1. ¿Toni kichiujtokej miakej tokniuan porin kinekij okachi kitekitiliskej Jiova?

 IXPOLIUILIS ejkotokya uan tikpiaj miak tekit (Mat. 24:14; Luc. 10:2; 1 Ped. 5:2). Tinochin tiknekij okachi tiktekitiliskej Jiova. Miakej mochikaujtokej kichiuaskej okachi tekimej. Sekin kinekij mochiuaskej precursores, oksekin kinekij tapaleuiskej Betel oso tapaleuiskej maj mochijchiuakan kalmej kampa se kiueyichiua Jiova. Uan miakej tokniuan takamej mochikaujtokej mochiuaskej tapaleuianij itech nechikol oso tayekananij (1 Tim. 3:1, 8). Jiova semi kiyolpaktia kiitas ke itekitikauan mochikauaj okachi kitekitiliskej (Sal. 110:3; Is. 6:8).

2. ¿Keniuj xa timomachiliskej komo amo tikseliaj se tekit tein tikuelitaskiaj tikpiaskej?

² Sayoj ke xa timotayokoltiaj porin uejkaujya tikchixtokej tikseliskej se tekit uan ayamo tikseliaj. Oso xa no timotayokoltiaj porin amo ueli tikchiuaj seki tekimej itech inechikol Jiova porin tixiuejkejya oso porin techtsakuilia okseki taman (Prov. 13:12). Yejua nejon kipanoua Melissa, * akin semi kiuelitaskia tapaleuis Betel oso kiselis Tamachtilis tein kiseliaj akin kiteixmatiltiaj iTekiuajyo Dios. Melissa kijtoua: “Nikpanauijya xiujmej tein motajtani. Yejua ika amo uelisok nikselis nejon tekimej. Kemansa nimotayokoltia”.

3. ¿Toni xa monekis kichiuaskej sekin akin kinekij kiseliskej okachi tekimej?

³ Sekin amo xiuejkej uan amo mokokouaj, sayoj ke ayamo ueli kiseliaj okachi tekimej porin achto moneki kipiaskej seki  kualneskayomej. Xa kimatij miak taman, niman kichiuaj teisa uan kiuelitaj tekitiskej, sayoj ke xa moneki maj amo semi yolijsiuikan, maj okachi kuali kichiuakan tekimej tein kipiaj oso maj okachi kinpoujkaitakan oksekin. Komo mochikauaj kipiaskej kualneskayomej tein monekij, xa kiseliskej se tekit keman amo kichixtoskej. Maj tikitakan tein kipanok Nick. Keman kipiaya 20 xiujmej semi motayokoltij porin amo kiixtalijkej kemej tapaleuijkej itech nechikol. Nick kielnamiki: “Niknemilij ke amo kuali nikchiujtoya teisa”. Sayoj ke amo mosenkauak. Mochikauak okachi tapaleuis itech nechikol uan itech tanojnotsalis. Axkan semej taixyekananij itech se Sucursal.

4. ¿Toni tikitaskej itech nejin tamachtilis?

⁴ Komo timotayokoltijtokej porin amo ueli tikseliaj se tekit tein tikuelitaskiaj tikpiaskej, maj tiktapouikan Jiova keniuj timomachiliaj (Sal. 37:5-7). Maj tikintajtanikan ininnepaleuil tokniuan akin semi kuali mouikaj iuan Jiova. Yejuan uelis techiluiskej keniuj uelis okachi kuali tikchiuaskej seki taman uan maj timochikauakan tikchiuaskej tein techyolmajxitiskej. Komo tikchiuaj, xa tikseliskej tekit tein tiknekij. Sayoj ke ¿keniuj uelis tiksentokaskej tiyolpakiskej komo amo ueli tikseliaj tekit tein tikuelitaskiaj tikpiaskej, ijkon kemej kipanoua Melissa? Itech nejin tamachtilis tikitaskej eyi taman tein techpaleuis maj tiknankilikan nejin netajtanil. Yekinika, toni uelis kichiuas maj tiyolpakikan. Ojpatika, keniuj uelis okachi tiyolpakiskej. Uan expatika, toni uelis tikixtaliskej tikchiuaskej tein techpaleuis maj okachi tiyolpakikan.

5. ¿Toni moneki tikitaskej komo tiknekij tiyolpakiskej? (Eclesiastés 6:9).

⁵ Komo tiknekij tiyolpakiskej, moneki tikchiuaskej tein kijtoua Eclesiastés 6:9 (xikonixtajtolti). Akin ‘yolpaki ika tein kiita’ kuali momachilia ika tein kipia uan ika tein ueli kichiua. Sayoj ke akin kisentoka kineki tein amo ueli kipia, amo keman yolpakis. Nejin techmachtia ke komo tiknekij tiyolpakiskej moneki tikitaskej tein tikpiaj uan amo tein amo ueli tikpiaj.

6. ¿Toni neskayot tikitaskej, uan toni techmachtis?

⁶ ¿Uelis tiyolpakiskej ika tein tikpiajya oso ika tein tikchiuaj? Miakej kinemiliaj ke amo porin tinochin tikuelitaj timomachtiskej keniuj tikchiuaskej okseki taman. Sayoj ke kemaj uelis tiyolpakiskej ika tein tikpiajya oso ika tein tikchiuaj. ¿Keniuj? Techpaleuis maj tikmatikan nejin, neskayot kampa Jesús ika tajtoj talentos, tein moajsi itech Mateo 25:14-30. Timomachtiskej keniuj uelis tiyolpakiskej ika tein tikpiaj oso ika tein tikchiuaj, uan hasta keniuj uelis okachiok tiyolpakiskej.

7. Xikonijto neskayot kampa Jesús ika tajtoj talentos.

⁷ Itech neskayot, Jesús ika tajtoj se takat akin uejka yaskia, uan achto ke yas kinmajmakak itakeualuan talentos porin kinekia maj kitaninij okachi tomin. * Kemej takat kimatia ke itakeualuan tataman tein uelia kichiuayaj, se kimakak makuil talentos, okse kimakak ome uan okse kimakak sayoj se. Yekinika ome takeualmej kitekitiltijkej tomin uan kimiakiltijkej. Sayoj ke expatika takeual amo kitekitiltij tomin tein kiselijka, yejua ika takat kitokak.

8. ¿Keyej xa yolpakia yekinika takeual?

⁸ Yekinika takeual xa semi yolpakik keman takat akin kitekitiliaya kimakak makuil talentos. Nejon katka miak tomin uan kinextiaya ke semi iuan takuaujtamatia. Ojpatika takeual xa ueliskia motayokoltis porin  amo kimakakej miak talentos kemej yekinika takeual. Sayoj ke ¿toni kichiuak?

9. ¿Toni amo kijtoj Jesús keman ika tajtoj ojpatika takeual? (Mateo 25:22, 23).

⁹ (Xikonixtajtolti Mateo 25:22, 23). Jesús amo kijtoj ke ojpatika takeual kualanik oso ke moyolkokoj porin sayoj kimakakej ome talentos, nion kiteajsikamatiltij ke kijtoj teisa kemej nejin: “¿Amo nechmakas okachi? ¡Ta nejua no semi nitekiti kemej takeual akin kimakak makuil talentos! Komo takat akin niktekitilia amo kiita ke no semi nitekiti, okachi kuali maj niktoka itomin uan maj nejua nimotekitili”.

10. ¿Toni kichiuak ojpatika takeual ika talentos tein kiselijka?

¹⁰ Ojpatika takeual no semi kipatiuitak tekit tein kimakakaj ijkon kemej yekinika takeual. Yejua ika kitekitiltij ome talentos tein kiselijka uan kitanik omeok. Takat akin kitekitiliaya semi kiyolpaktij maj mochikauani tekitis, yejua ika kimakak okachi tekimej.

11. ¿Keniuj uelis okachi tiyolpakiskej?

¹¹ No ijkon, tejuan uelis okachi tiyolpakiskej komo timochikauaj kuali tikchiuaskej tein yeski tekit tein tikseliskej. Maj nochipa titapaleuikan itech tanojnotsalis uan maj chikauak titekitikan itech nechikol (Hech. 18:5; Heb. 10:24, 25). Maj kuali timomachtikan achto ke tiaskej nechikolmej porin nejon tapaleuis maj titayolchikauakan ika tein titanankiliskej. Maj tikpatiuitakan tein yeski tamachtilis tein techiluiskej maj tikpanoltikan itech nechikol tein mochiua itajkotian semana. Komo techiluiaj maj titapaleuikan ika se tekit tein moneki mochiuas itech nechikol, maj niman tiajsikan  uan maj kuali tikchiuakan. Maj amo tiknemilikan ke seki tekimej amo semi monekij uan ke amo moneki ika tiuejkaujtoskej. Maj timochikauakan okachi kuali tikchiuaskej tekit tein tikpiaj (Prov. 22:29). Komo chikauak tiktekitiliaj Jiova, okachi kuali timouikaskej iuan uan okachi tiyolpakiskej (Gál. 6:4). Uan no tiyolpakiskej keman oksekin kiseliskej se tekit tein tejuan tikuelitaskiaj tikpiaskej (Rom. 12:15; Gál. 5:26).

12. ¿Toni kinpaleuij Melissa uan Nick maj okachi yolpakinij?

¹² ¿Tikelnamikij Melissa, akin ika titajtojkej itech párrafo 2, akin kinekia tapaleuitiuj Betel oso kiselis Tamachtilis tein kiseliaj akin kiteixmatiltiaj iTekiuajyo Dios? Maski amo uelik kichiuak nejin, yejua kijtoua: “Nimochikaua kuali nikchiuas tekit kemej precursora uan nitapaleuis itech nochi tataman tanojnotsalis. Nejin kichiuani maj semi niyolpaki”. ¿Uan toni kichiuak Nick, akin ika titajtojkej itech párrafo 3, keman motayokoltij porin amo kiixtalijkej kemej tapaleuijkej itech nechikol? Nick kielnamiki: “Nimochikauak nikchiuas tein kemaj uelia nikchiuaya: nikteixmatiltis iTajtol Dios uan nitanankilis itech nechikolmej tein tayolchikauaskia. No niktitanik amat tein ika nitajtanik nitapaleuitiuj Betel, uan se xiuit satepan nechyoleujkej”.

13. ¿Toni panos komo timochikauaj kuali tikchiuaskej tekimej tein axkan tikpiaj? (Eclesiastés 2:24).

¹³ ¿Kijtosneki ke komo timochikauaj kuali tikchiuaskej tekimej tein axkan tikpiaj tikseliskej okachi tekimej satepan? Xa kemaj, kemej kipanok Nick. Sayoj ke maski amo, kemej kipanok Melissa, semi tiyolpakiskej uan kuali timomachiliskej ika tekit tein tikchiujtokej (xikonixtajtolti Eclesiastés 2:24). Uan no semi tiyolpakiskej porin tikmatij ke tein timochikauaj tikchiuaskej kiyolpaktia Jesucristo, akin tiktekitiliaj.

14. ¿Toni moneki tikelnamikiskej ika tein tikixtaliaj tikchiuaskej?

¹⁴ Komo timochikaujtokejya kuali tikchiuaskej tekit tein tikpiaj, ¿kijtosneki ke amo moneki tiktemoskej okachi tiktekitiliskej Jiova? Amo. Moneki tikixtaliskej tikchiuaskej tein techpaleuis maj okachi kuali titanojnotsakan uan maj okachi kuali titamachtikan, uan tein uelis ika tikinpaleuiskej tokniuan. Uelis tikchiuaskej tein tikixtaliskej komo tiknextiaj tamatilis uan yolyemanilis uan amo sayoj totech titanemiliaj, ta tiktayekanaltiaj tikinpaleuiskej oksekin (Prov. 11:2; Hech. 20:35).

15. ¿Toni seki taman uelis tikixtaliskej tikchiuaskej tein techpaleuis maj okachi tiyolpakikan?

¹⁵ ¿Toni uelis tikixtaliskej tikchiuaskej? Maj tiktajtanikan Jiova maj techpaleui maj tikmatikan toni kemaj uelis tikchiuaskej (Prov. 16:3; Sant. 1:5). ¿Uelis tikixtaliskej tikchiuaskej seki taman tein ika motajtoj itech  yekinika párrafo, kemej timochiuaskej precursores auxiliares oso regulares, titapaleuitiuij Betel oso itech kalchiualis? ¿Uelis timomachtiskej okse tajtol oso titapaleuitiuij kampa monekij okachi tanojnotsanij? Komo tiknekij tikmatiskej keniuj tikchiuaskej nejin, uelis tikixtajtoltiskej amatajkuilol Organizados para hacer la voluntad de Jehová capítulo 10, uan titajtoskej iniuan tokniuan tayekananij itech tonechikol. * Ijkon kemej timochikaujtiaskej tikchiuaskej tein tikixtalijkej, okachi  tiyolpakiskej uan oksekin kiitaskej ke tokuali uikalis iuan Jiova okachi chikauak.

16. ¿Toni uelis tikchiuaskej komo axkan amo ueli tikchiuaj se tekit tein tikuelitaskiaj tikchiuaskej?

¹⁶ ¿Toni uelis tikchiuaskej komo axkan amo ueli tikchiuaj semej tekimej tein ika titajtojkej? Maj tikixtalikan se taman tein kemaj uelis tikchiuaskej. Maj tikitakan seki.

17. Kemej kijtoua 1 Timoteo 4:13, 15, ¿keniuj se tokniuj takat uelis mochiuas okachi kuali tamachtijkej?

¹⁷ (Xikonixtajtolti 1 Timoteo 4:13, 15). Tokniuan takamej akin moauijkejya uelis mochikauaskej okachi kuali kitemakaskej tanojnotsmej uan okachi kuali tamachtiskej. ¿Keyej? Porin okachi kinpaleuiskej akin kinkakiskej komo mochikauaj okachi kuali taixtajtoltiskej, okachi kuali kitemakaskej tanojnotsmej uan okachi kuali tamachtiskej. Uelis kiixtaliskej momachtiskej folleto Maj okachi kuali titaixtajtoltikan uan titamachtikan uan kichiuaskej tein kijtoua. Maj momachtikan sejse tamachtilis, maj miakpa momamachtikan ininchan uan maj mochikauakan kichiuaskej tein momachtijkej keman kitemakaskej tanojnotsmej. Uelis kitajtaniskej maj kinyolmajxiti tokniuj tayekankej akin kinyolmajxitia tayekananij uan tapaleuianij * oso no uelis kintajtaniskej nepaleuil okseki tokniuan tayekananij akin “tanojnotstinemij uan tamachtijtinemij ika in Tajtoltsin de Dios” (1 Tim. 5:17). Moneki amo sayoj kitayekanaltiskej kichiuaskej tein momachtijkej itech folleto, ta no moneki kitemoskej kinpaleuiskej tokniuan maj kichikauakan inintakuaujtamatilis uan maj kichiuakan tein momachtiaj. Nejon kichiuas maj okachi yolpakikan uan tokniuan akin kinkakiskej no yolpakiskej.

18. ¿Toni techpaleuis maj okachi kuali titanojnotsakan uan titamachtikan?

 ¹⁸ Nochin tiitekitikauan Dios moneki tikteixmatiltiskej iTajtol uan tikinpaleuiskej oksekin maj mochiuakan itatojtokakauan Cristo (Mat. 28:19, 20; Rom. 10:14). ¿Tikuelitaskiaj okachi kuali tikchiuaskej nejin tekit? Semi techpaleuis komo timomachtiaj folleto Titamachtikan uan komo tikixtaliaj tikchiuaskej seki taman tein techpaleuis maj tikchiuakan tein timomachtiaj. Amaix Tein timomachtiaj itech nechikol Tonemilis uan toTanojnotsalis uan videos “Keniuj uelis tipeuaskej titajtoskej” no kipiaj kuali tayolmajxitilis. Maj tikchiuakan seki uan maj tikitakan katiyejua okachi techpaleuia kampa titanojnotsaj. Komo tikchiuaj tein motayolmajxitia, okachi kuali titamachtiskej uan nejon kichiuas maj okachi tiyolpakikan (2 Tim. 4:5).

19. ¿Toni techpaleuis maj tikpiakan kualneskayomej tein kiyolpaktiaj Jiova?

¹⁹ Maj tikixtalikan tikpiaskej kualneskayomej tein kiyolpaktiaj Jiova. Maj amo tikelkauakan ke nejin se taman tein uelis tikixtaliskej tikchiuaskej tein semi moneki (Gál. 5:22, 23; Col. 3:12; 2 Ped. 1:5-8). ¿Keniuj uelis tikchiuaskej nejin? Kemej neskayot, maj tiknemilikan ke tiknekij okachi tikchikauaskej totakuaujtamatilis. Uelis tikixtajtoltiskej itech toamaixuan tamachtilismej tein ika tajtouaj nejon. No uelis tikitaskej seki videos tein kisak itech JW Broadcasting^® kampa ininka motajtoua tokniuan akin kinextijkej ueyi takuaujtamatilis keman kipanokej ouijkayomej. Ompa, maj tiknemilikan keniuj uelis tiknextiskej takuaujtamatilis kemej yejuan.

20. ¿Keniuj uelis okachi tiyolpakiskej uan amo timotayokoltiskej?

²⁰ Tikmatij ke maski tiktekitilijtokejya Jiova, tinochin tikuelitaskiaj okachiok tiktekitiliskej. Itech Xochital tein yejuatsin kijtoua ke kichiuas nikan taltikpak uelis tikchiuaskej nejon. Hasta maj ejko nejon tonal, maj timochikauakan kuali tikchiuaskej tein yeski tekit tein tikseliskej. Nejon kichiuas maj okachi tiyolpakikan uan maj amo timotayokoltikan. Uan tein okachi moneki, tikueyitaliskej uan tikueyichiuaskej Jiova, toDios “akin yolpaki” (1 Tim. 1:11, TNM). Yejua ika, maj tiyolpakikan ika tein ueli tikchiuaj itech itekiyo Jiova.