1. ¿Toni tiknekij tikchiuaskej tinochin tiitekitikauan Dios uan keyej? (Xikonita taixkopin ipeujyan amaix.)

JESUCRISTO kinnauatij itatojtokakauan: “Xiyakan nochi tech in senmanauak uan xikinnextilikan nochi in taltikpakuani ma yejuan no ma mochiuakan nomomachtijkauan” (Mat. 28:19). Tinochin tiitekitikauan Dios tiknekij timomachtiskej kuali tikchiuaskej tekit tein yejuatsin techmakani (2 Tim. 4:5). Nejin tekit yejua tein okachi kipia ipatiuj uan moneki maj axkan tikchiuakan. Sayoj ke, uelis techouijmakas titanojnotsaskej miak tonalmej ijkon kemej tikuelitaskiaj.

2. ¿Toni taman uelis kichiuas maj techouijmaka titanojnotsaskej?

² Onkak okseki taman tein moneki tikchiuaskej kampa tikuij totiempo uan tochikaualis. Xa monekis titekitiskej miak horas uan ijkon tikinixpanoltiskej tochankauan. Xa no tikixnamikij ouijkayomej porin tejuan oso semej tokalyetouanij mokokoua, tikixnamikij tayokol oso porin tixiuejkejya. ¿Keniuj uelis tikixnamikiskej nochi nejon uan no kuali tikchiuaskej tekit itech tanojnotsalis?

3. ¿Toni techmatiltia tein kijtoj Jesús itech Mateo 13:23?

³ Maj amo timosenkauakan komo tein tikpanotokej techtsakuilia maj amo semi titanojnotsakan. Jesús kimatia ke amo tinochin ueliskia titanojnotsaskej miak tonalmej (xikonixtajtolti Mateo 13:23). Jiova semi kipatiuita keman tikchiuaj nochi tein tiuelij itech itekiyo (Heb. 6:10-12). Sayoj ke, xa no tikitaskej ke tiuelij okachi tiktekitiliskej Jiova. Itech nejin tamachtilis, tikitatij  toni uelis tikchiuaskej tein techpaleuis maj tiktayekanaltikan itekiyo Dios, maj tinemikan ika amo miak taman uan maj okachi kuali titanojnotsakan uan maj titamachtikan. Sayoj ke achto maj tikitakan toni kijtosneki kuali tikchiuaskej tekit itech tanojnotsalis.

4. ¿Toni kijtosneki kuali tikchiuaskej tekit itech tanojnotsalis?

⁴ Kuali tikchiuaskej tekit itech tanojnotsalis kijtosneki titanojnotsaskej uan titamachtiskej nochi tein tiueliskej. Sayoj ke Jiova amo sayoj kiita kanachi tiempo titanojnotsaj, ta no keyej tikchiuaj. Komo techolinia netasojtalis tein tikpialiaj Jiova uan oksekin, titanojnotsaskej nochi tein tiueliskej * (Mar. 12:30, 31; Col. 3:23). Nejon kijtosneki ke tikuiskej nochi tochikaualis itech itekiyo Dios. Komo tikitaj tanojnotsalis kemej se tatiochiualis, tiktemoskej tikinmatiltiskej nochin kuali tanauatilmej.

5, 6. ¿Uelis aksa kitayekanaltis itekiyo Dios maski amo kipia miak tiempo? Xikonmelaua.

⁵ Maj tikijtokan ke se telpoch kiuelita kitsotsonas guitarra uan kichiua nochipa keman ueli. Satepan, kitakeuaj maj tatsotsona itamian semana kampa kinamakaj café. Sayoj ke, kemej tein kitani amo kiajsi, no tekiti itech se tanamakaloyan lunes hasta viernes. Maski okachi tekiti itech tanamakaloyan, tein okachi kiuelita kichiuas yejua tatsotsonas. Kineki okachi kuali tatsotsonas uan sayoj ika nejon kineki tekitis. Sayoj ke, kemej amo ueli, tatsotsona maski sayoj seki tonalmej.

⁶ No ijkon, tejuan xa amo tiueliskej titanojnotsaskej miak tonalmej kemej tiknekiskiaj. Sayoj ke, yejua nejon tein okachi tikuelitaj tikchiuaskej. Timochikauaj tikinnojnotsaskej taltikpakneminij ika iTekiuajyo Dios kemej okachi  kinpaleuis. Sayoj ke, kemej tikpiaj miak tekit, xa timotajtaniaj keniuj uelis tiktayekanaltiskej itekiyo Dios.

7, 8. ¿Keniuj uelis tikchiuaskej kemej Jesús keman titanojnotsaj?

⁷ Jesús techkauilij se kuali neskayot porin nochipa kitemoj tanojnotsas. Kiitaya ke semi monekia kiteixmatiltis iTekiuajyo Dios (Juan 4:34, 35). Semi uejka nejnemia uan ijkon ueliskia kinnojnotsas miakej. Tanojnotsaya kajkalpan uan kampa moajsiaj taltikpakneminij. Jesús nochipa kitayekanaltij itekiyo Dios.

⁸ Tikchiuaj kemej Cristo keman tiktemouaj tikteixmatiltiskej iTekiuajyo Dios kampa yeski. Maski ueliskia tikchiuaskej miak taman okachi tiktayekanaltiaj tanojnotsalis (Mar. 6:31-34; 1 Ped. 2:21). Sekin tokniuan uelij kichiuaj tekit kemej precursores especiales, regulares oso auxiliares. Oksekin momachtianij okse tajtol oso youij kampa okachi monekij tanojnotsanij. Uan amo tikinelkauaj tokniuan tanojnotsanij, akin no mochikauaj kiteixmatiltiskej kuali tanauatilmej. Tikchiuaskej miak oso amo, Jiova amo techtajtania okachi ke tein uelis tikchiuaskej. Kineki maj techyolpakti tikteixmatiltiskej “kuali tanauatilmej tein techmaka Dios akin yolpaki” (1 Tim. 1:11, TNM; Deut. 30:11).

9. 1) ¿Keniuj Pablo kitayekanaltij tanojnotsalis maski monekia tekitis? 2) Kemej kijtoua Hechos 28:16, 30, 31, TNM, ¿keniuj Pablo kiitaya itekiyo Dios?

⁹ Tatitanil Pablo no techkauilij se kuali neskayot. Keman yetoya ompa Corinto keman ika ojpa yajki tanojnotsato, monekik tekitis seki tonalmej ika kaltaken porin amo kipiaya miak tomin. Maski ijkon, amo kitayekanaltij nejon tekit. Tekitia porin ijkon akin nemiaj Corinto akin kinixmatiltij kuali tanauatilmej amo kipaleuiskiaj ika tomin (2 Cor. 11:7). Maski monekia tekitis, kisentokak kitayekanaltij itekiyo Dios uan tanojnotsaya nochi sábados. Keman kipiayaya tein ika moixpanoltis, “kachi ok peuak tanojnotstinemik [...]. Uan kachi ok kinyeknextiliaya in taka judíos ke ne Jesús Yejuatsin ya Cristo” (Hech. 18:3-5; 2 Cor. 11:9). Satepan, keman ome xiuit tsaktoya ichan ompa Roma, kinnojnotsaya akin yayaj kikalpanotij uan kijkuilouaya cartas (xikonixtajtolti Hechos 28:16, 30, 31, TNM). Kiixtalij maj amo teyi kitsakuili kichiuas itekiyo Dios. Kijkuiloj: “Ma amo keman timoyolkejkepakan tech totekiu” (2 Cor. 4:1). Ijkon kemej Pablo, no uelis tiktayekanaltiskej itekiyo Dios maski monekis titekitiskej.

10, 11. ¿Keniuj uelis kuali tikchiuaskej tekit itech tanojnotsalis maski timokokouaj?

¹⁰ ¿Toni uelis tikchiuaskej komo tixiuejkejya oso timokokouaj uan amo ueli titanojnotsaj kajkalpan ijkon kemej tikuelitaskiaj? Komo ijkon, onkak okseki taman kemej uelis titanojnotsaskej. Tokniuan itech yekinika siglo nochipa tanojnotsayaj kajkalpan, senteixtenoj uan kampa yeski (Hech. 17:17; 20:20). ¿Uan komo amo semi ueli tinejnemij? Xa ueliskia timotaliskej kampa miakej papanouaj uan iniuan titajtoskej. No uelis titanojnotsaskej ika teléfono, carta uan kampa yeski. Miakej tanojnotsanij  akin kipanouaj nejon yolpakij ijkon tanojnotsaskej.

¹¹ Kemej tikitaj, maski timokokouaj uelis kuali tikchiuaskej tekit itech tanojnotsalis. Maj oksepa tikitakan ineskayo tatitanil Pablo, kijtoj: “Ne chikaukauelilis ualeutok imako Dios uan amo ualeua tech tejuan san” (2 Cor. 4:7). Nejon kipaleuij keman se tonal kokolispeuak ijkuak tanojnotstinemia. Kiniluij gálatas: “Kuak ne achtopa ya namechnojnotsato ika ne Tajtoltsin de Dios [...] nimokokoaya” (Gál. 4:13). No ijkon, komo timokokouaj xa uelis tikinnojnotsaskej ika iTekiuajyo Dios, tapajtianij, enfermeros uan oksekinok. Miakej amo moajsij ininchan keman titanojnotsaj kajkalpan porin tekititokej.

12. ¿Toni kijtosneki maj toixtololo ‘yek tekiti’?

¹² Jesús kijtoj: “Namoixtololouan niknejneuililtia keme se tanex ten techtauilia tech tonakayo. Uan takan namoixtololouan yek tekitij keme se kuali tanex, no ijkon kuali namechtauilia tech nochi namonakayo” (Mat. 6:22). ¿Toni kijtosnekij nejin tajtolmej? Ke moneki tinemiskej ika amo miak taman uan amo tikauaskej maj nion teyi techtapololti. Jesús kikauak se kuali neskayot porin nochipa kitayekanaltij itekiyo Dios uan kinnextilij itatojtokakauan maj no ijkon kichiuakan. Jesús kijtoj: “Xiktemokan achto iTekiuajyo Dios uan imelaujkayo”, komo ijkon tikchiuaj  tiktojtokatoskej ineskayo (Mat. 6:33, TNM).

13. ¿Toni uelis techpaleuis maj tiktayekanaltikan itekiyo Dios?

¹³ Se taman kemej uelis tiktayekanaltiskej itekiyo Dios yejua komo tinemij ika amo miak taman, ijkon okachi tikinpaleuiskej oksekin maj kiixmatikan uan maj kitasojtakan Jiova. * Kemej neskayot, ¿ueliskia amo titekitiskej oso timoixpetaniskej miak horas itech semana uan ijkon okachi titanojnotsaskej?

14. ¿Toni kichiujkej seki tokniuan namikuanij tein kinpaleuij maj okachi tanojnotsakan?

¹⁴ Maj tikitakan tein kichiuak se tayekankej akin itokay Elías uan inamik. Yejua kijtoua: “Amo uelia timochiuayaj precursores, sayoj ke monekia tikchiuaskej teisa. Yejua ika tikchiujkej seki taman tein moitaya ke amo ueyi tein techpaleuij maj okachi titanojnotsakan. Kemej neskayot, amo tikouayaj tein amo monekia; amo semi timoixpetaniayajok porin tikitakej ke techkuiliaya miak horas uan tikiluijkej akin tiktekitiliayaj maj techpatiliani horas tein titekitiaj. Nejon techpaleuij maj titanojnotsanij tiotakpa, maj tikinmachtikan okachi taltikpakneminij ika Biblia uan hasta maj titanojnotsanij itajkotian semana ojpa itech metsti. Yekmelauj tiyolpakiaj”.

15, 16. Kemej kijtoua 1 Timoteo 4:13, 15, ¿keniuj uelis okachi kuali titanojnotsaskej uan titamachtiskej? (No xikonita recuadro “ Tein techpaleuis maj okachi kuali tikchiuakan tekit itech tanojnotsalis”.)

¹⁵ Okse taman kemej uelis okachi kuali tikchiuaskej tekit itech tanojnotsalis,  yejua komo tiktemouaj okachi kuali titamachtiskej. Seki motelmachtianij kiniluiaj maj kiselijtokan okachi nemachtil porin nejon kinpaleuia maj okachi taixmatikan uan maj okachi kuali tekitikan. No ijkon, tejuan moneki tiksentokaskej timomachtiskej keniuj okachi kuali titamachtiskej (Prov. 1:5; xikonixtajtolti 1 Timoteo 4:13, 15).

¹⁶ ¿Toni techpaleuis maj tikchiuakan? Maj kuali tikakikan tein techmachtiaj itech nechikol Tonemilis uan toTanojnotsalis. Ompa techmachtiaj keniuj okachi kuali titanojnotsaskej. Kemej neskayot, keman akin kiixyekana nechikol kinyolmajxitia akin kipanoltijkej se nemachtil, maj tikitakan tein tejuan uelis techpaleuis uan maj tikuikan nejon keman tiknojnotsaskej aksa ika Biblia. No uelis tikiluiskej akin kiixyekana tanojnotsalis maj techpaleui oso maj touan tanojnotsa. Uan no uelis tikiniluiskej okseki tokniuan akin miak xiujmej tanojnotsanij, se precursor oso tokniuj takalpanojkej. Nochi nejon techpaleuis maj okachi kuali tiktekitiltikan nepaleuilmej tein ika titamachtiaj. Ijkon, okachi techyolpaktis titanojnotsaskej uan titamachtiskej.

17. ¿Toni tikseliaj keman kuali tikchiuaj tekit itech tanojnotsalis?

¹⁷ Se ueyi tatiochiualis maj titekitikan iuan Jiova (1 Cor. 3:9). Keman tikchiuaj itekiyo Dios tein “okachi tayekantok”, tiktekitiliaj “Jiova ika yolpakilis” (Filip. 1:10, TNM; Sal. 100:2). Tiitekitikauan Dios tikmatij ke yejuatsin techpaleuis maj tikchiuakan itekiyo maski tikpiaskej ouijkayomej oso amo ueli tikchiuaj seki taman (2 Cor. 4:1, 7; 6:4). Tikchiuaskej nochi tein tiueliskej itech tanojnotsalis kichiua maj tiyolpakikan (Gál. 6:4). Keman kuali tikchiuaj tekit itech tanojnotsalis, tiknextiaj ke tiktasojtaj Jiova uan oksekin. Komo ijkon tikchiuaj, Biblia techiluia: “Timomakixtis tejua uan no tikinmakixtis nochi naken mitskakilijtinemiske” (1 Tim. 4:16).