1. ¿Toni moneki tikchiuaskej nochin akin tikchiuaj kemej Cristo?

¿MELAUJ ke amo timotaloskiaj uan timotataniskiaj iniuan oksekin komo tikmatij ke ouij, okachiok komo timokokouaj oso tisioujtokej? Sayoj ke, tatitanil Pablo kijtoj ke nochin akin yekmelauj tikchiuaj kemej Cristo timotalojtokej (Heb. 12:1). Tein melauj, maski tein yeski xiuit tikpiaskej oso ox tichikaujkejok oso amo, tinochin moneki titaxikoskej komo tiknekij tikseliskej netetayokolil tein Jiova kijtoua techmakas (Mat. 24:13).

2. ¿Keyej Pablo uelik kijtoj tein moajsi itech 2 Timoteo 4:7, 8?

² Pablo uelik kijtoj maj se taxiko keman se motalojtok porin yejua ‘motaloj hasta matamik’ (xikonixtajtolti 2 Timoteo 4:7, 8, TNM). Sayoj ke ¿keyej kijtoj Pablo ke timotalojtokej?

3. ¿Toni kijtosnekik Pablo keman kijtoj ke timotalojtokej?

³ Kemansa, Pablo kikuia kemej neskayot seki taman tein mochiuaya ompa Grecia keman taltikpakneminij motataniaj ininixpan miakej, porin kinekia tamachtis seki taman tein semi monekia (1 Cor. 9:25-27; 2 Tim. 2:5). Kijtoj ke se itatojtokakauj Cristo kemej yeskia motalojtok iniuan oksekin (1 Cor. 9:24). Peua timotalouaj keman timotemaktiaj iuan Jiova uan timoauiaj (1 Ped. 3:21). Uan titatanij keman Jiova techmaka netetayokolil: maj ueli tinemikan nochipaya (Mat. 25:31-34, 46; 2 Tim. 4:8).

4. ¿Toni tikitaskej itech nejin tamachtilis?

⁴ Tiitatojtokakauan Cristo no tikchiuaj miak taman tein  kichiuaj akin uejka motalouaj keman motatanij. Maj tikitakan eyi taman. Yekinika, moneki tiyaskej itech ojti tein ixyetok. Ojpatika, moneki tiknemiliskej ke titatanij. Uan expatika, moneki tikxikoskej ouijkayomej.

5. ¿Katiyejua ojti moneki itech tiyaskej, uan keyej?

⁵ Komo akin motalouaj kinekij tataniskej, moneki motaloskej itech ojti tein ixyetok. No ijkon, komo tiknekij titataniskej uan tinemiskej nochipaya, moneki tiyaskej itech ojti tein ixyetok, oso tinemiskej kemej Jiova kiixtalijtok (Hech. 20:24; 1 Ped. 2:21). Sayoj ke Satanás uan taltikpakneminij akin kichiuaj kemej yejua, kinekij maj oksekopa tiyakan uan maj tiksentokakan tinemikan kemej yejuan (1 Ped. 4:4). Keman kiitaj keniuj tinemij techpijpinaujtiaj uan kijtouaj ke yejuan okachi kuali nemij porin ueli kichiuaj tein kinekij. Sayoj ke nejon amo melauak (2 Ped. 2:19).

6. ¿Toni techmachtia tein kipanok Brian?

⁶ Komo tiknekij tiyaskej itech ojti tein kitojtokaj akin Satanás kinixyekana, niman tikitaskej ke nejon amo kichiua maj toselti timoixyekanakan, ta ke techixyekana Satanás uan totanejnekilis (Rom. 6:16). Maj tikitakan tein kipanok se tokniuj akin monotsa Brian. Keman okichpilok katka, itatuan mochikaujkej kimachtiskej maj kichiua tein Biblia tayolmajxitia. Sayoj ke keman katka telpoch peuak motajtania ox yekmelauj yolpakiskia komo kichiuaya. Yejua ika kiixtalij nemis kemej akin kichiuaj tein Satanás kineki. Brian kijtoua: “Semi niknekia noselti nimoixyekanas, sayoj ke ijkuak nion tepitsin niknemiliaya ke nejon kichiuaskia maj nochipa niknekini nikchiuas tein amo kuali”. Peuak kikui drogas, semi tauanaya uan auilnemia. No kijtoua: “Ijkon kemej panotiyayaj xiujmej peuak nikui drogas tein okachi chikaujkej uan amo kuali niyetoyaok komo amo nikuia. Hasta peuak niknamaka drogas uan ijkon ueliskia nikixtauas tein nikuia”. Satepan, kiixtalij kitakamatis itanauatiluan Jiova. Kikauak tein amo kuali uan moauij itech xiuit 2001. Axkan no motalojtok kemej itekitikauj Jiova uan yekmelauj yolpaki. *

7. Kemej kijtoua Mateo 7:13, 14, ¿katiyejua ome ojti moajsi?

⁷ Satanás amo kineki maj timotalokanok itech ojti tein “amo patauak” tein teuika “tech ne yek nemilis”, ta kineki maj timotalokan “tech ne patauak ojti” kampa miakej yajtokej. Itech nejin ojti amo ouijkan,  sayoj ke teuika “tech ne ixpoliuilis”. Yejua ika semi moneki maj tikixpejpenakan ojti tein techpaleuis (xikonixtajtolti Mateo 7:13, 14). Komo amo tiknekij maj nion teyi kichiua maj amo timotalokanok itech ojti tein tepaleuia, moneki titakuaujtamatiskej iuan Jiova uan tikakiskej tein techiluia.

8. ¿Toni kichiua se akin motalojtok komo uetsi?

⁸ Akin motalouaj keman motatanij nochipa tachiaj taixpan uan ijkon amo mometsteloskej uan uetsiskej. Maski ijkon, uelis taksaskej kampa takoyokkan oso xa okse akin no motalojtok kichiuas maj uetsikan. Komo uetsij, moketsaj uan kisentokaj motalouaj. Amo kiitaj tein kichiuak maj uetsikan, ta kiitaj kampa moneki ajsiskej uan netetayokolil tein kinekij kitaniskej.

9. ¿Toni moneki tikchiuaskej komo timometstelouaj?

⁹ Tejuan xa no miakpa kemej yeskia timometsteloskej, xa porin tikijtojkej oso tikchiujkej teisa tein amo kuali oso porin se tokniuj kichiuak teisa tein techyolkokoj. Nejin uelis panos, porin tinochin titajtakolejkej uan timotalojtokej itech ojti tein amo patauak tein techuikas maj tinemikan nochipaya. Yejua ika kemansa tokniuan xa kichiuaskej teisa tein techyolkokos oso tejuan tikinyolkokoskej. Pablo kijtoj ke kemansa tokniuan kichiuaskej teisa tein amo techyolpaktis (Col. 3:13). Sayoj ke maj amo itech titanemilijtokan tein kichiuak maj timometstelokan, ta maj tikitakan netetayokolil tein tikchiaj tikseliskej. Komo tiuetsij, maj timoketsakan uan maj tiksentokakan timotalokan. Komo tikualanij uan amo tiknekij timoketsaskej, amo uelis tiajsiskej kampa ixyetok nion tiktaniskej netetayokolil. Uan hasta uelis tikintsakuiliskej akin mochikaujtokej motaloskej itech ojti tein amo patauak tein teuika maj se nemi nochipaya.

10. ¿Toni moneki tikchiuaskej uan ijkon amo tikintsakuiliskej oksekin?

¹⁰ Komo amo tiknekij tikintsakuiliskej akin touan motalojtokej, keman uelis maj tikchiuakan teisa kemej yejuan kijtouaj uan maj amo tiktemokan maj nochipa mochiua tein tejuan tikijtouaj (Rom. 14:13, 19-21; 1 Cor. 8:9, 13). Nejin semi taman ika tein panoua keman motatanij akin motalouaj,  porin nochin kitemouaj tataniskej. Miakpa, sayoj inintech tanemiliaj. Yejua ika xa kitemoskej ajsiskej hasta taixpan maski kintojtopeuaskej oksekin. Sayoj ke, tejuan amo timotatanij iniuan tokniuan (Gál. 5:26; 6:4). Tiknekij tikinpaleuiskej nochin akin tiueliskej maj touan ajsikan kampa ixyetok tiajsiskej uan maj tikselikan netetayokolil: tinemiskej nochipaya. Yejua ika, timochikauaj amo tiktemoskej sayoj tejuan totanejnekilis, ta no inintanejnekilis oksekin, kemej Pablo tayolmajxitij (Filip. 2:4).

11. ¿Itech toni tanemiliaj akin motalouaj, uan keyej?

¹¹ Akin motalouaj amo sayoj tachiaj taixpan, ta no kiitaj kampa ixyetok ajsiskej. Uan maski xa amo ueli kiitaj, kinemiliaj ke ajsikejya uan kiselijtokejya netetayokolil. Nejon kichiua maj kisentokakan motalokan.

12. Kemej Jiova techtasojta, ¿toni kijtoua ke kichiuas?

¹² Kemej Jiova techtasojta, kijtoua ke nochin akin ajsiskej kampa ixyetok kitaniskej netetayokolil uan nemiskej nochipaya, ompa iluikak oso itech Xochital nikan taltikpak. Biblia kijtoua keniuj yeski nejin netetayokolil, yejua ika ueli tiknemiliaj keniuj semi kualtsin tinemiskej. Keman okachi titanemiliskej itech nejin netetayokolil, okachi tiknekiskej tiksentokaskej timotaloskej uan amo tikauaskej maj nion teyi techtsakuili.

13. ¿Toni nepaleuil tikpiaj, tein amo kipiaj akin motatanij?

¹³ Akin motataniaj ompa Grecia kipanouayaj seki ouijkayomej, xa kinkokouaya teisa oso siouiaj. Yejuan sayoj uelia mopaleuiayaj itech tein kinmachtijkaj achto ke motataniskiaj uan itech ininchikaualis. Ijkon kemej yejuan, tejuan no techmachtiaj keniuj timotaloskej itech ojti tein Jiova kiixtalijtok. Sayoj ke tejuan tikpiaj inepaleuil Jiova, akin techmaka nochi chikaualis tein monekis. Yejuatsin kijtoua ke techmachtis uan techchikauas komo iuan titakuaujtamatij (1 Ped. 5:10).

14. ¿Keniuj techpaleuia 2 Corintios 12:9, 10 maj titaxikokan keman tikpiaj ouijkayomej?

¹⁴ Tatitanil Pablo kipanok miak ouijkayomej. Amo sayoj kiuijuikaltijkej uan kitajyouiltijkej, ta kemansa kimachiliaya ke amo kipiaya chikaualis uan monekia kixikos tein kijtoj ke ‘kemej yeskia se uitsti kalakiskia itech inakayo’ (2 Cor. 12:7). Sayoj ke nejon ouijkayomej amo kichiujkej maj mosenkaua, ta kiitak ke ijkuak ueliskia kinextis ke takuaujtamatia iuan Jiova (xikonixtajtolti 2 Corintios 12:9, 10). Yejua ika, Jiova nochipa kipaleuij.

15. ¿Toni panos komo tikchiuaj kemej Pablo?

¹⁵ Ijkon kemej tatitanil Pablo, tejuan xa no techuijuikaltiskej uan techtajyouiltiskej porin tiktekitiliaj Jiova. Uan no, xa timokokouaj oso amo tikpiaj chikaualis. Sayoj ke, komo tikchiuaj kemej Pablo, keman tikpiaskej ouijkayomej uelis tikauaskej maj Jiova technextili inetasojtalis uan inepaleuil.

16. ¿Keniuj kinextiaj ke motalojtokej akin mokokouaj?

¹⁶ Akin mokokouaj uan amo ueli meuaj oso kikuij silla de ruedas, amo kipiajok chikaualis itech inintankuay oso amo yektachiajok, ¿uelis motaloskej iniuan akin telpochmej uan chikaujkej? Kemaj. Miakej tokniuan akin xiuejkejya uan oksekin akin mokokouaj motalojtokej porin kinekij kitaniskej netetayokolil tein Jiova techmakas. Sayoj ke amo kichiuaj ininselti, ta Jiova kinmaka chikaualis. Kikakij nechikolmej ika teléfono oso kintemoltiliaj  videos kampa uelis kiitaskej nechikol. No kinpaleuiaj oksekin maj mochiuakan itatojtokakauan Cristo. Kinnojnotsaj ininchankauan uan tapajtianij.

17. ¿Keniuj kinita Jiova akin mokokouaj?

¹⁷ Komo timokokouaj, maj amo timosenkauakan nion maj tiknemilikan ke amo uelis tiksentokaskej timotaloskej. Jiova techtasojta porin iuan titakuaujtamatij uan porin tikchiuanij miak taman itech itekiyo. Keman ijkon timoajsij okachi moneki maj techpaleui, uan yejuatsin amo techkauas (Sal. 9:10). Jiova okachi motokis touan. Maj tikitakan tein kijtoua se tokniuj siuat akin semi mokokoua: “Kemej okachiok nimokokoua, amo semi nikinita taltikpakneminij akin uelis nikintapouis tein melauak. Sayoj ke maski sayoj tepitsin nitanojnotsa, nikmati ke kiyolpaktia Jiova. Nejon nechyolpaktia”. Keman amo kuali timomachiliskej, maj tikelnamikikan ke Jiova touan yetok. Maj tikelnamikikan tein kipanok Pablo uan itajtoluan tein semi techyolchikauaj: “Nimouelitstinemis san kuak niyoltajyouijtinemi [...]. lka ya nojon kuak kachi nikyolmachilia in kuetauilis, ijkuakon kachi ok Dios nechmachililtia ichikaualitsin” (2 Cor. 12:10).

18. ¿Toni ouijkayot kipanouaj sekin?

¹⁸ Sekin akin motalojtokej itech ojti tein teajxitia kampa se nemis nochipaya kipanouaj okse ouijkayot. Nejin tokniuan kipiaj kuejmolmej tein oksekin amo ueli kiitaj uan xa amo kiajsikamatij. Kemej neskayot, xa semi motayokoltiaj oso semi motekipachouaj. ¿Keyej semi ouij tein kipanouaj? Porin nochin kiitaj keman se taltikpaknenkej moajkolpostekik oso yetok itech silla de ruedas uan xa kipaleuiaj. Sayoj ke tajyouilis tein kipanouaj akin semi motayokoltiaj oso semi motekipachouaj amo moita. Yejuan no semi tajyouiaj kemej se akin postekik iomiyo, sayoj ke kemej oksekin amo kiitaj ke tajyouijtokej, xa amo kinnextiliaj netasojtalis nion kinyekpiaj.

19. ¿Toni techmachtia tein kipanok Mefibóset?

¹⁹ Komo tein tikpanotokej kichiua maj amo semi ueli tiktekitilikan Jiova uan tikmachiliaj ke amo techajsikamatij, tein kipanok Mefibóset uelis techyolchikauas (2 Sam. 4:4). Yejua amo sayoj mokokouaya, ta no tekiuaj David kichiuilij tein amo kuali. Mefibóset amo motemolij nejon kuejmolmej, sayoj ke amo kikauak maj nejon kichiuani maj kualani. Okachi kuali, kipatiuitak tein kipiaya. Motasojkamatik porin David achto kipaleuijka (2 Sam. 9:6-10). Yejua ika, keman David kinemilij ke kichiujka tein amo kuali, Mefibóset kiixtalij amo kualanis. Amo kikauak maj inepolol David kikualantiani nion kitajtakoltij Jiova tein David kichiujka. Kitayekanaltij  kipaleuis tekiuaj akin Dios kiixtalijka (2 Sam. 16:1-4; 19:24-30). Jiova kichiuak maj moijkuilo itech iTajtol tein kichiuak Mefibóset porin uelis techpaleuis (Rom. 15:4).

20. ¿Keniuj momachiliaj akin semi motekipachouaj, sayoj ke toni uelis kimatiskej?

²⁰ Kemej seki tokniuan semi motekipachouaj, amo kuali momachiliaj keman moneki tajtoskej iniuan oksekin. Xa amo kuali momachiliaj keman miakej yetokej, sayoj ke kisentokaj youij nechikolmej uan uejueyi nechikolmej. Ouij kinkisa tajtoskej iniuan akin amo kinixmatij, sayoj ke youij tanojnotsatij. Komo ijkon timomachiliaj, amo sayoj tejuan, ta miakej no ijkon kinpanoua. Maj tikelnamikikan ke Jiova kiyolpaktia keman timochikauaj tiktekitiliskej. Kemej amo timosenkauaj, nejon kinextia ke yejuatsin techtatiochiuia uan techmaka chikaualis tein techpaleuia * (Filip. 4:6, 7; 1 Ped. 5:7). Komo tiktekitiliaj Jiova maski timokokouaj oso amo kuali timomachiliaj, uelis tikmatiskej ke nejon semi kiyolpaktia.

21. ¿Toni uelis tikchiuaskej tinochin ika inepaleuil Jiova?

²¹ Kemej tikitakejya, semi taman tein panoua keman tejuan timotalouaj uan tein panoua keman motalouaj akin motatanij. Itech itonaluan Pablo, sayoj se tatania. Sayoj ke, nochin akin kisentokaj motalouaj itech ojti tein Jiova kiixtalij, kiseliaj netetayokolil: nemiskej nochipaya (Juan 3:16). Akin motataniaj ne uejkauj monekia kuali yetoskej, porin komo amo kuali yetoyaj, amo ueliskia tataniskej. Sayoj ke timiakej timokokouaj, maski ijkon, tiksentokaj titaxikouaj (2 Cor. 4:16). Ika inepaleuil Jiova, tinochin tiksentokaskej timotaloskej hasta tiajsiskej kampa ixyetok.