1. ¿Toni kimaka Jiova sejse itekitikauj?

IKA netasojtalis, Jiova kimaka sejse itekitikauj se tekit itech inechikol. Maski tikpiaj tataman tekimej, Jiova tinochin techpatiuita uan tinochin timosenpaleuiaj itech nechikol. Tatitanil Pablo techpaleuia maj tikajsikamatikan nejin. ¿Keniuj?

2. Kemej kijtoua Efesios 4:16, ¿keyej moneki timopatiuitaskej uan tisentekitiskej?

² Kemej kijtoua tajkuilol kampa kisa nejin tamachtilis, Pablo kinextij ke amo uelis tikitaskej okse itekitikauj Jiova uan tiknemiliskej “amo semi timitsnekij xiyeto touan” (1 Cor. 12:21). Onkas yolseuilis itech nechikol komo timopatiuitaj uan tisentekitij (xikonixtajtolti Efesios 4:16). Keman tokniuan sentekitij, mochikaua inintakuaujtamatilis uan kimachiliaj ke kintasojtaj.

3. ¿Toni tikitaskej itech nejin tamachtilis?

³ ¿Itech toni taman uelis tiknextiskej ke tikinpoujkaitaj oso ke tikinmouiskaitaj tokniuan? Itech nejin tamachtilis, yekinika tikitaskej keniuj tokniuan tayekananij uelis kinpoujkaitaskej okseki tayekananij. Ompa, tikitaskej keniuj tinochin uelis tiknextiskej ke tikinpatiuitaj tokniuan takamej uan siuamej akin amo kipiaj ininnamik. Uan satepan, tikitaskej keniuj uelis  tiknextiskej ke tikinpatiuitaj tokniuan akin momachtijtokej totajtol.

4. ¿Toni tein Pablo tayolmajxitij itech Romanos 12:10 moneki kichiuaskej tayekananij?

⁴ Jiova kinixpejpena nochin tayekananij ika iyektikatsin espíritu, sayoj ke tataman tein uelij kichiuaj (1 Cor. 12:17, 18). Sekin xa yankuixtok mochiujkej tayekananij uan ayamo semi kimatij keniuj kichiuaskej nejon tekit, uan oksekin xa xiuejkejya oso mokokouaj uan yejua ika amo ueli kichiuajok tekit kemej achto. Sayoj ke nion se tayekankej monekiskia kiitas okse tayekankej uan kinemilis “amo semi timitsnekij xiyeto touan”, ta nochin moneki kichiuaskej tein Pablo tayolmajxitij itech Romanos 12:10 (xikonixtajtolti).

5. ¿Keniuj tokniuan tayekananij kinextiaj ke kinpoujkaitaj okseki tayekananij, uan keyej moneki ijkon kichiuaskej?

⁵ Tokniuan tayekananij kinextiaj ke kinpoujkaitaj okseki tayekananij keman kuali kinkakij. Nejin okachi moneki keman mosentiliaj uan ika tajtouaj seki taman tein moneki moyektalis. ¿Keyej? Maj tikitakan tein moijtoj itech amaix La Atalaya 1 de octubre de 1988: “Tayekananij kiajsikamatiskej ke ika yektikatsin espíritu, Cristo uelis kipaleuis semej tayekananij maj kiajsi se tayolmajxitilis itech Biblia tein tapaleuis maj kimatikan keniuj kiyektaliskej teisa oso toni moneki kiixtaliskej. (Hechos 15:6-15.) Yektikatsin espíritu kinpaleuia nochin tayekananij, amo sayoj semej”.

6. 1) ¿Toni kinpaleuis tokniuan tayekananij maj sentekitikan? 2) ¿Keniuj nejon kinpaleuia nochin tokniuan itech nechikol?

⁶ Komo se tokniuj tayekankej kinpoujkaita okseki tayekananij, amo kitemos nochipa yejua achto tajtos keman kipiaj ininnechikoluan. Amo sayoj yejua tajtos nion kinemilis ke tein kijtoua yejua tein moneki mochiuas, ta kijtos tein kinemilia ika yolyemanilis uan kuali kinkakis oksekin. Uan tein okachi moneki, kiitas toni kijtoua Biblia uan mokauas maj kiixyekana takeual takuaujtamach uan tamatkej (Mat. 24:45-47). Keman tayekananij kinextiaj  netasojtalis uan poujkaitalis keman kiyektaliaj teisa, iespíritu Dios kinixyekana uan kinpaleuia maj kiixpejpenakan tein kinpaleuis nochin tokniuan (Sant. 3:17, 18).

7. ¿Keniuj kinitaya Jesús akin amo kipiayaj ininnamik?

⁷ Itech tonechikoluan, amo sayoj moajsij tokniuan akin kipiaj ininnamik uan akin kipiaj ininkoneuan, ta no moajsij miakej tokniuan takamej uan siuamej akin amo kipiaj ininnamik. ¿Keniuj moneki tikinitaskej nejin tokniuan? Maj tikitakan keniuj kinitaya Jesús. Keman yetoya nikan taltikpak, amo monamiktij uan kitayekanaltij itanojnotsalis. Amo keman tamachtij ke itatojtokakauan monekia monamiktiskej oso ke monekia mokauaskej ininselti. Sayoj ke kemaj kijtoj ke seki itatojtokakauan kiixtaliskiaj amo monamiktiskej (Mat. 19:11, 12). Yejua kinpoujkaitaya uan kinpatiuitaya akin amo kipiayaj ininnamik uan amo kinemiliaya ke teisa kinpolouaya itech ininnemilis.

8. Kemej kijtoj Pablo itech 1 Corintios 7:7-9, ¿toni monekia kinemiliskej itatojtokakauan Cristo?

⁸ Ijkon kemej Jesús, tatitanil Pablo katka se itekitikauj Dios akin amo monamiktij. Amo keman tamachtij ke amo kuali yetok maj se monamikti. Kimatia ke sejse itekitikauj Dios monekia kiixpejpenas nejon. Maski ijkon, kinyolchikauak maj kinemilianij ox ueliskiaj kitekitiliskej Jiova ininselti (xikonixtajtolti 1 Corintios 7:7-9). Senkis tikmatij ke Pablo kinpatiuitaya tokniuan akin amo kipiayaj ininnamik. Tein melauj, kiixpejpenak telpoch Timoteo, akin amo kipiaya inamik, maj kichiuani uejueyi tekimej itech nechikol (Filip. 2:19-22). * Yejua ika, komo se tokniuj takat kipia inamik oso amo, maj amo tiknemilikan ke okachi kuali kichiuas se tekit oso ke amo uelis (1 Cor. 7:32-35, 38).

9. ¿Keniuj moneki tikinitaskej tokniuan akin kipiaj ininnamik uan akin ininselti?

⁹ Nion Jesús nion Pablo tamachtijkej ke moneki se monamiktis oso se mokauas se iselti. Komo ijkon, ¿keniuj moneki tikinitaskej tokniuan akin kipiaj ininnamik uan akin ininselti? Amaix La Atalaya 1 de octubre de 2012 kuali kimelauak nejin: “Tein melauj, se monamiktis oso amo se inetetayokolil Dios. [...] Jiova amo kinemilia ke akin amo kipiaj ininnamik moneki motayokoltiskej oso mopinaujmatiskej”. Yejua ika, moneki tikinpoujkaitaskej tokniuan  takamej uan siuamej akin amo kipiaj ininnamik.

10. ¿Keniuj uelis tiknextiskej ke tikinpoujkaitaj tokniuan akin amo kipiaj ininnamik?

¹⁰ ¿Keniuj uelis tiknextiskej ke tikinpoujkaitaj tokniuan akin amo kipiaj ininnamik? Moneki tikelnamikiskej ke seki tokniuan amo monamiktiaj porin ijkon kiixtalijkej. Sekin kiuelitaskiaj, sayoj ke amo kiajsinij akin uelis iuan monamiktiskej. Oksekin xa momikilij ininnamik. Sayoj ke amo moneki tikintajtaniskej keyej amo kipiaj ininnamik nion tikiniluiskej ke uelis tikinpaleuiskej maj kiajsikan akin uelis iuan monamiktiskej, maski sekin xa techiluiskej maj tikinpaleuikan. Sayoj ke, komo amo teyi techiluiaj, maj tiknemilikan keniuj momachiliskej komo tikiniluiaj ke uelis tikinpaleuiskej (1 Tes. 4:11; 1 Tim. 5:13). Maj tikitakan tein kijtouanij seki tokniuan akin amo kipiaj ininnamik.

11, 12. ¿Toni uelis kichiuas maj amo kuali momachilikan tokniuan akin amo kipiaj ininnamik?

¹¹ Se tokniuj takalpanojkej akin amo kipia inamik uan kuali kichiua tekit tein kipia, kinemilia ke amo se kipias se inamik tapaleuia itech miak taman. Sayoj ke kijtoua ke kemansa amo kuali momachilia keman seki tokniuan kitajtaniaj keyej ayamo monamiktia, maski amo kitemouaj kiyolkokoskej. Se tokniuj takat akin amo kipia inamik uan tapaleuia itech se sucursal, kijtoua: “Kemansa, niknemilia ke seki tokniuan kinikneliaj akin amo kipiaj ininnamik. Kiitaj ke amo se kipias se inamik kemej yeskia se kuejmol uan amo se netetayokolil”.

¹² Se tokniuj siuat akin amo kipia inamik uan tapaleuia Betel, kijtoua: “Seki tokniuan kinemiliaj ke nochin akin amo kipiaj ininnamik kinekij monamiktiskej oso ke kinemiliaj ke keman moajsij iniuan miakej tokniuan ijkuak uelis kiajsiskej akin iuan monamiktiskej. Se tonal, nechtitankej maj nikchiuati se tekit itech okse xolal uan niajsik itech tonal keman mochiuaya nechikol. Tokniuj siuat akin iuan nimokauaskia nechiluij ke itech inechikol moajsiaj ome tokniuan takamej akin katkaj nouampoyuan. Nechiluij ke amo kitemouaya nechpaleuis maj nikpia nonovio. Sayoj ke niman keman tiajsikej itech Kali kampa tiMosentiliaj, nechuikak kampa yetoyaj nejon ome tokniuan. ¡Tieyin semi timopinaujmatkej!”.

13. ¿Toni kiyolchikauak se tokniuj siuat akin amo kipia inamik?

¹³ Okse tokniuj siuat akin amo kipia inamik uan no tapaleuia Betel, kijtoua: “Nikinixmati precursores akin amo kipiaj ininnamik uan kipiaj kuali taixejekolis, kimatij toni kinekij kichiuaskej, kinpaleuiaj oksekin uan yolpakij. Yejuan semi tapaleuiaj itech ininnechikol. Amo kinemiliaj ke okachi tapaleuiaj porin amo kipiaj ininnamik nion ke amo uelis yolpakiskej komo amo monamiktiaj nion kinpiaj konemej”. Semi kualtsin keman se yetok itech se nechikol kampa tepoujkaitaj uan tepatiuitaj, kampa amo kinemiliaj ke tepoloua teisa nion tenexikoluiaj uan kampa amo akin kiixtopeuaj nion kiueyitaliaj. Nochin kimachiliaj ke kintasojtaj.

14. ¿Keniuj tiknextiaj ke tikinpoujkaitaj tokniuan akin amo kipiaj ininnamik?

¹⁴ Tokniuan akin amo kipiaj ininnamik kitasojkamatij maj tikinpatiuitakan porin kipiaj kualtsitsin kualneskayomej uan amo maj tiknemilikan ke teikneltijkej porin amo kipiaj ininnamik. Maj amo tiknemilikan ke amo yolpakij, ta maj tikinpatiuitakan porin kisentokaj kitekitiliaj Jiova. Komo ijkon tikchiuaj, amo keman kimachiliskej ke kemej yeskia tikiniluiaj “amo semi timitsnekij xiyeto touan” (1 Cor. 12:21). Yejuan kimatiskej ke tikinpoujkaitaj uan ke techyolpaktia maj yetokan itech nechikol.

15. ¿Toni kichiuanij seki tokniuan porin kinekij tapaleuiskej kampa monekij okachi tanojnotsanij?

¹⁵ Miakej tokniuan kiixtalianij momachtiskej okse tajtol porin kinekij tapaleuiskej kampa monekij okachi tanojnotsanij. Nejin kichiuani maj kipatakan miak taman. Kikaujkej nechikol kampa motajtoua inintajtol uan tapaleuitoj itech okse nechikol kampa monekij okachi tanojnotsanij uan motajtoua okse tajtol (Hech. 16:9). Nejin yejuan kiixtalianij kichiuaskej porin kinekij okachi kitekitiliskej Jiova. Maski xa amo niman uelij tajtol tein momachtijtokej, semi tapaleuiaj itech nechikol. Kemej kipiaj kualtsitsin kualneskayomej uan kimatij miak taman, semi kinpaleuiaj tokniuan. ¿Melauj ke tikpatiuitaj tein kichiuaj?

16. ¿Toni moneki kiitaskej tokniuan tayekananij keman kiixejekoskej ox se tokniuj takat uelis mochiuas tayekankej oso tapaleuijkej?

¹⁶ Komo se tokniuj takat ayamo kuali tajtoua tajtol tein mokui itech nechikol, ¿kuali yetoskia maj tokniuan tayekananij kijtokan ke ayamo uelis mochiuas tayekankej oso tapaleuijkej? Amo. Tokniuan tayekananij amo moneki kiitaskej nejon, ta moneki kiitaskej ox kichiujtok tein Biblia kijtoua ke moneki kichiuaskej akin kinekij yeskij tayekananij oso tapaleuianij (1 Tim. 3:1-10, 12, 13; Tito 1:5-9).

17. ¿Toni moneki kiixejekoskej kalyetouanij akin mokaltalitij itech okse altepet?

¹⁷ Seki kalyetouanij mokaltalitoj itech okse altepet porin kampa kayomej onkak kuejmolmej oso amo onkak tekit. Xa kaltamachtiloyan kampa youij ininkoneuan motajtoua tajtol tein mokui itech altepet uan tetatmej xa no moneki momachtiskej nejon tajtol uan ijkon uelis kiajsiskej tekit. Sayoj ke maj tiknemilikan ke itech nejon altepet moajsi se nechikol oso se tein ayamo nechikol itech inintajtol. ¿Kani monekiskia mosentiliskej? ¿Itech nechikol kampa motajtoua inintajtol oso itech nechikol kampa motajtoua tajtol tein mokui itech altepet?

18. Ika tein kijtoua Gálatas 6:5, ¿keniuj tiknextiaj ke tikpoujkaitaj keman tetat kiixtalis itech katiyejua nechikol mosentiliskej?

¹⁸ Tetat moneki kiixejekos itech katiyejua nechikol mosentiliskej. Keman kichiuas nejon, moneki kiitas toni okachi kinpaleuis ichankauan (xikonixtajtolti Gálatas 6:5). Kemej nejon yejua moneki kiixpejpenas, moneki amo teyi tikijtoskej keman kiixtalis itech katiyejua nechikol mosentiliskej. Maj tikpoujkaitakan tein kiixtalis uan maj tikinselikan ika netasojtalis itech nechikol (Rom. 15:7).

19. ¿Toni moneki kichiuas tetat komo ikoneuan amo semi kiajsikamatij tajtol tein motajtoua itech nechikol?

¹⁹ Xa seki kalyetouanij mosentiliaj itech se nechikol kampa motajtoua inintajtol tetatmej. Sayoj ke ininkoneuan xa amo semi uelij inintajtol porin kaltamachtiloyan kampa youij motajtoua tajtol tein mokui itech altepet.  Yejua ika, xa ouij kinkisas kiajsikamatiskej nechikolmej uan amo kipiaskej se kuali uikalis iuan Jiova. Komo panoua nejin, tetat moneki kichiuas netataujtil uan kinemilis keniuj kinpaleuiskej ininkoneuan maj kuali mouikakan iuan Jiova uan iniuan tokniuan. Uelis kiixtaliskej kinmachtiskej maj kuali tajtokan inintajtol oso yaskej itech se nechikol kampa motajtoua tajtol tein ininkoneuan kuali kiajsikamatij. Tein yeski taman tein kiixtaliskej kichiuaskej, tokniuan itech nechikol kampa kiixpejpenaskej yaskej moneki kichiuaskej maj nochin kalyetouanij kimachilikan ke kinpoujkaitaj uan kinpatiuitaj.

20. ¿Keniuj tiknextiaj ke tikinpoujkaitaj akin momachtijtokej se tajtol?

²⁰ Itech miak nechikolmej moajsij tokniuan akin mochikaujtokej ueliskej se tajtol, xa porin kinekiaj okachi kitekitiliskej Jiova oso porin monekik okseko mokaltalitiuij. Xa ouij kinkisas kuali kijtoskej teisa itech totajtol, sayoj ke komo amo okachi tikitaj nejon, uelis tikitaskej ke semi kitasojtaj Jiova uan ke kinekij kitekitiliskej. Nejon kichiuas maj tikinpoujkaitakan uan tikinpatiuitakan, uan maj amo tiknemilikan ke amo techpaleuiaj porin amo semi uelij totajtol.

21, 22. ¿Keyej semi timotasojkamatij iuan Jiova?

²¹ Semi tiktasojkamatiliaj Jiova porin tinochin techmakani se tekit itech inechikol. Jiova uan tokniuan kinpatiuitaj nochin akin moajsij itech nechikol: takamej, siuamej, akin kipiaj ininnamik, akin ininselti, telpochmej, akin xiuejkejya, akin uelijya se tajtol uan akin momachtijtokejok (Rom. 12:4, 5; Col. 3:10, 11).

²² Semi kualtsin tein techmachtij neskayot tein Pablo kikuik keman ika tajtoj kemej chijchiujtok se taltikpaknenkej. Komo tikchiuaj tein timomachtijkej, tiktemoskej keniuj okachi tiknextiskej ke tikpatiuitaj tekit tein tikpiaj itech inechikol Jiova uan tekit tein kipiaj oksekin.