1, 2. 1) ¿Toni tikitaj keman aksa moauia? 2) ¿Toni tikitaskej itech nejin tamachtilis?

 ¿KEMANSA tikonitani akin moauitij? Keman kinankiliaj ome netajtanilmej achto ke moauiskej, mokaki ke kichiuaj ika nochi ininyolo. Ininchankauan uan inintasojikniuan semi yolpakij. Uan keman kisaj den at moita ke semi yolpakij, uan mokaki keniuj nochin momataxkalouaj. Sejse semana tel miakej motemaktiaj iuan Jehová uan moauiaj. Ijkon mochiuaj itaixpantijkauan.

² Komo tikonnemilijtok tionmoauis, kemej yeskia tionmilini itech nejin taltikpak kampa mochiua tein amo kuali porin ‘tikontemojtok Jehová’ (Sal. 14:1, 2). Nejin tamachtilis moijkuiloj para nochin, hasta akin telpochmej oso xiuejkejya. Axkan tikitaskej sayoj eyi taman tein kinextia keyej moneki tiktekitiliskej Jehová. Uan akin timoauijkejya techpaleuis maj okachi tiknekikan tiktekitiliskej nochipaya.

3. ¿Keyej tiitekitikauan Jehová tiktasojtaj tein melauak uan tein kuali yetok? (Salmo 119:128, 163).

³ Jehová kinnauatia itekitikauan: “Xiktasojtakan tein melauak” (Zac. 8:19). Uan Jesús kijtoj ke moneki tiktemoskej maj mochiua tein kuali yetok (Mat. 5:6). Nejin kijtosneki ke moneki semi tiknekiskej tikchiuaskej tein Dios kiita ke kuali, melauak uan tein chipauak. ¿Tikonuelita maj mochiua tein melauak uan tein kuali yetok? Tikmatij ke kemaj, yejua ika amo tikonuelita tiontakajkayauas nion tikonchiuas tein amo kuali (xikonixtajtolti Salmo 119:128, 163). Akin takajkayauaj kichiuaj kemej Satanás, akin taixyekana nikan taltikpak (Juan 8:44; 12:31). Yejua kitemoua maj amo kuali kiitakan Jehová. Peuak kitakajkayauilia  Dios desde keman taixnamikik ompa Edén, kijtouilia Jehová ke amo kuali taixyekana, amo ininka tanemilia oksekin, ke techkajkayaua uan amo techmaka tein kuali (Gén. 3:1, 4, 5). Kemej Satanás kitakajkayauiliani, miakej amo kuali kiitajok Jehová. Satanás uelis kinchiualtis nochi taman tein tel amo kuali akin amo kinekij kichiuaskej tein kuali (Rom. 1:25-31).

4. ¿Keniuj kinextiani Jehová ke yejua Dios “akin kijtoua tein melauak”? (No xikonita taixkopin).

⁴ Jehová yejua Dios “akin kijtoua tein melauak”, uan kinmachtia tein melauak akin kitasojtaj (Sal. 31:5). Ijkon Satanás amo ueliok kinkajkayaua. Uan no, Jehová kinmachtia itekitikauan maj amo takajkayauakan uan maj kichiuakan tein kuali yetok, nejon kinpaleuia maj kuali momachilikan uan maj yolseujtokan (Prov. 13:5, 6). ¿Tikonitani ke Jehová ijkon mitsonpaleuiani desde ke peuak tionmomachtia Biblia? Tionmomachtijya ke amo akin ueli techixyekana kemej Jehová (Sal. 77:13). Yejua ika tikonneki tikontakamatis itanauatiluan (Mat. 6:33). Uan no tikonneki tikonnextis ke nochi tein Satanás kijtouiliani Dios amo melauak. ¿Keniuj uelis tikonchiuas?

5. ¿Toni moneki tikonchiuas para tikonnextis ke tikontemoua maj mochiua tein melauak uan tein kuali yetok?

⁵ Tein tikonchiuas kinextis ke amo tikonselia tein Satanás takajkayaua uan ke tikontemoua maj mochiua tein melauak, ke tionmokaua maj Jehová mitsonixyekana uan tikonneki tikontakamatis itanauatiluan. Yejua ika, xikontataujti Jehová uan iuan xionmotenkaua ke tikontekitilis nochipaya. Satepan moneki tionmoauis para tikonnextis senteixtenoj ke tionmotemaktijya iuan. Komo tikontemoua maj mochiua tein melauak uan tein kuali yetok mitsonpaleuis xikonixtali tionmoauis.

6. Kemej kijtoua Salmo 45:4, ¿keyej tiktasojtaj Jesucristo?

⁶ ¿Keyej tikontasojta Jesucristo? Tikajsij seki taman itech Salmo 45:4 (xikonixtajtolti). Jesús kineki maj tiyolyemankej, maj mochiua tein melauak uan tein kuali yetok. Yejua ika komo tejuatsin no tikonneki maj mochiua nejin, kijtosneki ke tikontasojta Jesús. Xikonnemili keniuj Jesús kinextij ke katka yolchikauak  keman kitemoj maj mochiua tein melauak uan tein kuali yetok (Juan 18:37). ¿Keniuj Jesús techpaleuia maj tiyolyemankej?

7. ¿Toni tein kichiua Jesús porin yolyemanik okachi tikonuelita?

⁷ Jesús techpaleuia maj tiyolyemankej ika tein kichiuak uan tein kijtoj. Yejua nochipa kiueyitalia iTajtsin uan amo keman kitemoua maj yejua kiueyitalikan (Mar. 10:17, 18; Juan 5:19). ¿Toni tikonmachilia keman tikonita ke Jesús yolyemanik? ¿Melauj ke tikonneki okachi tikontasojtas iKonetsin Dios uan tikonchiuas kemej yejua? ¿Uan keyej Jesús semi yolyemanik? Porin Jehová yolyemanik uan kemej Jesús kitasojta iTajtsin, no kinextia tein yejuatsin kinextia (Sal. 18:35; Heb. 1:3). ¿Melauj ke nejin kichiua okachi xionmotoki iuan Jesús?

8. ¿Keyej semi tikuelitaj maj Jesús toTekiuaj?

⁸ Semi tikuelitaj maj Jesús toTekiuaj porin kuali taixyekana. Jehová kimachtij uan kiixtalij maj taixyekana (Is. 50:4, 5). Xikonnemili keniuj Jesús kinextij ke semi techtasojta (Juan 13:1). Kemej Jesús yejua toTekiuaj, kinamiki maj tiktasojtakan. Yejua kijtoj ke akin yekmelauj kitasojtaj, kitakamatij tein tanauatij (Juan 14:15; 15:14, 15). ¡Se ueyi tatiochiualis maj kuali timouikakan iuan iKonetsin Jehová!

9. ¿Toni amo mopata kemej Jesús moauij uan kemej moauiaj itatojtokakauan?

⁹ Se taman tein Jesús kinnauatij itatojtokakauan yejua maj moauikan (Mat. 28:19, 20). Yejua ijkon kichiuak. Maski tepitsin taman kemej Jesús moauij uan kemej moauiaj imomachtijkauan, onkak seki taman tein amo mopata (xikonita recuadro “ Keniuj mopata keman Jesús moauij uan keman moauiaj itatojtokakauan”). Keman Jesús moauij kinextij ke motemakaya kichiuas tein iTajtsin kinekia (Heb. 10:7). No ijkon panoua iniuan itatojtokakauan. Keman moauiaj, senteixtenoj kinextiaj ke motemaktijkejya iuan Jehová uan ke itech nejon tonal peuas kichiuaskej tein yejuatsin kineki uan amo tein yejuan kinekij. Ijkon, kichiuaj kemej kinnextilij inintamachtijkauj.

10. ¿Keyej tikontasojta Jesús, uan toni moneki tikonchiuas?

¹⁰ Tejuatsin tikonneltoka ke Jesús yejua yojtsin iKoneuj Jehová uan Tekiuaj akin Dios kiixtalij maj techixyekana. Tikonmati ke Jesús yolyemanik uan kichiua kemej iTajtsin. Tionmomachtiani ke kintamakak akin mayamikiaj, kinyolchikauak akin tayokoyayaj uan hasta kinpajtij akin mokokouayaj (Mat. 14:14-21). No tikonitani ke yejua kiixyekana inechikol Dios itech nejin tonalmej (Mat. 23:10). Uan tikonmati ke kemej yejua Tekiuaj itech iTaixyekanalis Dios, amo uejkaua techmakas miak taman tein kuali. ¿Keniuj uelis tikonnextis ke tikontasojta Jesús? Komo tikonchiua kemej yejua (Juan 14:21). Uan uelis peuas tikonchiuas komo tionmotemaktia iuan Jehová uan tionmoauia.

11. ¿Toni techpaleuis maj tiknekikan timoauiskej, uan keyej?

¹¹ Keman Jesús ika tajtoj tanauatil tein okachi tayekantok, kinextij toni techpaleuis maj tiknekikan timoauiskej. Kijtoj: “Xiktasojta moDios Jehová ika nochi moyolo, ika nochi monemilis, ika nochi motanemilil uan ika nochi mochikaualis” (Mar. 12:30). ¿Ijkon tikontasojta Dios?

12. ¿Keyej tikontasojta Jehová? (No xikonita taixkopimej).

¹² Onkak miak taman tein kichiua maj tiktasojtakan Jehová. Tionmomachtiani  ke Jehová ‘kichiua maj tiyoltokan’ uan techmaka “nochi tatiochiualismej tein kuali uan tein amo teyi kinpoloua” (Sal. 36:9; Sant. 1:17). Nochi tein kuali tein tikonpia Jehová mitsonmakani, porin kiuelita kitemakas teisa uan semi tetasojta.

13. ¿Keyej se kualtsin netetayokolil maj Jehová kitemakani Jesús para techmakixtis?

¹³ Jehová techmakak se kualtsin netetayokolil porin kitemakak Jesús para techmakixtis. ¿Keyej ijkon tikijtouaj? Maj tiknemilikan keniuj Jehová uan iKonetsin semi motasojtaj. Jesús kijtoj: “NoTajtsin nechtasojta” uan “Niktasojta noTajtsin” (Juan 10:17; 14:31). Kemej tel miak xiujmej senyetoyaj ompa iluikak, semi kuali mouikayaj (Prov. 8:22, 23, 30). Xikonnemili keniuj Jehová semi kiyolkokoj keman kikauak maj iKonetsin tajyouiani uan maj momikiliani. Sayoj ke, Jehová kitemakak iKonetsin maj toka momikili para uelis tinemiskej nochipaya porin kintasojta nochin uan tejuatsin no (Juan 3:16; Gál. 2:20). Yejua nejin tein okachi kichiua maj tiktasojtakan Dios.

14. ¿Toni tein okachi kuali uelis tikonixtalis tikonchiuas?

¹⁴ Tejuatsin okachi tikontasojta Jehová porin okachi tikonixmattiuj. Xa tikonnejneki okachi iuan tionmouikas axkan uan nochipaya, uan uelis tikonchiuas. Uelis  tikonyolpaktis ika tein tikonijtos uan ika tein tikonchiuas, Jehová mitsonyolchikaua xikonyolpakti (Prov. 23:15, 16). Tein tikonixtalis itech monemilis kinextis ox yekmelauj tikontasojta Jehová (1 Juan 5:3). Amo onkak okse taman tein okachi kuali ke tikonyolpaktis yejuatsin.

15. ¿Keniuj uelis tikonnextis ke tikontasojta Jehová?

¹⁵ ¿Keniuj uelis tikonnextis ke tikontasojta Jehová, akin yekmelauj Dios? Yekinika, xikontataujti uan xikonilui ke iuan tionmotemaktia (Sal. 40:8). Satepan moneki tionmoauis, ijkon tikonnextis senteixtenoj ke tionmotemaktijya. Kampa peua nejin tamachtilis tikitakej ke keman timoauiaj semi tiyolpakij uan mopata tonemilis. Ijkuak peua tikchiuaj sayoj tein kiyolpaktia Jehová uan amo tein tejuan tiknejnekij (Rom. 14:8; 1 Ped. 4:1, 2). Xa tikonnemilis ke ouij tikonchiuas nejon, sayoj ke amo nenkaj porin mitsonpaleuis okachi kuali xionnemi. Maj tikitakan keyej ijkon tikijtouaj.

16. Ijkon kemej kijtoua Salmo 41:12, ¿toni kinmakas Jehová akin kitekitiliaj?

¹⁶ Amo akin semi kiuelita kitemakas teisa kemej Jehová. Uan tein tikonmakas, yeski miak oso amo, yejuatsin nochipa mitsonmakas okachi (Mar. 10:29, 30). Maski tinemij kampa mochiujtok tein amo kuali, Jehová mitsonpaleuis kualtsin xionnemi, xionyolpaki uan kuali xionmomachili. Uan amo sayoj nejon. Satepan ke tionmoauis uelis peuas tikonchiuas okseki taman, uan amo keman tikonkauas tikontekitilis moTajtsin. Ijkon kemej panotias xiujmej, Jehová okachi mitsontasojtas uan tejuatsin no, uan ijkon kemej yejuatsin, uelis tionnemis nochipaya (xikonixtajtolti Salmo 41:12).

17. ¿Toni se taman tein Jehová amo kipia uan tejuatsin uelis tikonmakas?

¹⁷ Keman tionmotemaktia uan tionmoauia, ueli tikonmaka Jehová teisa tein kitelpia ipatiuj. Jehová mitsonmakani nochi tein kuali tein tikonpia uan nochi tein kichiua xionyolpaki. Uan tejuatsin uelis  nochipa tikontekitilis uan amo keman tikonkauas akin iaxka iluikak uan taltikpak, nejin se taman tein ayamo kipia (Job 1:8; 41:11; Prov. 27:11). Yejua tein okachi kuali tein uelis tikonixtalis tikonchiuas. Tikontasojtas Jehová kichiuas xikonneki tionmoauis.

18. ¿Toni uelis tionmotajtanis?

¹⁸ Ika nochi tein tikitakejya, ¿tikonixtalijya tionmoauis? Sayoj tejuatsin uelis tiontanankilis. Uelis mitsonpaleuis komo tionmotajtania: “¿Toni nechtsakuilia maj nimoaui?” (Hech. 8:36). Xikonelnamiki eyi taman tein tikitakej tein uelis mitsonpaleuis xionmoaui. Yekinika, komo tikontasojta tein melauak uan tein kuali yetok. Xionmotajtani: “¿Nikneki nikitas tonal keman amo akinok takajkayauas uan mochiuasya tein kuali?”. Ojpatika, komo tikontasojta Jesucristo. Xionmotajtani: “¿Nikneki maj iKoneuj Dios mochiua noTekiuaj uan nikneki nikchiuas kemej yejua?”. Expatika uan tein okachi moneki, komo tikontasojta Jehová. Xionmotajtani: “¿Nikneki niktekitilis Jehová uan nikyolpaktis?”. Komo nochi netajtanilmej tikonnankilij ke kemaj, ¿keyej amo tionmoauia? ¿Toni mitsontsakuilia? (Hech. 16:33).

19. ¿Keyej amo moneki tikonnemilijtos ox tionmoauis? Xikonijto se neskayot (Juan 4:34).

¹⁹ Komo ayamo tikonmati ox tionmoauis, itech xiontanemili tein kijtoj Jesús (xikonixtajtolti Juan 4:34). Yejua kijtoj ke katka kemej yeskia itakual keman kichiuaya tein iTajtsin kinekia. ¿Keyej? Porin takual tepaleuia. Jesús kimatia ke nochi tein Jehová technauatia techpaleuia. Jehová amo keman techiluia maj tikchiuakan teisa tein uelis techijtakos. ¿Uan toni kineki xikonchiua? Kineki xionmoaui (Hech. 2:38). Yejua ika, komo tikontakamati uan tionmoauia semi mitsonpaleuis. Komo mitsonmakaskiaj se takual tein okachi uelik, ¿melauj ke amo tikonnemilijtoskia ox tikonkuas? No ijkon amo xikonnemilijto ox tionmoauis, ta xikonchiua.

20. ¿Toni tikitaskej itech okse tamachtilis?

²⁰ ¿Keyej sekin amo moauianij? Xa kinemiliaj ke ayamo uelis kichiuaskej. Keman tikonixtalia tionmotemaktis iuan Jehová uan tionmoauis, tikonchiua se taman tein semi moneki itech monemilis. Yejua ika, kuali xikonnemili uan xionmochikaua tikonchiuas tein moneki. Uan komo tikonneki tionmoauis, ¿toni mitsonpaleuis xikonchiua? Tikitaskej itech okse tamachtilis.