Yejua nejin se taman tein akin kitauelitayaj Jesús no ika kijijtouayaj yejua uan imomachtijkauan. Tanauatil tein kiselij Moisés kijtouaya ke moajsia seki taman tein kichiuaya maj aksa amo moajsi chipauak iixpan Dios. Seki taman katka kemej ijkuak siuamej esmeyayaj mejmetstika uan keman itech takat kisaya semen, keman aksa kipiaya lepra oso kimatokaya se tapial miket oso aksa miket. ¿Toni ueliskia kichiuas aksa komo kinekia mochipauas? Tanauatil kijtouaya ke ueliskia kitemakas netetayokolilmej, mopajpakas oso kiajtseluiskej (Levítico, capítulos 11 hasta 15; Números, capítulo 19).

Akin kitauelitayaj Jesús kiajxitilijkej okseki tanauatilmej. Se amatajkuilol kijtoua ke kitalijkej tanauatilmej tein senkis kinextiayaj keniuj aksa ueliskia amo moajsis chipauak uan keniuj ueliskia kichiuas maj oksekin no ijkon moajsinij. No senkis kiixtalijkej toni tapalkamej uan okseki taman ueliskia mopitsotilis uan toni amo. Uan no, kiixtalijkej yankuik taman tein taltikpakneminij monekia kichiuaskej komo kinekiaj mochipauaskej.

Akin kitauelitayaj Jesús kitajtanijkej: “¿Keye momomachtijkauan amo nemij keme technauatiaj in ueuetsitsin? Yejuan kikuaj nintakualis ika ninmauan ten amo chipauke” (Mar. 7:5). Nejon tayekananij amo sayoj ika tajtouayaj se momapajpakas. Yejuan kiixtalijkaj maj mochiua se taman kampa aksa monekia kimatekilis at akin yaya takuati. Amatajkuilol tein ika titajtojkej achto kijtoua ke taixyekananij judíos no kiixtaliayaj toni ika monekia se kikuis at, katiyejua at monekia mokuis, akoni monekia tematekilis uan hasta kani monekia ajsis at se imako.

¿Keniuj kiitaya Jesús nejin tanauatilmej tein kiixtalijkej taltikpakneminij? Yejua kiniluij nejon taixyekananij judíos ke katkaj ixkepmej uan ke Jiova kijtojka itechkopa Isaías: “Nijin pueblojuani nechmouistiliaj ika itenxipil san. Uan niyolojuan uejka yetok de Nejuatsin. Pues nenka san nechmouistiliaj. Porin yejuan tenextiliaj in tanauatilme de taka san keme yeskia in Tajtoltsin de Dios. Uan namejuan nankisekokauaj in tanauatil de Dios uan nankitakamatij in tanauatilme den taka san” (Mar. 7:6-8).