1. ¿Keyej techpaleuia maj ika titajtokan keniuj peuak timomachtiaj Biblia?

 “¿KENIUJ peuak tionmomachtia Biblia?”. Xa miakpa techtajtanianij nejin, okachiok keman tikinixmatij okseki tokniuan. Semi tikuelitaj tikakiskej keniuj tokniuan kiixmatkej Jiova uan peuak kitasojtaj, uan no tikuelitaj tikiniluiskej keyej semi techyolpaktia tiktekitiliskej Jiova (Rom. 1:11). Keman ika titajtouaj nejin techelnamiktia ke se ueyi tatiochiualis tiyeskij tiitaixpantijkauan Jiova. No techpaleuia maj tiknekikan tiksentokaskej itech tamachtilis tein melauak, tein kijtosneki maj tikchiuakan tein kiyolpaktis Jiova uan tein tapaleuis maj techtatiochiui (3 Juan 4).

2. ¿Toni tikitaskej itech nejin tamachtilis?

² Itech nejin tamachtilis tikitaskej seki taman keyej tikpatiuitaj tamachtilis tein melauak. No tikitaskej keniuj uelis tiksentokaskej tiknextiskej ke tikpatiuitaj. Nejon techpaleuis maj okachi tiktasojkamatilikan Jiova porin techpaleuij maj timotokikan iuan (Juan 6:44). Uan okachi tiknekiskej tikiniluiskej oksekin tein tamachtia Biblia.

3. ¿Keyej semi tikpatiuitaj tamachtilis tein melauak?

³ Onkak miak taman keyej tikpatiuitaj tamachtilis tein melauak. Tein okachi tayekantok yejua ke tiktasojtaj Jiova, akin techmachtia tein melauak. Itech iTajtol, Biblia, timomachtianij ke yejuatsin semi chikauak uan kichijchiuak nochi tein onkak itech iluikak uan taltikpak. Uan no timomachtianij  ke yejuatsin toTajtsin akin semi techtasojta uan toka motekipachoua (1 Ped. 5:7). Tikmatij ke Jiova “se Dios teiknelijkej, amo niman kualani uan inetasojtalis tein amo tami semi ueyi uan nochipa kijtoua tein melauj” (Éx. 34:6). Yejuatsin nochipa kineki maj mochiua tein kuali (Is. 61:8). Kiyolkokoua keman kiita ke titajyouiaj uan kineki kiixpolos nochi tein techtajyouiltia keman ajsis tonal tein kiixtalijtok (Jer. 29:11). ¡Semi tiknekij maj ejkoya nejon tonal! Nejin kichiua maj semi tiktasojtakan Jiova.

4, 5. ¿Keyej tatitanil Pablo kijtoj ke tein tikchiaj kemej yeskia se tepos tein ika motsikoua barco?

⁴ No tikpatiuitaj tamachtilis tein melauak porin semi techpaleuia. Kemej neskayot, itech Biblia timomachtianij ke uelis tikchiaskej maj mochiua tein kuali amo uejkaua. Keman Pablo ika tajtoj nejon, kijtoj: “Tein tikchiaj techpaleuia itech tonemilis kemej se tepos tein ika motsikoua barco” (Heb. 6:19, TNM). Se tepos tein ika motsikoua barco kipaleuia maj amo semi moolini nion maj moixkepa, no ijkon tein tikchiaj techpaleuia maj tiyolseujtokan keman tikpanouaj ouijkayomej.

⁵ Keman Pablo kijtoj nejin ininka tajtojtoya akin kichiaj nemiskej iluikak. Sayoj ke tein kijtoj no kinpaleuia akin kichiaj nemiskej nochipaya nikan taltikpak itech se xochital (Juan 3:16). Kemej tikchiaj tinemiskej nochipaya techpaleuia maj tiyolpakikan axkan.

6, 7. ¿Keniuj kipaleuij Yvonne kimatis tein Biblia kijtoua ke mochiuas satepan?

⁶ Maj tikitakan tein kipanok se tokniuj siuat akin monotsa Yvonne. Keman konetok katka amo kiixmatia Jiova, yejua ika kimouiliaya momikilis. Yejua kielnamiki ke itech se amatajkuilol kiixtajtoltij nejin tein semi kimoujkaitak: “Se tonal tinochin timomikiliskej”. Yejua kijtoua: “Nejin tein nikixtajtoltij kichiuaya maj amo ueli nikochi porin itech nitanemiliaya tein panoskia satepan. Niknemiliaya: ‘Tonemilis amo monekiskia ijkon yeski. ¿Keyej ninemi?’. ¡Amo niknekia nimomikilis!”.

⁷ Keman ichpochya katka, Yvonne kinixmatik itaixpantijkauan Jiova. Yejua kijtoua: “Peuak niknemilia ke ueliskia ninemis nochipaya itech se xochital nikan taltikpak”. Tamachtilis tein melauak semi kipaleuiani, porin kijtoua: “Axkan niyekkochia porin amo nechtekipachouaok tein mochiuas satepan nion nikmouiliaok nimomikilis”. Yejua ika Yvonne semi kipatiuita tamachtilis tein melauak uan semi kiuelita kiniluis oksekin tein mochiuas satepan (1 Tim. 4:16).

8, 9. 1) ¿Keniuj kinextij takat akin ika tajtoj Jesús ke kipatiuitaya tein kiajsik? 2) ¿Keniuj tikonita tamachtilis tein melauak?

⁸ Kuali tanauatilmej tein ika tajtoua iTaixyekanalis Dios no poui itech tamachtilis tein melauak. Jesús kijtoj ke nejin kemej yeskia teisa tein tel patiyoj tein toktok. Kijtoj: “ITaixyekanalis Dios tein moajsi iluikak tamati kemej se teisa tein tel patiyoj tein toktoya kampa tatokaj uan tein se takat kiajsik. Nejon takat oksepa kitalpachoj, uan kemej semi yolpakia, yajki uan kinamakak nochi tein kipiaya uan kikouak nejon tal” (Mat. 13:44, TNM). Kemej tikitaj, nejin takat amo kitemojtinemia nejon tein tel patiyoj, sayoj ke keman kiajsik, kinamakak nochi tein kipiaya para ueliskia kipias. ¿Keyej kichiuak nejon? Porin kiajsikamatia ke nejon kipiaya okachi ipatiuj ke nochi tein ueliskia kitemakas.

 ⁹ Tejuatsin xa no semi tikonpatiuita tamachtilis tein melauak. Tikmatij ke nion teyi tein onkak itech taltikpak kipia okachi ipatiuj ke tiktekitiliskej Jiova axkan, uan tikchiaskej tinemiskej nochipaya keman taixyekantos iTaixyekanalis Dios. Amo nenkaj nochi tein tikauaj porin tiknekij kuali timouikaskej iuan Jiova uan nejon se ueyi tatiochiualis. Semi tiyolpakij tikchiuaskej nochi tein Jiova kineki (Col. 1:10).

10, 11. ¿Toni kiolinij Michael maj senkis kipata inemilis?

¹⁰ Miakej tokniuan kikauanij miak taman para kiyolpaktiskej Jiova. Sekin kikauanij kuajkuali nemachtil tein kipiayaj. Oksekin amo kitemouanijok motomintiskej. Uan oksekin senkis kipatakej tein kichiuayaj keman peuak momachtiaj Biblia. Yejua nejon tein kichiuak se tokniuj takat akin monotsa Michael, akin amo kiixmatik Jiova keman konetok katka. Keman telpoch katka momachtij karate. Yejua kijtoua: “Nikuelitaya keniuj nimoitaya. […] Kemansa nikmachiliaya ke amo akin ueliskia nechtanis”. Sayoj ke peuak momachtia Biblia uan kiajsikamatik ke Jiova amo kiuelita maj se tateui (Sal. 11:5). Keman ininka tajtoj tokniuj takat uan inamik akin kimachtijkej, kijtoj: “Amo keman nechiluijkej maj nikaua karate, ta sayoj mochikaujkej kuali nechmachtiskej tein Biblia kijtoua”.

¹¹ Keman Michael okachi kiixmatia Jiova, okachi kitasojtaya. Semi kiyololinij keman kimatik ke Dios kiniknelia itekitikauan. Michael kimatia ke monekia kiixtalis se taman tein senkis kipataskia inemilis. Yejua kijtoua: “Nikmatia ke semi ouij yeskia nikauas karate. Sayoj ke no nikmatia ke komo nikauaya, Jiova yolpakiskia uan ke komo nikixtaliaya niktekitilis amo nenkaj yeskia”. Michael kipatiuitaya tamachtilis tein melauak uan nejon kiolinij maj senkis kipatani inemilis (Sant. 1:25).

12, 13. ¿Keniuj kipaleuij Mayli tein Biblia tamachtia?

¹² Tamachtilis tein melauak semi tapaleuia, yejua ika Biblia kijtoua ke kemej yeskia se tanex tein tauia kampa tayouayan (Sal. 119:105; Efes. 5:8). Mayli, akin kayot Azerbaiyán, semi kitasojkamati maj iTajtol Dios kipaleuiani. Itatuan kipiayaj tataman taneltokalis, ipopaj katka musulmán uan imomaj katka judía. Mayli kijtoua: “Nikneltokaya ke moajsi se Dios, sayoj ke onkaya seki taman tein amo nikajsikamatia. Nimotajtaniaya: ‘¿Keyej techchijchiuak? ¿Keyej aksa tajyouia nochi inemilis uan satepan kisentoka tajyouia miktan?’. Taltikpakneminij kijtouaj ke yejua Dios akin kiixtalia nochi tein mochiua, yejua ika niknemiliaya: ‘¿Techchiualtia Dios tein yejua kineki? ¿Yolpaki keman kiita ke titajyouiaj?’”.

¹³ Mayli kisentokak kitemoj tein kinekia kimatis. Satepan peuak kimachtiaj ika Biblia uan mochiuak itaixpantijkauj Jiova. Yejua kijtoua: “Tein Biblia tamachtia senkis nechpaleuij maj niyolpaki uan maj niyolseui”. Ijkon kemej Mayli, nochin akin tiktekitiliaj Jiova tikueyichiuaj ‘akin techuikak itech ikualtsin tanex porin tietoyaj kampa tayouayanʼ (1 Ped. 2:9, TNM).

14. ¿Toni techpaleuis maj okachi tikpatiuitakan tamachtilis tein melauak? (No xikonita recuadro “ Okseki neskayomej”).

¹⁴ Neskayomej tein tikitakej itech nejin párrafos kinextia ke tamachtilis tein melauak semi kipia ipatiuj. Uan xa tikelnamikij oksekiok. ¿Uelis tikixtaliskej tiktemoskej okseki taman keyej tikpatiuitaj  tamachtilis tein melauak? Komo okachi tikpatiuitaj okachi tiknextiskej ika tein tikchiuaj.

15. ¿Keniuj uelis tiknextiskej ke tikpatiuitaj tamachtilis tein melauak?

¹⁵ Uelis tiknextiskej ke tikpatiuitaj tamachtilis tein melauak komo nochipa timomachtiaj Biblia uan toamaixuan. Maski uejkaujya tikixmatij Jiova onkak miak taman tein uelisok timomachtiskej. Itech yekinika amaix Tanejmachtijkej itech tajtol inglés moijtoj ke tamachtilis tein melauak kemej yeskia se xochit tein yetok taluakyan. Kemej itech taltikpak miakej takajkayauaj ouij se kimatis toni tein melauak. Komo tiknekij tikmatiskej moneki timochikauaskej. Keman tikpiaskejya semej nejon xochimej tein kiixnextia tamachtilis tein melauak, maj tiksentokakan tiktemokan okseki xochimej, tein kijtosneki okseki taman tein tamachtia Biblia. Para timomachtiskej moneki timochikauaskej, sayoj ke amo nenkaj komo tikchiuaj.

16. ¿Keniuj tionmomachtia Biblia uan tikonita ke mitsonpaleuia? (Proverbios 2:4-6).

¹⁶ Sekin amo tikuelitaj titaixtajtoltiskej  uan timomachtiskej, sayoj ke Jiova techiluia maj tiksentokakan timomachtikan para okachi tikajsikamatiskej tamachtilis tein melauak (xikonixtajtolti Proverbios 2:4-6). Komo timochikauaj timomachtiskej nochipa techpaleuis. Se tokniuj takat akin monotsa Corey kijtoua ke keman momachtia Biblia, kiitstiuj sejse versículo. Yejua kijtoua: “Nikita notas tein nesij tatsintan, referencias marginales uan satepan niktemoua tamachtilis itech okseki amaixmej. […] Keman nikchiua nejin nimomachtia miak taman”. Xa timomachtiaj kemej nejin tokniuj oso xa taman kemej timomachtiaj, sayoj ke komo tikixtaliaj tiempo uan timochikauaj timomachtiskej Biblia, tiknextiskej ke tikpatiuitaj tamachtilis tein melauak (Sal. 1:1-3).

17. ¿Keniuj uelis yekmelauj techpaleuis tamachtilis tein melauak? (Santiago 1:25).

¹⁷ Amo sayoj moneki timomachtiskej Biblia, ta komo tiknekij maj techpaleui moneki tikchiuaskej tein timomachtiaj, sayoj ijkon uelis yekmelauj tiyolpakiskej (xikonixtajtolti Santiago 1:25). ¿Keniuj uelis tikmatiskej ox ijkon tikchiujtokejya? Se tokniuj takat kijtoua ke uelis tikitaskej toni tikchiujtokejya uan toniok moneki tikyekchiuaskej. Tatitanil Pablo kijtoj: “Maski kuali tiktekitilijtokejya Dios, maj ijkon tiksentokakan tikchiujtokan” (Filip. 3:16, TNM).

18. ¿Keyej timochikauaj tiksentokaskej itech tamachtilis tein melauak?

¹⁸ Maj itech titanemilikan nochi tein kuali tein tikseliaj keman timochikauaj tiksentokaskej itech tamachtilis tein melauak. Amo sayoj techpaleuia maj okachi kuali tinemikan, ta no tikyolpaktiaj Jiova uan tokniuan (Prov. 27:11; 3 Juan 4). ¡Nejin kichiua maj tikpatiuitakan tamachtilis tein melauak uan maj tikchiuakan tein timomachtiaj!