¿Keyej achto ke Jesús momikiliskia kijtoj itajtoluan David tein moajsij itech Salmo 22:1?

Mateo 27:46 kijtoua ke achto ke Jesús momikiliskia kijtoj: “No Dios, no Dios, ¿keye tinechsenkauak?”. Ijkon, Jesús kichiuak tein David kijtojka itech Salmo 22:1 (Mar. 15:34). Jesús amo kijtoj nejon porin kinemiliaya ke Jiova amo kipaleuijka oso porin amo takuaujtamatiaok. Yejua kuali kiajsikamatia keyej monekia momikilis uan kinekia kitemakas inemilis (Mat. 16:21; 20:28). No kimatia ke keman kimiktiskiaj, Jiova amo kipaleuiskiaok (Job 1:10) Ijkon, Jiova kikauak maj Jesús senkis kinextiani ke amo keman kikauaskia maski semi kitajyouiltiskiaj keman kimiktiskiaj (Mar. 14:35, 36).

Komo ijkon, ¿keyej Jesús kijtoj nejon? Maski amo senkis tikmatij keyej, maj tikitakan seki taman tein xa kichiuak maj kijtouani nejon. *

Ika nejon tajtolmej, Jesús xa kielnamiktoya ke Jiova kikauaskia maj kimiktikan. Yejua monekia kitemakas inemilis uan ijkon ueliskia kinmakixtis taltikpakneminij, sayoj ke Jiova amo kipaleuiskia. Monekia maj “momikili Cristo Jesús uan ma techixpatkayotiki ika por totajtakoluan” (Heb. 2:9).

Jesús xa kijtoj seki tajtolmej tein moajsij itech Salmo capítulo 22 porin kinekia maj taltikpakneminij kielnamikinij nochi tein kijtoua nejon capítulo. Itech nejon tonalmej,  judíos momattoyaj momamachtiskej tein kijtouaj salmos hasta maj mokauani itech inintanemilil. Yejua ika, komo kinelnamiktiayaj se versículo, kielnamikiskiaj nochi tein kijtoua capítulo. Komo yejua nejon kinekia kichiuas Jesús, kinpaleuijtoya imomachtijkauan maj kielnamikinij nochi tein kijtoua nejon capítulo ke kipanoskia keman kimiktiskiaj (Sal. 22:7, 8, 15, 16, 18, 24). Uan no, versículos tein moajsij itamian capítulo 22 kiueyitaliaj Jiova uan kijtouaj ke yejuatsin tekiuaj itech nochi taltikpak (Sal. 22:27-31).

Ika nejon tajtolmej, Jesús xa kiteajsikamatiltijtoya ke amo teyi kichiujka. Keman kiuikakej ininixpan tamelauanij achto ke kimiktiskiaj, yejuan kichiujkej miak taman tein amo kinamikia uan kipantijkej ke kiuijuikaltijka Dios (Mat. 26:65, 66). Youak kiuikakej ininixpan tamelauanij, ijsiujka kiitakej toni panoka uan kitapanauilijkej tanauatilmej tein ixyetoyaj (Mat. 26:59; Mar. 14:56-59). Keman Jesús tajtanik: “No Dios, no Dios, ¿keye tinechsenkauak?”, xa kinextijtoya ke amo kichiujka nion teyi tein amo kuali uan ke yejua ika amo kinamikia maj kimiktikan.

Jesús xa no kinelnamiktijtoya oksekin ke maski David, akin kijkuiloj nejin salmo, tajyouijtoya, amo kijtosnekia ke amo kipiayaok itatiochiualis Jiova. Itajtoluan David amo kijtosnekiaj ke amo takuaujtamatiaok, porin satepan ke kichiuak nejon netajtanil kijtoj ke takuaujtamatia ke Dios ueli kinmakixtia itekitikauan, uan Jiova kisentokak kitatiochiuij (Sal. 22:23, 24, 27). No ijkon, maski Jesús, “Tekonetsin de ne uejka rey David”, tajyouijtoya itech kouit kampa kipilojkaj, amo kijtosnekia ke amo kipiayaok itatiochiualis Jiova (Mat. 21:9).

Ika nejon tajtolmej, Jesús xa no kinextijtoya ke semi kitayokoltiaya maj Jiova amo kipaleuianiok porin sayoj ijkon ueliskia kinextis ke amo keman kikauaskia. Kemej Adán uan Eva kiixnamikkej Jiova, monekia maj Jesús tajyouiani uan maj momikiliani. Sayoj ke amo yejua nejon tein Jiova kiixtalijka. Jesús amo kichiujka nion teyi tein amo kuali, sayoj ke monekia kinextis ox melauak katka tein Satanás kijtojka, uan yejua ika monekia tajyouis uan momikilis. Ijkon no ueliskia kinmakixtis taltikpakneminij uan yejuan ueliskia oksepa kiseliskej tein Adán uan Eva kipolojkej (Mar. 8:31; 1 Ped. 2:21-24). Jesús ueliskia kichiuas nejon komo ijkuak Jiova amo kipaleuiayaok.

Jesús xa no kinekia kinpaleuis itatojtokakauan maj kinemilianij keyej Jiova kikauak maj ijkon momikiliani. * Jesús kimatia ke miakej amo iuan takuaujtamatiskiajok porin kipilojkej itech se kouit kemej se takat akin kichiujka tein amo kuali (1 Cor. 1:23). Komo itatojtokakauan itech tanemiliayaj keyej monekia momikilis, kiajsikamatiskiaj keyej panok nejon (Gál. 3:13, 14). Nejon kinpaleuiskia maj kiitanij kemej ininTemakixtijkauj uan amo kemej se takat akin kichiujka tein amo kuali.

Maski amo tikmatij keyej Jesús kijtoj nejon tajtolmej, yejua kimatia ke keman momikiliskia kichiujtoskia tein Jiova kinekia. Tepitsin satepan kijtoj: “Niktamichiuak ya” (Juan 19:30; Luc. 22:37). Kemej ijkuak Jiova amo kipaleuij, Jesús uelik kitamichiuak nochi tein ixyetoya maj kichiua nikan taltikpak. Nejin no tapaleuij maj itech mochiuani nochi tajtolmej tein “ijkuiliutok tech in Tajtoltsin de Moisés” uan “ten kijkuilojke in uejkautanauatiani de Dios uan no ten ijkuiliutok tech in Salmos” (Luc. 24:44).