¿TECHYOLPAKTISKIA tikchiuaskej se taman tekit itech inechikol Dios tein axkan amo tiuelij? Xa tein kichiua okse tokniuj oso tein achto tikchiuayaj. Xa tixiuejkejya, timokokouaj, ouij timoixpanoltiskej oso moneki tikpaleuiskej tochankauan, nejon uelis techtsakuilis maj tikchiuakan tein tiknekij. Oso xa monekik tikauaskej se tekit tein tikchiujkej miak xiujmej porin mopatak seki taman itech inechikol Dios. Tein yeski, xa tikitaj ke amo tikchiujtokej itech inechikol Dios nochi tein tikuelitaskiaj. Komo tikpanotokej se taman kemej nejon, kemansa amo kuali timomachiliskej. Sayoj ke, ¿toni uelis techpaleuis maj amo timosenkauakan, maj amo timotayokoltikan uan maj amo tiyolkualantokan? ¿Toni techpaleuis maj tiksentokakan tiyolpakikan?

Tein kipanok Juan Taauijkej techmachtia se taman. Yejua kichiuak uejueyi tekimej itech inechikol Dios. Kichiaya kichiuas miak xiujmej, sayoj ke amo ijkon panok, ta okachi miak tonalmej tsaktoya. Maski ijkon, kisentokak yolpakik. ¿Toni kipaleuij? ¿Keniuj uelis tiksentokaskej tiyolpakiskej maski amo mochiuas tein tikchiaj?

Itech metsti abril xiuit 29 itech totonaluan, Juan peuak kitematiltia ke Mesías ejkoskia, ijkon kemej Jiova kinauatijka. Kijtouaya: “Ximoyolnonotsakan, porin tekiuajyot tein ualeua iluikak moualtokijya” (Mat. 3:2, TNM; Luc. 1:12-17). Miakej kuali kikakkej, yejua ika tel miakej akin uejka nemiaj kikakitoj tein kitematiltiaya uan tel miakej moyolnonotskej uan moauijkej. Uan no, Juan amo mouik keman kinnejmachtij tayekananij itech taneltokalis akin takajkayauayaj ke kiseliskiaj tatsakuiltilis komo amo mopatayaj (Mat. 3:5-12). Itech metsti octubre xiuit 29, kichiuak tein okachi monekia, kiauij Jesús. Ijkuak, peuak kinyolchikaua taltikpakneminij maj kitojtokakan Jesús, Mesías akin moijtojka ke ualaskia (Juan 1:32-37).

Tein kichiuaya Juan semi monekia, yejua ika Jesús kijtoj: “Amo aken ongak okse kachi ueyi chiuke de nikan taltikpakuani. Ta, sayo ne Juan Taauijke” (Mat. 11:11). Juan kipatiuitak tein kichiuak itech itekiyo Dios uan ika yolpakik tatiochiualismej tein kiselij. Kemej yejua, akin axkan  kichiuaj kemej Cristo no kiselianij kualtsitsin tatiochiualismej. Maj tikitakan ineskayo se tokniuj akin itokay Terry, akin panouaya cincuenta xiujmej kitekitilijtok Jiova nochi tonalmej iuan inamik, Sandra. Terry kijtoua: “Nikchiuani kualtsitsin tekimej. Nitekitini kemej precursor regular, betelita, precursor especial uan kemej takalpanojkej uan axkan oksepa nitekiti kemej precursor especial”. Tikseliskej nejin tekimej semi techyolpaktia. Sayoj ke ineskayo Juan techmachtia ke moneki timochikauaskej tiksentokaskej tiyolpakiskej maski amo tikchiuaskejok.

Juan Taauijkej no kipaleuiaya maj kisentoka yolpaki nochipa kitasojkamatis kualtsitsin tekimej tein kichiuaya. Kemej neskayot, satepan ke Jesús moauij, Juan amo kipiayaok miak itatojtokakauan, sayoj ke Jesús peuak okachi kinpia. Nejon kintekipachoj itatojtokakauan Juan, uan kiluijkej: “Xikita san ne Jesús [...] taauijtinemi nikan uan miak tagayot kitoktilijtoke” (Juan 3:26). Juan kinnankilij: “Naken kuika in siuapil, yejua ne iyokich [...]. Uan yetok se [...] tasojikniu den teyokich [...] uan yetok inakastan uan kikaktok nochi tenika tajtojtok ne teyokich. Ika ya nojon ne itasojikniu semi moyolpaktia kuak kikaki ke ne teyokich tanojnotsa. Uan no ijkon [...] nejua semi nimoueyiyolpaktia” (Juan 3:29). Juan amo kiitaya ke motatantoya iuan Jesús nion kinemiliaya ke tein yejua kichiuaya amo kipiaya ipatiuj porin tein Jesús kichiuaya okachi monekia. Ta, kisentokaya yolpakia porin kipatiuitaya yeski “tasojikniu den teyokich”.

Kemej tanemiliaya Juan kipaleuij maj yolpaki kichiuas tekit tein Dios kimakaka, maski katka ouij. Kemej neskayot, keman yolik katkaya nazareo, yejua ika amo monekia tayis tein teuintij (Luc. 1:15). Jesús kijtoj keniuj nemia: “Yejua ne amo teltakuaya uan amo no tayaya ne vino”. Sayoj ke Jesús uan itatojtokakauan amo nemiaj kemej nazareos, ta ijkon kemej oksekin (Mat. 11:18, 19). Uan no, maski Juan amo kichiuak nion se mouiskatekit, kimatia ke itatojtokakauan Jesús ijkon kemej sekin akin achto kitojtokayaj, kemaj ueliaj kichiuayaj (Mat. 10:1; Juan 10:41). Sayoj ke Juan amo kiitak nejon, ta okachi kitayekanaltij kichiuas tein Jiova kinauatijka.

Komo no tikpatiuitaj tein tikchiujtokej itech itekiyo Dios, tiksentokaskej tiyolpakiskej. Terry, akin ika titajtojkej, kijtoua: “Okachi niktayekanaltij sejse tekit tein nikchiuaya”. Keman tanemilia itech tein kichiuak, kijtoua: “Amo nimoyolkokoua ika tein nikchiuak, ta sayoj nikelnamiki tein kualtsin tein nikpanok”.

Okachi tiyolpakiskej komo titanemiliaj ke tein yeski tekit tein tikchiuaskej kipia ipatiuj porin “tiksentekitilijtokke Dios” (1 Cor. 3:9). Maj tikijtokan se neskayot. Komo tikyekpiaj se teisa tein tikpatiuitaj kisentokas kualtsin moitas. No ijkon, komo tikitaj ke se ueyi tatiochiualis tiktekitiliskej Dios, techpaleuis maj tikpiakan kuali tanemililmej uan tiyolpakiskej. Uan no, amo tikitaskej ke tein oksekin kichiuaj okachi kipia ipatiuj ke tein tejuan tikchiuaj (Gál. 6:4).

Xa Juan kimatia ke amo miak xiujmej kichiuaskia itekiyo Dios, sayoj ke nion tepitsin kimatia ke niman tamiskia (Juan 3:30). Itech xiuit 30, chikuasen metsti satepan ke kiauij Jesús, tekiuaj Herodes tanauatij maj kitsakuakan. Maski ijkon, kisentokak kitemoj keniuj tanojnotsas (Mar. 6:17-20). ¿Toni kipaleuij maj yolpaki maski mopatak seki taman? Kitayekanaltis itekiyo Dios.

Keman tsaktoya, Juan kimatik nochi tein Jesús kichiujtoya (Mat. 11:2; Luc. 7:18). Juan kimatia ke Jesús katka Mesías, sayoj ke xa motajtaniaya ox kichiuaskia nochi tein moijtojka ke kichiuaskia Mesías. Kemej neskayot, yejua mochiuaskia se tekiuaj, yejua ika xa motajtaniaya, ¿niman peuaskia taixyekanas? ¿Kipaleuiskia maj kikajkauakan? Juan kinekia kimatis tein Jesús kichiuaskia, yejua ika kititanik ome itatojtokakauan maj kitajtanitij Jesús: “¿Kox melau Tejuatsin Ti Cristo tanauatijke de Dios ten ualaskia? ¿Oso kox tikchiaske ok ma uiki  okse [...] ?” (Luc. 7:19). Keman mokepkej, Juan xa kuali kinkakik keman kitapouiayaj ke Jesús kichiujtoya mouiskatekimej uan no kinnauatij maj kiluikan Juan: “In ixpojpoyome [...] nikintachialtij ya. Uan in koxojme axkan nikinnejnemiltijya. Uan [...] ten kokotokatoya ninakayo, axkan [...] nikinpajtij ya. Uan naken amo takakia, [...] nikintakakiltij ya. Uan in taka ten momikilijkaj ya, axkan nikinpankixtij ya yoltokke. Uan nekes ten [...] amo teyi chiuanime, [...] nikinnextilijtok in yankuik Tajtoltsin de Dios” (Luc. 7:20-22).

Tein kimatik Juan semi kiyolchikauak porin kimatiltiaya ke Jesús kichiujtoya tein moijtojka ke kichiuaskia Mesías. Maski Jesús amo kichiuaskia maj kikajkauakan, Juan kimatia ke amo nenkaj tein kichiujka. Maski kipanotoya ouijkayomej, tein kichiuaya semi kiyolpaktiaya.

Komo tikchiuaj kemej Juan uan tiktayekanaltiaj itekiyo Dios, tiyolpakiskej uan amo tiyolijsiuiskej maski mopatas seki taman (Col. 1:9-11). Tikixtajtoltiskej Biblia uan itech titanemiliskej no techpaleuis porin techelnamiktia ke tein tikchiuaj itech itekiyo Dios amo nenkaj (1 Cor. 15:58). Sandra, akin ika titajtojkej, kijtoua: “Nikixtajtoltis mojmostaj se capítulo itech Biblia nechpaleuiani maj okachi nimotoki iuan Jiova uan maj niktayekanaltij itekiyo uan amo tein nikmachilia”. No uelis tikitaskej tein tokniuan kichiujtokej noyampa taltikpak, nejon techpaleuis maj amo okachi tikitakan tein tikpanotokej, ta tein Jiova kichiujtok. Sandra no kijtoua: “Programas tein kisaj mejmetstika itech JW Broadcasting^®, techpaleuiaj maj tikitakan ke titekititokej iuan inechikol Dios uan maj tiyolpakikan itech tekit tein tikchiuaj”.

Maski Juan Taauijkej amo uejkauak kichiuak itekiyo Dios, kichiuak ika “in chikaualis den Yektikatsin Espíritu ijkon keme ne uejkautanauatijke Elias”. Uan kemej Elías, “no katka se tagat ten kipiaya nemilis keme tejuan” (Luc. 1:17; Sant. 5:17). Komo timotasojkamatij uan tiktayekanaltiaj itekiyo Dios kemej Juan, no tiksentokaskej tiyolpakiskej tiktekitiliskej Dios, maski mopatas seki taman.