Tein tayolmajxitia Biblia techpaleuia
Tein Biblia kijtoua kinpaleuiani tel miakej itech nejin naui taman.
1. Akin monamiktijkejya
Nochin tataman tein kinemiliaj de akin monamiktijkejya, uan miak taman tein kijtouaj ke uelis kinpaleuis para maj yolpakikan.
TEIN BIBLIA TAMACHTIA: “Nansejsemej moneki nankitasojtaskej namosiuatsin ijkon kemej namejuan namotasojtaj. Uan siuatsin moneki kitakachiuas itakatsin ika nochi iyolo” (Efesios 5:33).
TEIN KIJTOSNEKI: Dios kiixtalij maj se takat uan se siuat monamiktikan, yejua ika yejuatsin kuali kimati tein kinpaleuis para maj yolpakikan (Marcos 10:6-9). Takat uan siuat akin monamiktijkejya yolpakiskej komo amo sayoj inintech tanemiliaj, ta komo okachi tanemiliaj itech tein sejsemej uelis kichiuaskej para kuali mouikaskej. Takat akin kitasojta isiuatsin amo kitajyouiltia, ta kiyekpia. Uan siuatsin kinextia ke kipoujkaita itakatsin keman kipaleuia uan kuali kinojnotsa.
TEIN BIBLIA TAYOLMAJXITIA TAPALEUIA: Quang uan isiuatsin Thi, akin kayomej Vietnam, kinemiliayaj ke amo keman kuali mouikaskiaj nion yolpakiskiaj. Quang amo yolkuali katka. Yejua kijtoua: “Amo nechtekipachouaya tein kiyolmachiliaya Thi uan miakpa nikpinaujti”. Thi kinekia kikauas. Yejua kijtoua: “Amo ueliaok itech nitakuaujtamatia nion ueliaok nikpoujkaitaya”.
Satepan Quang uan Thi peujkej momachtiaj Biblia uan peuak kichiuaj tein kijtoua Efesios 5:33. Uan, ¿keniuj kinpaleuij? Quang kijtoua: “Nejin tein kijtoua Biblia nechpaleuij maj nikita ke monekia niyeski nikualtakat uan maj Thi kimachiliani ke niktasojtaya. Uan no nikitak ke monekia nikyekpias uan nikitas maj amo teyi kipolouani, maj kuali yetoni uan maj kuali momachiliani. Nikitani ke keman nikchiua nejin yejua okachi nechtasojta uan nechpoujkaita”. Thi kijtoua: “Nimochikaua okachi nikpoujkaitas notakatsin ijkon kemej kijtoua Efesios 5:33. Uan yejua nechnextiliani ke okachi nechtasojta, nechyekpia uan kichiua maj kuali nimomachili”.
Para tikonmatis toni okachi uelis kinpaleuis akin monamiktijkejya, xikontemo itech jw.org amaix ¡Taijxitilis! tapoual 2 xiuit 2018, tein motokaytia “12 taman tein kinpaleuis kalyetouanij maj yolpakikan”.
2. Kemej timouikaj iniuan oksekin
Miakej kinchikoitaj oksekin porin okseko kayomej, tataman kemej ixtamatij, porin kinuelitaj inintakaikniuan oso ininsiuaikniuan oso porin tataman inintaneltokalis.
TEIN BIBLIA TAMACHTIA: “Xikintakachiuakan nochin” (1 Pedro 2:17).
TEIN KIJTOSNEKI: Biblia tamachtia ke amo moneki tikinchikoitaskej akin okseko kayomej oso kiuelitaj inintakaikniuan oso ininsiuaikniuan. Ta techiluia ke moneki tikinpoujkaitaskej nochin, maski okseko kayomej oso kipiaskej tomin oso amo (Hechos 10:34). Uan maski taman tein kineltokaskej oksekin oso amo tikuelitaskej tein kichiuaj, moneki tiyeskij tikualtakamej iniuan uan tikinpoujkaitaskej (Mateo 7:12).
TEIN BIBLIA TAYOLMAJXITIA TAPALEUIA: Daniel kimachtijkej ke akin kayomej Asia kiixnamikiaj ialtepeuj. Yejua ika peuak kintauelita akin ompa kayomej katkaj, uan hasta kinpinaujtiaya teixteno. Yejua kijtoua: “Niknemiliaya ke kuali tein nikchiujtoya porin ijkon nikpaleuiaya noaltepeuj. Amo keman niknemilij ke tein nikchiuaya uan tein niknemiliaya amo kuali yetoya”.
Satepan Daniel momachtij tein kijtoua Biblia. Yejua kijtoua: “Monekik nikpatas kemej nitanemiliaya. Maski seseko tikayomej Dios amo techchikoita. Uan nejua no monekia ijkon nikchiuas”. Uan axkan, ¿toni kinemilia Daniel keman kiixmati aksa? Yejua kijtoua: “Amo nikitakok kani kayot, ta nochin nikintasojta uan kuali nimouika iniuan miakej akin okseko kayomej”.
Komo tikonneki tikonmatis okachi, xikontemo itech jw.org amaix ¡Taijxitilis! tapoual 3 xiuit 2020, tein motokaytia “¿Uelis amo akin techikoitasok?”.
3. Tomin
Miakej mochikauaj kipiaskej miak tomin para yolpakiskej uan kuali nemiskej satepan.
TEIN BIBLIA TAMACHTIA: “Tamatilis tapaleuia ijkon kemej tomin tapaleuia, sayoj ke nejon tamatilis tein kipia akin kiixmati Dios okachi kipia ipatiuj porin kipaleuia maj amo kipolo inemilis” (Eclesiastés 7:12).
TEIN KIJTOSNEKI: Maski tomin tapaleuia, nejon amo kijtosneki ke techpaleuis maj tiyolpakikan uan maj kuali tinemikan satepan (Proverbios 18:11; 23:4, 5). Tein yekmelauj techpaleuis maj ijkon tinemikan, yejua komo tikchiuaj tein Dios techyolmajxitia itech Biblia (1 Timoteo 6:17-19).
TEIN BIBLIA TAYOLMAJXITIA TAPALEUIA: Se takat kayot Indonesia akin monotsa Cardo kiixtalij kipias miak tomin, uan uelik kichiuak. Yejua kijtoua: “Niaya kampa niknekia, nikouaya carros, kalmej uan okseki taman tein patiyoj. Nejua nikpiaya nochi tein miakej kinekiskiaj kipiaskej”. Sayoj ke Cardo kipoloj nochi tein kipiaya. Yejua kijtoua: “Nechkajkayaujkej uan nechixtekilijkej nochi tomin tein nimotanilijka. Miak xiujmej niteltekitik porin niknekia nikpias miak tomin, sayoj ke satepan amo kuali nimomachilij, semi nitayokoyaya uan nikmachiliaya ke amo teyi nichiujkejok katka”.
Cardo kiixtalij kichiuas tein Biblia tayolmajxitia de keniuj moneki tikitaskej tomin, uan axkan tekiti sayoj para kipias tein moneki uan amo para motomintis. Yejua kijtoua: “Axkan kuali nimouika iuan Dios uan nejon yejua tein okachi kipia ipatiuj. Axkan kuali nikochi uan yekmelauj niyolpaki”.
Komo tikonneki tikonmatis okachi tein kijtoua Biblia ika tomin, xikontemo itech jw.org tamachtilis ¿Uelis mitsonpaleuis nemachtil uan tomin xikonchia kuali xionnemi?, tein moajsi itech amaix Tanejmachtijkej tapoual 3 xiuit 2021.
4. Keman omen mosentekaj
Nochin tataman kemej tanemiliaj de akonimej uelis mosentekaskej.
TEIN BIBLIA TAMACHTIA: “Amo xiauilnemikan. Nansejsemej moneki nankimatiskej keniuj nankikuiskej namonakayo para nanyeskij nanchipaujkej iixpan Dios uan nankiyolpaktiskej, uan amo nankichiuaskej kemej akin amo kiixmatij Dios, porin yejuan kitelnejnektokej motekaskej iuan aksa uan amo keman ixuij” (1 Tesalonicenses 4:3-5).
TEIN KIJTOSNEKI: Biblia kijtoua akonimej amo moneki mosentekaskej. Tajtol “amo xiauilnemikan” kijtosneki nochi tataman auilnemilis kemej ijkuak se takat oso se siuat moteka iuan aksa akin amo inamik, keman aksa moteka iuan okse porin kitaxtauia, keman omen akin amo monamiktijtokej mosentekaj, keman aksa moteka iuan itakaikniuj oso isiuaikniuj, uan keman aksa auilnemi iuan se tapial (1 Corintios 6:9, 10). Sayoj uelis mosentekaskej se takat uan se siuat akin monamiktijkejya, nejon se netetayokolil tein Dios kinmaka (Proverbios 5:18, 19).
TEIN BIBLIA TAYOLMAJXITIA TAPALEUIA: Kylie se siuatsin akin nemi Australia kijtoua: “Keman noseltiok katka, niknemiliaya ke komo nimotekaya iuan aksa yejua nechtasojtaskia uan nechyekpiaskia. Sayoj ke amo ijkon panok, porin amo kuali nimomachiliaya uan nechyolkokojkej”.
Satepan Kylie peuak momachtia Biblia, uan kiixtalij kichiuas tein tayolmajxitia ompa keman ika tajtoua ke omen ueli mosentekaj. Yejua kijtoua: “Nikita ke tiktakamatiskej itanauatiluan Dios techpaleuia maj amo titajyouikan. Axkan nikchiujtok tein Jehová tanauatia. Nimonamiktijya uan notakatsin nechtasojta uan nechyekpia. Kemej nikchiua tein Biblia tayolmajxitia, nechpaleuiani maj amo oksepa nechyolkokokan”.
Komo tikonneki tikonmatis okachi, xikontemo itech jw.org tamachtilis “¿Qué dice la Biblia sobre vivir juntos sin estar casados?”.
ToDios akin techchijchiuak techpaleuia maj tikmatikan toni kuali yetok uan toni amo. Uan semi tapaleuia maj tikchiuakan tein tayolmajxitia maski kemansa techouijkisas. Komo ijkon tikchiuaj amo sayoj tiyolpakiskej seki tonalmej, ta nochipaya.
