1. ¿Toni kinekij tokniuan tetatmej?

 TETATMEJ, tikmatij ke nankinekij nankinpaleuiskej namokoneuan maj kiixmatikan Jehová uan maj kitasojtakan. Sayoj ke, kemej Dios amo ueli se kiita, ¿keniuj uelis tikonpaleuis mokoneuan maj kineltokakan ke yekmelauj nemi uan maj iuan motokikan? (Sant. 4:8).

2. ¿Keniuj tetatmej uelis kinpaleuiskej ininkoneuan maj kiixmatikan Jehová?

² Se taman kemej tetatmej uelis kinpaleuiskej ininkoneuan maj motokikan iuan Jehová, yejua komo mosenmachtiaj tein kijtoua Biblia (2 Tim. 3:14-17). Biblia kinextia okse taman kemej telpochmej uelis okachi kiixmatiskej Jehová. Itech amatajkuilol Proverbios ika tajtoua keniuj se tepopaj kinojnotsa ikonetsin, uan kiyolchikaua maj nochipa kiita keniuj tamati Jehová ika tein kichijchiuak (Prov. 3:19-21). Axkan tikitaskej keniuj tetatmej uelis kikuiskej tein Jehová kichijchiuak para ika kinmachtiskej ininkoneuan keniuj tamati yejuatsin.

3. ¿Toni moneki kichiuaskej tetatmej para kinpaleuiskej ininkoneuan?

³ Biblia kijtoua: “Maski Dios amo ueli se kiita, desde keman kichijchiuak taltikpak ueli se kimati [...] ke yejua yekmelauj Dios, uan nejon ueli se kiajsikamati ika tein kichijchiuak” (Rom. 1:20). Tetatmej, ¿melauj ke nankiuelitaj nanyetoskej iniuan namokoneuan keman nankisaj nannemitij? Keman nankisaskej, xikinpaleuikan maj kiitakan ke  ‘tein Dios kichijchiuak’ kinextia keniuj tamati yejuatsin. Maj tikitakan toni uelis kinmachtis tetatmej tein kichiuak Jesús.

4. ¿Keniuj Jesús ika kinmachtij imomachtijkauan tein Dios kichijchiuak? (Lucas 12:24, 27-30).

⁴ Xikitakan keniuj Jesús ika tamachtij tein Dios kichijchiuak. Se tonal kiniluij imomachtijkauan maj kinitanij tiltik totomej uan xochimej (xikonixtajtolti Lucas 12:24, 27-30). Jesús ueliskia ika tajtos okse taman tapial oso xiuit, sayoj ke ika tajtoj se totot uan se xiujtsin tein imomachtijkauan kuali kiixmatiaj. Xa kiitayaj xochimej tein onkayaj uan tiltik totomej tein patantinemiaj, Jesús xa kinnextiliaya nejon keman ika kinnojnotsaya. ¿Uan toni kichiuak Jesús satepan ke ika tajtoj nejin? Kinnextilij imomachtijkauan ke iTajtsin kiuelita kitemakas tein kipia uan teiknelia: Jehová kinmakas tein kikuaskej uan tein motaliliskej itekitikauan akin amo kikauaj, ijkon kemej kinyekpia tiltik totomej uan xochimej ne koujtaj.

5. ¿Toni tein Jehová kichijchiuak uelis kikuiskej tetatmej para kinmachtiskej ininkoneuan de yejuatsin?

⁵ Tetatmej, ¿keniuj no uelis nantamachtiskej kemej Jesús? Xa uelis nankinojnotsaskej namokonetsin ika se taman tein Jehová kichijchiuak, kemej se xiujtsin oso se tapialtsin tein okachi nankiuelitaj. Nochipa xikmelauilikan toni techmachtia de Jehová. Satepan ueliskia nankitajtaniskej namokonetsin toni xiujtsin oso tapial okachi kiuelita, komo nankikuij tein kiyolnotsa xa okachi namechkakis keman nankinojnotsaskej de Jehová.

6. ¿Toni techmachtia tein kichiuaya imomaj Christopher?

⁶ Nejin amo kijtosneki ke tetatmej moneki semi uejkauak kitemojtoskej keniuj chijchiujtok se tapial oso se xiujtsin. Jesús amo semi kimelauak keniuj motamakaj tiltik totomej oso keniuj moskaltiaj xochimej. Xa mokonetsin kineki kuali kimatis keniuj chijchiujtok sejse taman tein onkak, sayoj ke kemansa sayoj uelis tikonijtos se taman oso tikontajtanis teisa para tikonmachtis de Jehová. Se tokniuj akin monotsa Christopher kielnamiki: “Maski nomaj amo semi kimelauaya keniuj chijchiujtok tein onkak, techpaleuiaya maj tikpatiuitakan tein kichijchiuak Dios. Keman tikitayaj tepemej techiluiaya: ‘¡Tel uejueykej tepemej uan tel kualtsitsin! ¿Melauj ke semi se kimojkaita Jehová?’. Oso keman tiayaj ueyiat techiluiaya: ‘¡Xikitakan keniuj at tel uejkapan moajkotamota! Moyekita ke Dios semi chikauak’”. Christopher kijtoua: “Nejon tein techiluiaya kichiuaya maj semi titanemilikan”.

7. ¿Keniuj uelis nankinmachtiskej namokoneuan maj itech tanemilikan tein Dios kichijchiuak?

⁷ Keman namokoneuan moskaltijtiaskej, uelis nankinmachtiskej maj itech tanemilikan tein Jehová kichijchiuak uan maj kiitakan toni kinmachtia de yejuatsin. Uelis ika tiontajtos se taman tein kichijchiuak uan tikontajtanis mokoneuan: “¿Toni namechmachtia nejin de Jehová?”. Xa tikonmojkaitas tein kijtoskej keman mitsonnankiliskej (Mat. 21:16).

8. ¿Toni ueliaj kichiuayaj israelitas ‘keman ojtokayaj’ iniuan ininkoneuan?

⁸ Israelitas kinnauatijkaj maj kinmachtikan ininkoneuan tein Jehová tanauatia ‘keman ojtokayaj’ (Deut. 11:19). Itech ojti tein panouaya Israel uelia kiitayaj  miak taman tein Jehová kichijchiuak kemej tapialmej uan xochimej, uan tetatmej israelitas kikuiaj nejon para ika kinnojnotsaskej ininkoneuan. Axkan tetatmej no uelis ijkon kichiuaskej. Maj tikitakan toni kichiuanij sekin.

9. ¿Toni mitsonmachtia Punitha uan Katya?

⁹ Se temomaj akin monotsa Punitha, akin nemi itech se ueyi xolal ompa India, kijtoua: “Keman tiouij tikinkalpanotij tochankauan akin nemij itech se xolaltsin, tikinnextiliaj tokoneuan seki taman tein kualtsin tein Jehová kichijchiuak. Nikitani ke keman amo tietokej kampa miakej takuejsouaj, nion kampa panouaj miakej carros, konemej okachi kiajsikamatij toni techmachtia tein onkak”. Tetatmej, xa namokoneuan nochipa kielnamikiskej keman namouan yetoyaj kampa takualtsinkan. Katya, se tokniuj akin nemi Moldavia, kijtoua: “Semi nikelnamiki keman niaya ninemiti iniuan notatuan. Semi nikintasojkamatilia porin desde nikonetsin nechmachtijkej maj nikita tein Jehová kichijchiuak uan maj itech nitanemili keniuj tamati yejuatsin”.

10. ¿Toni uelis kichiuaskej tetatmej komo amo ueli youij nemitij? (Xikonita recuadro “ Tein uelis kinpaleuis tetatmej”).

¹⁰ ¿Uan komo ouij namechkisa nanyaskej nannemitiuij? Amol, akin no nemi India, kijtoua: “Kampa ninemi tetatmej moneki tekitiskej miak tiempo uan para se nemitiuj semi patioj. Sayoj ke, uelis tikitaskej tein Dios kichijchiuak uan ika titajtoskej keniuj tamati yejuatsin keman tietokej kalkuako oso keman tinemitij itech se parque”. Tetatmej, komo kuali nankiitaj toni onkak kampa nanyetokej uelis nankiajsiskej miak taman tein Dios kichijchiuak tein uelis nankinnextiliskej namokoneuan (Sal. 104:24). Xa nankinitaskej  totomej, okuiltsitsin, xiujtsitsin uan okseki taman. Karina, akin nemi Alemania, kijtoua: “Nomaj semi kinuelita xochimej, yejua ika keman katka nikonetsin uan tiayaj tinemitij, nechnextiliaya xochimej tein yetoyaj ojti”. No uelis nankikuiskej miak videos uan amaixmej tein ika tajtouaj tein Dios kichijchiuak tein kikixtiani inechikol Jehová. Maski kampa yeski nannemiskej uelis nankinpaleuiskej namokoneuan maj kiitakan nochi tein onkak. Maj tikitakan seki taman tein kinextia Jehová tein ika uelis nankinnojnotsaskej namokoneuan.

11. ¿Keniuj tetatmej uelis kinpaleuiskej ininkoneuan maj kiitakan ke Jehová tetasojta?

¹¹ Uelis nankinpaleuiskej namokoneuan maj kiitakan ke Jehová tetasojta, komo ika nankinnojnotsaj keniuj tapialmej semi kualtsin kinyekpiaj ininkoneuan (Mat. 23:37). No uelis ika nantajtoskej miak taman tein Dios kichijchiuak uan tein tejuan semi tikuelitaj. Karina, akin ika titajtojkej itech okse párrafo, kijtoua: “Keman tiayaj tinejnemitij nomaj nechiluiaya maj nimoketsa uan maj nikita ke xochimej tatamamej, uan kemej semi kualtsitsin kinextia ke Jehová tetasojta. Maski panokejya xiujmej niksentoka nikita keniuj xochimej tatamamej uan tataman colores. Nochi nejon nechelnamiktia ke Jehová semi techtasojta”.

12. ¿Keniuj tetatmej uelis kinpaleuiskej ininkoneuan maj kiitakan ke Jehová tamatkej? (Salmo 139:14; no xikonita taixkopimej).

¹² Xikinpaleuikan namokoneuan maj kiitakan ke Jehová okachi tamatkej ke tejuan (Rom. 11:33). Xa uelis nankinmelauiliskej ke at mokepa mixti, pankisa uan ejekat kiuika okseko (Job 38:36, 37). No uelis nankinmelauiliskej keniuj semi kualtsin tichijchiujtokej (xikonixtajtolti Salmo 139:14). Xikonita keniuj se tepopaj akin monotsa Vladimir ijkon kichiuak. Yejua kijtoua: “Se tonal, tokonetsin uetsik de ibicicleta uan mokokoj. Seki tonalmej satepan, pajtik. Nosiuatsin uan nejua tikmelauilijkej ke Jehová kichijchiuak tocélulas kemej uelis iselti pajtis. No tikiluijkej ke nejon amo akin ueli  kichiua keman kichijchiua teisa. Kemej se carro, amo ueli iselti moyekchijchiua keman moteloua. Ijkon tokonetsin uelik kiajsikamatik ke Jehová semi tamatkej”.

13. ¿Keniuj tetatmej uelis kinpaleuiskej ininkoneuan maj kiitakan ke Jehová chikauak? (Isaías 40:26).

¹³ Jehová techyoleua maj tiajkotachiakan uan maj tiknemilikan keniuj ichikaualis kichiua maj sitalimej yetokan kampa moneki (xikonixtajtolti Isaías 40:26). Namejuan uelis nankinyolchikauaskej namokoneuan maj ajkotachiakan uan maj itech tanemilikan tein kiitaskej. Se tokniuj siuat akin kayot Taiwán kielnamiki tein kipanok keman katka siuapiltsin. Yejua kijtoua: “Se tonal, iuan nomaj tiajkej tinemitoj uan ompa timokaujkej, kemej tietoyaj uejka de ueyi xolal uan amo mixtaj katka, uelik tikinitakej miakej sitalimej. Itech nejon tonalmej nechtekipachouaya maj nikaua Jehová porin akin iniuan nimomachtiaya semi nechiluiayaj maj nikchiua tein amo kuali. Nomaj nechiluij maj itech nitanemili chikaualis tein Jehová kikuik para kinchijchiuas nochi sitalimej, uan maj nikelnamiki ke no uelis nechpaleuis maj amo nikaua. Satepan ke nikitak tein Jehová kichijchiuak, niknekik okachi nikixmatis uan nikixtalij nochipa niktekitilis”.

14. ¿Keniuj tetatmej uelis kinpaleuiskej ininkoneuan maj kiitakan ke Jehová yolpaki?

¹⁴ Tein Jehová kichijchiuak kinextia ke yejuatsin semi yolpaki. Tamatinij kiitanij ke miakej tapialmej hasta totomej uan pescados mauiltiaj (Job 40:20). Xa namokoneuan kiitanij se mistontsin kiauiltijtok se bolita de hilo oso seki itskuintsitsin mauiltiaj uan kinuetskitiani. Keman namokoneuan kinitstoskej keniuj mauiltiaj tapialmej, xikinelnamiktikan ke tiktekitiliaj se Dios akin yolpaki (1 Tim. 1:11).

15. ¿Keniuj tetatmej uelis kimatiskej toni kinemiliaj ininkoneuan? (Proverbios 20:5; no xikonita taixkopin).

¹⁵ Kemansa tetatmej ouij kinkisa maj ininkoneuan kintapouikan tein kinpanotok.  Komo no ijkon namechpanoua, ¿toni namechpaleuis xikmatikan tein kinemiliaj namokoneuan? (Xikonixtajtolti Proverbios 20:5). Seki tetatmej amo ouij kinkisa iniuan tajtoskej ininkoneuan keman ika moixpetaniaj tein Dios kichijchiuak. ¿Keyej? Porin tetatmej uan konemej amo teyi kintapololtia. Se tepopaj akin monotsa Masahiko uan nemi Taiwán, kijtoj okse taman: “Keman timoajsij itech se tepet oso itech se ueyiat, tokoneuan okachi kuali momachiliaj. Yejua ika amo ouij techkisa iniuan titajtoskej uan tikmatiskej toni kinemiliaj uan toni kimachiliaj”. Katya, akin ika titajtojkej itech párrafo 9, kijtoua: “Nomaj nechuikaya itech se parque tein semi kualtsin uan kampa taseujtoya. Keman ompa nietoya, okachi kuali nimomachiliaya nikiluis tein nechpanouaya kaltamachtiloyan oso tein nechtekipachouaya”.

16. ¿Keniuj kalyetonij uelis ika moyolpaktiskej tein Jehová kichijchiuak?

¹⁶ Tein Jehová kichijchiuak no kinpaleuia kalyetonij maj kuali momachilikan, maj moixpetanikan uan maj okachi kuali mouikakan. Biblia kijtoua ke “ixyetok tonal keman se uetskas” uan “tonal keman se mijtotis” oso se ajkotsikuinis uan se mauiltis (Ecl. 3:1, 4). Jehová kichijchiuak kampa takualtsinkan para uelis tikchiuaskej tein tikuelitaj. Miakej kalyetonij kiuelitaj moixpetanitiuij koujtaj, itech se tepet oso ueyiat. Seki konemej kiuelitaj motaloskej uan mauiltiskej itech parque, kinitaskej tapialmej mokalakiskej itech ueyiat oso itech atauit. Onkak miak taman tein Jehová kichijchiuak tein uelis ika timoixpetaniskej.

17. ¿Keyej tetatmej moneki kinpaleuiskej ininkoneuan maj yolpakikan ika tein Jehová kichijchiuak?

¹⁷ Itech yankuik taltikpak, tetatmej uan konemej semi yolpakiskej ika tein Jehová kichijchiuak. Amo tikinmouiliskejok tapialmej nion yejuan techmouiliskej (Is. 11:6-9). Tikpiaskej miak tiempo para tiyolpakiskej ika tein Jehová kichijchiuak (Sal. 22:26). Tetatmej, amo ximochiakan hasta maj ejko nejon tonal para nankinpaleuiskej namokoneuan maj kiitakan tein Dios kichijchiuak. Komo desde axkan ika nankinmachtiaj keniuj tamati yejuatsin, xa momachiliskej kemej tekiuaj David, akin kijtoj: “Amo akin kemej tejua, Jehová, uan amo akin tachijchiuani kemej tejua” (Sal. 86:8).