Felisa: Nimoskaltij España iniuan nochankauan akin katkaj católicos. Trece nochankauan katkaj tiopixkamej oso tekitikej tiopan. Semej katka iprimo nomomaj uan tamachtiaya itech se ininkaltamachtiloyan católicos. Keman momikilij, papa Juan Pablo ll kijtoj ke ueliskia kiixtaliskej maj kiueyichiuakan kemej se tiotsin. Nochankauan amo semi kipiayaj tomin. Nopopaj tekitia kampa kichijchiuayaj teposmej uan nomomaj tekitia milaj. Tikatkaj chikueyi tiiknimej uan nejua nitayekanaya.

Keman nikpiaya 12 xiujmej, peuak se neteuilis ompa España. Satepan ke tamik, tekiuanij kitsakkej nopopaj porin amo kinpaleuiaya. Nomomaj tel amo kiajsia tein ika techtamakas tinochin. Yejua ika kintitanik eyi nokniuan itech se kali kampa nemij monjas itech xolal Bilbao. Ompa, Araceli, Lauri uan Ramoni amo mayanpanoskiaj.

Araceli: Keman techkauatoj ompa, nejua nikpiaya 14 xiujmej, Lauri 12 uan Ramoni 10. Ompa, monjas techtachipaualtiayaj. Ome xiuit satepan techtitankej itech se okachi ueyi kali itech xolal Zaragoza, kampa kinyekpiayaj akin xiuejkejya. Monekia titachipauaskej kampa takualchiuayaj uan nochipa titelsiouiaj. Semi tikintemouayaj tochankauan.

Felisa: Keman nokniuan yajkej Zaragoza, nomomaj uan notío kiixtalijkej no ompa nechtitaniskej. Notío katka tiopixkat. Yejua uan nomomaj kinekiaj maj amo nikitaniok se telpoch akin kinekia maj  okachi timoixmatikan. Nechyolpaktiaya nikmatis ke ninemiskia seki tonalmej iniuan monjas, porin niktasojtaya Dios. Mojmostaj niyaya misa uan hasta niknekia nimochiuas misionera, kemej se noprimo akin yetoya África.

Sayoj ke ompa semi amo kuali nimomachiliaya porin amo uelia nikchiuaya tein niknemilijka. Monjas amo nechyolchikaujkej maj niktekitili Dios itech okse ueyi altepet, kemej nejua niknekia. Yejua ika se xiuit satepan nimokepak kalijtik kampa nikyekpiaskia notío, akin tiopixkat katka. Nitapaleuiaya ika tekimej tein mochiuaya kalijtik, uan mojmostaj tiotak tikijtouayaj rosario. Nechtelyolpaktiaya nikyektalis xochimej tiopan uan niktakentis virgen uan okseki tiotsitsin.

Araceli: Monekia nikchiuas seki netenkaualismej uan ijkon ueliskia nimochiuas monja. Yekinika netenkaualismej nikchiuak ompa Zaragoza. Sayoj ke satepan monjas seseko techtitankej nokniuan uan nejua. Lauri kititankej itech kali kampa nemij monjas ompa Valencia, Ramoni mokauak Zaragoza, uan nejua niyajki Madrid. Ompa nikchiuak ojpatika netenkaualismej. Kampa nemiaj monjas ompa Madrid mokalotiayaj miakej momachtianij uan no akin xiuejkejya, yejua ika onkaya miak tekit. Nitekitia itech kaltapajtiloyan tein ompa moajsia.

Niknemiliaya ke keman nimochiuaskia monja nochipa nikixtajtoltijtoskia uan nimomachtijtoskia Biblia. Sayoj ke amo katka kemej niknemilijka. Amo tikixtajtoltiayaj Biblia nion ika titajtouayaj Dios oso Jesús. Nimomachtij nitajtos tepitsin latín, ininnemilis tiotsitsin akin católicos kinueyichiuaj uan nikueyichiuaya María. Sayoj ke semi techtekitiltiayaj.

Peuak semi nimotekipachoua. Niknemiliaya ke monekia niktantos tomin tein ika nikinpaleuiskia nochankauan uan amo nitekititos ompa uan maj oksekin motomintikan. Yejua ika nitajtoj iuan monja akin taixyekanaya uan nikiluij ke niknekia niyas. Yejua nechtsakuato porin kinemiliaya ke ijkon nikpataskia kemej nitanemiliaya.

Monjas nechkaujkej maj nikisa, sayoj ke keman kiitakej ke niksentokaya niknekia niyas, oksepa nechtsakkej. Expa kichiujkej nejin. Ompa nechiluijkej ke ueliskia niyas sayoj komo nikijkuilouaya nejin: “Niyouj porin nikneki niktekitilis Satanás uan amo Dios”. Amo uelia nikneltokaya nejon. Nejua niknekia niyas, sayoj ke amo keman nikijkuiloskia nejon. Yejua ika nikijtoj ke niknekia nitajtos iuan se tiopixkat. Nikiluij nochi, uan yejua nechpaleuij maj se obispo kijtouani maj oksepa nechtitaninij Zaragoza. Ompa niyetoya seki metsti hasta ke nechkaujkej maj nikisa. Tepitsin satepan, Lauri uan Ramoni no kikaujkej kali kampa nemij monjas.

Felisa: Satepan nimonamiktij uan niyajki ninemito itech se xolal tein monotsa Cantabria ompa España. Ompa niksentokaya niyaya misa nochi semanas. Se domingo, tiopixkat kikixtij amatajkuilol La verdad que lleva a vida eterna. Ika miak kualanyot techiluij ke komo semej tikpiayaj nejon amatajkuilol, maj tikmakanij oso maj tiktamotanij itech tajsol.

Nejua amo nikpiaya nejon amatajkuilol, sayoj ke niknekia se. Seki tonalmej satepan, ome siuamej akin katkaj itaixpantijkauan Jiova ualajkej nokalijtik uan nechkauilijkej se. Niktamiixtajtoltij nejon youal. Keman siuamej mokepkej, nechtajtanijkej ox niknekia maj nechmachtikan ika Biblia, uan nikijtoj ke kemaj.

Nejua nochipa niknekia nikchiuas tein Dios kiyolpaktia. Yejua ika keman nikixmatik keniuj yekmelauj tamati Jiova, peuak nikteltasojta. Niknekia nikintapouis nochin tein nimomachtijtoya. Nimoauij itech xiuit 1973. Nochipa keman niuelia, niktemouaya nikinnojnotsas nochankauan. Sayoj ke nochin nechiluiayaj ke nimopolojtoya, okachiok nokniuj Araceli.

Araceli: Kemej itech kali kampa nemij monjas nechchiuilijkaj tein amo kuali, nikualantoya uan amo nechyolpaktiaya tein kichiuayaj itech notaneltokalis. Maski ijkon, niksentokaya niyaya misa domingo uan mojmostaj nikijtouaya rosario. Niknekiaok nikajsikamatis Biblia, uan niktajtaniaya Dios maj nechpaleuiani. Se tonal, Felisa nechtapouij tein momachtijtoya. Sayoj ke nejua amo nechyolpaktiaya tein kijtouaya. Nikitak ke tel yolpakia uan niknemilij ke nion kimatia toni kineltokaya.

Satepan nimokepak Madrid kampa nitekitiskia. Ompa nimonamiktij. Ijkon kemej panokej xiujmej nikitak ke akin nochipa yayaj tiopan amo monejnemiltiayaj kemej Jesús tamachtij. Yejua ika amo niyajkiok tiopan uan amo niktapouiayaok tiopixkat notajtakoluan. Amo nikneltokayaok ke tiotsitsin tepaleuiaj nion ke onkak miktan. Hasta nikintamotak tiotsitsin tein nikinpiaya. Tein melauj, amo nikmatia ox nikchiujtoya tein kuali, sayoj ke nikchiuaya porin itech notaneltokalis amo mochiuaya  tein nikchiaya. Nikiluiaya Dios: “Nikneki nimitsixmatis, ¡xinechpaleui!”. Nikelnamiki ke itaixpantijkauan Jiova miakpa tanotskej nochan, sayoj ke amo keman nikintatapouilij. Amo nitakuaujtamatiaok itech nion se taneltokalis.

Lauri nemia Francia, uan Ramoni nemia España. Kemej itech xiuit 1980 yejuan peujkej momachtiaj Biblia iniuan itaixpantijkauan Jiova. Niknemiliaya ke yejuan no kinkajkayaujtoyaj ijkon kemej Felisa. Satepan peuak kuali nimouika iuan Angelines, se siuat akin nemia kampa ika nejua ninemia, akin no katka itaixpantijkauj Jiova. Miakpa, yejua uan inamik nechtajtanijkej ox niknekia nimomachtis Biblia. Nejua nikiniluiaya ke amo nechyolnotsaya nipouis itech nion se taneltokalis. Sayoj ke yejuan kiitayaj ke nechyolnotsaya tein kijtoua Biblia. Ika tamik, se tonal nikiniluij ke iniuan nimomachtiskia sayoj komo nikuia noBiblia, katka se Nácar-Colunga.

Felisa: Keman nimoauij itech xiuit 1973, moajsiaj 70 itaixpantijkauan Jiova itech xolal Santander, tein poui Cantabria. Ompa moajsij tel miakej xolalkonemej. Monekia tel uejka tiyaskej itech autobús uan ijkon ueliskia tikinnojnotsaskej nochin taltikpakneminij. Satepan peuak tiyouij itech se coche.

Itech nochi nejin xiujmej nikinmachtiani miakej ika Biblia. Miakej katkaj católicos, uan 11 moauijkej. Monekik amo niyolijsiuis. Ijkon kemej nejua nechpanok, monekia panos tonalmej hasta kiajsikamatiskiaj ke tein kineltokayaj amo katka melauak. Nejua nikmatia ke sayoj Biblia uan yektikatsin espíritu uelij kipaleuiaj aksa maj mopata uan maj kiajsikamati tein melauak (Heb. 4:12). Nonamik katka policía uan moauij itech xiuit 1979. Uan nomomaj peuak momachtia Biblia tepitsin achto ke momikiliskia.

Araceli: Keman peuak nimomachtia Biblia iniuan itaixpantijkauan Jiova, amo inintech nitakuaujtamatia. Sayoj ke satepan amo ijkon nimomachilijok porin nikitaya ke kichiuayaj tein tamachtiayaj. Okachi nitakuaujtamatia iuan Jiova uan itech tein kijtoua Biblia, uan okachi niyolpakia. Sekin akin nemiaj kampa ika nejua ninemia kiitakej nejin uan nechiluijkej: “Araceli, xiksentoka itech nejon ojti tein tikixpejpenak”.

Nikelnamiki ke nikiluiaya Jiova: “Tasojkamatik porin amo tinechsenkauak uan porin miakpa tinechpaleuij maj nikajsi melauak tamachtilis tein kitemaka Biblia”. Uan no, nikiluij Felisa maj nechtapojpoluiani ika tein nikiluijka. Amo timotajtolteuiajok, ta techyolpaktia ika titajtoskej Biblia. Nimoauij itech xiuit 1989, keman nikpiaya 61 xiujmej.

Felisa: Axkan nikpia 91 xiujmej uan nonamik amo nemiok. Amo semi ueli nikchiuaok miak taman kemej achto, sayoj ke nikixtajtoltiaok Biblia mojmostaj. Uan nochipa keman niueli, niyouj nechikolmej uan nitanojnotsati.

Araceli: Nikuelita nikintapouis tiopixkamej uan monjas keniuj tamati Jiova, xa porin katka nimonja. Kemansa kuali iniuan nimonojnotsani sekin. Miakej nikinkauiliani amatajkuilolmej uan amaixmej. Okachi nikelnamiki se tiopixkat akin miakpa iuan nitajtoj. Se tonal nechiluij ke melauak tein nikiluiaya. Sayoj ke nechiluij: “¿Kani niyas axkan ke nixiuejya? ¿Toni kijtoskej akin nikinmachtia tiopan uan nochankauan?”. Nejua niknankilij: “¿Uan toni kijtos Dios?”. Nikitak ke motayokoltij keman kiajsikamatik ke melauak tein nikijtouaya. Sayoj ke niknemilia ke amo moyolchikauaya mopatas.

Amo keman nikelkauas tonal keman nonamik nechiluij ke kinekia yas nechikol nouan. Yejua kipiaya panoua 80 xiujmej keman yajki yekinika nechikol, uan satepan, amo keman tapoloj. Momachtij Biblia uan peuak tanojnotsa. Kuali nikelnamiki kualtsitsin taman tein tikpanokej keman tisentanojnotsayaj. Momikilij ome metsti achto ke moauiskia.

Felisa: Keman peuak niktekitilia Jiova, eyi nokniuan siuamej amo kinyolpaktij. Sayoj ke satepan yejuan no kiixtalijkej mochiuaskej itaixpantijkauan Jiova. Tein melauj, nejin yejua se taman tein okachi kuali tein nechpanouani itech nonemilis. Axkan uelia tisenyetoyaj uan ika titajtouayaj toDios akin tiktasojtaj uan iTajtol, Biblia. Axkan uelia tiksenueyichiuayaj Jiova. *