TAKUAUJTAMATILIS semi techpaleuia. Kemej neskayot, maski Satanás kitemoua maj amo timouikakanok iuan Dios, takuaujtamatilis techpaleuia maj tikxikokan “nochi tataman kuejmololis tenika [...] kineki techyolxokolis” (Efes. 6:16). Uan no, techpaleuia maj tikixnamikikan uejueyi kuejmolmej tein kemej yeskiaj tepemej. Jesús kiniluij imomachtijkauan: “Komo nankipiaskiaj namotakuautamatilis [...] tsiktsin keme se mostazajtet, ijkon kuali uelis nankiliske nijin tepelomo de ke ma ximijkuani [...]. Uan ijkon in tepelomo mijkuaniskia” (Mat. 17:20). Kemej takuaujtamatilis ueli kichiua maj okachi kuali timouikakan iuan Dios, semi kuali maj timotajtanikan: ¿Toni takuaujtamatilis? ¿Toni moneki tikchiuaskej uan ijkon tiknextiskej? ¿Keniuj uelis tikchikauaskej? Uan ¿itech akoni moneki titakuaujtamatiskej? (Rom. 4:3).

Takuaujtamatilis amo sayoj kijtosneki se kineltokas tein Biblia tamachtia porin hasta “in amokuali ejekame kineltokaj de ke ongak sayo se Dios. Ika ya nojon yejuan moukauiuiyokaj” (Sant. 2:19). Komo ijkon, ¿toni kijtosneki takuaujtamatilis?

Biblia kinextia ke takuaujtamatilis kijtosneki ome taman. Yekinika, ke “timoyekmatiltiaj ya ke se tonal tikselijtiue nochi ne ten axkan tikyolikachixtokke”, oso ke yekmelauj mochiuas (Heb. 11:1a). Komo tikpiaj takuaujtamatilis, senkis tikneltokaskej ke melauak tein kijtoua Jiova uan ke mochiuas. Kemej neskayot, Dios kiniluij israelitas: “Komo ueliskia tikchiuas maj amo tanesiok nion maj tayouaok kemej nimotenkauak iuan tonal uan iuan youal, no ijkon ueliskia amo mochiuas tein nimotenkauak iuan David notekitikauj” (Jer. 33:20, 21). ¿Tiknemilianij ke se tonal amo tanesisok uan amo tayouasok? ¿Melauj ke amo? ¿Keyej? Porin Dios ijkon kiixtalij uan nejon amo keman mopata. Yejua ika, ¿monekiskia tiknemiliskej ke Dios amo kichiuas nochi tein motenkauani? (Is. 55:10, 11; Mat. 5:18).

Ojpatika, takuaujtamatilis kijtosneki ke “timoyekmatiltiaj ya ke yek melau motamichiuaki nochi ne ten ayamo tikitstinemij”, nejin kijtosneki ke maski amo tikitaj teisa tikneltokaj ke melauak (Heb. 11:1b). Maj tiknemilikan ke se konet techtajtania keniuj tikmatij ke onkak ejekat. Maski ejekat amo keman tikitaj, amo ouij tikmelauiliaj konet keyej tikneltokaj ke onkak porin ueli tikakij uan tikitaj keniuj kiolinia xiuit uan okseki taman. Keman konet kineltoka ke melauak, kiajsikamati ke onkak tein amo kiita. No ijkon takuaujtamatilis moixyekana ika tein monextia ke melauak (Rom. 1:20).

Takuaujtamatilis moyekana ika tein monextia ke melauak. Yejua ika yekinika moneki maj ‘tikajsikamatikan in melauak Tajtoltsin de Dios’, ijkon tikpiaskej takuaujtamatilis (1 Tim. 2:4). Sayoj ke no moneki okse taman. Tatitanil Pablo kijkuiloj ke takuaujtamatilis se kinextia ika se iyolo (Rom. 10:10). Amo sayoj moneki maj tikneltokakan tein melauak, ta moneki maj tikpatiuitakan. Sayoj ijkon tiknextiskej  ke yekmelauj titakuaujtamatij (Sant. 2:20). Akin amo kipatiuita tein melauak, uelis hasta amo kineltokas tein monextiani ke melauak porin amo kineki kipatas itanemilil oso kineki kichiuas tein yejua kiixpejpena (2 Ped. 3:3, 4; Jud. 18). Yejua ika, ne uejkauj maski miakej kiitakej mouiskatekimej amo kinpaleuij maj kipiakan takuaujtamatilis (Núm. 14:11; Juan 12:37). Yektikatsin espíritu sayoj kinpaleuia maj takuaujtamatikan akin kitasojtaj tein melauak uan kitauelitaj takajkayaualis (Gál. 5:22; 2 Tes. 2:10, 11).

Semej itekitikauan Dios akin kinextij ueyi takuaujtamatilis yejua tekiuaj David (Heb. 11:32, 33). Sayoj ke seki ikalyetouanij amo ijkon kichiujkej. Kemej neskayot, Eliab, iikniuj akin tayekanaya, kinextij ke amo takuaujtamatia ke Jiova ueliskia kinmakixtis keman kiajuak David porin kijtoj ke kitekipachouaya tein Goliat kichiujtoya (1 Sam. 17:26-28). Amo akin yoli ika takuaujtamatilis nion no kipanoltiliaj itatuan. Yejua ika, David kipiaya takuaujtamatilis porin kuali mouikaya iuan Dios.

Itech Salmo 27, David kijtoj toni kipaleuij maj kichikaua itakuaujtamatilis (versículo 1). Itech tanemiliaya tein kipanoka uan itech tein Jiova kinchiuilij akin kitauelitayaj (versículo 2 uan 3). Kipatiuitaya itabernáculo Jiova (versículo 4) uan ompa kiueyichiuaya iniuan okseki israelitas (versículo 6). Ika netataujtil nochipa kitemouaya maj Jiova kiixyekana (versículo 7 uan 8). Uan no kinekia maj Jiova kimachtiani iojuan (versículo 11). Kitelpatiuitaya kipias takuaujtamatilis, yejua ika motajtanij: “¿Kani niyetoskia komo amo nitakuaujtamatiskia?” (versículo 13).

Totakuaujtamatilis uelis yeski kemej tein David kipiaya komo titanemiliaj uan tikchiuaj tein kijtoua Salmo 27. Tikpiaskej takuaujtamatilis komo tikpiaj taixmatilis, yejua ika ijkon kemej okachi timomachtiskej iTajtol Dios uan toamaixuan okachi amo ouij tiknextiskej nejin kualneskayot tein poui itech itakilo espíritu (Sal. 1:2, 3). Keman timomachtiskej, maj ika titanemilikan tein timomachtiaj, nejon techpaleuis maj timotasojkamatikan iuan Jiova. Uan keman okachi iuan timotasojkamatiskej, okachi tiknekiskej tiknextiskej totakuaujtamatilis keman tikueyichiuaskej itech nechikolmej uan keman tikteixmatiltiskej tein tikchiaj (Heb. 10:23-25). No tiknextiaj totakuaujtamatilis keman tiksentokaj timotataujtiaj uan amo timosenkauaj (Luc. 18:1-8). Yejua ika, maj nochipa timotataujtikan uan maj tikneltokakan ke Jiova toka motekipachoua (1 Tes. 5:17; 1 Ped. 5:7). Takuaujtamatilis techolinia maj tikchiuakan tein kuali uan keman tikchiuaj totakuaujtamatilis mochikaua (Sant. 2:22).

Youak achto ke momikiliskia, Jesús kiniluij imomachtijkauan: ‘Xitakuaujtamatikan iuan Totajtsin Dios, no ijkon moneki xiyektakuaujtamatikan nouantsin’ (Juan 14:1). Nejon kijtosneki ke no moneki itech titakuaujtamatiskej Jesús, amo sayoj itech Jiova. ¿Keniuj tikchiuaj? Maj tikitakan eyi taman.

Yekinika, maj tikelnamikikan ke Dios kitemakak iKonetsin maj toka momikiliki tisejsemej. Tatitanil Pablo kijtoj: “Ninemi porin nitakuaujtamati iuan iKonetsin Dios, akin nechtasojtak uan noka momikilij” (Gál. 2:20, TNM). Keman titakuaujtamatij itech Jesús senkis tikneltokaj ke inemilis tein kitemakak techpaleuia, ke ika nejon, Dios ueli techtapojpoluia, ke tikchiaj tikseliskej nemilis nochipaya uan ke ika Dios kinextia ke techtasojta (Rom. 8:32, 38, 39; Efes. 1:7). Nejon techpaleuis maj timochikauakan tikpiaskej se kuali tanemilil (2 Tes. 2:16, 17).

Ojpatika, maj timotokikan iuan Jiova ika netataujtil. Kemej Jesús kitemakak inemilis ueli timotataujtiaj uan titakuaujtamatij ke tikseliskej “iteiknelilis [...] para timopaleuiske tech ne momento kuak moneki” (Heb. 4:15, 16; 10:19-22). Timotataujtiskej techpaleuia maj okachi tikixtalikan amo titajtakolchiuaskej (Luc. 22:40).

Expatika, maj tiktakamatikan Jesús. Tatitanil Juan kijkuiloj: “Ten takuautamatiske iuan ne Ikonetsin Dios, yejuan nojonkes kipiaske ne yek nemilis nachipa. Pero nochi ne naken amo kinekiske yek tatakamatiske [...] amo kipiaske ne yek nemilis. Ta, yejuan sayo kiseliske ne ueyi tatsakuiltilis ten Totajtsin Dios kinualtitanilis” (Juan 3:36). Kemej tikitaj tatitanil Juan kijtoj ke komo amo tikpiaj takuaujtamatilis amo titatakamatiskej. Yejua ika tiknextiaj ke titakuaujtamatij itech Jesús keman tiktakamatij. Uan tiktakamatij keman tiktojtokaj “in tanauatil de Cristo”, tein kijtosneki nochi tein tamachtij uan tein tanauatij (Gál. 6:2). No tiktakamatij keman timokauaj maj techixyekana itechkopa takeual takuaujtamach uan tamatkej (Mat. 24:45). Komo tikchiuaj tein Jesús kijtoj, titaxikoskej keman tikpiaskej uejueyi ouijkayomej (Mat. 7:24, 25).

Se tonal, se takat kiluij Jesús: “Nitakuautamatik ya, uan xinechonpaleui kuak amo mouan niyektakuautamatis” (Mar. 9:24). Nejin takat takuaujtamatia, sayoj ke katka yolyemanik uan kimatia ke monekia okachi kimajxitis itakuaujtamatilis. Ijkon kemej yejua, ejkos tonal keman tinochin monekis okachi tikpiaskej totakuaujtamatilis. Kemej tikitakej, axkan uelis tikchikauaskej totakuaujtamatilis keman timomachtiaj iTajtol Dios uan itech titanemiliaj, nejon kichiuas maj okachi timotasojkamatikan iuan Jiova. Totakuaujtamatilis okachi mochikaua keman tikueyichiuaj Jiova iniuan tokniuan, keman ika tikinnojnotsaj oksekin tein tikchiaj uan keman nochipa timotataujtiaj. Komo tikmajxitijtiyouij totakuaujtamatilis uan tikchiuaj nochi nejon, tikseliskej tein okachi kuali; tiksentokaskej itech inetasojtalis Dios (Jud. 20, 21).