1. ¿Keniuj uelis tiktakamatiskej Dios uan tekiuanij?

BIBLIA tamachtia ke moneki tikintakamatiskej tekiuanij. Sayoj ke no tamachtia ke nochipa moneki tiktakamatiskej Dios (Hech. 5:29; Tito 3:1). ¿Keniuj uelis tikchiuaskej nejin ome taman? Itech Biblia moajsi se tayolmajxitilis tein uelis techpaleuis. Jesús kijtoj: “Xikmaktilikan in rey César ten kinamiki xikmaktikan César, uan xikmaktilikan Dios ten kinamiki xikmaktikan Dios” (Mat. 22:21). ^[1] ¿Keniuj tikmakaj “in rey César ten kinamiki”? Keman tiktakamatij tanauatilmej tein kitaliaj tekiuanij, keman tikinpoujkaitaj tekiuanij uan keman tikixtauaj impuestos (Rom. 13:7). Sayoj ke ¿komo tekiuanij technauatiaj maj tikchiuakan teisa tein Dios amo kiyolpaktia? Amo tikintakamatiskej. Sayoj ke nochipa moneki tikinpoujkaitaskej.

2. ¿Keniuj tiknextiaj ke amo tikpaleuiaj nion se tekiuajyot?

² Se taman kemej uelis tikmakaskej “Dios ten kinamiki” yejua keman amo tikpaleuiaj nion se tekiuajyot (Is. 2:4). ¿Keniuj tikchiuaj nejin? Amo tikinixnamikij tekiuajyomej, porin tikmatij ke  Jiova kinkaua maj taixyekanakan. Amo no titapaleuiaj keman mochiuaj iluimej tein ika kiueyichiuaj altepet (Rom. 13:1, 2). Amo keman tiktemouaj tikpataskej se tekiuajyot nion tiktemouaj maj se tekiuaj kichiua tein tejuan tiknekij. Uan amo no tikixtaliaj akoni tekiuajtis nion tiktemouaj maj techmakakan se tekit itech tekiuajyot.

3. ¿Keyej moneki amo tikpaleuiskej nion se taltikpaktekiuajyot?

³ ¿Keyej Dios amo kineki maj tikpaleuikan nion se taltikpaktekiuajyot? Onkak miak taman. Yekinika, porin tiktojtokaj ineskayo Jesús. Yejua kijtoj: “Nejuatsin amo nipoutinemi nikan taltikpak”. Yejua ika amo keman kitemoj pouis itech nion se taltikpaktekiuajyot nion tapaleuij itech neteuilismej (Juan 6:15; 17:16). Ojpatika, porin sayoj tikpaleuiaj iTekiuajyo Dios. Komo tikpaleuiskiaj se taltikpaktekiuajyot, ¿keniuj ueliskia tikinyekiluiskej taltikpakneminij ke sayoj iTekiuajyo Dios kiyektalis kuejmolmej tein tikpiaj? Expatika, porin nejon tapaleuia maj amo tixexeliujtokan iniuan tokniuan itech nochi taltikpak. Taneltokalismej tein amo melaujkej kinxexelouaj taltikpakneminij porin kinpaleuiaj tataman tekiuajyomej (1 Ped. 2:17).

4. 1) ¿Keniuj tikmatij ke okachi techouijmakas amo tikpaleuiskej nion se tekiuajyot? 2) ¿Keyej moneki tikchiuaskej axkan tein techpaleuis maj amo tikpaleuikan nion se tekiuajyot?

⁴ Itech toxolal xa amo kichiaj maj tikinpaleuikan akin kinekij pouiskej itech tekiuajyot. Sayoj ke ijkon kemej okachi motokijtiuits tonal keman ixpoliuis nochi tein Satanás kiixyekana, okachi techouijmakas amo tikpaleuiskej nion se tekiuajyot. Kemej kijtoua 2 Timoteo 3:3, 4, itech nejin tonalmej taltikpakneminij amo kinekij kipataskej inintanemilil uan amo kitemouaj tepaleuiskej. Uan ijkon kemej panotiyaskej tonalmej okachi xexeliujtoskej. Uan no, ijsiujka uelis mopatas kemej motaixyekana itech se tekiuajyot. Nejin panouaniya itech seki altepemej, uan tokniuan kipanouanij uejueyi ouijkayomej. Yejua ika moneki axkan tikchiuaskej nochi tein techpaleuis maj tiksentokakan amo tikpaleuikan nion se tekiuajyot hasta keman okachi ouij yeski. Maj tikitakan naui taman tein uelis tikchiuaskej.

5. ¿Keniuj Jiova kinita taltikpaktekiuajyomej?

⁵ Se taman tein uelis tikchiuaskej axkan tein techpaleuis maj amo tikpaleuikan nion se tekiuajyot yejua komo tikinitaj taltikpaktekiuajyomej kemej Jiova kinita. Yejuatsin amo kinmaka itatiochiualis nejin tekiuajyomej porin keman kinchijchiuak taltikpakneminij, amo kiixtalij maj kinixyekanakan okseki taltikpakneminij (Jer. 10:23). Jiova kinita nochin taltikpakneminij kemej kalyetouanij. Sayoj ke tekiuajyomej kinxexelouaj keman kijtouaj ke ininaltepeuj okachi kuali ke okseki. Uan maski seki tekiuajyomej mochikauaj kichiuaskej tein kuali, amo ueli kiyektaliaj nochi kuejmolmej tein tikpiaj. Uan no, taltikpaktekiuajyomej kiixnamikij iTekiuajyo Dios, tein peuak taixyekana itech xiuit 1914. Amo uejkaua, iTekiuajyo Dios kinixpoloti nochi taltikpaktekiuajyomej (xikonixtajtolti Salmo 2:2, 7-9).

6. ¿Keniuj moneki tikinitaskej tekiuanij?

⁶ Dios kikaua maj moajsikan taltikpaktekiuajyomej porin tapaleuiaj maj onka tepitsin yekyetolis uan maj amo semi mochiua tein amo kuali. Nejin techpaleuia maj ueli tikteixmatiltikan iTekiuajyo Dios (Rom. 13:3, 4). Jiova hasta techiluia maj ininka timotataujtikan tekiuanij uan ijkon amo teyi techtsakuilis  maj ueli tikueyichiuakan (1 Tim. 2:1, 2). Komo aksa techchiuilia tein amo kuali, uelis tikintajtaniskej tekiuanij maj techpaleuikan, ijkon kemej kichiuak tatitanil Pablo (Hech. 25:11). Uan maski Biblia kijtoua ke Satanás kinixyekana taltikpaktekiuajyomej, amo kijtoua ke yejua kichiualtia sejse tekiuaj tein kineki (Luc. 4:5, 6). Yejua ika moneki amo keman tikijtoskej ke Satanás kichiualtijtok teisa se tekiuaj. Biblia kijtoua maj amo tikinijijtokan tekiuanij uan maj tikinpoujkaitakan (Tito 3:1, 2).

7. ¿Keniuj moneki amo titanemiliskej?

⁷ Kemej tiknekij tiktakamatiskej Dios, amo tikpaleuiaj nion se tekiuajyot uan nion se tekiuaj. Nejin uelis yeski ouij, okachiok komo tein kinemiliaj oso tein kiixtalijtokej kichiuaskej uelis techpaleuis. Kemej neskayot, maj tiknemilikan ke kampa tinemij taltikpakneminij kiixnamikij tekiuajyot porin kichiuak miak taman tein kintajyouiltij. Xa nejon tekiuajyot no kinteltajyouiltiani tokniuan. ¿Toni tikchiuaskej? Melauak ke amo tikinpaleuiskej akin taixnamikij. Sayoj ke ¿titanemiliskej kemej yejuan uan itech toyolijtik tiknejnekiskej maj tatanikan? (Efes. 2:2.) Komo amo tiknekij tikpaleuiskej nion se tekiuajyot, moneki timoyekpiaskej ika tein tikijtouaj uan tikchiuaj. Sayoj ke no motelneki maj amo tiknemilikan ke semej kuali yetok tein kinemilia oso ke okachi kuali ke okse.

8. ¿Keniuj uelis tiknextiskej “kuali tanemililis” uan tikchiuaskej “ten kuali” keman techouijmakas amo tikpaleuiskej nion se tekiuajyot?

⁸ Ojpatika taman tein uelis tikchiuaskej tein techpaleuis maj amo tikpaleuikan nion se tekiuajyot yejua komo tiknextiaj “kuali tanemililis keme kouat ten kimati kenin mopaleuis” uan no “yolkualtagayot ijkon keme in paloma ten sayo kinchiuilia ten kuali” (xikonixtajtolti Mateo 10:16, 17). ¿Keniuj uelis tiknextiskej “kuali tanemililis”? Keman achto tiknemiliaj tein xa uelis tikpanoskej. ¿Uan keniuj uelis tikchiuaskej “ten kuali”? Keman amo tikpaleuiaj nion se tekiuajyot itech nejon tein tikpanoskej. Maj tikitakan seki taman uan tein techpaleuis maj amo tikpaleuikan nion se tekiuajyot.

9. ¿Ika toni moneki timopiaskej keman titajtoskej iniuan oksekin?

⁹ Keman titajtouaj iniuan okseki taltikpakneminij. Moneki timoyekpiaskej keman taltikpakneminij peua ika tajtouaj tekiuajyomej. Kemej neskayot, komo ika titajtojtokej iTekiuajyo Dios iuan aksa, moneki amo tikiluiskej ke techyolpaktia oso amo techyolpaktia itanemililuan se tekiuaj oso akin kinekij pouiskej itech tekiuajyot. ¿Uan komo aksa kineki tajtos touan ika tein taltikpakneminij kinemiliaj ke uelis kiyektalis kuejmolmej tein onkak nikan taltikpak? Maj tiknextilikan itech Biblia ke iTekiuajyo Dios senkis kiyektalis nejon kuejmolmej. ¿Uan komo kineki tajtos ika seki taman kemej keman sekin kimiktiaj se konetsin achto ke yolis oso keman ome takamej oso ome siuamej monamiktiaj? Moneki tikiluiskej tein Biblia tamachtia uan tikmelauiliskej keniuj timoojtokaltiaj ika tein kijtoua. ¿Uan komo kijtoua ke moneki moijkuanis oso mopatas se tanauatil? Keman panos nejon, maj amo tikijtokan toni tiknemiliaj nion maj tikteltemokan maj kipata tein kinemilia.

10. ¿Keniuj uelis amo tikpaleuiskej nion se tekiuajyot keman tikitaj oso tikixtajtoltiaj kampa moteixmatiltia tanauatilmej?

¹⁰ Keman tikixtajtoltiaj oso tikakij kampa moteixmatiltia tanauatilmej. Kemansa, kampa  moteixmatiltia tanauatilmej kitelpaleuiaj kemej tanemiliaj oso tein kichiuaj seki taltikpakneminij. Kemansa, itech seki uejueyi altepemej tekiuanij kiixyekanaj nochi tein moteixmatiltia ompa. Komo kampa moteixmatiltia tanauatilmej oso se akin kiteixmatiltia kipaleuia se tekiuajyot, moneki timoyekpiaskej maj amo ijkon titanemilikan. Kemej neskayot, moneki timotajtaniskej: “¿Nikuelita nikakis se akin kiteixmatiltia tanauatilmej porin no nitanemilia kemej yejua keman ininka tajtoua tekiuanij?”. Komo amo tiknekij tikpaleuiskej nion se tekiuajyot, maj amo semi tikixtajtoltikan oso tikitakan kampa moteixmatiltia tanauatilmej tein kipaleuiaj se tekiuajyot, okachi kuali maj tiktemokan periódicos oso kampa kiteixmatiltiaj tanauatilmej tein amo kipaleuiaj nion se tekiuajyot. Uan keman tikitaskej oso tikixtajtoltiskej tanauatilmej, maj nochipa tikelnamikikan tein Biblia tamachtia (2 Tim. 1:13).

11. ¿Toni uelis panos komo tiktelpatiuitaj tein tikpiaj?

¹¹ Komo tiktelpatiuitaj tein tikpiaj. Komo tiktayekanaltiaj tikpiaskej tomin uan okseki taman, okachi techouijmakas amo tikpaleuiskej nion se tekiuajyot. Maj tikitakan se neskayot. Itech ueyi altepet Malaui, satepan ke panok xiuit 1970 miakej tokniuan monekik kikauaskej nochi tein kipiayaj porin amo kinekkej kinpaleuiskej akin kinekiaj tekiuajtiskej. Sayoj ke se tokniuj akin motokaytia Ruth kijtoua ke sekin amo kinekkej kikauaskej tein kipiayaj. Maski cholojkej iniuan okseki tokniuan kampa tel miakej motepalotijkej, ika tamik kinpaleuijkej akin kinekiaj tekiuajtiskej porin ijkon uelkej mokepkej ininchan. Sayoj ke tel miakej itekitikauan Dios amo kipaleuianij nion se tekiuajyot maski nejon kijtosneki ke moixpanoltiskej ika tepitsin tomin oso kipoloskej nochi tein kipiayaj (Heb. 10:34).

12, 13. 1) ¿Keniuj Jiova kinita taltikpakneminij? 2) ¿Keniuj uelis tikmatiskej ox peua timoueyinekij ika toaltepeuj?

¹² Komo timoueyinekij ika toaltepeuj oso toxolal. Noyampa moita ke taltikpakneminij moueyinekij ika ininaltepeuj, ininxolal, kemej nemij ompa oso kemej ixtamatij. Sayoj ke Jiova amo kinemilia ke se taltikpaknenkej oso miakej okachi ueyichiuanimej ke oksekin. Yejuatsin amo techchichikotasojta. Melauak ke Dios techchijchiuak titatamamej. Uan tikitaskej nejon techyolpaktia. Jiova amo techtajtania maj amo tikchiuakan tein momattokej kichiuaskej kampa tinemij. Sayoj ke amo no kineki maj tiknemilikan ke tejuan okachi tiueyichiuanimej ke oksekin (Rom. 10:12).

¹³ Moneki amo keman timotelueyinekiskej ika toaltepeuj hasta tiknemiliskej ke okachi kuali ke okseki. Komo ijkon timomachiliaj, techouijmakas amo tikpaleuiskej nion se tekiuajyot. Yejua nejon panok itech yekinika siglo. Seki tokniuan hebreos amo kinpoujkaitakej tokniuan siuamej kayomej Grecia akin amo nemiaok ininnamik (Hech. 6:1). ¿Keniuj uelis tikmatiskej ox peua timoueyinekij? Maj tiknemilikan: “¿Toni nikchiua keman se tokniuj akin kayot okse ueyi altepet nechyolmajxitia? ¿Amo nikaki porin niknemilia ke itech noaltepeuj okachi kuali tikchiuaj teisa?”. Komo tiknemiliaj nejon, maj tikelnamikikan ke Biblia kijtoua ke moneki tiyeskij tiyolyemankej uan tiknemiliskej ke oksekin okachi ueyichiuanimej ke tejuan (Filip. 2:3).

14. 1) ¿Keniuj uelis techpaleuis netataujtil? 2) Xikonijto keniuj tapaleuia netataujtil ika se neskayot tein moajsi itech Biblia.

¹⁴ Expatika taman tein techpaleuis maj amo tikpaleuikan nion se tekiuajyot yejua keman  tiktemouaj maj Jiova techpaleui. Netataujtil uelis techtelpaleuis. Kemej neskayot, uelis tiktajtaniskej Dios maj techmaka iyektikatsin espíritu, tein uelis techpaleuis maj amo tiyolijsiuikan uan maj ueli timotsakuilikan. Nejin kualneskayomej techpaleuiskej komo tekiuanij takajkayauaj oso kichiuaj tein amo kuali. No uelis tiktajtaniskej Dios maj techmaka tamatilis tein techpaleuis maj tikmatikan kemanian uelis nesis ke tikpaleuijtokej se tekiuajyot uan maj techmaka chikaualis tein techpaleuis maj tikchiuakan tein kuali (Sant. 1:5). Uelis yeski ke kemej amo tikpaleuiaj nion se tekiuajyot techtsakuaskej oso techtatsakuiltiskej. Komo techpanoua nejon, maj tiktajtanikan Jiova maj techmaka yolchikaualis tein techpaleuis maj kuali tikmelauakan keyej sayoj tikpaleuiaj iTekiuajyo. Uelis senkis tikmatiskej ke Jiova techpaleuis maj titaxikokan. Uelis tikitaskej keniuj netataujtil tapaleuia itech Hechos 4:27-31 (xikonixtajtolti).

15. ¿Keniuj uelis techpaleuis Biblia maj amo tikpaleuikan nion se tekiuajyot? (Xikonita kampa kijtoua “ ITajtol Dios kinpaleuij maj amo mokalakikan itech tekiuajyot”.)

¹⁵ Jiova techmakak Biblia tein ika techyolchikaua. Onkak seki tajkuilolmej tein uelis techpaleuiskej maj sayoj tikpaleuikan iTekiuajyo Dios. Uelis itech titanemiliskej uan timochikauaskej maj mokaua itech totanemilil takan se tonal amo ueli tikpiaj se biblia. Biblia no uelis techpaleuis maj okachi titakuaujtamatikan ke Dios kichiuas tein motenkauak. Nejin techpaleuis maj titaxikokan keman techtajyouiltiskej (Rom. 8:25). Maj tikixpejpenakan tajkuilolmej tein ika tajtouaj Xochital uan maj timochikauakan tiknemiliskej tein tiknekij tikpiaskej ompa.

16, 17. ¿Toni techmachtia ininneskayo itekitikauan Dios akin amo kipaleuijkej nion se tekiuajyot? (Xikonita taixkopin ipeujyan tamachtilis.)

¹⁶ Naujpatika taman tein uelis techpaleuis maj amo tikpaleuikan nion se tekiuajyot yejua keman titanemiliaj itech ininneskayo itekitikauan Jiova akin amo kikaujkej. Ne uejkauj, miakej kinextijkej yolchikaualis uan kiixpejpenkej kichiuaskej tein kuali tein kinpaleuij maj amo kipaleuianij nion se tekiuajyot. Kemej neskayot, Sadrac, Mesac uan Abednego amo kinekkej kiueyichiuaskej se tiotsin tamachijchiuj tein kiixnextiaya tekiuajyot ompa Babilonia (xikonixtajtolti Daniel 3:16-18). Nejin tein panok kinpaleuia axkan miakej tokniuan maj kipiakan yolchikaualis uan maj amo kiueyichiuakan bandera tein kiixnextia ininaltepeuj. Maj no titanemilikan itech ineskayo Jesús. Yejua amo kipaleuij nion se tekiuajyot nion mokalakij itech okseki taman tein kichiuaya maj  taltikpakneminij moxexelokan. Kimatia ke kuali neskayot tein kikauaskia kinpaleuiskia itatojtokakauan. Yejua ika kinyolchikauak uan kiniluij: “Nejuatsin nochi niktamixijxikoj ya in chikaualis den amokuali Satanás ten takitskijtinemi nikan taltikpak” (Juan 16:33).

¹⁷ Itech totonaluan, miakej tokniuan amo kipaleuianij nion se tekiuajyot. Sekin kintelteuianij, kintsakuanij oso hasta kinmiktianij porin sayoj kitakamatij Jiova. Ininneskayo techpaleuia maj tikpiakan yolchikaualis. Se tokniuj takat akin kayot Turquía kijtoj: “Franz Reiter katka se telpoch akin kimiktijkej porin amo kinekik tapaleuis iniuan itateuijkauan Hitler. Amat tein kijkuilouilij imomaj se youak achto ke kimiktiskiaj kinextia ke semi takuaujtamatia iuan Jiova. Nejua niknekia nikchiuas kemej yejua komo se tonal no ijkon nechpanouaya”. ^[2]

18, 19. 1) ¿Keniuj uelis techpaleuiskej tokniuan itech nechikol maj amo tikpaleuikan nion se tekiuajyot? 2) ¿Toni tikonixtalijya tikonchiuas axkan?

¹⁸ Tokniuan uelis techpaleuiskej maj amo tikpaleuikan nion se tekiuajyot. Komo tikpanotokej se ouijkayot, maj titajtokan iniuan tayekananij. Yejuan uelis kuali techyolmajxitiskej ika Biblia. Uan no, komo okseki tokniuan itech nechikol kimatij tein tikpanotokej, no uelis techyolchikauaskej. Uelis tikiniluiskej maj kitataujtikan Jiova maj techpaleui. Sayoj ke tejuan no uelis tikinyolchikauaskej tokniuan uan ininka timotataujtiskej (Mat. 7:12). Itech jw.org moajsi inintokay tokniuan akin tsaktokej. Tikajsiskej itech tamachtilis “Testigos de Jehová presos por sus creencias (por países)”, tein moajsi itech taxelol PRENSA > ASUNTOS LEGALES. Maj tikixpejpenakan inintokay seki tokniuan uan maj tiktajtanikan Jiova maj kinpaleui maj kipiakan yolchikaualis uan maj amo kikauakan (Efes. 6:19, 20).

¹⁹ Ijkon kemej okachi motokijtiuits tonal keman ixpoliuis nochi tein amo kuali, uelis yeski ke tekiuajyomej okachi techchikaujkauiskej maj tikinpaleuikan. Yejua ika motelneki maj axkan tikchiuakan nochi tein techpaleuis maj amo tikpaleuikan nion se tekiuajyot.