28).

¹³ ¿Toni kichiuak Jesús? Yejua amo kualanik. Amo kiniluij itatitaniluan ke kinixpataskia uan kinixpejpenaskia  okseki takamej akin okachi yolyemankej katkaj uan okachi tetasojtayaj. Ta iniuan tajtoj ika nejmachkayot uan kintanemililtij porin kimatia ke kinekiaj kichiuaskej tein kuali (xikonixtajtolti Mateo 20:25-28). Maski itatitaniluan miakpa motajtolteuijkej porin moueyimatiaj, Jesús nochipa katka kualtakat iniuan (Mar. 9:34; Luc. 22:24).

14. ¿Keniuj nemiaj kampa moskaltijkej itatitaniluan Jesús?

¹⁴ Tikyekmatij ke Jesús kimatia keniuj nemiaj kampa moskaltijkaj itatitaniluan (Juan 2:24, 25). Itech nejon tonalmej, akin taixyekanayaj itech taneltokalis tamachtiayaj ke sayoj akin kipiaya se ueyi tanauatil katka ueyichiujkej (Mat. 23:6; no xikonita video Asientos del frente en la sinagoga, itech nota de estudio tein kipia Mateo 23:6). Tein melauj, judíos akin taixyekanayaj itech taneltokalis kinemiliayaj ke katkaj okachi ueyichiuanimej ke oksekin (Luc. 18:9-12). f Jesús kimatia ke tatitanilmej xa no kinemiliskiaj ke katkaj okachi ueyichiuanimej ke oksekin (Prov. 19:11). Yejua amo kichiaya maj itatitaniluan amo keman mopolouanij uan amo kualania keman ijkon kichiuayaj. Jesús kimatia ke kinekiaj kichiuaskej tein kuali. Yejua ika, kinpaleuij maj amo moueyimatikanok, maj yolyemankej uan maj kintasojtakan oksekin.

15. ¿Toni techmachtia tein kichiujkej Santiago uan Juan?

¹⁵ Tein kichiujkej Santiago uan Juan techmachtia miak taman. Amo kuali tein kichiujkej keman tajtankej maj kinmakanij ueyi tanauatil keman Jesús taixyekantoskia. Uan no, amo kuali yetoya maj okseki tatitanilmej kikauanij maj nejon kinxexelouani. Maski ijkon, Jesús kintasojtak nochin 12 tatitanilmej. ¿Toni techmachtia nejon? Amo sayoj moneki tikitaskej keman mopolouaj oksekin, ta toni tikchiuaj. Yejua ika, keman techkualantis se tokniuj, maj timotajtanikan: “¿Keyej semi nechkualantij tein kichiuak? ¿Moneki nikpatas teisa? ¿Kipanotok tokniuj se ouijkayot? ¿Ueliskia niknextis ke niktasojta uan niktapojpoluis maski nechyolkokoj?”. Komo nochipa tikintasojtaj oksekin, tiknextiskej ke yekmelauj tikchiuaj kemej Cristo.

16. ¿Toni no techmachtia tein kichiuak Jesús?

¹⁶ Tein Jesús kichiuak no techmachtia ke moneki tikinajsikamatiskej tokniuan (Prov. 20:5). Jesús uelia kimatia toni kinemiliayaj uan kimachiliayaj oksekin, sayoj ke tejuan amo. Maski ijkon, uelis tikixpanouiskej ininnepololuan tokniuan (Efes. 4:1, 2; 1 Ped. 3:8). Uan tein techpaleuis yejua komo timochikauaj okachi tikinixmatiskej. Maj tikitakan toni kichiuak se tokniuj.

17. ¿Toni panok keman se tokniuj takalpanojkej mochikauak okachi kiixmatis se tokniuj?

¹⁷ Ompa África oriental, se tokniuj takalpanojkej kiixmatik se tokniuj akin  moitaya ke niman kualania. ¿Toni kichiuak tokniuj takalpanojkej? Yejua kijtoua: “Nikixtalij okachi nikixmatis”. Keman kichiuak nejon, kimatik ke tokniuj kipanoka miak taman keman moskaltij, yejua ika kiouijmakaya yeski yolnejmach. Yejua kijtoua: “Keman nikmatik ke miak taman kipatakaya uan ke kisentokaya mochikaujtoya mopatas, kichiuak maj semi niktasojta uan peuak kuali timouikaj”. Komo timochikauaj okachi tikinixmatiskej uan tikinajsikamatiskej tokniuan, okachi amo ouij techkisas tikintasojtaskej.

18. ¿Toni uelis timotajtaniskej komo se tokniuj techyolkokoj? (Proverbios 26:20).

¹⁸ Kemansa xa monekis iuan titajtoskej tokniuj akin techyolkokoj. Sayoj ke, achto ke tikchiuaskej moneki timotajtaniskej seki taman. “¿Nikmati nochi tein panok?” (Prov. 18:13). “¿Yekmelauj kinekia nechyolkokos?” (Ecl. 7:20). “¿Amo keman niteyolkokouani?” (Ecl. 7:21, 22). “Komo iuan nitajtoua tokniuj, ¿nikchiuas maj okachi ueyia kuejmol?” (xikonixtajtolti Proverbios 26:20). Komo itech titanemiliaj nejin netajtanilmej, xa tikitaskej ke okachi kuali maj tiknextikan ke tiktasojtaj akin techyolkokoj uan maj tiktapojpoluikan.

19. ¿Toni tikixtaliaj tikchiuaskej?

¹⁹ Itaixpantijkauan Jehová kinextiaj ke yekmelauj imomachtijkauan Jesús keman motasojtaj se iuan okse. Uan tisejsemej no tiknextiaj nejon komo tikintasojtaj tokniuan maski mopoloskej. Komo ijkon tikchiuaj, oksekin uelis kiitaskej katiyejua taneltokalis tein melauak uan kinekiskej no kiueyichiuaskej Jehová, Dios akin tetasojta. Yejua ika, maj tikixtalikan tiksentokaskej titetasojtaskej kemej akin yekmelauj kichiuaj kemej Cristo.