1. ¿Toni techyoleua Jehová maj tikchiuakan? (No xikonita taixkopimej).

 ¿AKONI uelis techpaleuis keman monekis maj techixyekanakan uan maj techyolchikauakan? Tejuan tikmatijya akoni: yejua Jehová. Yejuatsin techyoleua maj tiktataujtikan uan tikmatij nejin porin techiluia: “Nochipa xikchiujtokan netataujtil” (1 Tes. 5:17). Uelis timotataujtiskej keman tiknekiskej uan tiktajtaniskej maj techixyekana itech nochi tein tikchiuaskej (Prov. 3:5, 6). Kemej Jehová techmaka miak tiempo, techkaua maj timotataujtikan keman tiknekiskej uan amo ixyetok kanachpa uelis tikchiuaskej.

2. ¿Toni tikitaskej itech nejin tamachtilis?

² Semi tikpatiuitaj maj ueli timotataujtikan. Maski ijkon, kemej tikchiuaj miak taman, ouij techkisa tikxeloskej tiempo para titajtoskej iuan Jehová. Uan xa tiknemiliskej ke amo kuali timotataujtiaj. Sayoj ke Biblia techpaleuia maj tikmatikan keniuj uelis tikchiuaskej. Itech nejin tamachtilis tikitaskej tein technextilij Jesús uan tikmatiskej keniuj uelis tikxeloskej tiempo para timotataujtiskej. No tikitaskej ke uelis okachi kuali tikchiuaskej komo no tikijtouaj makuil taman tein semi moneki.

3. ¿Toni kimatia Jesús?

³ Jesús kimatia ke Jehová kiita ke semi moneki maj se motataujti. Miak xiujmej achto ke ualaskia nikan taltikpak yejua kiitak keniuj iTajtsin kinnankiliaya itekitikauan keman kitataujtiayaj. Jesús yetoya iuan iTajtsin keman kinankilij Ana, David, Elías uan miakejok keman kitataujtijkej ika nochi ininyolo (1 Sam. 1:10, 11, 20;  1 Rey. 19:4-6; Sal. 32:5). Yejua ika kiniluij itatitaniluan maj nochipa motataujtianij uan maj takuaujtamatinij ke Jehová kinnankiliskia (Mat. 7:7-11).

4. ¿Toni techmachtia Jesús?

⁴ Keman Jesús yetoya nikan taltikpak semi motataujtiaya, ijkon kinnextilij imomachtijkauan ke yejuan no monekia ijkon kichiuaskej. Monekik kixelos tiempo porin nochipa kichiujtoya teisa uan porin oksekin nochipa iuan yetoyaj (Mar. 6:31, 45, 46). Kualkan meuaya para yetos iselti uan tajtos iuan iTajtsin (Mar. 1:35). Uan keman monekik kiixpejpenas teisa tein motelneki kitataujtij Jehová nochi youal (Luc. 6:12, 13). Se youak achto ke Jesús momikiliskia, miakpa kitataujtij Jehová. Kimatia ke tein yaya kichiuati yejua tein okachi ouij katka, tein ika tamiskia tekit tein kichiuako nikan taltikpak (Mat. 26:39, 42, 44).

5. ¿Keniuj uelis tikchiuaskej kemej Jesús?

⁵ Tein kichiuak Jesús technextilia ke maski tikpiaskej miak taman tein moneki tikchiuaskej, moneki tikxeloskej tiempo para tiktataujtiskej Jehová. Xa monekis tikixtaliskej kemanian timotataujtiskej ijkon kemej Jesús kichiuak: ueliskia timeuaskej okachi kualkan oso tikochiskej okachi youak. Ijkon tiknextiliskej Jehová ke semi timotasojkamatij maj ueli tiktataujtikan. Se tokniuj siuat akin monotsa Lynne kielnamiki ke semi yolpakik keman momachtij ke ueliskia kinojnotsas Jehová itech netataujtil. Yejua kijtoua: “keman nimomachtij ke Jehová nechkaki keman yeski, peuak nikita kemej se tel kuali notasojikniuj uan nikixtalij okachi kuali niktataujtis”. Xa timiakej no ijkon timomachiliaj. Axkan maj tikitakan makuil taman tein no uelis tikijtoskej keman timotataujtiskej.

6. Kemej kijtoua Apocalipsis 4:10, 11, ¿toni kinamiki kiselis Jehová?

⁶ Maj tikueyitalikan Jehová. Tatitanil Juan kinitak 24 tayekananij akin kiueyichiujtoyaj Jehová ompa iluikak. Yejuan kiueyitalijtoyaj uan kiitayaj ke yejuatsin  semi chikauak uan ‘kinamiki maj kiueyitalikan uan maj kiueyichiuakan’ (xikonixtajtolti Apocalipsis 4:10, 11). Ángeles no kimatij ke moneki kiueyitaliskej uan kiueyichiuaskej Jehová. Yejuan iuan yetokej ompa iluikak uan kuali kiixmatij. Ika tein kichiua kiitaj ke kinextia kualtsitsin taman, yejua ika kinekij kiueyitaliskej (Job 38:4-7).

7. ¿Keniuj tikueyitaliaj Jehová keman tiktataujtiaj?

⁷ Tejuan no moneki tikueyitaliskej Jehová keman iuan titajtouaj. Ijkon tikchiuaj keman tikiluiaj toni tein kichiua tikuelitaj uan keyej tikpoujkaitaj. Keman tikixtajtoltiskej uan timomachtiskej Biblia, maj timochikauakan tikitaskej toni kualtsitsin taman kinextia Jehová tein okachi techyolnotsak (Job 37:23; Rom. 11:33). Satepan maj tiktapouikan keniuj timomachilijkej keman itech titanemilijkej tein kinextia. No uelis tikueyitaliskej porin techpaleuia tejuan uan nochin tokniuan. Yejuatsin nochipa kiita tein techpoloua uan techyekpia (1 Sam. 1:27; 2:1, 2).

8. ¿Toni uelis tiktasojkamatiliskej Jehová? (1 Tesalonicenses 5:18).

⁸ Maj tiktasojkamatilikan Jehová. Keman tiktataujtiaj ueli tiktasojkamatiliaj miak taman (xikonixtajtolti 1 Tesalonicenses 5:18). Maj tiktasojkamatilikan Jehová nochi tein tikpiaj, porin ualeua imako (Sant. 1:17). Xa porin techmakatok tochankauan, tonemilis, totasojikniuan, taltikpak kampa tinemij, nochi tein kichijchiuak uan tein tikchiaj. Uan no porin ueli kuali iuan timouikaj.

9. ¿Keyej kemansa ouij techkisa timotasojkamatiskej?

⁹ Xa tisejsemej moneki tiknemiliskej keyej uelis tiktasojkamatiliskej Jehová. Kemej tinemij itech tonalmej kampa amo akin motasojkamati xa ouij techkisas. Miakej sayoj itech tanemiliaj tein kinekij kipiaskej uan amo kitasojkamatij tein kipiajya. Komo no ijkon peua titanemiliaj, xa keman timotataujtiskej sayoj titajtaniskej miak taman tein tiknejnekij. Komo amo tiknekij maj techpano nejon, moneki maj tiksentokakan timochikauakan tiktasojkamatiliskej Jehová nochi tein techmakani (Luc. 6:45).

10. ¿Keniuj se tokniuj siuat semi kipaleuij motasojkamatis? (No xikonita taixkopin).

¹⁰ Komo timotasojkamatij techpaleuis maj titaxikokan keman tikpiaskej ouijkayomej. Itech amaix Tanejmachtijkej 15 de enero xiuit 2015, kijtoua tein kipanok se tokniuj siuat akin monotsa Kyung-sook. Yejua kiluijkej ke semi mokokouaya porin kipiaya cáncer itech ipulmón, kijtoj: “Semi nechijtakoj keman nikmatik ke nikpiaya nejon kokolis. Nikmachilij ke nikpoloj nochi uan nimotelmoujtij”. ¿Toni kipaleuij maj taxiko?  Yejua kijtoj ke nochipa achto ke yaskia kochitiuj, tejkoya kalkuako uan kitasojkamatiliaya Jehová ika tajtol chikauak makuil taman tein kipanoka nejon tonal. Nejon kiyolseuiaya uan kipaleuiaya maj kilui Jehová ke kitasojtaya. Keman kipanok nejon, kiitak ke Jehová kinyekpia itekitikauan keman kipiaj ouijkayomej. No kiajsikamatik ke itech tonemilis nochipa tikpiaj okachi miak taman tein kuali ke tein amo kuali. Ijkon kemej Kyung-sook, onkak miak taman tein uelis tiktasojkamatiliskej Jehová maski tikpiaskej ouijkayomej. Komo tiktasojkamatiliaj Jehová techpaleuis maj titaxikokan uan maj kuali timomachilikan.

11. ¿Keyej imomachtijkauan Jesús monekia maj yolchikaujkej?

¹¹ Maj tiktajtanikan Jehová maj amo timouikan keman titanojnotsaj. Tepitsin achto ke Jesús yaskia iluikak, kinelnamiktij imomachtijkauan ke monekia kiteixmatiltiskej “ompa Jerusalén, itech nochi Judea uan Samaria, uan itech nochi taltikpak” (Hech. 1:8; Luc. 24:46-48). Tepitsin satepan, taixyekananij judíos kinkitskijkej Pedro uan Juan, uan kinuikakej ininixpan uejueyi tamelauanij. Kinnauatijkej maj amo tanojnotsanijok uan kinmojmoujtijkej (Hech. 4:18, 21). ¿Toni kichiujkej nejon ome tatitanilmej?

12. Kemej kijtoua Hechos 4:29, 31, ¿toni kichiujkej imomachtijkauan Jesús?

¹² Keman kinmojmoujtijkej, Pedro uan Juan tanankilijkej: “Komo kuali yetok iixpan Dios tamechtakamatiskej namejuan uan amo Dios, namejuan xikitakan. Sayoj ke tejuan tiksentokaskej ika titajtoskej tein tikitanij uan tikakinij” (Hech. 4:19, 20). Keman Pedro uan Juan kinkajkaujkej, mosentilijkej iniuan okseki imomachtijkauan Jesús. Uan kisentataujtijkej Jehová maj kinpaleui maj kisentokakan kichiuakan tein yejuatsin kinekia. Kijtojkej: “Xikinpaleui motakeualuan maj amo mouikan uan maj kisentokakan kiteixmatiltikan motajtol”. Jehová kinnankilij tein kitajtanijkej (xikonixtajtolti Hechos 4:29, 31).

13. ¿Toni techmachtia tein kipanok tokniuj Jin-hyuk?

¹³ Uelis tikchiuaskej kemej imomachtijkauan Jesús keman tekiuanij technauatiskej maj amo titanojnotsakanok. Ijkon kichiuak Jin-hyuk, se tokniuj takat akin kitsakkej porin amo mochiuak soldado. Uan kinauatijkej maj kinmakani tein kinpolouaya akin semi tamouililmej katkaj akin ompa tsaktoyaj. Sayoj uelia kinnojnotsaya keman kintajtaniaya toni kinpolouaya. Uan kinauatijkaj maj amo ika kinnojnotsani Biblia. Yejua ika kitajtanij Jehová maj kiyolchikaua uan maj kipaleui maj kimati keniuj kinnojnotsaskia keman ueliskia (Hech. 5:29). Yejua kijtoua: “Jehová kinankilij nonetataujtiluan, uan nechpaleuij maj niyolchikauak uan maj nitamatkej para nikpeualtis miak nemachtilmej ika Biblia tein sayoj niuejkauaskia makuil minutos itech ininpuertas. Uan youak nikijkuilouaya cartas tein mostika nikinmakaskia akin ompa tsaktoyaj”. Ijkon kemej kichiuak Jin-hyuk, maj titakuaujtamatikan ke Jehová techpaleuis maj tikchiuakan tein technauatia uan uelis tiktajtaniskej maj amo timouikan uan maj timochiuakan titamatinij.

14. ¿Toni mitsonpaleuis xikonixnamiki ouijkayomej? (Salmo 37:3, 5).

 ¹⁴ Maj tiktataujtikan Jehová keman tikpiaskej ouijkayomej. Miakej titajyouijtokej porin momikilij se akin tiktasojtaj, techtajyouiltiaj, timokokouaj, amo kuali timomachiliaj oso tikpiaj ouijkayomej iniuan tochankauan. Uan uejueyi kokolismej tein momoyauaj uan neteuilismej kichiuaj maj okachi titajyouikan. Yejua ika xikonilui Jehová nochi tein tikonmachilia. Xikonilui tein tikonpanotok ijkon kemej tikoniluiskia se motasojikniuj. Uelis tikonmatis ke yejuatsin mitsonpaleuis (xikonixtajtolti Salmo 37:3, 5).

15. ¿Keniuj netataujtil techpaleuia maj titaxikokan keman tikpiaj ouijkayomej? Xikonijto se neskayot.

¹⁵ Komo nochipa tiktataujtiaj Jehová techpaleuis maj titaxikokan keman tikpiaskej ouijkayomej (Rom. 12:12). Jehová kimati nochi tein kinpanoua itekitikauan uan “kinkaki keman kitsajtsiliaj maj kinpaleui, uan kinmakixtia” (Sal. 145:18, 19). Se precursora akin kipia 29 xiujmej uan monotsa Kristie kiitak ke yekmelauj nejin. Yejua ijsiujka peuak motelkokoua uan nejon kichiuak maj semi motayokolti. Satepan imomaj kiajxilijkej se kokolis tein kichiuaskia maj momikili. Kristie kijtoua: “Semi niktajtaniaya Jehová maj nechmaka chikaualis para ueliskia nitaxikos mojmostaj. Nimochikauak niksentokas nias nechikolmej uan nimomachtis noselti”. No kijtoua: “Netataujtil nechpaleuij maj nitaxiko keman okachi nikpiaya ouijkayomej. Kemej nikmatia ke Jehová nochipa yetoya nouan semi nechyolseuiaya. Maski amo niman nipajtik, Jehová nechnankilij porin nechpaleuij maj niyolseujto”. Maj amo keman tikelkauakan “ke Jehová kuali kimati keniuj kinmakixtis akin kiueyichiuaj ika nochi ininyolo” (2 Ped. 2:9).

16. ¿Keyej moneki maj Jehová techpaleui para tikixtopeuaskej tein amo kuali?

 ¹⁶ Maj tiktajtanikan Jehová maj ueli tikixtopeuakan tein amo kuali. Kemej titajtakolejkej moneki nochipa timochikauaskej tikixtopeuaskej tein amo kuali. Uan Satanás kichiua nochi tein ueli para maj okachi ouij techkisa. Kijtakoua totanemilil keman kichiua maj ika timoixpetanikan teisa tein kipia auilnemilis oso tein amo chipauak. Nejon kichiua maj totanemilil semi mopitsotili, maj amo tichipaujkejok iixpan Jehová uan maj tiueyi tajtakokan (Mar. 7:21-23; Sant. 1:14, 15).

17. Satepan ke timotataujtiaj, ¿toni no moneki tikchiuaskej para tikixtopeuaskej tein amo kuali? (No xikonita taixkopimej).

¹⁷ Toselti amo uelis tikixtopeuaskej tein amo kuali, ta moneki maj Jehová techpaleui. Jesús no kijtoj itech netataujtil tein ika tamachtij: “Amo xikaua maj timotajtakolmakakan, ta xitechmakixti den Amokuali” (Mat. 6:13). Jehová kineki techpaleuis, sayoj ke moneki tiktajtaniskej. Uan moneki tikchiuaskej ijkon kemej titajtanij. Moneki timochikauaskej amo tikixtajtoltiskej, nion tikakiskej tein amo kuali tein kichiuaj akin mokauaj maj kinixyekana Satanás (Sal. 97:10). Moneki tikixtajtoltiskej uan timomachtiskej Biblia, tiyaskej nechikolmej uan titanojnotsaskej para timoyekpiaskej uan amo tiknemiliskej tein amo kuali. Jehová motenkaua ke amo techkauas maj tikixnamikikan se kuejmol tein amo uelis tikxikoskej (1 Cor. 10:12, 13).

18. ¿Toni moneki tikchiuaskej tinochin?

¹⁸ Itech nejin tonalmej tein ouijkej, tisejsemej moneki okachi tiktataujtiskej Jehová para amo tikauaskej. Jehová kineki maj ‘iixpan yejuatsin tiktapokan toyolo’ (Sal. 62:8). Yejua ika xikonxelo tiempo para tikontataujtis mojmostaj uan xikonilui nochi tein tikonmachilia. Xikonueyitali uan xikontasojkamatili nochi tein kichiua. Xikonilui maj mitsonpaleui amo xionmoui keman tiontanojnotsas, maj mitsonpaleui xikonxiko ouijkayomej uan maj ueli xikonixtopeua tein amo kuali. Amo xikonkaua maj nion akin uan nion teyi mitsontsakuili xikontataujti Jehová. Sayoj ke, ¿keniuj kinankilia tonetataujtiluan? Itech okse tamachtilis ika tajtos nejin tein semi moneki.