1, 2. 1) ¿Keniuj mochiujtok tein kijtoua Isaías 60:22 itech itamian tonalmej? 2) ¿Toni moneki itech nochi nechikolmej?

“TEIN tsikitsin mochiuas se millar, uan tein amo ueyi mochiuas se altepet tel chikauak.” (Is. 60:22.) Nejin tajtolmej mochiujtokya axkan itech itamian tonalmej. Kemej neskayot, itech xiuit 2015 moajsiajya 8,220,105 itaixpantijkauan Jiova semanauak taltikpak. Jiova kijtoj keniuj momiakiliskiaj itekitikauan: “Nejua, Jiova, nikijsiuiltis keman ajsis tonalmej”. Nejin kijtosneki ke ijkon kemej panoskej tonalmej, okachi tikpiaskej tekit. ¿Tikchiujtokejya nochi tein techpaleuis maj tikteixmatiltikan uan maj titamachtikan tein kichiuas iTekiuajyo Dios? Miakej tokniuan takamej uan siuamej kichiuaj tekit kemej precursor regular oso auxiliar. Sekin tapaleuitij okseko itech tanojnotsalis. Uan oksekin chikauak tekitij kichijchiuaj Kalmej kampa tiMosentiliaj.

² Nochi xiujmej mopeualtiaj kemej 2,000 yankuik nechikolmej. Itech nejon nechikolmej moneki moajsiskej tayekananij uan tapaleuianij. Yejua ika, sejse xiuit moneki maj tel miakej  tokniuan takamej mochiuakan tapaleuianij uan maj tel miakej tapaleuianij mochiuakan tayekananij. Moyekita ke tinochin, tiyeskij titakamej oso tisiuamej, moneki tikchiuaskej “kachi ok tech ne tekitsin ten Totekotsin Cristo technauatilij” (1 Cor. 15:58).

3, 4. ¿Toni tekimej itech inechikol Dios uelis tikixtaliskej tikchiuaskej?

³ (Xikonixtajtolti 1 Timoteo 3:1.) Tajtolmej “kineki mochiuas” itech tajtol griego teajsikamatiltia keman se motilana porin se kineki se kikitskis teisa tein amo ijsiujka se maajsi. Keman tatitanil Pablo kikuik nejin tajtolmej, kinextij ke komo se kineki se kiselis se tekit moneki se mochikauas. Kemej neskayot, maj tiknemilikan ke se tokniuj kineki yeski tapaleuijkej. Xa kiita ke moneki mochikauas kinextis seki kualneskayomej. Keman kinextisya uan mochiuas tapaleuijkej, kisentokas mochikauas kichiuas tein moneki tein kipaleuis maj kiseli tekit kemej tayekankej.

⁴ Tokniuan takamej uan siuamej akin kinekij kichiuaskej tekit kemej precursor, tekitiskej Betel oso kichijchiuaskej Kalmej kampa tiMosentiliaj no moneki mochikauaskej. Maj tikitakan keniuj Biblia uelis techpaleuis maj tiktemokan keniuj okachi tiktekitiliskej Jiova.

5. ¿Keniuj telpochmej uelis kikuiskej ininchikaualis itech itekiyo Dios?

⁵ Telpochmej uan ichpochmej amo semi kokolispeuaj uan chikaujkej, uan yejua ika ueli kichiuaj miak taman itech itekiyo Jiova (xikonixtajtolti Proverbios 20:29). Sekin akin tekitij Betel kichijchiuaj amaixmej. Miakej tapaleuiaj kampa kichijchiuaj oso kiyektaliaj Kalmej kampa tiMosentiliaj. Oksekin tapaleuitij kampa mochiua se tetsauit. Uan miakej akin kichiuaj tekit kemej precursor momachtiaj okse tajtol oso tapaleuitij okseko itech tanojnotsalis.

6-8. 1) ¿Toni kipaleuij se telpoch maj kiyolpakti kitekitilis Dios, uan toni panok satepan? 2) ¿Keniuj uelis tikitaskej ke “Jiova yolkuali”?

⁶ Maski tiktasojtaj Jiova uan tiknekij tikmakaskej tein okachi kuali, uelis timomachiliskej kemej momachiliaya se tokniuj akin motokaytia Aaron. Yejua kinekia maj kiyolpakti tein kichiuaya itech itekiyo Jiova, sayoj ke amo yolpakia. Yaya nechikolmej uan peuak tanojnotsa keman nojnelok katka, sayoj ke nochipa tasematia. ¿Toni kichiuak?

⁷ Mochikauak kiixtajtoltis Biblia mojmostaj, momachtis tein moitaskia itech nechikolmej uan tanankilis. Uan no, peuak okachi kichiua netataujtil. Nochi nejin kipaleuij maj okachi kichikaua itakuaujtamatilis. Okachi kuali kiixmatik Jiova uan peuak okachi kitasojta, uan nejon kichiuak maj okachi yolpaki. Mochiuak precursor, tapaleuij miakkan kampa mochiuaya tetsaujmej uan tanojnotsato itech okse ueyi altepet. Axkan yejua se tayekankej uan tekiti Betel. ¿Keniuj momachilia? Kijtoua ke kiitani ke “Jiova yolkuali”. Uan no, kimachilia kemej yeskia kitauikilia Jiova uan yejua ika kineki okachi kitekitilis. Yejua kimati ke nejin kiualkuilia okachi tatiochiualismej.

 ⁸ Se itekitikauj Dios mokuikatij: “Xikyekokan uan xikitakan ke Jiova yolkuali”. Uan no kijtoj: “Akin kitemouaj Jiova, amo kinpolos nion teyi tein kuali” (xikonixtajtolti Salmo 34:8-10). Keman tikmakaj Jiova tein okachi kuali, tiyolpakij porin tikmatij ke nejon kiyolpaktia. Uan yejuatsin techyekpias ijkon kemej motenkaujtok.

9, 10. ¿Keyej motelneki maj amo tiyolijsiuikan?

⁹ Xa tiknekiskej okachi tiktekitiliskej Jiova. Sayoj ke ¿toni tikchiuaskej komo uejkaujya timochixtokej maj techmakakan se tekit itech nechikol oso maj mopata tein tikpanotokej? Moneki maj amo tiyolijsiuikan (Miq. 7:7). Jiova xa kikauas maj ijkon kisentoka. Sayoj ke maj titakuaujtamatikan ke yejuatsin nochipa techmakas inepaleuil. Maj titanemilikan itech Abrahán. Jiova motenkauak iuan ke kipiaskia se konetsin, sayoj ke panokej miak xiujmej hasta keman Isaac yolik. Maski ijkon, Abrahán amo yolijsiuik uan amo keman omeyolouak (Gén. 15:3, 4; 21:5; Heb. 6:12-15).

¹⁰ Melauak ke semi teouijmaka se mochias (Prov. 13:12). Sayoj ke komo tiksentokaj titanemiliaj itech tein amo mochiua, tiyolkuetauiskej. Okachi kuali maj timochikauakan tikpiaskej kualneskayomej tein techpaleuis maj kuali tikchiuakan tekimej itech nechikol. Maj tikitakan eyi taman tein uelis tikchiujtoskej.

11. 1) ¿Toni kualneskayomej uelis timochikauaskej tiknextiskej? 2) ¿Keyej motelneki maj tikchiuakan nejon?

¹¹ Maj tiknextikan kualneskayomej tein monekij. Komo tikixtajtoltiaj Biblia uan itech titanemiliaj, techpaleuis maj tiknextikan tamatilis, maj okachi kuali titanemilikan uan maj kuali titaixpejpenakan. Motelneki maj tokniuan takamej kipiakan kualneskayomej kemej nejin porin kinpaleuis maj kinyekpiakan tokniuan itech nechikol (Prov. 1:1-4; Tito 1:7-9). Keman timomachtiskej Biblia, tikmatiskej tein Jiova kinemilia ika miak taman. Uan mojmostaj uelis tikuiskej tein timomachtiskej uan ijkon tikixpejpenaskej tein kiyolpaktis. Kemej neskayot, tikmatiskej keniuj moneki timouikaskej iniuan oksekin, keniuj kuali tiktekitiltiskej tomin uan keniuj kuali tikixpejpenaskej tein timotaliliskej uan tein ika timoixpetaniskej.

12. ¿Keniuj uelis kinextiskej tokniuan ke takuaujtamachmej?

¹² Maj timochikauakan tikyekchiuaskej tekimej tein techmakaskej. Keman judíos kiyekchijchiujtoyaj templo, monekiaj takamej akin kipaleuiskiaj Nehemías itech miak tataman tekimej. ¿Akonimej kinixpejpenak? Akin kuali ininka tajtouayaj. Yejua kimatia ke yejuan kitasojtayaj Dios uan ke kiyekchiuaskiaj tein yeski tekit tein kinmakaskia  (Neh. 7:2; 13:12, 13). Axkan no ijkon. Komo se tokniuj takuaujtamach uan kuali tekiti, kuali ika tajtoskej. Ijkon xa kimakaskej okseki tekimej (1 Cor. 4:2). Tiyeskij titakamej oso tisiuamej, maj nochipa tikyekchiuakan tein yeski tekit tein techmakaskej (xikonixtajtolti 1 Timoteo 5:25).

13. ¿Keniuj uelis tikchiuaskej kemej José keman techchiuiliskej tein amo kuali?

¹³ Maj tiktemokan inepaleuil Jiova. Komo aksa techchiuilia tein amo kuali, ¿toni uelis tikchiuaskej? Uelis tikiluiskej keniuj timomachiliaj. Sayoj ke komo tiksentokaj tiktemouaj maj monexti ke amo tejuan timopolojkej, uelis tikchiuaskej maj okachi ueyia kuejmol. Maj titanemilikan itech tein kipanok José. Iikniuan kiteltajyouiltijkej, uan satepan oksekin kipantijkej teisa tein amo kichiujka uan kitsakkej. Sayoj ke yejua kitemoj inepaleuil Jiova. Tanemilij itech tein Dios motenkaujtoya uan amo keman kikauak (Sal. 105:19). Keman kipanotoya tein okachi ouij, mochikauak kipias kualneskayomej tein satepan kipaleuijkej keman kimakakej se ueyi tekit (Gén. 41:37-44; 45:4-8). Komo aksa techchiuilij tein amo kuali, maj tiktajtanikan Jiova maj techmaka tamatilis. Yejuatsin techpaleuis maj tiyolseujtokan uan maj tikualtakamej keman titajtoskej iuan nejon taltikpaknenkej (xikonixtajtolti 1 Pedro 5:10).

14, 15. 1) ¿Keyej moneki tiktemoskej okachi kuali titanojnotsaskej? 2) ¿Keniuj uelis tiktemoskej okseki taman kemej titanojnotsaskej? (Xikonita taixkopimej ipeujyan tamachtilis uan kampa kijtoua “ ¿Uelis taman titanojnotsaskej?”).

¹⁴ Pablo kiluij Timoteo maj kisentokani kitemouani keniuj okachi kuali kimelauas iTajtol Dios. Uan no kiluij: “Xikyekpixtinemi moyolo [...]. Xiktakamati de motanextililisuan tenika tejua titamachtijtinemi” (1 Tim. 4:13, 16). Timoteo miak xiujmejya tamachtiaya ika iTajtol Dios. Komo ijkon, ¿keyej Pablo kinauatij nejon? Porin taltikpakneminij uan tein mochiua mopataj. Komo Timoteo kinekia maj taltikpakneminij kisentokanij kikakinij, monekia okachi kuali tamachtis uan kipatas kemej tamachtiaya. Tejuan no moneki tikchiuaskej nejon.

¹⁵ Keman titanojnotsatij, miakkan xa amo tikinajsij miakej ininchan. Kansaika, taltikpakneminij xa kemaj moajsij ininchan, sayoj ke amo ueli tikalakij kampa ika yejuan nemij. Komo techpanoua nejin, xa uelis tiktemoskej okseki taman kemej uelis tikinnojnotsaskej.

16. ¿Keniuj uelis kuali titanojnotsaskej kampa miakej panouaj?

¹⁶ Miakej tokniuan kiuelitaj tanojnotsaskej kampa miakej panouaj, kemej kampa ajsi tren uan autobús, tanamakaloyamej uan parques. ¿Keniuj peua kinnojnotsaj taltikpakneminij? Sekin peua ika tajtouaj se tanauatil tein yankuixtok motemakak. Oksekin kiluiaj taltikpaknenkej se taman tein kuali tein kichiuaj ikoneuan oso kitajtaniaj se taman ika itekiuj. Komo kiitaj ke taltikpaknenkej kineki kisentokas tajtos, kimelauiliaj tein kijtoua Biblia uan kitajtaniaj tein kinemilia. Miakpa, taltikpakneminij kinekij okachi kimatiskej tein tamachtia Biblia.

17, 18. 1) ¿Toni techpaleuis maj amo techouijmaka titanojnotsaskej kampa miakej panouaj? 2) ¿Keyej tikonnemilia tejuatsin ke uelis mitsonpaleuis itech tanojnotsalis komo no tikonneki tikonueyichiuas Dios kemej David?

¹⁷ Xa ouij techkisa tipeuaskej titajtoskej itech ojti iniuan akin amo tikinixmatij. Yejua nejon kipanouaya Eddie, se precursor akin nemi Nueva York. ¿Toni kipaleuiani maj amo semi kiouijmaka? Kijtoua ke keman taueyichiuaj kemej kalyetouanij, yejua uan inamik kitemouaj tamachtilis tein kinpaleuis maj kimatikan toni kijtoskej keman taltikpakneminij kijtouaj tein kinemiliaj oso keman kinchiuiliaj se netajtanil. Uan no, kintajtaniaj okseki tokniuan maj kinyolmajxitikan keniuj uelis tanankiliskej. Axkan Eddie kiteluelita tanojnotsas kampa miakej panouaj.

¹⁸ Komo okachi techyolpaktia titanojnotsaskej uan timochikauaj okachi kuali titanojnotsaskej, oksekin kiitaskej ke tiktemouaj okachi tikyolpaktiskej Jiova (xikonixtajtolti 1 Timoteo 4:15). Xa hasta uelis tikpaleuiskej aksa maj mochiua itaixpantijkauj Jiova. David kijtoj: “Nochipa nikueyichiuas Jiova; nochipa notenoj kiueyichiuas. Nimoueyinekis itech Jiova; akin yolnejmachmej kikakiskej uan yolpakiskej” (Sal. 34:1, 2).

19. ¿Keyej se itekitikauj Jiova uelis yolpakis maski onkas seki taman tein kichiuas maj amo semi teyi ueli kichiua?

¹⁹ David no kijtoj: “Nochi motachijchiualis mitsueyichiuas, Jiova, uan akin  amo mitskauaj mitsueyitaliskej. Yejuan kiteixmatiltiskej keniuj ueyi motaixyekanalis uan ika tajtoskej moueyi chikaualis, uan ijkon kinixmatiltiskej takamej mouejueyi tachiualisuan uan iueyikualtsinyo motaixyekanalis kemej tekiuaj” (Sal. 145:10-12). Akin kitasojtaj Jiova uan amo kikauaj kinekij ika nochi ininyolo kinixmatiltiskej okseki taltikpakneminij keniuj tamati yejuatsin. Sayoj ke komo tixiuejkejya oso timokokouaj xa amo uelis titanojnotsaskej kajkalpan ijkon kemej tiknekiskiaj. ¿Toni uelis tikchiuaskej? Nochipa maj tikelnamikikan ke tikueyichiuaj Jiova keman ika titajtouaj iniuan akin touan yetoskej, kemej tapajtianij. ¿Uan komo techtsakkej porin titanojnotsaj? Maski ijkon, xa uelis ika titajtoskej Jiova iniuan oksekin. Nejin semi kiyolpaktia (Prov. 27:11). Yejuatsin no kiyolpaktia maj tiktekitilikan maski tochankauan amo (1 Ped. 3:1-4). Hasta keman tikpanotoskej tein okachi ouij uelis tikueyichiuaskej Jiova, okachi kuali iuan timouikaskej uan tiktemoskej keniuj okachi tiktekitiliskej.

20, 21. ¿Keniuj kinpaleuis oksekin komo timochikauaj okachi tiktekitiliskej Jiova?

²⁰ Jiova techtatiochiuis komo tiksentokaj okachi kuali timouikaj iuan uan tiktekitiliaj nochi tein tiueliskej. Komo tikpataj tein tikchiuaj mojmostaj, uelis okachi tikinpaleuiskej taltikpakneminij maj kiixmatikan nochi tein kualtsin tein Dios motenkaujtok. Uan xa no uelis okachiok tikinpaleuiskej tokniuan. Keman yejuan kiitaskej ke timochikauaj okachi titapaleuiskej itech nechikol, okachi techtasojtaskej.

²¹ Yeski uejkaujya oso yankuixtok tiktekitiliaj Jiova, tinochin uelis okachi kuali timouikaskej iuan uan okachi tiktekitiliskej. Itech okse tamachtilis tikitaskej keniuj uelis tikinnextiliskej oksekin keniuj kichiuaskej tekit.