1. ¿Toni kijtoj David keman ika tajtoj Jiova?

¿YEKMELAUJ ueli tikijtouaj ke Jiova yolyemanik? Kemaj, porin David kijtoj: “Tejua tinechmaka moescudo tein temakixtia, uan moyolyemanilis nechueyitalia” (2 Sam. 22:36; Sal. 18:35). Keman David kijkuiloj nejin tajtolmej, xa itech tanemilijtoya tonal keman tanauatijkej Samuel yajka ichan ipopaj kiixpejpenato akin mochiuaskia tekiuaj itech xolal Israel. Maski David kinpiaya chikome iikniuan takamej akin tayekanayaj, Jiova yejua kiixpejpenak maj kiixpata Saúl kemej tekiuaj (1 Sam. 16:1, 10-13).

2. ¿Toni tikitaskej itech nejin tamachtilis?

² Nesi ke David kiitaya Jiova kemej kijtoj akin kijkuiloj se salmo: “Yejuatsin moixpiloua uan ijkon uelis kiitas iluikak uan taltikpak, uan ijkon uelis kiajokuis itech talnex akin teikneltij. Kiajokui [...] akin kipanoua tatasojtilis uan kitokotstalia iniuan uejueyi chiuanimej” (Sal. 113:6-8). Itech nejin tamachtilis, tikitaskej keniuj Jiova kinextij yolyemanilis uan toni techmachtia nejon. Ompa, okachi ika titajtoskej yolyemanilis ika tein kichiujkej tekiuaj Saúl, tanauatijkej Daniel uan Jesús.

3. ¿Keniuj techita Jiova, uan toni kinextia nejon?

³ Se taman kemej Jiova kinextia ke yolyemanik yejua kemej techita, maski titajtakolejkej. Amo sayoj techkaua maj tikueyichiuakan, ta no techita kemej itasojikniuan (Sal. 25:14). Ueli kuali timouikaj iuan porin kitemakak iKonetsin maj toka momikili  uan ijkon uelis techtapojpoluis totajtakoluan. Nejin kinextia ke Jiova semi techiknelia.

4. ¿Keniuj techchijchiuak Jiova, uan keyej?

⁴ Maj tikitakan okse taman kemej Jiova kinextia ke yolyemanik. Yejuatsin amo monekia techchijchiuas kemej toselti ueliskia tikixtaliskej toni tikchiuaskej. Maski ijkon, techchijchiuak kemej yejuatsin uan kemej toselti uelis titaixpejpenaskej. Maski iixpan amo teyi tichiuanimej, kineki maj tiktekitilikan porin tiktasojtaj uan porin tikmatij ke komo tiktakamatij techpaleuia (Deut. 10:12; Is. 48:17, 18). Semi tiktasojkamatij maj Jiova semi yolyemanik.

5. ¿Keniuj techmachtia Jiova maj tiyolyemankej? (Xikonita taixkopin ipeujyan amaix).

⁵ Jiova kinkaua itekitikauan maj kichiuakan seki taman. Ijkon techmachtia maj tiyolyemankej. Maski yejuatsin okachi tamatkej, kikaki tein kiluiaj ke uelis kichiuas. Kemej neskayot, kikauak maj iKonetsin kipaleuiani maj kichijchiua nochi tein onkak (Prov. 8:27-30; Heb. 1:2). Uan maski Jiova nochi ueli kichiua, kinmaka oksekin seki tekimej. Kemej neskayot, kiixtalij Jesús kemej Tekiuaj itech iTekiuajyo uan kinmakas tanauatil 144,000 taltikpakneminij akin iuan tekiuajtiskej (Luc. 12:32, TNM). Melauj ke achto kimachtij Jesús keniuj kichiuas tekit kemej Tekiuaj uan Tayekankatiopixkat (Heb. 5:8, 9). No kinmachtia akin iuan tekiuajtiskej iKonetsin. Sayoj ke maski kinmakas nejin tekit, amo nochipa kiniluijtos keniuj moneki kichiuaskej, ta takuaujtamatis ke kichiuaskej tein yejuatsin kineki (Apoc. 5:10).

6, 7. ¿Keniuj uelis kichiuaskej kemej toTajtsin Jiova tokniuan takamej akin kipiaj ininnamik, tayekananij uan tetatmej?

⁶ Komo toTajtsin Jiova kinmaka oksekin  seki tekimej maski amo moneki maj kipaleuikan, okachiok tejuan moneki ijkon tikchiuaskej. Kemej neskayot, ¿keniuj uelis kichiuaskej kemej yejuatsin tokniuan takamej akin kipiaj ininnamik uan tayekananij itech nechikol? Keman kinmakaj tekimej oksekin uan amo nochipa kiniluijtokej keniuj moneki kichiuaskej. Ijkon, amo sayoj tapaleuiskej maj mochiua tekit, ta no kinmachtiskej oksekin uan kinpaleuiskej maj okachi takuaujtamatikan ke uelis kichiuaskej (Is. 41:10). ¿Toni okseki taman uelis kinmachtis ineskayo Jiova akin kipiaj tanauatil?

⁷ Biblia kinextia ke Jiova kinkaki ángeles keman kiluiaj tein uelis mochiuas (1 Rey. 22:19-22). ¿Keniuj tetatmej uelis kichiuaskej kemej yejuatsin? Keman kiitaskej ke kinamiki, maj kintajtanikan ininkoneuan keniuj kinemiliaj ke moneki mochiuas se tekit. Uan komo ueli, maj kichiuakan tein kiniluiskej.

8. ¿Keniuj Jiova amo yolijsiuik iniuan Abrahán uan Sara?

⁸ Jiova no kinextia ke yolyemanik keman amo yolijsiui. Kemej neskayot, kinkaki itekitikauan keman kitajtaniaj ika poujkaitalis oso mouiskaitalis keyej kiixtalia seki taman. Maj tikelnamikikan ke kikakik Abrahán keman kiluij ke kinemiliaya ke amo kuali katka maj kiixtaliani kiixpolos Sodoma uan Gomorra (Gén. 18:22-33). Uan no maj tikelnamikikan toni kichiuak keman inamik Abrahán, Sara, ueuetskak keman kikakik ke kipiaskia se konetsin maski xiuejya katka. Jiova amo moyolkokoj nion kualanik, ta kinextilij poujkaitalis (Gén. 18:10-14).

9. ¿Toni uelis kinmachtis ineskayo Jiova tetatmej uan tayekananij?

⁹ Tetatmej uan tayekananij, ¿toni uelis namechmachtis ineskayo Jiova? Xiknemilikan toni nankichiuaj keman nanmokoneuan oso seki tokniuan itech nechikol namechtajtaniaj keyej nankiixtalijkej seki taman. ¿Niman nankiniluiaj ke amo moneki kiixnamikiskej tein nankiixtalijkej? ¿Oso nanmochikauaj nankiajsikamatiskej keyej ijkon kiitaj? Senkis tikmatij ke kalyetouanij uan tokniuan itech nechikolmej kinpaleuia maj akin kinixyekanaj kichiuakan kemej Dios. Itech nejin párrafos, tikitakejya keniuj Jiova kinextia ke yolyemanik uan toni techmachtia ineskayo. Axkan no maj tikitakan keniuj uelis tiknextiskej yolyemanilis ika ininneskayo sekin akin ininka motajtoua itech Biblia.

10. ¿Keniuj techmachtia Jiova?

¹⁰ Kemej Jiova ‘toUeyi Tamachtijkauj’, itech iTajtol kichiuak maj moijkuilo neskayomej tein uelis techmachtiskej miak taman (Is. 30:20, 21). Uelis inintech titanemiliskej sekin akin Biblia ininka tajtoua akin kinextijkej kualneskayomej tein kiyolpaktiaj Dios, kemej yolyemanilis, uan tein kinpanok oksekin akin amo kinextijkej (Sal. 37:37; 1 Cor. 10:11).

11. ¿Toni techmachtia tein amo kuali tein kichiuak Saúl?

¹¹ Maj itech titanemilikan tein kipanok tekiuaj Saúl. Keman katka telpoch, semi yolyemanik katka uan kinemiliaya ke amo kinamikia kichiuas seki taman. Yejua ika amo kinekia kiselis uejueyi tekimej (1 Sam. 9:21; 10:20-22). Sayoj ke tepitsin satepan ke mochiuak tekiuaj, peuak moueyimati uan kichiuak seki taman tein amo kinamikia kichiuas. Se tonal, yolijsiuik uan amo kichiakok tanauatijkej Samuel. Amo takuaujtamatik ke Jiova kipaleuiskia ixolal, ta kimaktilij se tapial tachichinol maski amo yejua kinamikia kichiuas. Yejua ika, Jiova amo kitatiochiuijok uan kiixtopeuak kemej tekiuaj (1 Sam. 13:8-14). Nejin techmachtia ke amo moneki tikchiuaskej  tein amo technamiki. Semi techpaleuis komo tikelnamikij nejin.

12. ¿Toni kuali neskayot techkauilij Daniel?

¹² Tanauatijkej Daniel techkauilij se kuali neskayot, amo kemej Saúl. Daniel nochipa kinextij yolyemanilis uan kitemoj maj Jiova kiixyekana. Kemej neskayot, keman Jiova kichiuak maj kiluiani Nabucodonosor toni kijtosnekia tein kikochitaka, Daniel amo yejua moueyitalij, ta kiueyitalij Jiova (Dan. 2:26-28). Nejin techmachtia ke komo tiktemakaj tanojnotsmej tein tokniuan kiuelkakij oso komo kuali techyoui itech tanojnotsalis, moneki tikueyitaliskej Jiova. Maj tiyolyemankej uan maj tikajsikamatikan ke nejon sayoj ueli tikchiuaj porin Jiova techpaleuia (2 Cor. 4:7). Ijkon no tikchiuaj kemej Jesús. Maj tikitakan keyej tikijtouaj nejin.

13. Ika tein kijtoua Juan 5:19, 30, ¿toni techmachtia tein kichiuak Jesús?

¹³ Maski Jesús katka iKonetsin Dios uan amo tajtakolej katka, nochipa kitemoj inepaleuil Jiova (xikonixtajtolti Juan 5:19, 30). Amo keman kitemoj kitapanauilis iTajtsin. Biblia kijtoua ke “amo kinemilij kikuilis Dios tein iaxka uan mochiuas kemej yejuatsin” (Filip. 2:6, TNM). Kiajsikamatia toni kinamikia kichiuas, kipoujkaitaya tanauatil tein kipia iTajtsin uan kitakamatia.

14. ¿Toni kichiuak Jesús keman kitajtanijkej maj kichiua se taman tein amo yejua kinamikia kichiuas?

¹⁴ Maj tiknemilikan toni kichiuak Jesús keman imomachtijkauan, Santiago uan Juan, iuan ininmomaj, kitajtanijkej maj yejuan omen motalianij se iyekmakopaka uan okse iopochmakopaka itech iTekiuajyo Dios. Jesús niman kinnankilij ke sayoj iTajtsin kinamikia kiixtalis akoni kiseliskia nejon tatiochiualis (Mat. 20:20-23). Ijkon kinextij ke kiajsikamatia ke seki taman amo yejua kinamikia kichiuas. Kinextij yolyemanilis uan sayoj kichiuak tein Jiova kinauatijka (Juan 12:49). ¿Keniuj uelis tikchiuaskej kemej yejua?

15, 16. ¿Keniuj uelis tikchiuaskej tanauatil tein moajsi itech 1 Corintios 4:6?

¹⁵ Ijkon kemej Jesús, tiknextiaj ke tikajsikamatij ke seki taman amo tejuan technamiki tikchiuaskej keman tiktakamatij tanauatil tein moajsi itech 1 Corintios 4:6: “Amo xikpanauikan [...] in tanauatilme de Dios”. Yejua ika, keman se tokniuj techtajtanis maj tikyolmajxitikan, maj amo tikchikaujkauikan maj kichiua tein tejuan tiknemiliaj nion maj niman  tiknankilikan komo amo achto tiknemilijkej toni tikiluiskej. Okachi kuali, maj tikiluikan tein Biblia uan toamaixuan tayolmajxitiaj. Ijkon tiknextiskej ke tikajsikamatij ke amo nochi tikmatij uan ke tiyolyemankej porin tikajsikamatij ke tein Jiova tayolmajxitia okachi kuali (Apoc. 15:3, 4).

¹⁶ Kemej tikitakej, keman tiyolyemankej uan tiknextiaj ke tikajsikamatij ke seki taman amo tejuan technamiki tikchiuaskej, tikueyitaliaj Jiova. Axkan maj tikitakan keniuj komo tiyolyemankej uan tikajsikamatij ke amo nochi ueli tikchiuaj techpaleuia maj tiyolpakikan uan maj kuali timouikakan iniuan oksekin.

17. ¿Keyej yolpakij akin yolyemankej uan akin kiajsikamatij ke amo nochi ueli kichiuaj?

¹⁷ Komo tiyolyemankej uan tikajsikamatij ke amo nochi ueli tikchiuaj, okachi tiyolpakiskej. ¿Keyej? Porin keman tikajsikamatij nejin, tiktasojkamatij keman oksekin kinekij techpaleuiskej. Maj tikelnamikikan tonal keman Jesús kinpajtij majtakti takamej akin kipiayaj lepra. Sayoj se mokepak uan kitasojkamatilij maj kipajtiani. Nejon takat akin katka yolyemanik kimatia ke amo keman ueliskia iselti mopajtis, yejua ika motasojkamatik uan kiueyitalij Dios (Luc. 17:11-19).

18. ¿Keniuj techpaleuia maj kuali timouikakan iniuan oksekin komo tiyolyemankej uan tikajsikamatij ke amo nochi ueli tikchiuaj? (Romanos 12:10).

¹⁸ Miakpa, akin yolyemankej uan akin kiajsikamatij ke amo nochi ueli kichiuaj kuali mouikaj iniuan oksekin uan kinpiaj kuali tasojiknimej. ¿Keyej? Porin kiajsikamatij ke oksekin kipiaj kualtsitsin kualneskayomej uan iniuan takuaujtamatij. Uan no, yolpakij keman kuali kinyoui itech tekit tein kipiaj itech inechikol Jiova uan niman kiniluiaj ke kichiuaj se kuali tekit uan kinpoujkaitaj oso kinmouiskaitaj (xikonixtajtolti Romanos 12:10).

19. ¿Keyej moneki amo timoueyimatiskej?

 ¹⁹ Sayoj ke, akin moueyimatij ouij kinkisa kiniluiskej oksekin ke kuali tekit kichiuaj uan kinekij maj sayoj yejuan kiniluikan. Kiitaj tein oksekin kichiuaj uan kitemouaj maj okachi kuali kinkisa teisa. Amo kinmachtiaj oksekin nion kinmakaj tekimej, ta yejuan kichiuaj nochi porin kinemiliaj ke sayoj ijkon kuali kisas. Uan no, miakpa kinekij yeskij okachi ueyichiuanimej uan kinnexikoluiaj akin okachi kuali kichiuaj teisa (Gál. 5:26). Uan amo semi kinpiaj tasojiknimej. Yejua ika, komo tikitaj ke timoueyimatij, maj tiktataujtikan Jiova maj techpaleui maj tikpatakan totanemilil uan ijkon amo timoueyimatiskejok (Rom. 12:2).

20. ¿Keyej moneki tiyeskij tiyolyemankej uan tikajsikamatiskej ke amo nochi ueli tikchiuaj?

²⁰ Semi tiktasojkamatij maj Jiova techkauili se kuali neskayot. Kinextia ke yolyemanik keman kinkaua itekitikauan maj kichiuakan seki taman, uan tiknekij tikchiuaskej kemej yejuatsin. No tiknekij tikchiuaskej kemej akin kitekitilijkej Jiova ika yolyemanilis. Maj nochipa tikueyitalikan Jiova kemej kinamiki (Apoc. 4:11). Ijkon no uelis timouikaskej iuan nochipaya, porin yejuatsin kintasojta akin yolyemankej uan akin kiajsikamatij ke amo nochi ueli kichiuaj.