1. ¿Keyej Jesús kitajtanij Jiova maj kinyekpiani itatojtokakauan?

 YOUAK achto ke Jesús momikiliskia kitajtanij iTajtsin maj kinyekpiani itatojtokakauan (Juan 17:15, 20). Maski Jesús kimatia ke Jiova nochipa kinyekpia itekitikauan, no kimatia ke Satanás okachi kinixnamikiskia uan yejua ika monekia maj Jiova kinyekpiani.

2. Kemej kijtoua Salmo 33:18-20, ¿keyej amo moneki timouiskej keman tikpiaskej ouijkayomej?

² Itech nejin taltikpak kampa taixyekana Satanás onkak miak kuejmolmej tein kichiua maj itekitikauan Dios tajyouikan uan tein kichiua maj kinextikan ox yekmelauj takuaujtamatij. Sayoj ke kemej tikitaskej itech nejin tamachtilis, amo moneki timouiskej porin Jiova kiita nochi tein techpanoua uan yekmelauj kineki techpaleuis. Ika ome neskayomej tikitaskej ke “Jiova kinita akin kimoujkatokaj” (xikonixtajtolti Salmo 33:18-20).

3. ¿Toni ueliskia kichiuas maj timomachilikan toselti?

³ Maski moajsij miakej tokniuan itech nechikol, kemansa uelis timomachiliskej toselti. Kemej neskayot, telpochmej xa momachiliskej ininselti keman moneki kiteixmatiltiskej tein kineltokaj kampa momachtiaj oso keman mopataj de nechikol. Tisekimej xa amo kuali timomachiliaj oso timotayokoltiaj uan tiknemiliaj ke amo akin uelis techpaleuis. Uan xa amo tiknekiskej tikiniluiskej oksekin keniuj timomachiliaj porin tiknemiliskej ke amo techajsikamatiskej.  Keman timomachiliaj toselti no uelis tiknemiliskej ke amo akin uelis techpaleuis uan ke amo akin toka motekipachoua. Sayoj ke Jiova amo kineki maj ijkon timomachilikan. ¿Keyej?

4. ¿Keyej tanauatijkej Elías kijtoj “sayoj nejua nimokaua”?

⁴ Maj tikitakan tein kipanok tanauatijkej Elías. Yejua monekik cholos panoua 40 tonalmej porin Jezabel kinekia kimiktis (1 Rey. 19:1-9). Iselti moajsia itech se tekoyok uan kiluij Jiova: “Sayoj nejua nimokaua” (1 Rey. 19:10). Elías kinemiliaya ke sayoj yejua mokaujka kemej tanauatijkej itech nejon altepet, sayoj ke tein melauj moajsiajok 100 tanauatianij akin Abdías kinmakixtijka porin Jezabel kinekia kinmiktis (1 Rey. 18:7, 13). ¿Keyej Elías momachiliaya iselti? Xa porin kinemiliaya ke kinmiktijkaj tanauatianij akin Abdías kinmakixtijka. Oso porin amo akin kiueyichiuak Jiova satepan ke kinixpolojkej itanauatijkauan Baal itech tepet Carmelo. Xa kinemiliaya ke amo akin kimatia ke kinekiaj kimiktiskej oso ke amo akin ika motekipachouaya. Biblia amo kijtoua keyej Elías momachiliaya iselti, sayoj ke Jiova kimatia keyej uan no kimatia keniuj kipaleuis.

5. ¿Keniuj kipaleuij Jiova tanauatijkej Elías keman momachiliaya iselti?

⁵ Jiova kichiuak miak taman tein ika kipaleuij Elías. Kemej neskayot, kiyolchikauak maj kijto keniuj momachiliaya keman ojpa kitajtanij: “¿Toni tikchiua nikan Elías?” (1 Rey. 19:9, 13). Uan yejuatsin kuali kikakik tein Elías kijtoj. Kimatiltij ke amo kikauaskia iselti uan ke yejuatsin semi chikauak. No kimatiltij ke itech altepet onkayajok miakej akin kiueyichiuayaj (1 Rey. 19:11, 12, 18). Elías semi yolseuik keman kiluij Jiova keniuj momachiliaya uan tein yejuatsin kinankilij. No kiluij maj kiixtaliani Hazael kemej tekiuaj ompa Siria, Jehú ompa Israel uan Eliseo kemej tanauatijkej (1 Rey. 19:15, 16). Jiova kiluij Elías maj kichiuani nejon para maj oksepa yolpakini uan  no kiixtalij maj Eliseo kipaleuiani. ¿Toni moneki tikchiuaskej komo timomachiliaj toselti uan moneki maj Jiova techpaleui?

6. ¿Toni uelis tikiluiskej Jiova keman timomachiliaj toselti? (Salmo 62:8).

⁶ Jiova kineki maj tiktataujtikan. Yejuatsin kimati keniuj timomachiliaj uan techiluia ke uelis tiktataujtiskej keman yeski uan techkakis (1 Tes. 5:17). Yejuatsin semi kiyolpaktia kinkakis itekitikauan (Prov. 15:8). ¿Toni uelis tikiluiskej Jiova keman timomachiliskej toselti? Maj tikchiuakan kemej Elías (xikonixtajtolti Salmo 62:8). Maj tiktapouikan tein techtekipachoua uan keniuj timomachiliaj. Maj tiktajtanikan maj techpaleui maj tikmatikan toni tikchiuaskej. Kemej neskayot, komo titelpoch oso tiichpoch, ¿toni uelis tikchiuas komo timomachilia moselti uan timoui ika titajtos Jiova kampa timomachtia? Uelis tiktajtanis yejuatsin maj mitspaleui xiyolchikauak uan xikmati keniuj tikmelauas tein tikneltoka (Luc. 21:14, 15). ¿Uan toni uelis tikonchiuas komo amo kuali tionmomachilia oso tionmotayokoltia? Uelis tikontataujtis Jiova maj mitsonpaleui xiontajto iuan se tokniuj akin semi kuali mouika iuan, uan maj kipaleui maj mitsonajsikamati. Komo tikontapouia Jiova keniuj tionmomachilia, tikonita keniuj mitsonnankilia keman tikontataujtia uan tionmokaua maj oksekin mitsonpaleuikan, amo tionmomachilisok moselti.

7. ¿Toni mitsonmachtia tein kipanok Mauricio?

⁷ Jiova techmaka tekimej tein semi monekij. Kiita uan kipatiuita nochi tein tikchiuaj itech nechikol uan itech tanojnotsalis (Sal. 110:3). Keman tiktekitiliaj Jiova techpaleuia maj amo timomachilikan toselti. Maj tikitakan tein kipanok se telpoch akin monotsa Mauricio. * Tepitsin satepan ke moauij, se akin kuali iuan mouikaya yolik peuak kikaua Jiova. Yejua kijtoua: “Keman nikitak ke akin kuali iuan nimouikaya yolik kikaujtiaya Jiova, nimotajtaniaya ox ueliskia niksentokas nikchiuas kemej nimotenkaujka keman nimoauij uan niksentokas nipouis itech inechikol Dios. Nimomachiliaya noselti uan niknemiliaya ke amo akin nechajsikamatia”. ¿Toni kipaleuij? Yejua kijtoua: “Nitanojnotsas nechpaleuij maj amo sayoj notech nitanemili uan maj amo nimotayokolti. Keman nitanojnotsaya iuan tokniuan niyolpakia uan amo nimomachiliayaok noselti”. Keman titanojnotsaj iniuan tokniuan ika carta oso ika teléfono, no semi techpaleuia maski amo ueli tietokej iniuan. ¿Toni no kipaleuij Mauricio? Yejua kijtoua: “Peuak okachi nitapaleuia itech nechikol uan nimochikauak okachi kuali nikpanoltis tamachtilismej tein nechmakayaj.  Nejon nechpaleuij maj nikita ke Jiova uan tokniuan semi nechtasojtaj”.

8. ¿Keniuj xa timomachiliskej keman tikpanoskej uejueyi ouijkayomej?

⁸ Tinochin tikmatij ke itech itamian tonalmej tikpiaskej ouijkayomej (2 Tim. 3:1). Sayoj ke amo tikmatij katiyejua ouijkayot tikpiaskej nion kemanian. Xa panos teisa tein amo tikmattoyaj uan monekis miak tomin, xa techiluiskej ke tikpiaj se ueyi kokolis oso xa momikilis aksa akin tiktasojtaj. Ijkuak xa semi timotekipachoskej, okachiok keman tikmachiliaj ke keman tami se ouijkayot peua okse oso sepasaj tikpiaj miak ouijkayomej. Sayoj ke maj tikelnamikikan ke Jiova kiita tein tikpanouaj uan ke techpaleuia maj tikixnamikikan tein yeski taman tein tikpanoskej.

9. ¿Toni ouijkayomej kipanok Job?

⁹ Maj tikitakan tein kipanok Job, se takat akin amo keman kikauak Jiova. Itech sayoj seki tonalmej kipanok uejueyi ouijkayomej. Itech sayoj se tonal kimatik ke amo kinpiayaok itapialuan, porin seki kinichtekkej uan okseki mikkej. Itakeualuan momikilijkej, uan tein okachi amo kuali, momikilijkej ikoneuan akin semi kintasojtaya (Job 1:13-19). Tepitsin satepan, keman tayokoxtoyaok porin kipanoka nochi nejon, kikuik se kokolis tein semi kitajyouiltiaya uan nion moixmatiaok (Job 2:7). Semi amo kuali tein kipanotoya, uan hasta kijtoj: “Niktauelita nonemilis uan amo nikneki niksentokas ninemisok” (Job 7:16).

10. ¿Keniuj Jiova kipaleuij Job maj taxiko? (Xikonita taixkopin ipeujyan amaix).

¹⁰ Jiova kiitaya nochi tein kipanotoya Job. Kemej kitasojtaya kipaleuij maj taxiko uan maj amo kikaua. Kinojnotsak uan kiluij ke yejuatsin semi tamatkej uan kiyekpia ika netasojtalis nochi tein kichijchiuak. Ika tajtoj seki tapialmej tein semi se kinmoujkaita (Job 38:1, 2; 39:9, 13, 19, 27; 40:15; 41:1, 2). Uan no, Jiova kititanik Elihú maj kiyolchikaua uan maj kiyolseui Job. Elihú kielnamiktij ke Jiova kintatiochiuia akin taxikouaj uan amo kikauaj. Sayoj ke Jiova no kinekia maj Elihú kiyolmajxiti. Ika netasojtalis, kipaleuij maj amo sayoj itech tanemili porin kielnamiktij ke Jiova, akin kichijchiuak nochi tein onkak semi ueyichiujkej, uan ke tejuan amo teyi tichiuanimej iixpan (Job 37:14). Satepan Jiova kiluij Job maj ininka motataujti eyi takamej akin iniuan mouikaya porin tajtakojkaj (Job 42:8-10). Uan axkan, ¿keniuj techpaleuia Jiova keman tikpanouaj ouijkayomej?

11. ¿Keniuj techyolchikaua Biblia keman tikpanouaj ouijkayomej?

¹¹ Jiova amo technojnotsaok kemej kinojnotsak Job, ta technojnotsa ika Biblia (Rom. 15:4). Techyolchikaua porin techiluia ke uelis tikchiaskej tein kuali. Maj tikitakan seki taman tein kijtoua Biblia tein techyolchikaua keman tikpanouaj ouijkayomej. Itech Biblia Jiova techyekiluia ke nion teyi, nion ouijkayomej, “uelis kichiuas maj Dios amo techtasojta” (Rom. 8:38, 39, TNM). No techiluia ke “amo uejka moajsi iniuan nochin akin kinotsaj”, tein kijtosneki ke kikaki keman kitataujtiaj (Sal. 145:18). Jiova techiluia ke komo iuan titakuaujtamatij, uelis tikxikoskej tein yeski ouijkayot uan uelis tiyolpakiskej (1 Cor. 10:13; Sant. 1:2, 12). Uan no, iTajtol Dios techelnamiktia ke ouijkayomej tein tikpiaj panotikisaj, sayoj ke tein Jiova techmakas amo keman tamis  porin tinemiskej nochipaya (2 Cor. 4:16-18). Jiova techyekiluia ke kiixpolos Satanás uan nochin akin kichiuaj kemej yejua, porin yejuan kichiuaj maj tikpiakan ouijkayomej (Sal. 37:10). ¿Tikonmatiya uan tionueliya seki textos tein mitsonpaleuiskej keman tikonpanos ouijkayomej?

12. ¿Keniuj uelis okachi techpaleuis iTajtol Dios?

¹² Jiova techpaleuia ika tein kijtoua Biblia, yejua ika kineki maj nochipa timomachtikan iTajtol uan maj itech titanemilikan. Komo tikchiuaj tein timomachtiaj, okachi titakuaujtamatiskej uan okachi kuali timouikaskej iuan Jiova. Nejon techpaleuis maj titaxikokan. Uan no, komo titakuaujtamatij itech iTajtol yejuatsin techmakas ichikaualis. Nejon techpaleuis maj tikpiakan “chikaualis tein toselti amo ueli tikpiaj”, uan uelis tikxikoskej tein yeski ouijkayot (2 Cor. 4:7-10, TNM).

13. ¿Keniuj techpaleuia maj titaxikokan nochi tein techmaka “takeual takuaujtamach uan tamatkej”?

¹³ Jiova kipaleuia “takeual takuaujtamach uan tamatkej” para kikixtis miak tataman tamachtilis, videos uan nekuikatilmej tein techpaleuiaj maj okachi titakuaujtamatikan iuan Jiova uan maj kuali timouikakan iuan (Mat. 24:45, TNM). Moneki kuali tikuiskej nochi tein Jiova techmaka. Se tokniuj siuat akin kayot Estados Unidos kijtoj ke semi kitasojkamati nochi tamachtilis tein tikpiaj. Kijtoj: “Niktekitiliani Jiova 40 xiujmejya, uan miakpa monekini niknextis ox yekmelauj nitakuaujtamati”. Nejin tokniuj kipanouani miak ouijkayomej. Kemej neskayot, iueyitat momikilij porin se takat akin uintitoya kipechij ika icarro. Itatuan momikilijkej porin semi mokokouayaj, uan yejua ojpa kikuini cáncer. ¿Toni kipaleuij maj taxiko? Yejua kijtoua: “Jiova nochipa nechyekpiani. Tamachtilis tein techmaka takeual takuaujtamach uan tamatkej nechpaleuiani maj nitaxiko. Yejua ika, ueli nikijtoua kemej kijtoj Job: ‘¡Amo keman nikauas Dios hasta maj nimiki!’” (Job 27:5).

14. ¿Keniuj techpaleuia Jiova inintechkopa tokniuan keman tikpanouaj ouijkayomej? (1 Tesalonicenses 4:9).

¹⁴ Jiova techmachtia maj timotasojtakan uan maj timoyolchikauakan keman tikpanouaj ouijkayomej (2 Cor. 1:3, 4; xikonixtajtolti 1 Tesalonicenses 4:9). Tokniuan kichiuaj kemej Elihú, kinekij techpaleuiskej maj amo tikauakan Jiova keman tikpanouaj ouijkayomej (Hech. 14: 22). Se tokniuj siuat akin monotsa Diane senkis kiitak ke melauj nejin. Keman itakatsin semi kokolispeuak, tokniuan itech nechikol kiyolchikaujkej uan kipaleuijkej maj kisentoka kuali mouika iuan Jiova. Yejua kijtoua: “Semi ouij tein tikpanokej seki metsti, sayoj ke itech nejon tonalmej tikmachilijkej keniuj Jiova technextilij ke semi techtasojta. Tokniuan itech nechikol semi techpaleuijkej, techkalpanouayaj, technotsayaj uan technauayaj. Uan kemej amo ueli niknejnemiltia carro, kiitayaj keniuj ueliskia nias nechikolmej uan tanojnotsalis keman niuelia”. ¡Semi kualtsin porin tikinpiaj tokniuan akin kemej yeskia tochankauan uan semi techtasojtaj!

15. ¿Keyej senkis tikneltokaj ke uelis tikixnamikiskej ouijkayomej tein tikpiaj?

¹⁵ Tinochin tikpanoskej ouijkayomej, sayoj ke kemej tikitakejya amo toselti tietokej. Ijkon kemej se tepopaj akin tetasojta, Jiova nochipa kiita tein tikpanouaj. Yejuatsin touan yetok, uan keman tiktajtaniaj maj techpaleui niman kichiua (Is. 43:2). Senkis tikneltokaj ke uelis titaxikoskej porin Jiova techmaka nochi tein moneki: netataujtil, Biblia, miak tamachtilis uan tokniuan akin semi techtasojtaj.

16. ¿Toni moneki tikchiuaskej para maj Jiova kisentoka techyekpia?

¹⁶ Semi timotasojkamatij porin toTajtsin kiita tein tikpanouaj. “Yejuatsin kichiua maj tiyolpakikan” (Sal. 33:21). ¿Keniuj uelis tiktasojkamatiliskej Jiova porin techyekpia ika netasojtalis? Keman kuali tikuij nochi tein yejuatsin techmaka. Sayoj ke komo tiknekij maj Jiova kisentoka techyekpia, moneki tikchiuaskej teisa. Moneki timochikauaskej tiktakamatiskej uan tikchiuaskej tein kiita ke kuali yetok. Komo tikchiuaj, Jiova techyekpias nochipaya (1 Ped. 3:12).