Komo panoua nejon, tokniuan kiitaskej ke takat amo inamikok siuat akin iuan monamiktijka keman senkis kikaua uan monamiktia iuan okse. Komo tikitaj tein Jesús kijtoj uelis tikajsikamatiskej keyej tokniuan ijkon kiitaskiaj.

Jesús kijtoj keyej uelis mokauaskej akin monamiktijkejya. Mateo 19:9 itech Traduccion del Nuevo Mundo, kijtoua: “Akin monamiktijya uan kikaua isiuatsin, maski siuatsin amo auilnemik, uan monamiktia iuan okse, nejon takat auilnemi”. Tein Jesús kijtoj techmachtia 1) ke akin monamiktijkejya sayoj uelis mokauaskej komo semej auilnemi uan 2) ke komo se takat kikaua inamik maski siuat amo auilnemik uan oksepa monamiktia, nejon takat auilnemi. a

¿Kijtosnekik Jesús ke uelis oksepa monamiktis se takat akin auilnemi uan kikaua inamik ininixpan tekiuanij? Amo senkis yejua nejon kijtosnekik. Komo se takat auilnemi, inamik akin amo teyi kichiujtok uelis kiixpejpenas ox kitapojpoluis. Komo amo kitapojpoluia uan mokauaj ininixpan tekiuanij, nochin omen uelis oksepa monamiktiskej.

Sayoj ke, siuat xa kinekis kitapojpoluis inamik uan iuan yetosok. ¿Uan komo takat kisentoka kiixtalia kikauas ininixpan tekiuanij? Biblia kinextia ke amo kuali yetoskia maj oksepa monamikti porin siuat kiixtalia kitapojpoluis uan kisentokas iuan yetos. Komo amo kitakamati tein Biblia kijtoua uan oksepa monamiktia, oksepa auilnemi. Tokniuan tayekananij oksepa moneki kinojnotsaskej uan kimelauaskej (1 Cor. 5:1, 2; 6:9, 10).

Komo se takat oksepa monamiktia maski Biblia amo kijtoua ke uelis kichiuas, ¿keniuj kiitaj tokniuan? ¿Kinextia Biblia ke inamikok siuat akin yekinika iuan monamiktijka? ¿Uelisok siuat kitapojpoluis akin katka inamik? ¿Kiitaskiaj tokniuan ke nejon takat auilnentok iuan siuat akin axkan iuan monamiktij?

Achto moajsikamatia ke komo siuat akin kikaujkaj yoltoyaok, amo monamiktiaya uan amo auilnemia, takat auilnentoya iuan siuat akin axkan iuan monamiktij. Sayoj ke Jesús amo ika tajtoj siuat akin kikajkayaujkej. Yejua kijtoj ke se takat auilnemi komo kikaua inamik ininixpan tekiuanij, maski Biblia amo kijtoua ke uelis kichiuas, uan oksepa monamiktia. Yejua ika, keman takat kikaua inamik uan oksepa monamiktia, senkis amo inamikok akin yekinika iuan monamiktijka.

Yejua ika, keman aksa kikaua inamik ininixpan tekiuanij uan oksepa monamiktia, akin kikaujkej amo ueliok kiixtalia ox kitapojpoluis uan amo monekiok ika motekipachos nejon. Uan no, maski siuat akin kikaujkej yoltos, amo monamiktis uan amo auilnemis, nejon amo kipatas kemej tokniuan kiitaskej nejon takat uan siuat akin axkan inamik. b

 Itech neskayot tein yekinika ika titajtojkej, takat auilnemik uan kikauak inamik ininixpan tekiuanij. Sayoj ke ¿toni panoskia komo takat kikaua inamik uan oksepa monamiktia maski amo auilnemik? ¿Oso komo takat amo auilnemi achto ke kikauas inamik, ta satepan uan oksepa monamiktiskia maski inamik kinekiskia kitapojpoluis? Itech nejin neskayomej takat akin kikaua inamik ininixpan tekiuanij uan oksepa monamiktia, auilnemik. Yejua ika, yekinika siuat amo inamikok. Ininixpan tekiuanij inamik akin axkan iuan yetok. Itech amaix La Atalaya 15 de febrero de 1980, itech página 30, momelauak ke aksa akin oksepa monamiktia kipiaya okse inamik “uan yejua ika amo uelis kikauas uan mokepas iuan akin achto katka inamik, yejua amo inamikok porin kikauak ininixpan tekiuanij, auilnemik uan oksepa monamiktij”.

Nejin amo kijtosneki ke akin kichiuaj kemej Cristo amo moneki kipatiuitaskej nenamiktilis oso ke amo se ueyi tajtakol keman semej auilnemi. Komo se takat kikaua inamik ininixpan tekiuanij maski Biblia amo kijtoua ke uelis kichiuas uan oksepa monamiktia, tayekananij moneki kinojnotsaskej uan kimelauaskej porin auilnemik. (Komo siuat akin iuan monamiktij no itaixpantijkauj Jiova, tayekananij moneki oksepa mosentiliskej uan kimelauaskej porin yejua no auilnemik). Maski amo moijtoskiaok ke takat uan siuat akin monamiktijkej auilnentokej, miak xiujmej takat amo uelis kiselis tekimej itech nechikol hasta maj taltikpakneminij oksepa kuali kiitakan. Uan no monekiskia moitas keniuj yetok akin achto katka inamik akin tajyouij porin kikauak uan keniuj yetokej ikoneuan akin no kinkauak (Mal. 2:14-16).

Tikitakejya tein panoua keman aksa kikaua inamik ininixpan tekiuanij uan oksepa monamiktia, maski Biblia amo kijtoua ke uelis kichiuas. Yejua ika, semi kuali komo tikchiuaj kemej Jiova uan tikitaj ke semi chipauak nenamiktilis (Ecl. 5:4, 5; Heb. 13:4).