POLICÍA nechiluij: “Amo kuali titepopaj. Tikauak mosiuapiltsin uan monamik, akin kokoxkayetok. ¿Akoni kintamakas uan kinyekpias? Xikaua motaneltokalis uan ximokepa mochan”. Nejua niknankilij: “Amo nikinkauak nochankauan. Namejuan nanechkitskijkej. ¿Uan toni tein amo kuali nikchiuak?”. Policía nechnankilij: “Amo onkak okse taman tein tel amo kuali ke se mochiuas itaixpantijkauj Jiova”.

Nejin panok itech xiuit 1959 itech kali kampa tetsakuaj itech xolal Irkutsk, ompa Rusia. Maj namechtapoui keyej nonamik, Maria, uan nejua tikixtalijtoyaj amo tikauaskej Jiova uan titajyouiskej porin tikchiujtoyaj tein melauak, uan no keniuj Dios techtatiochiuij (1 Ped. 3:13, 14).

Niyolik itech xiuit 1933 ompa Ucrania itech xolal Zolotniki. Itech xiuit 1937, notíos, akin katkaj itaixpantijkauan Jiova uan nemiaj Francia, techkalpanojkej uan techmakakej amatajkuilolmej Gobierno uan Liberación. * Keman nopopaj kinixtajtoltij, oksepa peuak iuan takuaujtamati Dios. Tetayokoltij nikijtos ke itech xiuit 1939 ueyi kokolispeuak. Sayoj ke achto ke momikiliskia kiluij nomomaj: “Yejua nejin tein melauak. Xikinmachti tokoneuan”.

Itech metsti abril xiuit 1951, tekiuanij peuak kinuikaj Siberia itaixpantijkauan Jiova akin nemiaj itonalkalakyampa Unión Soviética. Nomomaj, nokniuj Grigory akin xokoyot uan nejua techkixtijkej kampa tinemiaj ompa Ucrania. Satepan ke tiyajkej itech tren panoua 6,000 kilómetros, tiajsikej xolal Tulun, ompa Siberia. Nokniuj Bogdan, akin tayekana, kiajxitijkej ome semana satepan itech xolal Angarsk, tein amo uejka moajsia. Kiixtalijkaj maj tsakto veinticinco xiujmej kampa kiteltekitiltiskiaj.

Nomomaj, nokniuj Grigory uan nejua titanojnotsayaj kampa miakej mokaltalijkaj, sayoj ke monekia tikchiuaskej ika nejmachkayot. Kemej neskayot, tikintajtaniayaj taltikpakneminij: “¿Tikonixmati aksa akin kineki kinamakas se kuakouej?”. Komo tikajsiaj aksa akin kinekia kinamakas se, ika titajtouayaj keniuj tel kuali kemej chijchiujtok nejin tapial. Tepitsin satepan, ika titajtojtoyajya Tachijchiujkej. Itech nejon tonalmej, itech se periódico moijkuiloj ke itaixpantijkauan Jiova ika tajtaniaj kuakuejmej, sayoj ke tein melauj kintemouayaj ichkamej. Uan tein melauj, tikinajsikej miakej taltikpakneminij yolyemankej akin tamatiaj kemej ichkamej. Semi techyolpaktij timomachtiskej Biblia iniuan nejon taltikpakneminij yolyemankej uan kualtakamej. Axkan, ompa Tulun moajsi se nechikol kampa pouij panoua cien tanojnotsanij.

Nonamik, Maria, kiixmatik tamachtilis tein melauak ompa Ucrania keman mochiujtoya Ojpatika Neteuilis tein Mochiuak itech Nochi Taltikpak. Keman kipiaya 18 xiujmej, se policía peuak kiteliluia maj iuan motekani, sayoj ke Maria nochipa kiluiaya ke amo. Se tonal, keman mokepak ichan, kiajsik policía uetstok itech icama. Maria ijsiujka kisteuak. Policía tel kualanik uan kiluij ke kitsakuaskiaj porin katka itaixpantijkauj Jiova. Uan ijkon panok; itech xiuit 1952 kiixtalijkej maj tsakto majtakti xiujmej. Momachilij kemej José, akin kitsakkej porin kitakamatik Jiova (Gén. 39:12, 20). Akin kiuikak Maria itech carro keman yetoyaj ininixpan tamelauanij hasta kampa kitsakuaskiaj kiluij: “Amo ximoui. Miakej akin kintsakuanij kisentokaj kinpoujkaitaj”. Nejon semi kiyolchikauak.

Itech xiuit 1952 hasta 1956, Maria tsaktoya kampa ika xolal Gorki (axkan Nizni Nóvgorod), ompa Rusia, kampa kiteltekitiltiayaj. Kichikaujkauiayaj maj kinichkua koujmej hasta kintamotaskia, maski tel taseseyaskia. Yejua ika, kokolispeuak. Itech xiuit 1956 kikixtijkej uan kititankej Tulun.

Se tokniuj takat nechiluij ke ajsiskia se tokniuj siuat ompa Tulun, yejua ika niknamikito itech nobicicleta kampa ajsia autobús uan nikpaleuito ika tein kiuikaya. Keman nikixmatik Maria, nikueuelitak. Maski ouij nechkisak nikchiuas maj nechtasojta, uelik nikchiuak. Timonamiktijkej itech xiuit 1957, uan se xiuit satepan yolik tosiuapiltsin Irina. Semi tiyolpakiaj, sayoj ke nejin yolpakilis amo uejkauak. Itech xiuit 1959, nechkitskijkej porin nikamakixtiaya amaixmej tein ika tajtouaj Biblia. Tajko xiuit nechtsakkej noselti. Kemej niknekia niksentokas niyolseujtos, nochipa nikchiuaya netataujtil, nikueyichiuaya Jiova ika nekuikatilmej uan niknemiliaya keniuj nitanojnotsaskia komo amo nitsaktoskiaok.

Se tonal keman nechchiuilijtoyaj netajtanilmej kampa nitsaktoya, se policía nechtsajtsilij: “¡Amo uejkaua tikinixpoloskej nochin itaixpantijkauan Jiova kemej yeskiaj kimichimej!”. Nejua niknankilij: “Jesús kijtoj ke tein kuali tein kichiuas Tekiuajyot moteixmatiltis itech nochi altepemej, uan amo akin uelis kitsakuilis nejon”. Satepan policía kipatak kemej kitemouaya nechtanemililpatas uan kitemoj kichiuas maj nikauani notaneltokalis, ijkon kemej nikijtoj yekinika. Kemej amo nikauak notaneltokalis maski nechmojmoujtijkej uan nechtanejnektijkej maj nimokepa kalijtik, kiixtalijkej maj nitsakto chikome xiuit kampa nechteltekitiltiskiaj tein moajsia kampa ika xolal Saransk. Keman nechuikayaj ompa, nikmatik ke yolik ojpatika nosiuapiltsin, Olga. Maski nonamik uan nosiuapipiluan tel uejka yetoyaj, nechyolseuiaya nikmatis ke nonamik uan nejua tiktakamattoyaj Jiova.

Maria yaya nechitati Saransk sepa itech xiuit, maski yas uan mokepas kiuikiliaya doce tonalmej itech tren. Nochipa nechualkuiliaya seki botas tein yankuikej uan taijtik kitatiaya amaixmej Tanejmachtijkej tein yankuixtok kiskaj. Niktelelnamiki tonal keman nechkalpanoko iniuan ome tosiuapipiluan. Kemej ueli tikonnemilia, tel kualtsin nimomachilij keman nikinitak.

Itech xiuit 1966 nechkixtijkej, uan nimokaltalito iniuan nochankauan itech xolal Armavir, kampa ika  mar Negro. Ompa yolkej tookichpipiluan Yaroslav uan Pavel.

Amo uejkauak, policías peuak kitemouaj amaixmej tein ika tajtouaj Biblia tokalijtik. Noyampa kitemouayaj, hasta itech inintakual kuakuejmej. Itech semej nejon tonalmej, Maria kiniknelij. Policías mitonijtoyaj uan inintilmaj tel talnexyoj katka. Maria kimatia ke yejuan sayoj kichiujtoyaj tein kinnauatiayaj. Yejua ika kinmakak tein tayiskiaj uan kinuikilij se tapalkat ika at, tilmaj tein ika mouatsaskiaj uan se cepillo tein ika kixakualoskiaj inintilmaj. Ompa, keman inintaixyekankauj ajsik, kitapouijkej ke semi tikintakachiujkaj. Keman yajkej, inintaixyekankauj techixuetskilij uan momanauatij. Techyolpaktij tikitaskej tein panoua keman timochikauaj tiksentokaskej tiktaniskej tein amo kuali ika tein kuali (Rom. 12:21).

Maski tatemouayaj, tiksentokakej titanojnotskej ompa Armavir. No tikinpaleuijkej seki tanojnotsanij akin amo miakej katkaj itech xolal Kurgáninsk tein ompakauin moajsia. Nechyolpaktia nikijtos ke axkan moajsij chikuasen nechikolmej ompa Armavir uan naui itech xolal Kurgáninsk.

Itech xiujmej tein panouanij, kemansa amo tiktekitilianij Jiova kemej moneki. Tikteltasojkamatiliaj Jiova porin kinkuik tokniuan akin nochipa kitekitilijkej maj techyolmajxitianij uan maj techyolchikauanij (Sal. 130:3). No ouij techkisak tiktekitiliskej Jiova iniuan policías akin mokalakijkej itech nechikolmej ika takajkayaualis. Semi tanojnotsayaj uan kinextiayaj ke kitasojtayaj tamachtilis tein melauak. Sekin hasta kiselijkej tekimej itech nechikol. Sayoj ke satepan tikmatkej toni yekmelauj kichiuayaj.

Itech xiuit 1978, keman Maria kipiaya 45 xiujmej, oksepa mokokoxkatalij. Kemej kipiaya se kokolis itech iyolo, tapajtianij kinemiliayaj ke ueliskia momikilis uan kitemojkej kichiuaskej maj kimayoui konetsin. Yejua senkis kijtoj ke amo. Yejua ika seki tapajtianij kitojtokakej noyampa itech kaltapajtiloyan porin kinekiaj kitaliliskej se pajti tein kichiuaskia maj konetsin ijsiujka yolini. Maria choloj uan ijkon kimatampauij konetsin.

Kemej policías technauatijkej maj tikisanij itech xolal, timokaltalitoj itech se xolal tein moajsia kampa ika xolal Tallin, ompa Estonia, tein ijkuak pouia itech Unión Soviética. Ompa, maski tapajtianij kijtojkaj ke ueliskia momikilis, Maria kiyolitij se konetsin akin kuali yetoya, akin tiktokaytijkej Vitaly.

Satepan, tikiskej Estonia uan tiajsikej Nezlobnaia, kampa ika sur ompa Rusia. Titanojnotsayaj ika nejmachkayot itech xolalmej tein ompakauin moajsiaj, kampa ajsiaj miakej akin mokokouayaj uan akin yayaj paxalotij. Taltikpakneminij akin miakkan ualeuayaj ajsiaj ompa porin kichiayaj pajtiskej, sayoj ke keman sekin mokepkej ininchan kichiayajya nemiskej nochipaya.

Timochikaujkej tikinpaleuiskej tokoneuan maj kitasojtakan Jiova uan maj kinekikan kitekitiliskej. Tikinyoleuayaj kalijtik tokniuan akin kinkauiliayaj se kuali neskayot. Nokniuj Grigory, akin takalpanoj itech nechikolmej itech xiuit 1970 hasta 1995, nochipa techkalpanouaya. Tinochin semi tiyolpakiaj keman techkalpanouaya porin semi yolpakia. Keman tokniuan techkalpanouayaj, miakpa timauiltiayaj ika netajtanilmej tein tikixtiayaj itech Biblia, uan nejon kinpaleuij tokoneuan maj okachi kipatiuitanij tein Biblia kijtoua.

 Itech xiuit 1987 tookichpil Yaroslav yajki Riga, tein moajsi Letonia, kampa okachi ueliskia tanojnotsas. Sayoj ke kemej amo kinekik pouis iniuan tateuianij, kitsakkej se xiuit uan tajko. Kiuikatinenkej itech chiknaui kalmej kampa tetsakuaj. Tein niktapouijka tein nikpanok keman nechtsakkaj kipaleuij maj taxiko. Satepan mochiuak precursor. Itech xiuit 1990, Pavel, akin kipiaya 19 xiujmej, kinekik tapaleuitiuj kemej precursor itech xolal Sajalín, se tal tein moajsi tatajko ueyiat ompa Japón kampa ika norte. Yekinika amo tiknekiaj maj youi. Ompa sayoj moajsiaj 20 tanojnotsanij uan tinemiaj panoua 9,000 kilómetros uejka. Sayoj ke, satepan tikaujkej maj youi. Uan kuali tein mochiuak. Taltikpakneminij kuali tanankilijkej keman kinmatiltijkej kuali tanauatilmej. Itech sayoj seki xiujmej moajsiajya chikueyi nechikolmej. Pavel tanojnotsak ompa Sajalín hasta xiuit 1995. Itech nejon tonalmej, sayoj Vitaly, tookichpil akin xokoyot, touan nemia. Keman konetsinok katka, ipa semi kiuelitani kiixtajtoltis Biblia. Keman kipiaya 14 xiujmej mochiuak precursor uan nejua iuan nikchiuak nejon tekit ome xiuit. Semi kualtsin tein nikpanok itech nejon tonalmej. Keman Vitaly kipiaya 19 xiujmej, yajki tapaleuito kemej precursor especial.

Itech xiuit 1952 se policía kiluijka Maria: “Xikaua motaneltokalis oso titsaktos majtakti xiuit. Keman tikisas, tixiuejya tiyeski uan moselti tiyetos”. Sayoj ke amo ijkon panok. Maria uan nejua tikmachiliaj netasojtalis tein techpialiaj Jiova, akin amo keman techkaua, tokoneuan uan nochin akin tikpianij tatiochiualis tikinmachtiskej tein melauak. No techyolpaktij tikinkalpanoskej tokoneuan kampa tapaleuianij. Tikitakej ke tokniuan akin tokoneuan kinpaleuijkej maj kiixmatikan Jiova semi motasojkamatij.

Itech xiuit 1991, tekit tein kichiuaj itaixpantijkauan Jiova moijkuiloj ininixpan tekiuanij. Nejon tapaleuij maj okachi motanojnotsa. Itech nechikol hasta tikoujkej se autobús tein ika ueliskia tiyaskej itamian sejse semana itech xolalkonemej uan xolalmej tein ompakauin moajsiaj.

Semi nechyolpaktia maj Yaroslav uan inamik, Alyona, uan Pavel uan inamik, Raya, tekititokan Betel. Uan no, Vitaly uan inamik, Svetlana, takalpanouaj itech nechikolmej. Irina nemi Alemania, uan inamik, Vladimir, uan nochin eyin ininokichpipiluan tapaleuiaj kemej tayekananij. Olga nemi Estonia uan nochipa nechnotsa. Nechtayokoltia nikijtos ke nonamik, Maria, akin semi niktasojtaya, momikilij itech xiuit 2014. Niktelneki oksepa nikitas keman moajokuis. Axkan ninemi itech xolal Bielgorod, uan tokniuan itech nechikol semi nechpaleuiaj.

Itech nochi nejin xiujmej nikitani ke ouij tekisa se kisentokas se kitekitilis Dios, sayoj ke yolseuilis tein Jiova temaka kitelpia ipatiuj. Tatiochiualismej tein Maria uan nejua tikselianij porin tikxikouanij ouijkayomej okachi miakej ke tein tiknemiliayaj. Achto ke ixpoliuiskia Unión Soviética itech xiuit 1991, moajsiaj panoua 40,000 tanojnotsanij. Axkan, itech altepemej tein pouiaj itech Unión Soviética, moajsij panoua 400,000 tanojnotsanij. Axkan nikpia 83 xiujmej uan niksentoka nitekiti kemej tayekankej. Jiova nochipa nechmakani chikaualis tein nechpaleuia maj nitaxiko. Kemaj, Jiova semi nechtatiochiuiani (Sal. 13:5, 6).