1, 2. ¿Keyej moneki tikinnextiliskej oksekin keniuj kichiuaskej tekit?

JESÚS semi mochikauak kiteixmatiltis tein kuali tein kichiuas iTekiuajyo Dios. Sayoj ke no kinmachtiaya itatojtokakauan maj kuali tamachtianij uan maj kinyekpianij itekitikauan Dios (Mat. 10:5-7). Felipe katka se itatojtokakauj Cristo akin nochipa tanojnotsaya. Sayoj ke no kinnextilij iichpochuan keniuj tanojnotsaskej (Hech. 21:8, 9). Axkan, tejuan no moneki tikinnextiliskej oksekin keniuj kichiuaskej tekit. ¿Keyej?

² Itech nochi nechikolmej semanauak taltikpak moajsij miakej akin yankuixtok peuak momachtiaj Biblia uan ayamo moauiaj. Yejuan moneki maj se kinpaleui maj kiajsikamatikan keyej moneki momachtiskej Biblia ininselti. No moneki tikinnextiliskej keniuj tanojnotsaskej uan keniuj tamachtiskej. Tokniuan akin yankuixtok moauijkej no moneki se kinnextilis maj kichiuakan seki tekimej tein kinpaleuis maj se tonal mochiuakan tapaleuianij uan tayekananij. Nochin tokniuan  itech nechikol uelis kinpaleuiskej akin yankuikej (Prov. 4:2).

3, 4. 1) Komo tikixtajtoltiaj Biblia mojmostaj, ¿keniuj uelis techpaleuis itech tanojnotsalis, ijkon kemej Pablo kijtoj? 2) Komo tiknekij tikinpaleuiskej akin tikinmachtiaj ika Biblia maj momachtikan ininselti, ¿toni moneki tikchiujtoskej?

³ Tinochin tiitekitikauan Jiova moneki tikixtajtoltiskej uan timomachtiskej Biblia porin ijkon tikmatiskej katiyejua itanejnekilis Dios. Tatitanil Pablo kinmelauilij tokniuan akin nemiaj Colosas: “Amo keman tikauaj de amo timotatatautiliske ika por namejuan. Uan tiktajtaniliaj Dios ke ma Yejuatsin namechmatiltij de nochi Yejuatsin kimonekiltia”. ¿Keyej motelnekia maj kiixtajtoltianij uan maj momachtianij iTajtol Dios? Porin ijkon kemej kijtoj Pablo, kipiaskiaj tamatilis uan kinpaleuiskia maj ‘chipaujkaneminij ijkon kemej kinamiki’, kemej Jiova kiyolpaktia. No kinpaleuiskia maj kichiuanij “kuajkuali chiualisme” kemej Jiova kinekia, okachiok itech tanojnotsalis (Col. 1:9, 10). Yejua ika, keman titamachtiskej ika Biblia, maj tikinpaleuikan taltikpakneminij maj kiajsikamatikan ke komo nochipa kiixtajtoltiaj uan momachtiaj Biblia uelis kinpaleuis maj kitekitilikan Jiova.

⁴ Komo tiknekij tikinpaleuiskej akin tikinmachtiaj ika Biblia maj momachtikan ininselti, tejuan no moneki timomachtiskej. Komo tikixtajtoltiaj Biblia uan itech titanemiliaj techpaleuis itech tonemilis uan itech tanojnotsalis. Kemej neskayot, komo itech tanojnotsalis aksa techchiuilia se netajtanil tein ouij, uelis tiknankiliskej ika Biblia. Oso keman tikixtajtoltiaj ke Jesús, Pablo uan oksekin kisentokakej tanojnotskej, techyolchikauas uan tiksentokaskej titanojnotsaskej maski ouij yeski. Keman tikintapouiaj oksekin tein timomachtianij itech Biblia uan keniuj techpaleuiani, xa kinekiskej momachtiskej ika okachi nejmachkayot uan kiitaskej keniuj kinpaleuis.

5. Xikonijto se taman kemej uelis tikinpaleuiskej akin tikinmachtiaj maj momachtikan Biblia ininselti.

⁵ Xa timotajtaniskej keniuj uelis tikpaleuiskej akin tikmachtiaj maj momachti Biblia iselti. Uelis tiknextiliskej keniuj momachtis tein satepan timomachtiskej iuan. Kemej neskayot, uelis tikiluiskej maj kitemo itech Biblia tajkuilolmej tein ixnesij itech párrafos. Komo timomachtijtokej amatajkuilol Tamachtia Biblia, uelis tikiluiskej maj kiixtajtolti tamachtilis tein moajsi  itech itamajsikayo amatajkuilol. Satepan uelis tiknextiliskej keniuj momachtis tein moitas itech nechikolmej uan maj kiixtali tanankilis. No uelis tikyolchikauaskej maj nochipa kiixtajtolti amaix Tanejmachtijkej uan ¡Despertad! Uan no, uelis tiknextiliskej keniuj kiajsis itanankililuan netajtanilmej tein kipias, xa ika amaixmej tein moajsij itech Watchtower Library itech computadora oso BIBLIOTECA ITECH TEPOS Watchtower. Keman ijkon kichiuas, okachi kiyolpaktis momachtis iTajtol Dios.

6. 1) ¿Keniuj uelis tikonpaleuis akin tikonmachtia maj kiyolpakti momachtis iTajtol Dios? 2) ¿Keniuj uelis momachilis akin tikmachtiaj komo tikpaleuiaj maj kiyolpakti momachtis iTajtol Dios?

⁶ Keman tikmachtiaj aksa ika Biblia, tiknekij maj kiajsikamati ke Biblia kitelpia ipatiuj porin kipaleuia maj okachi kiixmati Jiova. Maj tikmachtikan maj kiyolpakti momachtis, uan maj amo tikteliluikan maj momachti. Keman okachi kiixmatis tein Biblia tamachtia, okachi kiuelitas momachtis. Ijkuak, xa momachilis kemej akin kijtoj nejin tajtolmej: “Semi kuali maj nimotoki iuan Dios. Niktemoua nepaleuil iuan toTajtsin Jiova akin okachi Ueyi Taixyekankej” (Sal. 73:28). Iespíritu Jiova kipaleuis maj kineki mochiuas itasojikniuj.

7. ¿Keniuj Jesús kinnextilij itatitaniluan keniuj kiteixmatiltiskej iTajtol Dios? (Xikonita taixkopin ipeujyan tamachtilis.)

⁷ Uelis tikmatiskej miak taman kemej Jesús kinnextilij itatitaniluan keniuj monekia kichiuaskej tekit. Yejua iniuan tanojnotsak, uan yejuan kiitakej keniuj tamachtiaya. Jesús no kiniluij toni senkis monekia kichiuaskej itech tanojnotsalis (Mateo, capítulo 10). ^[1] Itech amo miak tonalmej, tatitanilmej kimatkej keniuj kinmachtiskej oksekin toni yekmelauj tamachtia iTajtol Dios (Mat. 11:1). Maj tikitakan ome taman tein uelis tikinnextiliskej akin yankuikej keman titanojnotsaj.

8, 9. 1) ¿Keniuj Jesús kinnojnotsaya taltikpakneminij? 2) ¿Keniuj uelis tikinpaleuiskej yankuik tanojnotsanij maj tajtokan iniuan taltikpakneminij kemej Jesús tajtouaya?

⁸ Keniuj tajtoskej iniuan taltikpakneminij. Jesús amo nochipa tanojnotsak ininixpan tel miakej taltikpakneminij. Miakpa kinmachtiaya sejsemej. Uan nochipa katka kualtakat. Kemej neskayot, se tonal tel kuali tajtoj iuan se siuat akin atakuito ompakauin itech xolal Sicar (Juan 4:5-30). Okse tonal tajtoj iuan se takat akin kisentiliaya tomin akin monotsaya Mateo Leví. Jesús kiyoleuak maj mochiua itatojtokakauj, uan Mateo kijtoj ke kemaj. Satepan nejin takat kiyoleuak Jesús uan oksekin maj takuatij ichan. Itech nejon tatakualis, Jesús kinnojnotsak miakej (Mat. 9:9; Luc. 5:27-39).

⁹ Se takat akin monotsaya Natanael amo kuali ininka tajtojka akin kayomej Nazaret, ixolal Jesús. Maski ijkon, Jesús kuali  kinojnotsak. Yejua ika, Natanael kipatak kemej kiitaya Jesús uan kinekik okachi kiixmatis (Juan 1:46-51). ¿Toni techmachtia tein kichiuak Jesús? Ke komo tikualtakamej iniuan taltikpakneminij, xa okachi kinekiskej techkakiskej. ^[2] Maj tikinnextilikan akin yankuikej maj kualtakamej. Ijkon, okachi kinyolpaktis tanojnotsaskej.

10-12. 1) ¿Toni kichiuak Jesús keman taltikpakneminij kinekiaj kimatiskej okachi? 2) ¿Keniuj uelis tikinpaleuiskej yankuik tanojnotsanij maj okachi kuali tamachtikan?

¹⁰ Maj kinmachtikan akin kinekij kinkakiskej. Jesús nochipa kipiaya miak tekit. Sayoj ke keman taltikpakneminij kinekiaj kikakiskej, yejua kinmachtiaya miak taman. Kemej neskayot, se tonal tel miakej taltikpakneminij yajkej atenoj porin kinekiaj kikakiskej. Jesús tejkok itech se barco iuan Pedro uan ompa peuak kinmachtia. Itech nejon tonal kipaleuij Pedro maj ueli kinkitski tel miak amichimej. Satepan kiluij: “Nikan para taixpan nimitsnextiliti de keniu tikintemojtinemis tagayot para ma nechtakamatikan, ijkon keme ay tikintemojtinemi pescados”. Biblia kijtoua ke Pedro uan oksekin akin iuan moajsiaj niman “kikauteuke ninbarcos uan yajke kitoktilijke Jesús para momachtiske itanextililis” (Luc. 5:1-11).

¹¹ Se takat akin monotsaya Nicodemo no kinekia okachi kimatis tein tamachtiaya Jesús. Sayoj ke kemej pouia iniuan tamelauanij judíos akin okachi ueyichiuanimej katkaj, kimouiliaya tein oksekin ueliskia kijtoskej komo kiitayaj tajtojtok iuan Jesús. Yejua ika kikalpanoto youak. Jesús kiselij ika pakilis, uan peuak kimachtia miak taman tein motelnekia (Juan 3:1, 2). Jesús keman yeski kinmachtiaya taltikpakneminij uan kichikauaya inintakuaujtamatilis. Tejuan no moneki tikinkalpanoskej taltikpakneminij keman okachi kemantiskej uan tikinpaleuiskej maj kiajsikamatikan tein tamachtia Biblia.

¹² Keman titanojnotsaj iniuan akin yankuikej, uelis tikinpaleuiskej maj kimatikan ke moneki oksepa kinkalpanoskej akin kinextijkej ke kinekiaj kimatiskej okachi. No uelis tikinyoleuaskej maj touan yakan keman oksepa tikinkalpanoskej taltikpakneminij uan keman titamachtiskej. Nejin kinpaleuis maj kimatikan keniuj tamachtiskej ika Biblia uan kiitaskej yolpakilis tein teualkuilia se kinpaleuis oksekin maj kiixmatikan Jiova. Satepan yejuan kinyolpaktis oksepa kinkalpanoskej taltikpakneminij uan kinmachtiskej ika Biblia. Uan no, amo yolijsiuiskej uan amo niman mosenkauaskej komo amo kinajsij taltikpakneminij (Gál. 5:22; xikonita kampa kijtoua “ Amo mosenkauak”).

13, 14. 1) ¿Toni techmachtiaj itekitikauan Jiova akin kinpaleuijkej oksekin? 2) ¿Keniuj uelis tikinpaleuiskej telpochmej uan akin yankuikej maj kinnextilikan tokniuan ke kintasojtaj?

¹³ Jiova kineki maj tiitekitikauan timotasojtakan kemej tiiknimej uan maj timopaleuikan (xikonixtajtolti Lucas 22:24-27 uan 1 Pedro 1:22). Biblia kijtoua ke Jesús kichiuak nochi tein uelik kemej kinpaleuis taltikpakneminij. Hasta toka kitemakak inemilis (Mat. 20:28). Se itatojtokakauj Cristo akin monotsaya Dorcas nochipa kinpaleuiaya oksekin (Hech. 9: 36, 39). Uan okse akin monotsaya María kintelpaleuij tokniuan akin nemiaj Roma (Rom. 16:6). ¿Keniuj uelis tikinpaleuiskej akin yankuikej maj kiajsikamatikan ke motelneki kinpaleuiskej tokniuan?

¹⁴ Uelis tikinyoleuaskej akin yankuikej maj tikinkalpanotij tokniuan akin xiuejkejya oso akin mokokouaj. Tetatmej uelis kinuikaskej ininkoneuan, komo kiitaj ke uelis. Tayekananij uelis kiniluiskej telpochmej oso akin yankuikej maj kinuikilikan takual akin xiuejkejya oso maj kiyektalikan teisa ininchan. Komo telpochmej uan akin yankuikej kiitaj ke tokniuan mosenyekpiaj, no ijkon kichiuaskej. Maj tikitakan tein kichiuaya se tayekankej. Keman tanojnotsaya itech se xolal, kinkalpanouaya tokniuan akin ompa nemiaj uan kiitaya keniuj moajsiaj. Nejon kipaleuij se telpoch akin miakpa iuan yaya maj no kitemouani keniuj kinpaleuis tokniuan (Rom. 12:10).

15. ¿Keyej motelneki maj tayekananij kinpaleuikan tokniuan takamej maj okachi kuali tamachtikan?

¹⁵ Kemej Jiova tamachtia itech nechikol inintechkopa takamej, motelneki maj yejuan kimatikan kuali tamachtiskej keman kitemakaskej tanojnotsmej. Tayekananij uelis kinpaleuiskej. Kemej neskayot, uelis iuan yetoskej se tokniuj tapaleuijkej keman momachtijtos keniuj kitemakas se tanojnots (Neh. 8:8). ^[3]

16, 17. 1) ¿Keniuj Pablo kinextij ke kinekia kipaleuis Timoteo? 2) ¿Keniuj tayekananij uelis kinpaleuiskej akin satepan yeskij tayekananij?

¹⁶ Motelneki maj se kinmachti okachi tokniuan maj kichiuakan tein kinpaleuis maj mochiuakan tayekananij akin kinyekpiaskej tokniuan itech nechikol (xikonita kampa kijtoua “Tein okachi momelaua”). Pablo kimachtij Timoteo uan kiluij maj no kinmachtiani oksekin. Yejua kiluij: “Ximoyekyojyolchikautiu ika ne teiknelilis ne ten Dios techmaktilijtok porin iuan Yejuatsin tisenpoutinemij. Uan tejua Timoteo, tikaktinemik ya notanextililis inixpan miak takakini, kuak nitamachtijtinemia ika in Tajtoltsin de Dios. Uan ne notanextililis xikui uan xikinmachti ne taneltokani ten tikitas ke melau kinekij motekitiltiske para Cristo. Uan yejuan nojonkes no ma kinextilijtinemikan oksekin” (2 Tim. 2:1, 2). Keman moajsia iuan Pablo, akin katka tayekankej uan tatitanil, Timoteo kimatik miak taman, kemej keniuj okachi kuali tanojnotsaskia uan keniuj kinpaleuiskia oksekin itech nechikol (2 Tim. 3:10-12).

 ¹⁷ Pablo kitelpaleuij Timoteo porin kinekia maj kuali tamachti (Hech. 16:1-5). ¿Keniuj tayekananij uelis kichiuaskej kemej Pablo? Keman kinyoleuaskej seki tapaleuianij maj iniuan kinyolchikauatij tokniuan, keman kiitaskej ke uelis. Ijkon, tapaleuianij kimatiskej keniuj kinmachtiskej oksekin uan keniuj amo yolijsiuiskej uan tetasojtaskej. No kiitaskej ke moneki kitajtaniskej Jiova maj kinpaleui maj kuali kinyekpiakan itekitikauan (1 Ped. 5:2).

18. ¿Keyej motelneki tikinnextiliskej oksekin keniuj kichiuaskej tekit?

¹⁸ Itech nejin itamian tonalmej, miakej akin yankuikej moneki tikinnextiliskej keniuj okachi kuali tanojnotsaskej. Uan no, moneki maj okachi tokniuan kimatikan keniuj taixyekanaskej itech nechikol. Jiova kineki maj nochin itekitikauan kipiakan kuali tamachtilis uan techmakani tatiochiualis maj tikinpaleuikan akin yankuikej. Yejua ika, motelneki maj timochikauakan tikinmachtiskej oksekin, kemej kichiujkej Jesús uan Pablo. Moneki tikinnextiliskej nochin akin tiueliskej keniuj kichiuaskej tekit, porin onkakok miak tekit itech tanojnotsalis achto ke ejkos poliuilis.

19. ¿Keyej tikonyekmati tejuatsin ke kiualkuis tein kuali komo tionmochikaua tikonnextilis oksekin keniuj kichiuaskej tekit?

¹⁹ Amo ijsiujka se kinmachtia akin yankuikej uan moneki chikaujkayot. Sayoj ke uelis tikyekmatiskej ke Jiova uan Jesús techpaleuiskej maj tikmatikan keniuj okachi kuali tikinmachtiskej. Tiyolpakiskej keman tikinitaskej ke mochikauaj okachi tapaleuiskej itech nechikol uan itech tanojnotsalis (1 Tim. 4:10). Uan no, maj tiksentokakan tiktemojtokan keniuj okachi tiktekitiliskej Jiova, maj okachi kuali tiknextikan kualneskayomej uan maj okachi kuali timouikakan iuan.