¿Keyej “takatsin” kijtoj ke komo iuan monamiktiaya Rut ‘tapoloskia’? (Rut 4:1, 6).

Ne uejkauj, komo se takat akin monamiktijka momikiliaya uan amo kinpiaya konemej, monekia moitas toni mochiuaskia ika seki taman. ¿Akoni mokauiliskia italuan? ¿Amo keman kielnamikiskiajok itokay? Nochi nejin moitaya itech iTanauatil Moisés.

Komo se takat momikiliaya oso kinamakaya italuan porin katka pobre, se iikniuj oso se ichankauj uelia kikouiliaya. Ijkon, talmej kisentokaskia yeskia ininaxka ichankauan (Lev. 25:23-28; Núm. 27:8-11).

¿Toni mochiuaya para maj itokay akin momikiliaya amo ixpoliuini? Se iikniuj monamiktiaya iuan akin katka isiuatsin para kipias se konetsin akin motokaytiskia kemej akin momikilijka uan kiseliskia talmej tein katka iaxka. Nejin tanauatil kipaleuiaya siuat akin mokauaya iselti, ijkon kemej kipanok Rut (Deut. 25:5-7; Mat. 22:23-28).

Maj ika titajtokan tein kipanok Noemí. Yejua monamiktijka iuan Elimélec. Sayoj ke, keman yejua uan ome iokichpipiluan momikilijkej, amo moajsia okse takat akin ueliskia kiyekpias (Rut 1:1-5). Keman Noemí mokepak Judá, kiluij isiuamon Rut maj kiluiani Boaz maj kikouani italuan. Boaz katka semej ichankauan Elimélec (Rut 2:1, 19, 20; 3:1-4). Sayoj ke Boaz kimatia ke moajsia okse takat akin katka okachi ichankauj Elimélec uan yejua akin ueliskia yekinika takouas. Biblia kinotsa “takatsin” (Rut 3:9, 12, 13).

Yekinika, nejon takat kijtoj ke kikouaskia nejon talmej (Rut 4:1-4). Maski kimatia ke patiyoj yeskia, no kimatia ke Noemí xiuejya katka uan amo ueliskiaok kipias se konetsin akin mokauiliskia tein iaxka katka Elimélec. Nejon talmej no moaxkatiliskia nejon takat. Yejua ika moitaya ke amo nenkaj yeskia.

Sayoj ke, keman takat kimatik ke monekia monamiktis iuan Rut, kiixtalij amo kikouasok. Yejua kijtoj: “Amo uelis nikouas, porin nitapoloua” (Rut 4:5, 6). ¿Keyej amo kinekikok kikouas?

Komo nejon takat oso okse ichankauj monamiktiaya iuan Rut uan kipiaskia se konetsin, yejua konetsin imako panoskia talmej tein katka iaxka Elimélec. ¿Keniuj nejon kichiuaskia maj takat ‘tapolouani’? Biblia amo kijtoua, sayoj ke maj tikitakan seki taman tein ueliskia panos.

• Yekinika, takat xa kinemilij ke kipoloskia miak tomin porin italuan Elimélec imako panoskia ikonetsin Rut, amo yejua imako.

• Ojpatika, monekia kintekipanos Noemí uan Rut.

• Expatika, komo Rut kinpiaskia okseki konemej iuan nejon takat, no monekiskia kinxejxeluiskej talmej iniuan okseki ikoneuan takat.

• Naujpatika, komo nejon takat amo kinpiaya okseki konemej, konetsin tein kipiaskia iuan Rut imako mokauaskia italuan Elimélec uan no tein kipiaya nejon takat. Italuan takat imako mokauaskia se okichpil akin kichiuaskia maj amo ixpoliui itokay Elimélec, sayoj ke itokay nejon takat ixpoliuiskia. Yejua amo kinekik kipolos italuan para kipaleuis Noemí. Okachi kuali kikauilij Boaz, akin yeskia ojpatika takoujkej. Boaz kinekik kikouas porin kinekia maj tein iaxka katka takat akin momikilijka, ininaxkatini “ikoneuan” (Rut 4:10).

Nejon takat amo kinekia maj ixpoliuini itokay uan tein kipiaya. ¡Sayoj itech tanemiliaya! Maski ijkon nochi tein kichiuak amo tapaleuij, porin itokay ipa ixpoliuik. Uan amo kiselij tatiochiualis tein Boaz kiselij: maj itokay ixnesini iniuan iuejkaujtatuan Mesías, Jesucristo (Mat. 1:5; Luc. 3:23, 32). Nejon takat kipoloj nochi porin sayoj itech tanemilij uan amo kinekik kipaleuis akin semi kipolouaya.