Moijtoua ke se motenkauas teisa kijtosneki se kijtos iixpan Dios ke se kichiuas teisa. Nejin uelis se kijtos oso se kijkuilos.

Sekin kinemiliaj ke amo kuali yetok maj se motenkaua teisa porin Jesús kijtoj: “Amo keman xikijtojtiuetsikan ‘kitstikaj’. […] Ta keman nankijtoskej ‘kemaj’, maj kemaj, uan keman nankijtoskej ‘amo’, maj amo. Porin akin amo kichiua tein kijtoua, kichiujtok tein kineki in Amokuali” (Mat. 5:33-37, TNM). Jesús kimatia ke tanauatil tein Dios kimakaka Moisés kijtouaya ke kemansa israelitas monekia motenkauaskej teisa uan ke seki itekitikauan Dios ne uejkauj no ijkon kichiujkej (Gén. 14:22, 23; Éx. 22:10, 11). No kimatia ke hasta Jiova motenkaujka seki taman (Heb. 6:13-17). Yejua ika, Jesús amo kijtojtoya ke amo keman uelis se motenkauas, ta tanejmachtijtoya maj amo se kiauilmati uan maj amo se motenkaua teisa tein amo moneki. Nochipa moneki tikchiuaskej tein tikijtouaj porin yejua nejon tein Jiova kineki.

Komo ijkon, ¿toni moneki tikonchiuas komo mitsoniluiaj xionmotenkaua teisa? Yekinika, kuali xikonnemili ox yekmelauj uelis tikonchiuas. Komo amo, okachi kuali amo xionmotenkaua. ITajtol Dios kijtoua: “Okachi kuali amo xionmotenkaua nion teyi ke tionmotenkauas uan amo tikonchiuas” (Ecl. 5:5). Satepan, xikonita toni kijtoua Biblia ika tein mitsoniluiaj xionmotenkaua uan ompa, kuali xikonnemili uan xikonixejeko toni uelis tikonchiuas ika tein tionmomachtianiya. ¿Toni tein kijtoua Biblia uelis techpaleuis?

Seki taman tein se motenkaua kiyolpaktia Dios. Kemej neskayot, keman se takat uan se siuat akin itaixpantijkauan Jiova monamiktiaj motenkauaj seki taman. Yejuan motenkauaj iixpan Dios uan ininixpan oksekin ke motasojtaskej, moyekpiaskej uan mopoujkaitaskej hasta keman momikiliskej. (Sekin xa amo senkis kijtouaj nejin tajtolmej, sayoj ke motenkauaj iixpan Dios). Ijkon monamiktiajya uan moneki sennemiskej nochipaya (Gén. 2:24; 1 Cor. 7:39). Tein motenkauaj se takat uan se siuat keman monamiktiaj, kiyolpaktia Dios.

Seki taman tein se motenkaua amo kiyolpaktia Dios. Kemej neskayot, akin kichiuaj kemej Cristo amo motenkauaj ke tateuiskej para kipaleuiskej ininaltepeuj oso ke amo kiueyichiuaskejok Dios. Komo ijkon kichiuaskiaj, amo kitakamattoskiaj itanauatiluan Dios. Kemej akin kichiuaj kemej Cristo amo ‘poutinemij ok iuan in taltikpakuani’, amo tapaleuiaj keman sekin takuejmolchiuaj nion keman tateuiaj (Juan 15:19; Is. 2:4; Sant. 1:27).

Seki taman tejuan tikixejekouaj ox timotenkauaskej oso amo. Kemansa, achto ke se tokniuj kiixejekos ox motenkauas teisa moneki itech tanemilis tein kijtoj Jesús: “Moneki nankimakaskej  Tekiuaj tein iaxka Tekiuaj, sayoj ke xikmakakan Dios tein iaxka Dios” (Luc. 20:25, TNM).

Maj tiknemilikan ke se tokniuj kineki nemis itech okse altepet oso kineki kikixtis amamej para uelis yas ompa, uan kiluiaj ke moneki motenkauas teisa. Komo tein kiluiaj maj motenkaua kitapanauilia itanauatiluan Dios, tein momachtianiya itech Biblia kipaleuis maj amo motenkaua. Sayoj ke, tekiuanij xa kinekiskej kipataskej tein kinekij maj motenkaua para amo kikuejmolos itanemilil.

Romanos 13:1 kijtoua: “Nochi namejuan moneki xikintakamatiyakan nochi nojon tekiuani”. Yejua ika, se tokniuj xa kinemilis ke amo tajtakol komo motenkaua kichiuas tein tekiuanij kipatakejya porin Dios ipa kinauatia maj kintakamati.

Tein timomachtianij itech Biblia no uelis techpaleuis keman techiluiskej maj tikuikan teisa oso maj tikchiuakan teisa keman timotenkauaskej. Ne uejkauj, romanos uan escitas kikuiaj ininespadas keman motenkauayaj teisa itokaykopa inindios tein kiixnextiaya neteuilis, ika nejon kinextiayaj ke yekmelauj kichiuaskiaj tein kijtojkaj. Griegos momaajoketsayaj keman motenkauayaj teisa. Ijkon kinextiayaj ke kineltokayaj ke ne iluikak aksa kiitaya tein kijtouayaj uan tein kichiuayaj uan ke iixpan monekiskia tanankiliskej.

Se itekitikauj Jiova amo motenkauas ika se taman tein kiueyichiuaj tein kiixnextia se altepet uan tein mouika ika taueyichiualis tein amo melauak. Sayoj ke, komo se tokniuj moneki yas ininixpan tekiuanij uan kiluiaj maj kitali imay itech Biblia uan maj motenkaua amo takajkayauas ¿toni kichiuas? Tokniuj xa kiixtalis kichiuas porin Biblia kijtoua ke seki itekitikauan Dios ne uejkauj kichiujkej teisa keman motenkaujkej (Gén. 24:2, 3, 9; 47:29-31). Komo tikchiuaj tein techiluiaj, moneki tikelnamikiskej ke timotenkaujtokej iixpan Dios amo titakajkayauaskej. Yejua ika, maj amo titakajkayauakan keman techtajtaniskej teisa.

Kemej tiknekij tiksentokaskej kuali timouikaskej iuan Jiova, moneki tikchiuaskej netataujtil uan kuali tiknemiliskej achto ke timotenkauaskej teisa. Amo tiknekij maj techkuejmolo totanemilil nion tiktapanauiliskej tein Biblia tayolmajxitia. Komo timotenkauaj teisa moneki tikchiuaskej (1 Ped. 2:12).