1. ¿Toni kinauatij Jehová tatitanil Pedro maj kichiua achto ke momikiliskia?

 TATITANIL Pedro miak xiujmej kitekitilij Jehová uan amo keman kikauak. Tanojnotsak iuan Jesús keman ualajka nikan taltikpak, peuak kinnojnotsa akin amo katkaj judíos uan satepan pouik iniuan oloch taojtokaltianij. Keman Pedro kimatik ke yaya momikilitia, Jehová kinauatij maj kichiua okseki tekimej. Itech xiuit 62 uan 64 satepan ke ualajka Cristo, Dios kichiuak maj kijkuilouani ome cartas: amatajkuilolmej 1 uan 2 Pedro. Tatitanil kinekia maj nejin cartas kisentokani kinpaleuiani tokniuan satepan ke momikiliskia (2 Ped. 1:​12-15).

2. ¿Keyej cartas tein kijkuiloj Pedro semi kinpaleuij tokniuan?

² Keman Pedro kijkuiloj nejin cartas, tokniuan ‘kijyouijtoyaj tataman ouijkayomej’ (1 Ped. 1:6). Seki takamej akin amo yolkualmej katkaj kinkajkayauayaj tokniuan uan kinmachtiayaj tein amo yekmelauj, uan no kinekiaj maj amo chipaujkanemikanok itech nechikol (2 Ped. 2:​1, 2, 14). Tokniuan akin nemiaj Jerusalén ‘amo uejkaua kiitaskiaj ke nochi tatamiskiaya’, nejin mochiuaskia keman tateuianij romanos kiixpoloskiaj Jerusalén uan itemplo (1 Ped. 4:7). Tikyekmatij ke cartas tein kijkuiloj Pedro kinpaleuij tokniuan maj kixikokan ouijkayomej tein kipiayaj, uan maj kimatinij toni kichiuaskiaj keman oksepa kipiaskiaj ouijkayomej. b

3. ¿Keyej moneki maj timomachtikan cartas tein kijkuiloj Pedro?

³ Maski Pedro kinijkuilouilij tokniuan itech yekinika siglo nejin cartas, Jehová kinekik maj no moijkuilokan itech Biblia  para maj techpaleui (Rom. 15:4). Tejuan no tinemij kampa miakej amo chipaujkanemij uan tikpiaj ouijkayomej tein kichiua maj ouij techkisa tiktekitiliskej Jehová. Uan no, amo uejkaua okachi techtajyouiltiskej ke keman kintajyouiltijkej akin nenkej keman ixpoliuik Jerusalén uan itemplo. Ome cartas tein kijkuiloj Pedro techmachtiaj miak taman tein semi moneki uan techpaleuis maj tikchixtokan keman ejkos itonal Jehová, maj amo tikinmouilikan oksekin uan maj okachi tikintasojtakan tokniuan. Nejin no kinpaleuis tayekananij maj kimatikan keniuj kinpaleuiskej tokniuan itech nechikol maj kisentokakan kitekitilikan Jehová.

4. ¿Toni ueliskia kichiuas maj amo semi titakuaujtamatikanok? (2 Pedro 3:​3, 4).

⁴ Miakej amo kineltokaj tein Biblia kijtoua ke mochiuas satepan. Kemej miak xiujmejya tiktematiltiaj ke amo uejkaua ixpoliuis nochi tein amo kuali, xa miakej akin techixnamikij techkejkelouaj uan hasta kijtouaj ke amo keman mochiuas tein tikchiaj (xikonixtajtolti 2 Pedro 3:​3, 4). Komo kampa titekitij, semej tochankauan oso keman titanojnotsaj techiluiskiaj nejon, xa amo semi titakuaujtamatiskiajok. Pedro kimelauak tein uelis techpaleuis.

5. ¿Toni techpaleuis maj timochiakan hasta keman Dios kiixpolos nochi tein amo kuali? (2 Pedro 3:​8, 9).

⁵ Xa sekin kinemiliaj ke Jehová yolikati uan amo ijsiujka kiixpoloua nochi tein amo kuali tein mochiujtok. Tein kijtoj Pedro techyolchikaua porin techelnamiktia ke Jehová amo kiita tonalmej kemej tejuan tikitaj (xikonixtajtolti 2 Pedro 3:​8, 9). Para Jehová mil xiujmej kemej yeskia se tonal. Uan no, yejuatsin amo yolijsiui uan amo kineki maj nion akin ixpoliui. Sayoj ke itonal Jehová ejkos uan kiixpolos nochi tein amo kuali. ¿Melauj ke se tatiochiualis maj ueli titanojnotsakan achto ke ixpoliuis tein amo kuali?

6. ¿Keniuj uelis tikchixtoskej itonal Jehová? (2 Pedro 3:​11, 12).

⁶ Pedro techyolmajxitia maj ‘semi tikchiakan’ keman ejkos itonal Jehová (xikonixtajtolti 2 Pedro 3:​11, 12). ¿Keniuj uelis tikchiuaskej? Komo ueli, maj mojmostaj tiknemilikan keniuj tel kualtsin tinemiskej itech xochital. ¿Tikonnemiliani tikonijyotilantok ejekat tein chipauak, ke tikonkuajtok takual tein uelik, ke tikonselijtok mochankauan oso motasojikniuan akin oksepa nemij, uan ke tikonmelauilijtok akin nenkej ne uejkauj tein Biblia achto kijtojka ke mochiuaskia? Komo itech tiontanemilia nejin, mitsonpaleuis xikonchixto uan xikonelnamiki ke tinemij itech tonalmej keman amo uejkaua tatamitiya. Kemej tikmatijya toni mochiuas satepan, amo timokauaj maj techkajkayauakan akin tamachtiaj tein amo melauak (2 Ped. 3:17).

7. ¿Toni uelis techpanos komo tikinmouiliaj oksekin?

⁷ Kemej tikmatij ke itonal Jehová amo uejkaua ejkos, tiknekij tikinmatiltiskej oksekin tein kuali tein kichiuas iTaixyekanalis Dios. Sayoj ke kemansa, xa amo tiknekiskej titajtoskej. ¿Keyej? Porin tikinmouiliskej oksekin. Ijkon kipanok Pedro youak keman yaya kitatsakuiltitij Jesús. Pedro amo kijtoj ke no katka semej imomachtijkauan uan miakpa kijtoj ke amo kiixmatia (Mat. 26:​69-75). Sayoj ke satepan amo mouiaok uan kijtoj: “Amo xikmouilikan tein yejuan kimouiliaj nion ximotekipachokan”  (1 Ped. 3:14). Tein kijtoj Pedro kinextia ke tejuan no uelis timoyolchikauaskej uan amo tikmouiliskejok tein kichiuaskej oksekin.

8. ¿Toni mitsonpaleuis amo xikonmouili oksekin? (1 Pedro 3:15).

⁸ ¿Toni techpaleuis maj amo tikinmouilikanok oksekin? Pedro techyolmajxitia: “Itech namoyolo xiktakachiuakan Cristo kemej namoTekotsin” (xikonixtajtolti 1 Pedro 3:15). Nejin no kijtosneki ke moneki tikelnamikiskej ke toTekotsin Jesucristo yejua toTekiuaj uan ke semi chikauak. Komo tionmoui keman tikonita ke uelis tikonnojnotsas aksa, xiontanemili itech toTekiuaj. Xikonnemili ke taixyekantok ompa iluikak, uan kiyoualojtokej millones de ángeles. Uan xikonelnamiki ke yejua kimaktilijkej “nochi tanauatil ne iluikak uan nikan taltikpak” uan ke nochipa yetos mouan “hasta keman tantiasya tein mochiujtok itech taltikpak” (Mat. 28:​18-20). Pedro kijtoua ke moneki nochipa tikmatiskej keniuj tikinnankiliskej akin techtajtaniskej keyej titakuaujtamatij. ¿Tikonuelitaskia tiontanojnotsas kampa tiontekiti, kampa tionmomachtia oso okseko? Komo ijkon, xikonnemili kemanian uelis tikonchiuas uan toni uelis tikonijtos. Xikontajtani Jehová maj mitsonyolchikaua, uan xiontakuaujtamati ke mitsonpaleuis amo xikonmouili oksekin (Hech. 4:29).

9. ¿Kemanian Pedro amo kinextij ke tetasojtaya? (No xikonita taixkopin).

⁹ Pedro kimatik keniuj tetasojtas. Yejua ompa yetoya keman Jesús kijtoj: “Namechmaka se yankuik tanauatil: ximotasojtakan se iuan okse; ijkon kemej nejua namechtasojta, namejuan no ximotasojtakan se iuan okse” (Juan 13:34). Sayoj ke satepan, mouik uan amo kinekikok takuas iniuan tokniuan akin amo katkaj judíos. Tatitanil Pablo kijtoj ke Pedro taixkajkayaujtoya (Gál. 2:​11-14). Pedro kichiuak tein kiluij Pablo uan mopatak. Itech ome cartas kijkuiloj ke amo sayoj moneki maj tikintasojtakan tokniuan, ta no maj tiknextikan.

10. ¿Toni techpaleuis maj ‘yekmelauj timotasojtakan kemej yeskia tiiknimej’? (1 Pedro 1:22).

¹⁰ Pedro kijtoj maj “yekmelauj timotasojtakan kemej yeskia tiiknimej” (xikonixtajtolti 1 Pedro 1:22). Timotasojtaskej komo ‘tiktakamatij tamachtilis tein melauak’, nejin tamachtilis no yejua tein techiluia “ke Dios amo techichikotasojta” (Hech. 10:​34, 35). Komo sayoj tikintasojtaj sekin tokniuan itech nechikol, amo tiknextijtoskiaj ke tiktakamatij Jesús keman tanauatij maj timotasojtakan. Uan tein melauj, xa ipa okachi timouikaskej iniuan okseki tokniuan, ijkon kemej kipanok Jesús iuan imomachtijkauan (Juan 13:23; 20:2). Sayoj ke Pedro techelnamiktia ke moneki ‘tikintasojtaskej nochin tokniuan kemej yeskia tiiknimej’ ijkon kemej tiktasojtaj sejse tochankauj (1 Ped. 2:17).

11. ¿Toni kijtosneki maj ‘semi timotasojtakan se iuan okse ika nochi toyolo’?

¹¹ Pedro tayolmajxitij nejin: “Semi ximotasojtakan se iuan okse ika nochi namoyolo”. Keman Pedro kijtoj “semi ximotasojtakan” no kijtosneki ke moneki tikintasojtaskej hasta akin amo tikintasojtaskiaj. ¿Toni xa tikchiuaskiaj komo se tokniuj techchiuiliskia teisa tein amo kuali oso techyolkokoskia? Xa amo tiktasojtaskiaj, ta timomakepaskiaj. Sayoj ke Jesús kimachtij Pedro ke nejon amo kiyolpaktiskia Jehová (Juan 18:​10, 11). Tatitanil kijkuiloj: “Amo ximomakepakan nion xikinuijuikaltikan akin namechuijuikaltiaj, ta xikinnejnekilikan tein kuali” (1 Ped. 3:9). Komo semi tiontetasojta, yeski tionkualtakat uan tionteajsikamatis, hasta iniuan akin mitsonchiuiliskej tein amo kuali.

12. 1) ¿Toni no tikchiuaskej komo semi tikintasojtaj tokniuan? 2) ¿Toni mitsonyolchikaua xikonchiua video Tatiochiualismej tein tikseliaj keman oksepa tiyolseujkanemij iniuan oksekin?

¹² Itech yekinika carta tein Pedro kijkuiloj, no kijtoj “semi ximotasojtakan”. Keman ijkon titetasojtaj amo kijtosneki ke sayoj kemansa titetapojpoluiaj, ta ke ‘nochipa titetapojpoluiaj’ (1 Ped. 4:8). Keman Pedro kijkuiloj nejin, xa kielnamikik keman seki xiujmej achto Jesús kimachtijka ke monekia tetapojpoluis. Keman Pedro kiluij ke tetapojpoluiskia “hasta chikome viaje”, xa kinemiliaya ke semi yolkuali katka. Sayoj ke Jesús kimachtij ke monekia tetapojpoluis “hasta 77” oso ke amo ixyetoya kanachpa monekia kichiuas, uan nejin no uelis techmachtis tejuan (Mat. 18:​21, 22). ¿Ouij mitsonkisa tikonchiuas nejin? Amo xionmosenkaua. Kemej titajtakolejkej, tinochin akin tiktekitiliaj Jehová kemansa ouij techkisa titetapojpoluiskej. Komo ijkon, ¿toni uelis tikonchiuas? Semi xionmochikaua tikontapojpoluis tokniuj uan xikontemo oksepa kuali iuan tionmouikas. c

13. ¿Keyej tayekananij xa ouij kinkisa kinyekpiaskej tokniuan?

¹³ Pedro xa amo keman kielkauak tein Jesús kiluij satepan ke oksepa nemik: “Xikinyekpia noichkatsitsin” (Juan 21:16). Komo tiontayekankej, tikonmati ke no moneki tikonchiuas nejin. Sayoj ke xa ouij mitsonkisas tikonxelos tiempo para tikonchiuas nejin tekit tein motelneki. Yekinika, tayekananij moneki kiitaskej maj ininchankauan kipiakan tein ika moixpanoltiskej, maj kimachilikan ke kintasojtaj, uan maj kinpaleuikan maj kuali mouikakan iuan Jehová. Tayekananij no moneki tanojnotsaskej para maj tokniuan no ijkon kichiuakan, moneki kuali momachtiskej para kuali tamachtiskej itech nechikolmej uan kipanoltiskej tanojnotsmej itech uejueyi nechikolmej. Uan sekin no kinpaleuiaj Tayekananij akin Tetajtouiaj itech Tapajtiloyamej oso no tapaleuiaj Kampa Moixtalia uan Moixyekana Kalchiualis. Tokniuan tayekananij kipiaj miak tekit.

14. ¿Keyej tayekananij kinekij kinyekpiaskej tokniuan, uan toni uelis kinpaleuis? (1 Pedro 5:​1-4).

¹⁴ Pedro kiniluij oksekin tokniuan akin no katkaj tayekananij: “Kemej [...] ichkatajpianij, xikinyekpiakan iichkauan Dios” (xikonixtajtolti 1 Pedro 5:​1-4). Tikmatij ke tayekananij kintasojtaj tokniuan uan kinekij kinyekpiaskej. Sayoj ke kemansa xa kimachiliskej ke amo uelis kichiuaskej nejon tekit porin tel sioujtokej oso moneki kichiuaskej okseki taman. ¿Toni uelis tikonchiuas komo ijkon mitsonpanoua? Xikonilui Jehová keniuj tionmomachilia. Pedro kijkuiloj: “Komo aksa kinpaleuia oksekin, maj takuaujtamati itech chikaualis tein Dios kitemaka” (1 Ped. 4:11). Xa tokniuan kipiaskej ouijkayomej tein amo moyektaliskej hasta keman mochiuas xochital. Sayoj ke xikonelnamiki ke Jesucristo, akin “okachi ueyi ichkatajpixkej”, uelis okachi kinpaleuis tokniuan axkan uan no itech xochital. Jehová kineki maj tayekananij kintasojtakan tokniuan, maj kinyekpiakan uan maj kichiuakan tein kuali para maj yejuan no ijkon kichiuakan.

15. ¿Toni kichiua se tayekankej para kinyekpias tokniuan? (No xikonita taixkopin).

¹⁵ William, akin miak xiujmejya tapaleuia kemej tayekankej, kiita ke semi moneki maj kinyekpia tokniuan. Keman peuak  ueyi kokolis COVID-19, yejua uan okseki tayekananij kiitakej ke semi monekia maj sejse semana kinnotsanij nochin tokniuan akin iniuan tanojnotsayaj. Yejua kijtoua keyej: “Miakej tokniuan nemiaj ininselti, uan ijsiujka ueliskia motayokoltiskej”. Keman se tokniuj kipia ouijkayomej, William kuali kikaki para kimatis toni kipoloua uan tein kitekipachoua. Kitemoua toni uelis okachi kipaleuis, xa se video tein moajsi itech jw.org. William kijtoua: “Axkan okachi moneki maj tikinyekpiakan tokniuan. Semi timochikauaj tikinpaleuiskej oksekin maj kiixmatikan Jehová. Uan yejua nejon moneki tikchiuaskej para tikinyekpiaskej tokniuan, oso para tikinpaleuiskej iichkauan Jehová maj kisentokakan kitekitilikan”.

16. ¿Keniuj uelis tikchiuaskej tein timomachtijkej itech cartas tein kijkuiloj Pedro?

¹⁶ Itech nejin tamachtilis tikitakej seki taman tein techmachtiaj ome cartas tein kijkuiloj Pedro. Xa tejuatsin tikonitak ke onkak seki taman tein moneki tikonyekchiuas. ¿Tikonuelitaskia okachi itech tiontanemilis xochital kampa kualtsin tinemiskej? ¿Tikonixtalijya tiontanojnotsas kampa tiontekiti, kampa tionmomachtia oso okseko? ¿Tikonnemiliani keniuj no uelis tikonnextilis tokniuan ke tikontasojta? Uan komo tejuatsin tiontayekankej, ¿tikonixtalijya kuali tikonyekpias iichkauan Jehová uan tikonchiua porin ijkon tikonneki? Komo tikonita ke teisa amo tikonchiujtok kemej moneki, amo xionmosenkaua. Xikonelnamiki ke “toTekotsin kualtakat” uan mitsonpaleuis okachi kuali xikonchiua (1 Ped. 2:3). Pedro techiluia: “Dios […] namechtamimachtis. Yejua kichiuas amo ximotsinkixtikan, namechchikauas, namechpaleuis amo xiuetsikan” (1 Ped. 5:10).

17. ¿Toni uelis tikseliskej komo tiksentokaj timochikauaj uan tikauaj maj Jehová techmachti?

¹⁷ Se tonal, Pedro kimachilij ke amo kinamikia yetos iixpan iKonetsin Dios (Luc. 5:8). Sayoj ke kemej Jehová uan Jesús kipaleuijkej uan kitasojtakej, Pedro amo keman kikauak Jesús. Yejua ika, Jehová kikauak maj yeto “itech iTaixyekanalis toTekotsin uan toTemakixtijkauj Jesucristo” (2 Ped. 1:11). ¡Tel kualtsin tein kiselij Pedro! Komo tejuatsin no tikonsentoka tionmochikaua kemej yejua uan tikonkaua maj Jehová mitsonmachti, no uelis tionnemis nochipaya. “Tionmomakixtis porin tiontakuaujtamati” (1 Ped. 1:9).