1. ¿Keyej Jiova peuak tachijchiua?

MASKI Jiova uejkauak yetoya iselti, nejon amo kitayokoltij. Yejuatsin amo kipolouaya nion teyi. Sayoj ke no kinekia maj oksekin neminij uan maj yolpakinij. Yejua ika inetasojtalis kichiuak maj peuani tachijchiuani (Sal. 36:9; 1 Juan 4:19).

2. ¿Keniuj momachilijkej Jesús uan ángeles keman Jiova kichijchiuak okseki taman?

² Yekinika, Jiova kichijchiuak iKonetsin, Jesús. Ompa, Jesús kipaleuij maj kichijchiua nochi okseki taman, kemej ángeles (Col. 1:16). Jesús semi kiyolpaktij tekitis iuan iTajtsin (Prov. 8:30). Uan ángeles no semi yolpakkej porin kiitakej keniuj Jiova uan Jesús, akin tekitikej tein ixmach, kichijchiujkej iluikak uan taltikpak. ¿Keniuj momachilijkej ángeles? Biblia kijtoua ke kiueyichiujkej Jiova uan kisentokakej kiueyichiujkej keman kiitakej nochi okseki taman tein kichijchiujka, okachiok keman kinchijchiuak taltikpakneminij (Job 38:7; Prov. 8:31). Itech nochi tein kichijchiuak moita inetasojtalis uan itamatilis (Sal. 104:24; Rom. 1:20).

3. Kemej kijtoua 1 Corintios 15:21, 22, ¿keniuj tapaleuia inemilis Jesús tein kitemakak?

³ Jiova kinekia maj taltikpakneminij nemikan nochipaya itech kualtsin taltikpak tein kichijchiuak. Sayoj ke, keman Adán uan Eva kiixnamikkej, tajtakol uan mikilis peuak moajsij  itech taltikpak (Rom. 5:12). ¿Toni kichiuak Jiova? Niman kijtoj keniuj kinmakixtiskia taltikpakneminij (Gén. 3:15). Kiixtalij kitemakas iKonetsin maj kinmakixti itech tajtakol uan mikilis ikoneuan Adán uan Eva. Ijkon, kikauaskia maj sejse taltikpaknenkej kiixejeko ox kitekitilis uan nemis nochipaya (Juan 3:16; Rom. 6:23; xikonixtajtolti 1 Corintios 15:21, 22).

4. ¿Toni tikitaskej itech nejin tamachtilis?

⁴ Kemej Dios kijtoua ke kichiuas maj mikemej oksepa nemikan oso maj moajokuikan, nejon kichiua maj timotajtanikan seki taman. Kemej neskayot, ¿keniuj yeski neajokuilis?, ¿tikinixmatiskej akin tikintasojtayaj keman oksepa nemiskej?, ¿keyej neajokuilis semi techyolpaktis? Uan ¿keniuj neajokuilis techmachtia maj tikpatiuitakan maj Jiova techtasojta, maj tamatkej uan maj amo yolijsiui? Maj tikitakan.

5. ¿Keyej taixejekol maj amo sepasaj nemikan nochin akin momikilijkejya?

⁵ Itechkopa iKonetsin, Jiova kichiuas maj millones akin momikilijkejya oksepa nemikan. Sayoj ke xa amo nochin moajokuiskej sepasaj. ¿Keyej amo? Porin komo sepasaj momiakiliskiaj taltikpakneminij, amo akin kimatiskia toni kichiuas. Uan Jiova amo kiuelita maj teisa amo moajsi kemej moneki. Kimati ke onkas yolseuilis komo nochi kuali moajsi (1 Cor. 14:33). Achto ke Jiova kinchijchiuaskia taltikpakneminij, yolik kichijchiujtiaj taltikpak iuan Jesús. Ijkon kinextij ke tamatkej uan ke amo yolijsiui. Uan keman Jesús taixyekanas Mil Xiujmej, no kinextis nejon kualneskayomej keman kinpaleuis akin makisaskej itech Armagedón maj kichijchiuakan miak taman tein xa kikuiskej akin oksepa nemiskej.

6. Kemej kijtoua Hechos 24:15, ¿akonimej oksepa nemiskej?

 ⁶ Sayoj ke tein okachi tayekantok tein monekis kichiuaskej akin makisaskej itech Armagedón yejua kinmachtiskej itanauatiluan Dios uan toni iTekiuajyo akin oksepa nemiskej. ¿Keyej monekis kinmachtiskej? Porin miakej akin oksepa nemiskej yejuan akin Biblia kijtoua ke “amo yolkualime” (xikonixtajtolti Hechos 24:15). Yejuan monekis kipataskej miak taman itech ininnemilis uan ijkon uelis kinpaleuis inemilis Cristo tein kitemakak. Tikmatij ke yeski se ueyi tekit se kinmachtis millones taltikpakneminij akin senkis amo kiixmatij Jiova. ¿Kinmachtiskej ika Biblia ininsejselti, kemej axkan tikchiuaj? ¿Yetoskej itech se nechikol uan kinnextiliskej keniuj kinmachtiskej akin moajokuiskej satepan? Nejon ayamo ueli tikmatij. Tein kemaj tikmatij yejua ke keman tamis itaixyekanalis Cristo tein uejkauas Mil Xiujmej, “itech nochi taltikpak yekmelauj onkas itaixmatilis Jiova” (Is. 11:9). ¡Itech nejon mil xiujmej onkas miak tekit uan ueyi yolpakilis!

7. ¿Keyej itekitikauan Jiova kinajsikamatiskej akin oksepa nemiskej keman kinmachtiskej?

⁷ Itech Mil Xiujmej tein uejkauas itaixyekanalis Cristo, nochin itekitikauan Jiova monekis kipataskej miak taman itech ininnemilis uan ijkon uelis kiyolpaktiskej. Yejua ika, kinajsikamatiskej akin oksepa nemiskej keman kinpaleuiskej maj kiixtopeuakan tein amo kuali uan maj kitakamatikan itanauatiluan Jiova (1 Ped. 3:8). Tikmatij ke akin oksepa nemiskej no kinekiskej kiueyichiuaskej Dios keman kiitaskej ke itekitikauan yolyemankej uan ke no kisentokaj mochikauaj kipataskej seki taman uan ijkon uelis kiyolpaktiskej Jiova (Filip. 2:12).

8. ¿Keyej tiknemiliaj ke akin kinchiaskej akin oksepa nemiskej uelis kinixmatiskej?

⁸ Moajsi miak taman tein kinextia ke akin kinchiaskej akin oksepa nemiskej uelis kinixmatiskej. Kemej neskayot, keman tikixtajtoltiaj itech Biblia keman Jiova kichiuak maj oksepa nemikan seki taltikpakneminij, techajsikamatiltia ke akin oksepa nemiskej kinchijchiuas kemej katkaj tepitsin achto ke momikiliskiaj, kemej moitayaj, kemej tajtouayaj uan kemej tanemiliayaj. Uan no, maj tikelnamikikan ke Jesús kijtoj ke keman se momikilia kemej yeskia se kochi uan ke keman oksepa se nemi kemej yeskia se ijsa oso se tachia (Mat. 9:18, 24; Juan 11:11-13). Keman taltikpakneminij ijsaj oso tachiaj amo mopata kemej moitayaj, kemej tajtouayaj uan tein kinemiliayaj achto ke kochiskiaj. Maj tikitakan tein kipanok Lázaro. Keman Jesús kichiuak maj oksepa nemi, naui tonal achtoya momikilijka, yejua ika inakayo uejueliujtoyaya. Sayoj ke iikniuan niman kiixmatkej uan Lázaro no kinelnamikia (Juan 11:38-44; 12:1, 2).

9. ¿Keyej akin oksepa nemiskej tajtakolejkejok yeskij?

⁹ Jiova kijtoua ke itech Xochital amo akinok kijtos: “Nimokokoua” (Is. 33:24; Rom. 6:7). Yejua ika, keman Dios oksepa kinchijchiuas akin momikilijkejya, amo kokolispeuaskejok. Sayoj ke amo niman kinajchiuilis tajtakol, porin komo senkis kinajchiuilia, ininchankauan uan akin iniuan mouikayaj xa amo kinixmatiskej. Nesi ke nochin taltikpakneminij yolik kinajchiuilijtiaskej tajtakol itech iTekiuajyo Cristo tein uejkauas Mil Xiujmej. Keman nejon Tekiuajyot kitamichiuasya nochi tein Jiova kinekia, hasta maj taltikpakneminij amo kipiakanok tajtakol,  Jesús kimaktilis Tekiuajyot iTajtsin (1 Cor. 15:24-28; Apoc. 20:1-3).

10. ¿Keniuj timomachiliskej keman mikemej oksepa nemiskej?

¹⁰ Maj tiknemilikan keniuj timomachiliskej keman oksepa tikinitaskej tochankauan uan akin kuali iniuan timouikayaj. ¿Tiuetskaskej oso tichokaskej porin semi tiyolpakij? ¿Tikueyichiuaskej Jiova ika nekuikatilmej? Tein kemaj tikmatij yejua ke semi tiktasojtaskej toTajtsin uan iKonetsin akin semi techtasojtaj, porin yejuan kichiujkej maj mikemej oksepa nemikan.

11. Ika tein kijtoj Jesús itech Juan 5:28, 29, ¿toni kiseliskej akin oksepa nemiskej uan tatakamatiskej?

¹¹ No maj tiknemilikan yolpakilis tein kimachiliskej akin oksepa nemiskej keman kipatatiaskej ininnemilis uan ijkon uelis kitakamatiskej Dios. Akin kichiuaskej nejin, uelis nemiskej nochipaya itech Xochital. Sayoj ke akin taixnamikiskej, Jiova amo kinkauas maj nemikan ompa nion maj kichiuakan maj amo onka yolseuilis (xikonixtajtolti Juan 5:28, 29; Is. 65:20).

12. ¿Keniuj kintatiochiuis Jiova nochin akin nemiskej itech taltikpak?

¹² Keman taixyekantos iTekiuajyo Dios, nochin itekitikauan kiitaskej ke melauak tein kijtoua Proverbios 10:22: “Itatiochiualis Jiova yejua tein kichiua maj se kipia miak taman, uan amo teualkuilia tekokojkayot”. Ika inepaleuil iespíritu Jiova, itekitikauan okachi kinextijtiaskej ikualneskayouan Cristo uan yolik kinajchiuilijtiaskej tajtakol (Juan 13:15-17; Efes. 4:23, 24). Mojmostaj kipiaskej okachi chikaualis uan kinextijtiaskej okachi kualneskayomej. ¡Semi yolpakiskej! (Job 33:25). Sayoj ke, ¿keniuj techpaleuia axkan itech titanemiliskej neajokuilis?

13. Kemej kijtoua Salmo 139:1-4, ¿keniuj neajokuilis kinextia ke Jiova kuali techixmati?

¹³ Kemej tikitakejya, keman Jiova kichiuas maj mikemej oksepa nemikan, yejuan tanemiliskej uan yeskij kemej achto ke momikiliskiaj. Maj tiknemilikan toni kijtosneki nejon. Kemej Jiova semi techtasojta tisejsemej, kimati toni tiknemiliaj, toni tikmachiliaj, toni tikijtouaj uan toni tikchiuaj. Yejua ika, komo monekiskia oksepa techmakas tonemilis, amo ouij kikisaskia techchijchiuas kemej achto tikatkaj. Tekiuaj David kimatia ke Jiova kuali techixmati (xikonixtajtolti Salmo 139:1-4). ¿Keniuj timomachiliaj keman tikmatij ke Jiova kuali techixmati?

14. ¿Keniuj moneki tikitaskej maj Jiova kuali techixmati?

¹⁴ Amo moneki techtekipachos maj Jiova kuali techixmati. ¿Keyej? Maj tikelnamikikan ke yejuatsin semi techtasojta uan ke techpatiuita tisejsemej. Uan no, kimati toni tikpanouanij uan ke nejon kichiuani maj tikpiakan se taman tanemilil uan maj tikchiuakan seki taman. ¿Melauj ke semi techyolseuia tikmatiskej nejin? Maj amo keman tiknemilikan ke toselti tiyetokej, porin Jiova nochipa touan yetok uan kitemoua keniuj techpaleuis (2 Crón. 16:9).

15. ¿Keyej neajokuilis kinextia ke Jiova semi tamatkej?

¹⁵ Semi tamouilil maj taltikpakneminij kimouilikan mikiskej. Akin Satanás kinixyekana kitekitiltiaj nejon moujkayot uan ika kinchikaujkauiaj taltikpakneminij maj kintemaktikan akin kuali iniuan mouikaj oso maj kichiuakan tein kimatij ke amo kuali. Sayoj ke tejuan amo ueli ika techmojmoujtiaj.  Tikmatij ke komo akin techtauelitaj techmiktiaj, Jiova oksepa techmakas tonemilis (Apoc. 2:10). Senkis tikneltokaj ke amo uelis kichiuaskej maj amo tiktekitilikanok Jiova maski techchiuiliskej miak taman (Rom. 8:35-39). Jiova kinextij ke semi tamatkej keman kiixtalij maj mikemej oksepa nemikan. Ijkon kikuilia Satanás se taman tein ika tamojmoujtia uan no techpaleuia maj tikpiakan ueyi yolchikaualis uan ijkon amo tikauaskej Jiova.

16. ¿Toni moneki timotajtaniskej, uan toni kinextis tein titanankiliskej?

¹⁶ Komo akin techtauelitaj techiluiaj ke techmiktiskej, ¿titakuaujtamatiskej ke Jiova uelis kichiuas maj oksepa tinemikan? ¿Keniuj uelis tikmatiskej nejon? Maj timotajtanikan: “¿Kinextia tein mojmostaj nikixpejpena ke nitakuaujtamati iuan Jiova?” (Luc. 16:10). “¿Kinextia kemej ninemi ke nitakuaujtamati ke Jiova nechmakas tein nechpolos komo niktayekanaltia iTekiuajyo?” (Mat. 6:31-33). Komo titanankiliaj ke kemaj, tiknextiskej ke titakuaujtamatij iuan Jiova uan nejon takuaujtamatilis techpaleuis maj titaxikokan keman tikpanoskej tein yeski ouijkayot (Prov. 3:5, 6).

17. 1) ¿Keyej neajokuilis kinextia ke Jiova amo yolijsiui? 2) ¿Keniuj uelis tiknextiskej ke tiktasojkamatij maj Jiova amo yolijsiui?

¹⁷ Jiova kiixtalijya tonal uan hora keman kiixpolos tein amo kuali (Mat. 24:36). Maski kineki maj ejkoya tonal keman kichiuas maj mikemej oksepa nemikan, amo yolijsiuis nion kichiuas achto (Job 14:14, 15). Kichixtok maj ejko tonal tein kiixtalij (Juan 5:28). Onkak miak taman tein kichiua maj tiktasojkamatikan maj Jiova amo yolijsiui. Kemej neskayot, miakej uelinij moyolnonotsanij oso moyolnemilianij, hasta tejuan (2 Ped. 3:9). Jiova kineki maj miakej uelikan nemikan nochipaya. Yejua ika, maj tiknextikan ke tiktasojkamatij maj amo yolijsiui. ¿Keniuj? Keman timochikauaj tikinajsiskej akin kinekij nemiskej nochipaya uan tikinpaleuiaj maj kitasojtakan uan maj kitekitilikan (Hech. 13:48, TNM). Ijkon yejuan no kinpaleuis maj Jiova amo yolijsiui.

18. ¿Keyej moneki amo tiyolijsiuiskej keman oksekin kipanouaj ouijkayomej?

¹⁸ Jiova amo yolijsiuis uan kisentokas techtapojpoluis totajtakoluan hasta keman tamis mil xiujmej. Satepan amo tikpiaskejok tajtakol.  Yejua ika, maj tikitakan ininkualneskayouan oksekin uan maj amo tiyolijsiuikan, ijkon kemej kichiua yejuatsin. Maj tikitakan ineskayo se tokniuj siuat. Inamik peuak amo kuali momachilia porin semi motekipachouaya uan amo yayaok nechikolmej. Tokniuj siuat kijtoua: “Nejin semi nechyolkokouaya. Amo uelikok tikchiujkej tein tikixtalijkaj tikchiuaskej kemej kalyetouanij”. Maski ijkon, kisentokak kinextilij netasojtalis inamik uan amo yolijsiuik. Takuaujtamatik iuan Jiova uan amo keman mosenkauak. Ijkon kemej Jiova, amo sayoj kiitak kuejmol, ta okachi kiitak ikualneskayouan inamik. Yejua kijtoua: “Nonamik kipia kualtsitsin kualneskayomej uan mochikaujtok okachi kuali momachilis”. Komo tochankauan oso tokniuan itech nechikol kipanouaj ouijkayomej, moneki amo tiyolijsiuiskej.

19. ¿Toni moneki tikixtaliskej tikchiuaskej?

¹⁹ Jesús uan ángeles semi yolpakkej keman Jiova kichijchiuak taltikpak. Maj tiknemilikan keniuj semi yolpakiskej keman kiitaskej ke itech nochi taltikpak moajsij taltikpakneminij akin amo tajtakolejkej, akin kitasojtaj Jiova uan kitekitiliaj. Uan maj tiknemilikan keniuj semi yolpakiskej akin tekiuajtiskej iuan Cristo ompa iluikak keman kiitaskej ke tekit tein kichiuaj kinpaleuia taltikpakneminij (Apoc. 4:4, 9-11; 5:9, 10). No maj tiknemilikan keniuj yeski tonemilis keman tichokaskej porin tiyolpakij uan amo porin titayokoyaj, keman amo akinok kokolispeuas, tayokoyas nion momikilis (Apoc. 21:4). Hasta maj ejko nejon tonal, maj tikixtalikan tikchiuaskej kemej toTajtsin uan maj tiknextikan netasojtalis, tamatilis uan maj amo tiyolijsiuikan. Ijkon, tiksentokaskej tiyolpakiskej maski tikpanoskej tein yeski ouijkayot (Sant. 1:2-4). Semi tiktasojkamatij maj Jiova kijto ke “kinpankixtis yoltokke nochi in animajme [oso mikemej]” (Hech. 24:15).