1, 2. ¿Toni xa timotajtaniaj?

 ¿KEMANSA tionmotajtaniani ox Jehová kinankilia tonetataujtiluan? Komo kemaj, amo sayoj tejuatsin. Miakej tokniuan no motajtanianij nejon, uan okachiok keman kipianij ouijkayomej. Komo titajyouijtokej xa ouij techkisas tikitaskej keniuj Jehová kinankilia tonetataujtiluan.

² Itech nejin tamachtilis oksepa tikitaskej keyej uelis tikneltokaskej ke Jehová kinnankilia itekitikauan keman kitataujtiaj (1 Juan 5:15). No tikitaskej keyej kemansa uelis moitas ke Jehová amo technankilia keman tiktataujtiaj, uan keniuj technankilia yejuatsin.

3. ¿Keyej Jehová kineki maj tiktataujtikan?

³ Biblia kijtoua ke Jehová semi techtasojta uan techpatiuita (Ageo 2:7; 1 Juan 4:10). Yejua ika, techyolchikaua maj tiktataujtikan uan maj tiktajtanikan maj techpaleui (1 Ped. 5:6, 7). Kineki techpaleuis para maj okachi iuan timotokikan uan maj tikxikokan nochi ouijkayomej tein tikpiaj.

4. ¿Keniuj tikmatij ke Jehová kinnankilia itekitikauan keman kitataujtiaj? (No xikonita taixkopin).

⁴ Itech Biblia, miakkan tikajsij kampa kijtoua ke Jehová kinnankilij itekitikauan keman kitataujtijkej. Xa tikelnamikij tein kipanok tekiuaj David. Itech nochi xiujmej keman nemik, miakej kitauelitayaj uan kiixnamikiaj, yejua ika nochipa kitajtaniaya Jehová maj kipaleui. Se tonal kitataujtij: “Jehová noDios, xikaki nonetataujtil;  xinechkaki keman nimitstataujtia xinechpaleui. Xinechnankili porin tejua tikchiua tein kuali yetok uan amo titekaua” (Sal. 143:1). Jehová kinankilij inetataujtiluan uan kimakixtij (1 Sam. 19:10, 18-20; 2 Sam. 5:17-25). Yejua ika, David kijtoj: “Jehová amo uejka moajsi de nochin akin kinotsaj”. Uan tejuan no uelis tikneltokaskej nejon (Sal. 145:18).

5. ¿Nochipa kinnankiliaya Jehová itekitikauan kemej kichiayaj? Xikonijto se neskayot. (No xikonita taixkopin).

⁵ Xa Jehová amo kinankilis tonetataujtiluan kemej tiknekiskiaj. Yejua nejon tein kipanok tatitanil Pablo. Yejua kijtoj ke ‘kemej yeskia kipiaya se uitsti itech inakayo’, katka se ueyi ouijkayot. Uan expa kitajtanij Dios maj kikixtili. ¿Kinankilij Jehová tein kitajtanij? Kemaj, sayoj ke amo kemej Pablo kinekia. Maski Jehová amo kiajchiuilij ouijkayot, kemaj kipaleuij maj taxiko uan maj kisentoka kitekitili (2 Cor. 12:7-10).

6. ¿Keyej kemansa uelis moitas ke Jehová amo technankilia keman tiktataujtiaj?

⁶ Kemansa Jehová xa no technankilis kemej amo tikchiaj. Sayoj ke uelis tikneltokaskej ke yejuatsin kuali kimati toni okachi techpaleuis, uan hasta “ueli kichiua okachi miak ke nochi tein tiktajtaniaj oso tiknemiliaj” (Efes. 3:20). Yejua ika, ueli technankilia keman amo tikmattokej oso keman amo tikchiaj.

7. ¿Keyej kemansa monekis tikpataskej tein tiktajtaniaj Jehová? Xikonijto se neskayot.

⁷ Xa monekis tikpataskej tein tiktajtaniaj Jehová keman tikajsikamatiskej tein yejuatsin kineki. Maj tikitakan tein kipanok tokniuj Martin Poetzinger. Tepitsin satepan ke monamiktij, kiuikakej kampa nazis tetsakuayaj uan tetajyouiltiayaj. Keman ajsik, peuak kitajtania Jehová maj kikajkauanij para iuan yetos isiuatsin uan kisentokas tanojnotsas. Panokej seki semanas uan amo moitaya maj Jehová kichiuani maj kikajkauakan. Yejua ika, tokniuj Poetzinger kitajtanij Jehová: “Jehová, xinechpaleui maj nikmati toni tikneki maj nikchiua”. Satepan peuak ininka tanemilia okseki tokniuan akin no tsaktoyaj. Miakej semi ininka motekipachojtoyaj ininsiuatsin uan ininkoneuan. Yejua ika, tokniuj Poetzinger kiluij Jehová:  “Jehová, nimitstasojkamatilia porin tinechmakak se tekit. Xinechpaleui maj nikinyolchikaua nokniuan”. Uan yejua nejon tein kichiuak itech chiknaui xiujmej keman tsaktoya.

8. ¿Toni semi moneki maj tikelnamikikan keman timotataujtiaj?

⁸ Moneki tikelnamikiskej ke Jehová kichiuas tein kineki keman yejuatsin kiixtalijtok. Kiixtalijtok kiixpolos nochi ouijkayomej tein techtajyouiltiaj, kemej tetsaujmej, kokolismej uan mikilis. Ika iTaixyekanalis Jehová, kichiuas tein motenkaua (Dan. 2:44; Apoc. 21:3, 4). Sayoj ke kemej ayamo kichiua, kikaujtokok maj Satanás taixyekana nikan taltikpak (Juan 12:31; Apoc. 12:9). b Komo Jehová kiixpoloskia nochi ouijkayomej tein tikpiaj, moitaskia ke Satanás kuali taixyekantok. Uan maski moneki timochiaskej maj Jehová kichiua tein motenkaua, amo kijtosneki ke amo techpaleuia. Maj tikitakan seki taman tein yejuatsin toka kichiua.

9. ¿Keniuj techpaleuia Jehová keman moneki titaixpejpenaskej? Xikonijto se neskayot.

⁹ Techpaleuia maj timochiuakan titamatinij. Jehová motenkaua ke techpaleuis maj timochiuakan titamatinij para kuali titaixpejpenaskej. Uan okachi moneki maj tiktataujtikan maj techpaleui maj titamatinij keman monekis tikixpejpenaskej seki taman, kemej ox timonamiktiskej oso amo (Sant. 1:5). Maj tikitakan tein kipanok se tokniuj akin monotsa María uan amo kipia itakauj. c Keman katka precursora kiixmatik se tokniuj takat. Yejua kijtoua: “Keman okachi kuali timouikayaj okachi timoueuelitayaj. Nikmattoya ke monekia nikixejekos toni nikchiuas. Yejua ika uejkauak niktataujtij Jehová uan niktapouij tein panotoya. Niknekia maj nechixyekana, sayoj ke no nikmatia ke nejua monekia nikixpejpenas toni nikchiuas”. María kiitak ke Jehová kinankilij inetataujtil uan kipaleuij maj mochiua tamatkej. ¿Keniuj kichiuak? Yejua kitemoj tamachtilis itech toamaixuan, uan tein kiajsik kinankiliaya tein motajtaniaya. Uan tein kiyolmajxitij imomaj akin no kitekitilia Jehová, kipaleuij maj kiita tein yekmelauj kimachiliaya. Ijkon María kuali taixpejpenak.

10. Kemej kijtoua Filipenses 4:13, ¿keniuj Jehová kinpaleuia itekitikauan? Xikonijto se neskayot. (No xikonita taixkopin).

¹⁰ Techpaleuia maj titaxikokan. Ijkon kemej Jehová kipaleuij tatitanil Pablo,  tejuan no techpaleuis maj tikxikokan ouijkayomej (xikonixtajtolti Filipenses 4:13). Maj tikitakan keniuj Jehová kipaleuij se tokniuj takat akin monotsa Benjamin. Desde telpoch miak xiujmej yetoya iniuan ichankauan kampa motepalotiaj ompa África. Yejua kijtoua: “Nochipa niktataujtiaya Jehová uan niktajtaniaya maj nechpaleui maj nikchiua tein kuali. Jehová kinankilij nonetataujtil keman kichiuak maj niyolseujto uan maj niyolchikauak para niksentokas nitanojnotsas, no nechmakak amaixmej tein nechpaleuijkej maj niksentoka kuali iuan nimouika”. No kijtoj: “Keman nikixtajtoltiaya tein kinpanok oksekin itaixpantijkauan Jehová uan keniuj yejuatsin kinpaleuiaya maj taxikokan, nechpaleuij maj amo nimosenkaua uan maj amo nikaua Jehová”.

11, 12. ¿Keniuj Jehová kinankilia tonetataujtiluan inintechkopa tokniuan? (No xikonita taixkopin).

¹¹ Kichiua maj tokniuan techpaleuikan. Youak achto ke Jesús momikiliskia, semi kitataujtij Jehová. Kitajtanij maj amo kikauani maj oksekin kinemilianij ke kiuijuikaltijka uan maj ika kitatsakuiltianij. Sayoj ke Jehová kipaleuij keman kititanilij se iikniuj Jesús, se ángel para maj kiyolchikaua (Luc. 22:42, 43). No ijkon, xa Jehová techpaleuis keman se tokniuj technotsas oso techkalpanos para techyolchikauas. Tinochin uelis tiktemoskej keniuj tikiniluiskej “tein kuali” tokniuan (Prov. 12:25).

¹² Maj tikitakan tein kipanok se tokniuj siuat akin monotsa Míriam. Seki semanas satepan ke itakatsin momikilij, yetoya ichan iselti, semi moyolkokojtoya uan tayokoxtoya. Yejua chokaya uan kinekia tajtos iuan aksa. Míriam kijtoua: “Amo nitaxikouaya niknotsas aksa, yejua ika niktataujtij Jehová. Uan keman niktataujtijtoya uan nichokatiaya, kakistiko noteléfono. Nechnotsak se tayekankej akin kuali iuan nimouikaya”. Yejua uan isiuatsin kiyolchikaujkej Míriam. Nejin tokniuj kimati ke Jehová kichiuak maj nejon tayekankej kinotsani.

13. Xikonijto se taman tein kinextia keniuj Jehová kichiua maj techpaleuikan akin amo kitekitiliaj.

 ¹³ Uelis kichiuas maj techpaleuikan akin amo kitekitiliaj (Prov. 21:1). Kemansa, Jehová kinnankilia itekitikauan keman kichiua maj kinpaleuikan akin amo kitekitiliaj. Jehová kichiuak maj tekiuaj Artajerjes kikauani Nehemías maj mokepani Jerusalén uan maj tapaleuiti maj moyekchijchiua xolal (Neh. 2:3-6). Uan axkan Jehová kichiua maj hasta akin amo itaixpantijkauan techpaleuikan keman moneki.

14. ¿Keniuj mitsonyolchikaua tein kipanok tokniuj Soo Hing? (No xikonita taixkopin).

¹⁴ Se tokniuj siuat akin monotsa Soo Hing, kiitak ke Jehová kichiuak maj tapajtijkej kipaleuiani. Keman iokichpil katka konetsin kiajxilijkej miak kokolismej itech itsontekon tein kichiua maj amo yektanemili. Uan seki xiujmej satepan panuetsik uejkapan uan semi mokokoj. Yejua ika, Soo Hing uan itakatsin kikaujkej inintekiuj para kiyekpiaskej. Nejon kichiuak maj amo kinajsiok tomin. Semi ouij tein kipanotoyaj, Soo Hing kijtoj ke amo taxikouayaok uan amo kimatiaok toni kichiuas. Yejua ika kitataujtij Jehová uan kitajtanij maj kipaleui. Tapajtijkej kitemoj keniuj kinpaleuis, ijkon uelik kiselijkej inepaleuil tekiuaj uan kiajsikej kani nemiskej kampa amo patiyoj taxtauaskiaj. Satepan Soo Hing kijtoj: “Tikitakej keniuj Jehová techpaleuij. Tikmatij ke yejuatsin ‘kikaki netataujtilmej’” (Sal. 65:2).

15. ¿Toni kipaleuij se tokniuj maj kiita ke Jehová kinankiliaya inetataujtiluan?

¹⁵ Jehová amo nochipa kinankilia tonetataujtiluan kemej tejuan tiknekiskiaj, sayoj ke tein technankilia techpaleuia maj amo tikauakan. Yejua ika moneki tikitaskej keniuj technankilia toTajtsin. Se tokniuj siuat akin monotsa Yoko kinemiliaya ke Jehová amo kinankiliaya. Sayoj ke peuak kijkuiloua nochi tein kitajtaniaya. Keman panok se tiempo, kiitak tein kijkuilojka uan kimatik ke Jehová kinankilijkaya miak taman tein kitajtanijka, hasta seki taman tein amo kielnamikiaok. Semi moneki tikxeloskej tiempo para itech titanemiliskej keniuj  yejuatsin kinankiliani tonetataujtiluan (Sal. 66:19, 20).

16. ¿Keyej moneki maj titakuaujtamatikan keman timotataujtiaj? (Hebreos 11:6).

¹⁶ Moneki titakuaujtamatiskej para tiktataujtiskej Jehová uan no para tikseliskej keman technankilis maski kemej yeski kichiuas (xikonixtajtolti Hebreos 11:6). Maj tikitakan tein kipanok Mike uan isiuatsin Chrissy, yejuan kinekiaj tapaleuiskej Betel. Mike kijtoua: “Miakpa tiktitankej amat tein se kipexontia para se tapaleuis ompa uan miakpa ika tiknojnotskej Jehová, sayoj ke amo keman techyoleujkej”. Mike uan Chrissy nochipa takuaujtamatkej ke Jehová kimatia kani okachi kuali tapaleuiskej. Kisentokakej mochikaujkej kitekitiliskej Jehová: tapaleuijkej kemej precursores regulares kampa monekiaj tanojnotsanij uan maj mochijchiuakan kalmej kampa titaueyichiuaj. Axkan takalpanouaj itech circuito. Mike kijtoua: “Jehová amo nochipa kinankiliani tonetataujtiluan kemej tiknekiskiaj, sayoj ke kemaj technankiliani uan hasta okachi kuali ke kemej tikchiayaj”.

17, 18. Kemej kijtoua Salmo 86:6, 7, ¿toni kuali tikmatij?

¹⁷ (Xikonixtajtolti Salmo 86:6, 7). David kimatia ke Jehová kikakia uan kinankiliaya inetataujtiluan. Tejuatsin no uelis tiontakuaujtamatis ke ijkon kichiua. Tein kinpanok itekitikauan Dios tein tikitakej itech nejin tamachtilis, technextilia ke Jehová uelis techpaleuis maj timochiuakan titamatinij uan maj titaxikokan. No tikitakej ke Jehová ueli kichiua maj tokniuan techpaleuikan uan hasta akin amo kitekitiliaj.

¹⁸ Maski xa Jehová amo nochipa technankilis kemej tiknekiskiaj, tikmatij ke kemaj technankilis. Techmakas tein monekis uan keman okachi monekis. Yejua ika maj tiksentokakan tiktataujtikan, maj titakuaujtamatikan ke Jehová techkaki uan technankilia, tikmatij ke yejuatsin techyekpias axkan, uan itech xochital ‘kinmakas tein kinekij nochin tein yoltokej’ (Sal. 145:16).