1. ¿Toni timiakej ouij techkisa tikchiuaskej?

 TINOCHIN tiknekij okachi tiktekitiliskej Jehová uan tikyolpaktiskej, yejua ika tikixtaliaj tikchiuaskej seki taman. Kemej tikixtajtoltiskej Biblia mojmostaj, timomachtiskej toselti, tiktekitiliskej Dios kampa monekis oso tiknextiskej kualtsitsin taman tein kinextiaj itekitikauan Jehová. Xa no tikonixtalijya nejin, sayoj ke xa ouij mitsonkistok. Komo ijkon, amo sayoj tejuatsin mitsonpanoua. Philip kinekia okachi motataujtis uan okachi kuali kichiuas, sayoj ke ouij kikisaya kixelos tiempo para tajtos iuan Jehová. Erika kiixtalij ajsis kualkan para yetos itech nechikol tein mochiua achto ke se tanojnotsatiuj. Sayoj ke miakpa ipa ajsia tajkajya. Tomáš miakpa kiyejyekoj kiixtajtoltis nochi Biblia. Yejua kijtoua: “Amo nechyolpaktiaya nikixtajtoltis Biblia. Expa nikyejyekoj, sayoj ke nochipa niajsia sayoj hasta Levítico”.

2. ¿Keyej amo moneki timosenkauaskej komo ayamo ueli tikchiuaj tein tikixtalijkej para tiktekitiliskej Dios?

² Komo ayamo ueli tikonchiua tein tikonixtalijtok, amo xionmosenkaua. Moneki timochikauaskej uan tikxeloskej tiempo para tikchiuaskej tein tikixtalijtokej, maski amo ueyi. Kemej tikonsentoka tikonneki tikonchiuas tein tikonixtalij, tikonnextia ke semi tikonpatiuita tionmouikas iuan Jehová uan tikonneki okachi kuali tikontekitilis. Jehová kiita nejon, uan amo mitsontajtania xikonchiua tein amo tionueli (Sal. 103:14; Miq. 6:8). Yejua ika, keman tikonixtalis tikonchiuas teisa, xikonita ox uelis tikonchiuas. Satepan ke tikonitas ke kemaj tionueli, ¿toni mitsonpaleuis ijkon xikonchiua? Maj tikitakan seki taman.

3. ¿Keyej moneki maj tiknejnekikan tikchiuaskej tein tikixtaliaj?

³ Para tiktekitiliskej Dios ijkon kemej tikixtalijkej, moneki semi tiknejnekiskej tikchiuaskej ¿Keyej? Porin komo tiknejnekij, timochikauaskej ijkon tikchiuaskej. Nejin tamati kemej se ueyiat tein ijsiujka yajtok uan kiuika se barco tein tsikitsin. Komo at kisentoka motaloua, akin youi itech barco ajsis kampa kineki. Uan komo at okachi motaloua, okachi niman ajsis. No ijkon, keman okachi tiknejnekij tikchiuaskej tein tikixtalijkej, xa okachi ijsiujka tikchiuaskej. Se tokniuj takat de El Salvador akin monotsa David kijtoua: “Keman tiknejneki tikchiuas teisa, amo tikaua maj nion teyi mitstsakuili uan okachi timochikaua tikchiuas tein tikixtalia”. ¿Toni mitsonpaleuis xikonnejneki tikonchiuas tein tikonixtalijtok?

4. ¿Toni uelis tiktajtaniskej Jehová? (Filipenses 2:13; no xikonita taixkopin).

⁴ Xionmotataujti para tikonnejnekis tikonchiuas tein tikonixtalijtok. Ichikaualis Jehová uelis mitsonpaleuis xikonnejneki xikonchiua tein tikonixtalijtok (xikonixtajtolti Filipenses 2:13). Kemansa, tikixtaliaj tikchiuaskej teisa porin tikmatij ke ijkon moneki tikchiuaskej, uan nejon kuali yetok. Sayoj ke, xa amo yekmelauj tiknejnekij. Yejua nejon tein kipanok se tokniuj siuat akin monotsa Norina, akin nemi Uganda. Yejua kiixtalijka tamachtis ika Biblia, sayoj ke amo semi kinejnekia porin kimachiliaya ke amo kuali tamachtiaya. ¿Toni kipaleuij? Yejua kijtoua: “Mojmostaj niktajtaniaya Jehová maj nechpaleui maj okachi niknejneki nikmachtis aksa ika Biblia. Uan no, nimochikauak okachi kuali nitamachtis. Seki metsti satepan nikitak ke okachi niknejnekia nikchiuas. Itech nejon xiuit peuak nikinmachtia omen”.

5. ¿Itech toni moneki titanemiliskej para okachi tiknejnekiskej tikchiuaskej tein tikixtalijtokej?

⁵ Itech xiontanemili tein Jehová moka kichiuani (Sal. 143:5). Tatitanil Pablo itech tanemilij keniuj kitatiochiuijka Jehová, uan nejon kipaleuij maj semi kinejneki kitekitilis (1 Cor. 15:9, 10; 1 Tim. 1:12-14). No ijkon, keman okachi itech tiontanemilis tein Jehová moka kichiuani, okachi tikonnejnekis tikonchiuas tein tikonixtalijtok (Sal. 116:12). Xikonita toni kipaleuij se tokniuj de Honduras maj mochiua precursora regular. Yejua kijtoua: “Peuak niknemilia keniuj Jehová semi nechtasojta. Nechpaleuij maj nipoui iniuan itekitikauan, nechpaleuia uan nechyekpia. Keman itech nitanemilij nochi nejon, nechpaleuij maj okachi niktasojta uan maj okachi niknejneki nimochiuas precursora”.

6. ¿Toni okse taman techpaleuis maj tiknejnekikan tikchiuaskej tein tikixtalijkej?

⁶ Itech xiontanemili tein uelis tikonselis komo tikonchiua tein tikonixtalijtok. Maj oksepa tikitakan tein kipanok Erika,  akin ika titajtojkej itech párrafo 1. ¿Toni kipaleuij maj amo motajkajtiliok? Yejua kijtoua: “Nikitak ke keman tajkajya niajsia, amo ueliaok nikinnojnotsaya tokniuan nion nikintajpalouayaok. Amo no nikakiaok tayolmajxitilis tein nechpaleuiskia maj okachi kuali nitanojnotsa uan maj nechyolpakti. Sayoj ke komo niajsia kualkan ueliskia nikchiuas nochi nejon”. Erika mochikauak ajsis kualkan porin kiitak ke ueliskia kichiuas miak taman. ¿Toni tein uelis tikonselis moneki itech tiontanemilis? Komo tikonixtalij tikonixtajtoltis nochi Biblia oso okachi kuali tionmotataujtis, xikonnemili keniuj nejon mitsonpaleuis okachi kuali xionmouika iuan Jehová (Sal. 145:18, 19). Komo tikonneki tikonnextis teisa tein kuali, xikonnemili keniuj mitsonpaleuis okachi kuali xionmouika iniuan oksekin (Col. 3:14). No xikonijkuilo keyej tikonneki tikonchiuas nejin uan nochipa xikonita. Tomáš, akin achto no ika titajtojkej, kijtoua: “Keman nikita keyej moneki nikchiuas tein nikixtalij, okachi nimochikaua nikchiuas”.

7. ¿Toni kichiujkej Julio uan isiuatsin para kichiuaskej tein kiixtalijtoyaj?

⁷ Xionmouika iniuan akin mitsonyolchikauaskej (Prov. 13:20). Julio uan isiuatsin kinekiaj yaskej tapaleuitiuij kampa monekiaj tanojnotsanij. Julio kijtoua toni kinpaleuij maj kichiuakan: “Tiktemojkej iniuan timouikaskej akin techpaleuiskiaj uan ika tikinnojnotsayaj tein tikixtalijtoyaj. Miakej ueliaj techyolmajxitiayaj porin kichiujtoyajya tein tejuan tikixtalijtoyaj tikchiuaskej. Totasojikniuan techtajtaniayaj ox tikchiujtoyajya tein tikixtalijtoyaj, uan nochipa techyolchikauayaj para amo timosenkauaskej”.

8. ¿Toni uelis panos komo tikchiuaj tein tikixtaliaj sayoj keman tiknejnekij? (No xikonita taixkopin).

⁸ Tein melauj, kemansa tinochin amo tiknekij tikchiuaskej teisa. ¿Kijtosneki nejin ke amo uelis tikchiuaskej tein tikixtaliaj? Amo. Maj oksepa ika titajtokan barco uan at tein ijsiujka motalojtok. At tein ijsiujka motalojtok uelis kiuikas barco kampa moneki ajsis. Sayoj ke kemansa at amo ijsiujka motaloua, oso uelis moitas ke sayoj tektok. ¿Kijtosneki nejin ke barco amo uelis moolinisok? Amo, porin akin ompa youi uelis kisentokas kiuikas ika seki koujmej para ajsis kampa kineki. No ijkon, kemansa uelis tiktelnejnekiskej tikchiuaskej tein tikixtalijtokej, uan kemansa amo semi, oso nion tepitsin tiknejnekiskej tikchiuaskej. Yejua ika komo tikchiuaskiaj tein tikixtaliaj sayoj keman tiknejnekij, xa amo keman tikchiuaskiaj. Akin youi itech barco kitemoua keniuj ajsis kampa kineki maski at amo motalojtok. Tejuan no uelis tiksentokaskej timochikauaskej para tikchiuaskej tein tikixtaliaj maski kemansa amo semi tiknejnekiskej. Semi tiyolpakiskej keman tikchiuaskej maski monekis  timochikauaskej. Achto ke tikitaskej toni uelis tikchiuaskej, maj tikitakan se taman tein xa miakej motajtaniaj.

9. ¿Keyej moneki tiksentokaskej tikchiuaskej tein tikixtalijtokej maski amo tiknekij?

⁹ Jehová kineki maj tiknekikan tiktekitiliskej uan maj techyolpakti (Sal. 100:2; 2 Cor. 9:7). ¿Keyej moneki timochikauaskej tiktekitiliskej Jehová komo amo tiknejnekij? Maj tiknemilikan tein kichiuak tatitanil Pablo. Yejua kijtoj: “Niktatsakuiltia nonakayo uan nikchiua kemej notakeual” (1 Cor. 9:25-27, nota). Pablo mochikauak kichiuas tein Jehová kiyolpaktia maski yejua amo semi kinejnekia. ¿Kiyolpaktiaya Jehová tein kichiuaya Pablo? Kemaj. Uan Jehová kitatiochiuij porin semi kitekitilij (2 Tim. 4:7, 8).

10. ¿Toni tikseliskej komo timochikauaj tikchiuaskej tein tikixtalijkej maski amo semi tiknejnekij?

¹⁰ Jehová no yolpaki keman kiita ke timochikauaj okachi tiktekitiliskej maski amo semi tiknejnekij. ¿Keyej? Porin kimati ke maski amo nochipa tikuelitaj tein tikixtalijkej, tikchiuaj porin tiktasojtaj yejuatsin. Jehová kitatiochiuij Pablo uan tejuan no techtatiochiuis porin timochikauaj (Sal. 126:5). Uan keman tikitaskej ke Jehová techtatiochiuia, xa okachi tiknejnekiskej tikchiuaskej. Se tokniuj siuat de Polonia akin monotsa Lucyna kijtoua: “Kemansa amo nikneki nitanojnotsatiuj, uan okachiok keman nisioujtok. Sayoj ke keman nimokepa semi niyolpaki”. Maj tikitakan toni techpaleuis keman amo tiknejnekiskejok tikchiuaskej tein tikixtalijkej.

11. ¿Keniuj Jehová techpaleuia maj ueli timotsakuilikan?

¹¹ Xikontajtani Jehová maj mitsonpaleui ueli xionmotsakuili. Akin kimati motsakuilis achto kuali kinemilia tein kichiuas uan kitsakuilia tein kimachilia. Nejin amo sayoj techpaleuia maj amo tikchiuakan tein amo kuali, ta no techpaleuia maj tiknejnekikan tikchiuaskej tein kuali, okachiok keman ouij techkisa oso amo tiknejnekijok tikchiuaskej. Maj tikelnamikikan ke komo timotsakuiliaj no tiknextiaj ke timokauaj maj techixyekana ichikaualis Dios. Yejua ika, komo tiktajtaniaj Jehová maj techpaleui ika ichikaualis, uelis tikchiuaskej nejin tein motelneki (Luc. 11:13; Gál. 5:22, 23). David, akin ika titajtojkej itech párrafo 3, kiixtalij okachi momachtis iselti. Yejua kiita ke semi moneki maj se motataujti. Yejua kijtoua: “Niktataujtij Jehová maj nechpaleui maj ueli nimotsakuili, uan yejuatsin nechpaleuij. Nikixtalij kemanian nimomachtis noselti, uan ijkon niksentoka”.

12. ¿Keniuj Eclesiastés 11:4 techpaleuia maj okachi tiktekitilikan Jehová ijkon kemej tikixtalijtokej?

¹² Amo xikonchiua hasta keman tionuelis. Axkan amo nochipa kuali tietoskej. Komo timochixtokej uan amo teyi tikchiuaj, xa amo keman tikchiuaskej tein tikixtaliaj (xikonixtajtolti Eclesiastés 11:4). Se tokniuj takat akin monotsa Dayniel kijtoua: “Amo keman tel kuali tiyetokej. Yejua ika amo moneki timochiaskej, ta maj peua tikchiuakan tein tikixtaliaj”. Paul, se tokniuj takat de Uganda, no kijtoua keyej amo moneki timochiaskej: “Keman peua tikchiuaj tein tikixtaliaj maski ouij techkisa, Jehová techpaleuia” (Mal. 3:10).

13. ¿Keyej semi kuali komo yolik tikchiujtiouij tein tikixtaliaj?

¹³ Peua xikonchiua tein amo ouij mitsonkisas. Xa kemansa amo tiknejnekiskej tikchiuaskej porin tein tikixtaliaj semi ouij. Komo yejua nejon tein mitsonpanoua, ¿keyej amo yolik peua tikonchiujtiuj tein tikonixtalijtok? Komo tikonneki tikonnextis teisa tein kuali, ¿keyej amo peua tikonnextia ika seki taman tein amo ueyi? Komo  tikonneki tikonixtajtoltis nochi Biblia, ¿keyej amo peua tikonixtajtoltia sayoj seki versículos? Tomáš, akin ika titajtojkej ipeujyan nejin tamachtilis, semi ouij kikisaya kiixtajtoltis nochi Biblia itech se xiuit ijkon kemej kiixtalijka. Yejua kijtoua: “Nikitak ke nikixtajtoltis Biblia itech se xiuit ijkon kemej nikixtalijka, xa ipa amo nimatamiskia. Yejua ika oksepa nikpeualtij, sayoj ke nikixtajtoltiaya okachi yolik kemej niuelia. Uan itech nitanemiliskia maski amo miak tein nikixtajtoltiskia. Nejin nechpaleuij maj okachi nikuelita”. Kemej Tomáš peuak okachi kiuelita kiixtajtoltis Biblia, kiixtaliaya okachi miak tiempo kichiuas, uan uelik kitamiixtajtoltij nochi Biblia. b

14. ¿Toni ouijkayomej uelis tikpiaskej?

¹⁴ Tein melauj, maski tiknejnekiskej tikchiuaskej tein tikixtalijkej, uelis panos teisa tein techtsakuilis. Xa techpanos ‘tein amo tikchiaj’ yejua ika amo tikpiaskejok tiempo para tikchiuaskej tein tikixtalijkaj (Ecl. 9:11). Oso tikpiaskej ouijkayomej uan amo tiknekiskejok tikchiuaskej tein tikixtalijkaj uan amo tiueliskejok (Prov. 24:10). Uan no, kemej titajtakolejkej timopolouaj, uan nejon xa uelis kichiuas maj okachi ouij techkisa tikchiuaskej tein tikixtalijkej (Rom. 7:23). Oso xa sayoj tisioujtokej (Mat. 26:43). ¿Toni techpaleuis maj amo timosenkauakan?

15. ¿Keyej amo timosenkauaj keman ayamo ueli tikchiuaj teisa? (Salmo 145:14).

¹⁵ Xikonelnamiki ke komo ayamo tikonchiua teisa, amo kijtosneki ke amo tionuelisok. Biblia kijtoua ke xa ipa tikpanoskej miak taman ouijkayomej. Sayoj ke no techiluia ke Jehová techpaleuis maj tiuelikan tikchiuakan tein tikixtalijtokej (xikonixtajtolti Salmo 145:14). Philip, akin ika titajtojkej itech párrafo 1, kijtoua: “Nejua amo nikita kanachpa amo nikchiuani tein nikixtalijka, ta kanachpa nimochikaua  nikchiuas”. Maj oksepa ika titajtokan David. Yejua kijtoua: “Keman okachi ouij nechkisa nikchiuas tein nikixtalij oso nechpanoua teisa, amo nikita nejon kemej teisa tein nechtsakuilia, ta kemej se teisa tein nechpaleuia maj niknextili Jehová ke semi niktasojta”. Keman tiksentokaj tikchiuaj tein tikixtalijkej maski tikpiaj ouijkayomej, tiknextiliaj Jehová ke tiknekij tikyolpaktiskej. Yejuatsin semi yolpaki keman mitsonita ke tionmochikaua tikonchiuas tein tikonixtalijtok.

16. ¿Toni uelis techmachtis komo amo ueli tikchiuaj tein tikixtalijtokej?

¹⁶ Tein mitsontsakuilia uelis mitsonmachtis miak taman. Xikonita tein panotok uan xionmotajtani: “¿Toni uelis nikpatas para maj amo teyi nechtsakuiliok?” (Prov. 27:12). ¿Uan komo amo ueli tikchiuaj tein tikixtalijtokej maski miakpaya tikyejyekojkej? Xa tein moneki tikpataskej yejua tein tikixtalijkej. Para tikonmatis ox monekis tikonpatas, xikonnemili ox tein tikonixtalij yejua tein yekmelauj uelis tikonchiuas. c Komo amo uelik tikonchiuak tein tikonixtalijtoya, Jehová amo kinemilis ke amo teyi ueli tikonchiua (2 Cor. 8:12).

17. ¿Keyej amo moneki tikelkauaskej tein tikchiuanijya?

¹⁷ Amo xikonelkaua tein tikonchiuaniya. Biblia kijtoua ke ‘Dios yolmelauak uan amo kielkauas tein tikonchiua’ (Heb. 6:10). Yejua ika amo no xikonelkaua. Xikonelnamiki seki taman tein tikonchiuania, xa kuali tionmouika iuan Jehová, tiontanojnotsa oso tionmoauijya. Tein tikonchiuakya para okachi tikontekitilis Jehová ijkon kemej tikonixtalijka, kinextia ke no uelis tikonchiuas tein axkan tikonixtalijtok (Filip. 3:16).

18. ¿Toni moneki tikonelnamikis keman tikonchiujtos tein tikonixtalij? (No xikonita taixkopin).

¹⁸ Jehová uelis mitsonpaleuis xikonchiua tein tikonixtalijtok ijkon kemej yolpaki akin kiuika barco uan ajsi kampa moneki. Uan no, miakej akin kiuikaj se barco kiuelitaj tachixtiaskej. Tejuatsin no uelis tionyolpakis keman tikonchiujtias tein tikonixtalijtok komo tikonita keniuj Jehová mitsonpaleuia uan mitsontatiochiuia (2 Cor. 4:7). Komo amo tionmosenkaua, Jehová okachi mitsontatiochiuis (Gál. 6:9).