1, 2. Komo ayamo ueli tionmoauia, ¿keyej amo moneki tionmosenkauas? (Xikonita taixkopimej ipeujyan amaix).

 SEMI kuali komo tejuatsin tikonixtalijya tionmoauis. Sayoj ke, ¿uelisya tikonchiuas? Komo tikonnemilia ke kemaj uan tayekananij no ijkon kinemiliaj, niman xionmoaui. Ijkon semi tionyolpakis porin tikontekitilis Jehová.

² Sayoj ke, ¿komo mitsoniluiaj ke ayamo uelis tionmoauis? ¿Oso komo tejuatsin tikonnemilia ke ayamo uelis? Amo xionmosenkaua. Xionmochikaua tikonchiuas tein moneki para uelis tionmoauis, maski titelpochok oso tionxiuejya.

3. ¿Toni kijtoj ueyichiujkej de Etiopía, uan toni uelis timotajtaniskej? (Hechos 8:36, 38).

³ (Xikonixtajtolti Hechos 8:36, 38). Se ueyichiujkej akin kayot Etiopía kiluij Felipe akin kiteixmatiltiaya kuali tanauatilmej: “¿Toni nechtsakuilia maj nimoaui?”. Yejua kinekia moauis. Sayoj ke, ¿ueliskiaya kichiuas?

4. ¿Keniuj kinextij takat akin kayot Etiopía ke kinekia kimatis okachi?

⁴ Nejon takat akin kayot Etiopía “yajka Jerusalén kiueyichiuato Dios” (Hech. 8:27). Nesi ke yejua kiselijkaya inintaneltokalis judíos. Kiixmatia seki taman de Jehová porin momachtiaya Escrituras Hebreas, sayoj ke kinekia kimatis okachi. Tikmatij nejon porin keman Felipe kiajsito itech ojti, kiixtajtoltijtiaya amatajkuilol Isaías (Hech. 8:28). Ompa moajsi seki tamachtilis tein okachi ouij. Nejon takat kinekia kisentokas kimatis okachi ke tein kimatiaya.

5. ¿Toni kichiuak takat akin kayot Etiopía ika tein momachtij?

⁵ Takat ueyichiujkej akin kayot Etiopía kipiaya ueyi tanauatil. Yejua kitekitiliaya siuat akin tekiuajtia Etiopía akin kiluiayaj Candace uan “kiyekpiaya nochi itomin” (Hech. 8:27). Moajsikamati ke kipiaya miak tekit uan amo semi kipiaya tiempo. Sayoj ke kiixtalij kiueyichiuas Jehová. Amo sayoj momachtiaya tein melauak, ta tein momachtiaya kioliniaya maj kichiua tein monekia. Desde Etiopía yajka hasta Jerusalén para kiueyichiuas Jehová itech templo. Kinekia ompa taueyichiuatiuj maski uejka katka uan monekia miak tomin.

6, 7. ¿Toni kichiuak ueyichiujkej de Etiopía para okachi kitasojtas Jehová?

⁶ Felipe peuak kimelauilia nejon ueyichiujkej seki tamachtilismej tein tayekantokej, semej yejua ke Jesús katka Mesías (Hech. 8:34, 35). Xa nejon ueyichiujkej semi yolpakik keman kimatik nochi tein Jesús kichiuak para ueliskia kimakixtis. ¿Toni kichiuak keman kiajsikamatik nochi nejon? Ueliskia amo teyi kichiuasok uan kisentokas itech inintaneltokalis judíos. Sayoj ke kemej peuak okachi kitasojta Jehová uan iKonetsin Jesús, kinekik moauis uan mochiuas imomachtijkauj. Felipe kiitak ke ueliskiaya moauis uan yejua kiauij.

⁷ Tein kichiuak takat akin kayot Etiopía mitsonpaleuis xikonchiua tein moneki para uelis tionmoauis. Ijkon kemej nejon takat, no uelis tikonijtos: “¿Toni nechtsakuilia maj nimoaui?”. Tikitaskej keniuj no uelis ijkon tikonchiuas: komo tikonsentoka tionmomachtia, tikonchiua tein tionmomachtia uan okachi tikontasojta Jehová.

8. Kemej kijtoua Juan 17:3, ¿toni moneki tikonchiuas?

⁸ (Xikonixtajtolti Juan 17:3 uan nota). ¿Mitsonyolchikaua xikonnejneki tionmomachtis Biblia tein Jesús kijtoj? Miakej no kinyolchikaua. Sayoj ke, nejin tajtolmej no techyolchikaua maj tiksentokakan timomachtikan porin amo keman uelis tiktamiixmatiskej Jehová, akin yekmelauj Dios (Ecl. 3:11). Nochipa tiksentokaskej timomachtiskej keniuj tamati yejuatsin. Ijkon kemej okachi tikixmatiskej Jehová, okachi timotokiskej iuan (Sal. 73:28).

9. ¿Toni moneki tikchiuaskej satepan ke tikixmatiskejya tein yekinika timomachtijkej itech Biblia?

⁹ Keman peua timomachtiaj, peua tikixmatij sayoj seki taman tein Biblia  tamachtia, keman Pablo kintajkuilouilij tokniuan hebreos, kijtoj ke nejon yejua ‘tein yekinika timomachtijkej itech itajtol Dios’. Yejua amo kijtosnekik ke tein “yekinika timomachtijkej” amo semi moneki, ta kijtoj ke katka kemej leche tein ika moskaltia se konetsin (Heb. 5:12; 6:1). Sayoj ke Pablo no kinyolchikauak nejon tokniuan maj kitemouanij kiajsikamatiskej okseki tamachtilismej tein ouijkej tein kipia iTajtol Dios. ¿Tejuatsin no tikonnejneki tikonajsikamatis nejon tamachtilismej? ¿Tikonneki tionmochikauas tionmomachtis de Jehová uan tein kiixtalijtok kichiuas?

10. ¿Keyej sekin semi kinouijmaka momachtiskej?

¹⁰ Sekin semi kinouijmaka momachtiskej. ¿Uan tejuatsin? ¿Mitsonnextilijkej kaltamachtiloyan keniuj tiontaixtajtoltis uan tionmomachtis? ¿Tikonuelitaya oso tikonitak ke semi ouij tionmomachtis? Komo ijkon, amo sayoj tejuatsin ijkon mitsonpanok. Sayoj ke Jehová uelis mitsonpaleuis, yejuatsin amo tajtakolej uan okachi kuali tamachtia.

11. ¿Keyej Jehová ‘toUeyi Tamachtijkauj’?

¹¹ Jehová kijtoua ke yejua ‘toUeyi Tamachtijkauj’ (Is. 30:20, 21). Keman tamachtia amo yolijsiui, kualtakat, teajsikamati uan nochipa kiita tein kuali tein kichiuaj akin kinmachtia (Sal. 130:3). Amo keman techtajtania maj tikchiuakan tein amo tiueliskej. Maj tikelnamikikan ke yejuatsin kichijchiuak totsontekon, se kualtsin netetayokolil (Sal. 139:14). Uan no, techchijchiuak kemej tiknekiskej timomachtiskej miak taman, kineki maj tiksentokakan timomachtikan uan maj techyolpakti. Yejua ika desde axkan moneki ‘tiktelnejnekiskej’ okachi timomachtiskej iTajtol Dios (1 Ped. 2:2). ¿Toni uelis mitsonpaleuis? Xionmomachti uan xikonixtajtolti Biblia mojmostaj uan xikonixtali seki taman tein uelis tikonchiuas (Jos. 1:8). Jehová mitsonpaleuis maj mitsonyolpakti tikonixtajtoltis Biblia uan okachi tikonixmatis.

12. ¿Keyej moneki timomachtiskej tein kichiuak Jesús uan keniuj kitekitilij Dios?

¹² Xikonxelo tiempo para itech tiontanemilis tein kichiuak Jesús uan keniuj kitekitilij Dios. Kemej tinemij itech nejin tonalmej tein semi ouijkej, semi moneki maj tikchiuakan kemej Jesús para uelis tiktekitiliskej Jehová (1 Ped. 2:21). Jesús kinyekiluij imomachtijkauan ke kipiaskiaj miak ouijkayomej (Luc. 14:27, 28). Sayoj ke kimatia ke ijkon kemej yejua, amo kikauaskiaj Jehová (Juan 16:33). Xionmomachti tein kichiuak Jesús uan xikonixtali no ijkon tikonchiuas mojmostaj.

13. ¿Toni moneki tikonsentokas tikontajtanis Jehová, uan keyej?

¹³ Amo sayoj tiktemouaj tikmatiskej miak taman keman timomachtiaj, ta no tiknekij okachi tikixmatiskej Jehová, tiktasojtaskej uan iuan titakuaujtamatiskej (1 Cor. 8:1-3). Xikonsentoka okachi xikonixmati Jehová uan nochipa xikontajtani maj mitsonpaleui okachi xiontakuaujtamati (Luc. 17:5). Yejuatsin kichiuas tein tikontajtanis. Komo semi tiontakuaujtamati porin kuali tikonixmati Dios, tikonsentokas tikonchiuas tein tionmomachtia (Sant. 2:26).

14. ¿Keniuj kinextij Pedro ke semi moneki maj tikchiuakan tein timomachtiaj? (No xikonita taixkopin).

¹⁴ Tatitanil Pedro kijtoj ke semi moneki maj itatojtokakauan Cristo kichiuakan  tein momachtiaj. Uan ika tajtoj tein kichiuak Noé. Jehová kiluij Noé ke kichiuaskia maj tetsaujkakioui uan ijkon kinixpoloskia nochin akin amo yolkualmej akin nemiaj nejon tonalmej. Noé uan ichankauan amo sayoj monekia kimatiskej tein panoskia, ta no monekia kichiuaskej okseki taman para momakixtiskiaj. Keman Pedro kijtoj “keman kichijchiujtoyaj arca” ika tajtojtoya tiempo achto ke ualaskia Tetsaujkakiouit (1 Ped. 3:20). Noé uan ichankauan kichiujkej ijkon kemej Jehová kinnauatij uan kichijchiujkej se ueyi arca (Heb. 11:7). Satepan, Pedro kijtoj ke tein kichiuak Noé tamati kemej ijkuak timoauiaj. Kijtoj: “Uelis tikijtoskej ke tein panok itech nejon tonalmej tamati kemej ijkuak se moauia. Nejon axkan namechmakixtijtok” (1 Ped. 3:21). Tein tejuatsin tikonchiujtok para uelis tionmoauis, tamati kemej tein kichiujkej miak xiujmej Noé uan ichankauan keman kichijchiujkej arca. ¿Uan toni moneki tikonchiuas para uelis tionmoauis?

15. ¿Toni kijtosneki yekmelauj se moyolpatas?

¹⁵ Yekinika taman tein moneki tikchiuaskej yejua timoyolpataskej (Hech. 2:37, 38). Keman ijkon tikchiuaj, tikpataj tein achto tikchiuayaj. ¿Tikonkauakya seki taman tein Jehová amo kiuelita, kemej auilnemilis, tachichinalis uan tajtolmej tein pitsotikej? (1 Cor. 6:9, 10; 2 Cor. 7:1; Efes. 4:29). Komo ayamo, xikonsentoka xionmochikaua tikonkauas. Komo tikonneki maj mitsonpaleuikan uan maj mitsonyolmajxitikan, xiontajto iuan akin mitsonmachtia Biblia oso iniuan tayekananij. Komo titelpochok uan tinemiok iniuan motatuan, uelis tikiniluis maj mitspaleuikan xikaua tein mitstsakuilia ximoaui.

16. ¿Toni no moneki tikchiuaskej para kuali timouikaskej iuan Dios?

¹⁶ No moneki nochipa xikonchiua tein mitsonpaleuis kuali xionmouika iuan Dios, kemej tionyas nechikolmej uan tiontanankilis (Heb. 10:24, 25). Uan keman uelisya tiontanojnotsas iniuan tokniuan, nochipa xiontanojnotsa. Komo ijkon tikonchiua, okachi tikonuelitas (2 Tim. 4:5). Komo titelpochok  uan tinemiok iniuan motatuan, ximotajtani: “¿Nochipa nechelnamiktijtokej maj niouj nechikolmej oso maj nitanojnotsati? ¿Oso nikchiua porin ijkon nikneki?”. Komo tikchiua porin ijkon tikneki, tiknextia ke titakuaujtamati iuan Jehová, ke tiktasojta uan ke tiktasojkamatilia tein moka kichiuani, uan tiknextia ke ‘tikueyichiua [...] ika nochi moyolo’, kemej yeskia tiktayokolijtok Jehová seki taman (2 Ped. 3:11; Heb. 13:15). Yejuatsin semi kiuelita maj tiktayokolikan seki taman porin tiknekij, amo porin techchikaujkauiaj (no xikonita 2 Corintios 9:7). Uan tejuan no tiyolpakij keman tikmakaj Jehová tein okachi kuali.

17, 18. ¿Toni mitsonpaleuis xionmoaui, uan keyej? (Proverbios 3:3-6).

¹⁷ Keman tikonchiujtias tein moneki para uelis tionmoauis, tikonixnamikis seki ouijkayomej. Xa sekin mitsonkejkeloskej oso hasta uelis mitsontajyouiltiskej (2 Tim. 3:12). Oso oksepa tikonchiuas seki taman tein tionmochikaujtoya tikonkauas. Oso xa tikonnemilia ke miak tamanok mitsonpoloua para uelis tionmoauis uan yejua ika tikonnemilia ke amo uelis tikonchiuas. ¿Toni mitsonpaleuis amo xionmosenkaua? Semi mitsonpaleuis komo tikontasojta Jehová.

¹⁸ Semi kualtsin ke ueli tikontasojta Jehová (xikonixtajtolti Proverbios 3:3-6). Nejin mitsonpaleuis xikonixnamiki tein yeski ouijkayot. Biblia miakpa kijtoua ke Jehová kinnextiliani itekitikauan ke nochipa kintasojta, nejin kijtosneki ke amo keman kinsenkaua (Sal. 100:5). Tejuatsin tiontamati kemej Dios tamati (Gén. 1:26). Komo ijkon, ¿keniuj uelis tiontetasojtas kemej yejuatsin?

19. ¿Keniuj uelis tikontasojkamatilis Jehová tein moka kichiuani? (Gálatas 2:20).

¹⁹ Yekinika moneki tionmotasojkamatis (1 Tes. 5:18). Mojmostaj xionmotajtani: “¿Keniuj nejin tonal Jehová nechnextilij ke nechtasojta?”. Uan satepan keman tionmotataujtis, xikontasojkamatili tein moka kichiuak. Xikonita ke Jehová moka kichiuak nejon porin mitsontasojta, ijkon kemej kiitak tatitanil Pablo (xikonixtajtolti Gálatas 2:20). Uan xionmotajtani: “¿Nikneki niknextilis Jehová ke no niktasojta?”. Komo tikontasojta, mitsonpaleuis  xiontaxiko keman mitsonyejyekoskej, xikonixnamiki kuejmolmej uan xikonsentoka xikonueyichiua Jehová. Ijkon mojmostaj tikonnextis ke tikontasojta moTajtsin.

20. ¿Toni kijtosneki se motemaktis iuan Jehová, uan keyej semi moneki?

²⁰ Ijkon kemej panos tiempo okachi tikontasojtas Jehová, uan nejon kichiuas xionmotemakti iuan itech se netataujtil. Uan keman tionmotemaktisya, tikonpias tatiochiualis tionyeski iaxka Jehová nochipaya. Keman tionmotenkaua iuan Jehová, tikoniluia ke tikontekitilis keman kuali tionyetos uan keman amo. Sayoj sepa se motemaktia iuan Jehová. Nejin amo moneki se kiauilmatis, sayoj ke tionmotemaktis iuan Dios yejua tein okachi kuali tein uelis tikonchiuas (Sal. 50:14). Satanás kitemos kichiuas amo xikontasojtaok Jehová uan amo xikontekitiliok. Sayoj ke amo xikonkaua maj kichiua tein kineki (Job 27:5). Kemej semi tikontasojta moTajtsin, mitsonpaleuis xikonchiua tein tionmotenkauak uan okachi xionmotoki iuan.

21. ¿Keyej tikijtouaj ke keman timoauiaj amo nochi ompa tami?

²¹ Satepan ke tionmotemaktisya iuan Jehová, xikontajtani tayekananij toniok uelis tikonchiuas. Sayoj ke xikonelnamiki ke amo sayoj moneki tionmoauis, ta itech nejon tonal peuas tikontekitilis Jehová nochipaya. Yejua ika, desde axkan xionmochikaua mojmostaj tikontasojtas moTajtsin. Nejon mitsonpaleuis xikonchiua tein moneki para uelis tionmoauis. Nejon tonal amo keman tikonelkauas, sayoj ke amo ompa tami. Xikonsentoka okachi xikontasojta Jehová uan iKonetsin nochipaya.