1. ¿Toni kichiuanij miakej telpochmej uan ichpochmej?

 XIJXIUJTIKA semi miakej telpochmej uan ichpochmej moauiaj. Komo no timoauijya, nochin tokniuan itech nechikol uan Jiova semi yolpakij (Prov. 27:11). Xiknemili nochi tein tikchiuani, timomachtiani Biblia miak xiujmej, nejon kichiuani xikneltoka ke iTajtol Dios. Axkan tikixmati uan tiktasojta akin kichiuak maj moijkuilo nejon amaix uan yejua tein okachi moneki. Semi tiktasojta Jiova yejua ika tikixtalij timotemaktis uan timoauis. ¡Semi kuali tein tikchiuak!

2. ¿Toni tikitaskej itech nejin tamachtilis?

 ² Achto ke timoauiskia xa tikpanok ouijkayomej tein kichiuak maj ouij mitskisa tiktakamatis Jiova. Sayoj ke tiksentokas tikpanos ouijkayomej porin Satanás kineki amo xiktasojtaok Jiova nion xiktekitiliok (Efes. 4:14). Amo xikaua maj Satanás kichiua tein kineki. ¿Toni mitspaleuis amo xikaua Jiova uan xiksentoka xikchiua kemej tikijtoj keman timotemaktij? Moneki okachi tiktekitilis Jiova, oso ‘amo ompa timokauas, ta okachi titakuaujtamatis’ iuan (Heb. 6:1, TNM). Itech nejin tamachtilis tikitaskej toni uelis mitspaleuis ijkon xikchiua.

3. ¿Toni moneki kichiuaskej nochin tokniuan satepan ke moauiaj?

³ Keman aksa moauia moneki kichiuas tein tatitanil Pablo kinyolmajxitij tokniuan akin nemiaj Éfeso. Kinyolchikauak ‘maj moskaltikan kemej se akin ueyiya’ (Efes. 4:13, TNM). Nejin kijtosneki ke monekia kisentokaskej kitekitiliskej Jiova. Pablo kijtoj ke kemej yeskia keman se konet moskaltia. Se konetsin semi kinyolpaktia itatuan, sayoj  ke ipa moskaltis uan monekis kikauas “tein se okichpil kichiua” (1 Cor. 13:11, TNM). No ijkon tejuan, satepan ke timoauiaj moneki tiksentokaskej tiktekitiliskej Jiova. Maj tikitakan seki taman tein mitspaleuis ijkon xikchiua.

4. ¿Toni mitspaleuis okachi xiktekitili Jiova, uan keyej? (Filipenses 1:9).

⁴ Okachi xiktasojta Jiova. Maski axkan tiktasojta Jiova, uelis okachi tiktasojtas, ¿keniuj? Tatitanil Pablo kijtoj se taman itech Filipenses 1:9 itech Traducción del Nuevo Mundo (xikixtajtolti). Pablo kitataujtij Jiova maj tokniuan akin nemiaj Filipos okachi tetasojtanij. Nejin kijtosneki ke uelis okachi tiktasojtaskej Dios maski tiktasojtajya, uelis tikchiuaskej nejin komo ‘kuali tikixmatij uan kuali titaixejekouaj’. Keman okachi tikixmatij Jiova okachi tiktasojtaj uan okachi tikuelitaj kemej tamati uan kemej kichiua teisa. Okachi tiknekij tiktakamatiskej uan tiknekij tikyolpaktiskej. Timochikauaj tikmatiskej toni kineki maj tikchiuakan uan ijkon tikchiuaj.

5, 6. ¿Toni okse taman techpaleuis maj okachi tiktasojtakan Jiova?

⁵ Komo kuali tikixmatij Jesús no techpaleuis maj okachi tiktasojtakan Jiova, porin yejua senkis kichiua kemej iTajtsin (Heb. 1:3). Uelis okachi kuali tikixmatiskej Jesús komo timomachtiaj naui Evangelios. Komo ayamo tikixtajtoltia Biblia mojmostaj, uelis peuas tikixtajtoltis kampa ika tajtoua inemilis Jesús. Keman tikitas tein kichiuaya xikita keniuj tamatia. Miakej kinekiaj iuan yetoskej Jesús uan iuan tajtoskej, hasta kinnapalouaya konemej (Mar. 10:13-16). Imomachtijkauan kuali momachiliayaj iuan, yejua ika kiluiayaj nochi tein kinemiliayaj (Mat. 16:22). Jesús ijkon katka porin iTajtsin ijkon kichiua, yejua ika amo ouij techkisa timotokiskej iuan Jiova. Ueli tiktataujtiaj uan tikiluiaj nochi uan amo tiknemiliaj ke techijijtos. Yejuatsin techtasojta uan toka motekipachoua (1 Ped. 5:7).

⁶ Jesús semi kinikneliaya nochin. Tatitanil Mateo kijtoua: “Keman kinitaya nochin akin mosentiliayaj, semi kinyolikneliaya, porin kinkojkokojkaj uan kinsenkaujkaj kemej ichkamej tein amo kipiaj inintajpixkauj” (Mat. 9:36, TNM). ¿Uan keniuj kinita Jiova taltikpakneminij? Keman Jesús ika tajtoj iTajtsin, kijtoj: “Yejua amo kineki maj poliui nion semej nejin akin moitaj ke amo ueyichiuanimej” (Mat. 18:14, TNM). ¡Techyolpaktia tikmatiskej ke Jiova semi techtasojta! Komo okachi tikixmatij Jesús, okachi tiktasojtaskej Jiova.

7. ¿Keyej semi mitspaleuis komo timouika iniuan akin kuali kitekitilijtokej Jiova?

⁷ Onkak okse taman tein uelis tikchiuas para okachi tiktasojtas Jiova uan okachi tiktekitilis. ¿Toni? Kuali ximouika iniuan tokniuan itech nechikol akin kuali kitekitilijtokej Jiova. Xikita keniuj semi yolpakij uan amo kinemiliaj ke amo kuali tein kiixtalijkej. Xikinilui maj mitstapouikan teisa tein kuali tein kipanouanij. Komo moneki tikixpejpenas teisa tein semi moneki xikinilui maj mitsyolmajxitikan. Biblia kijtoua: “Nochi kuali kisa keman miakej tayolmajxitiaj” (Prov. 11:14).

8. ¿Toni uelis mitspaleuis komo timotajtania ox melauak tein tamachtia Biblia?

⁸ Xiktemo tikmatis toni tein melauak. Kemej tikitakej itech  párrafo 2, Satanás amo kineki xiksentoka xiktekitili Jiova uan kitemoua nejon keman kichiua ximotajtani ox melauak tein timomachtiani  itech Biblia. Xa miakej kinekiskej xikneltoka ke Dios amo tachijchiuak ta ke iselti mochiuak nochi, nejin kichiua maj amo kuali kiitakanok Dios. Xa achto amo semi itech titanemiliaya nejin. Sayoj ke itech kaltamachtiloyan xa mitsmachtiskej ke amo akin tachijchiuak uan xa mokakis ke melauak nejon. Sayoj ke yejuan amo momachtianij tein kinextia ke yekmelauj moajsi se Tachijchiujkej. Xikelnamiki tein kijtoua Proverbios 18:17: “Akin yekinika tajtoua kinextia ke melauj tein kijtoua, sayoj ke okse ejko uan kichiuilia netajtanilmej para kinextis tein melauj”. ¿Toni techmachtia nejin? Ke amo moneki tikneltokas nochi tein mitsiluiaj kaltamachtiloyan, ta moneki kuali timomachtis iTajtol Dios uan toamaixuan. Iniuan xitajto tokniuan akin amo kineltokayaj ke aksa tachijchiuak uan xikintajtani toni kinpaleuij maj kineltokakan ke moajsi se Tachijchiujkej akin techtasojta. * Nejon mitspaleuis xikneltoka ke moajsi aksa akin tachijchiuak.

9. ¿Toni mitsmachtia tein kipanok Melissa?

⁹ Se tokniuj siuat akin monotsa Melissa semi kipaleuij momachtis tein kinextia ke moajsi aksa akin tachijchiuak. * Yejua kijtoua: “Itech kaltamachtiloyan tamachtiaj ke nochi iselti peuak uan kichiuaj kemej nochin kineltokaskej. Yekinika amo niknekia niktemos okachi tamachtilis, porin nimouia maj nikajsini tein kinextiskia ke yekmelauj tein nechmachtiayaj. Sayoj ke nikelnamikik ke Jiova kineki maj kuali tikmatikan keyej tikneltokaj tein timomachtiaj itech Biblia, yejua ika peuak okachi nimomachtia. Nikixtajtoltij amatajkuilol ¿Existe un Creador que se interese por nosotros? uan folletos ¿Es la vida obra de un Creador? uan El origen de la vida. Cinco cuestiones dignas de análisis. Semi nechpaleuij keman nimomachtij nejin amaixmej. Niknemilia keyej amo nikchiuak achto”.

10, 11. ¿Toni mitspaleuis amo xikchiua tein amo kuali tein tiknejneki? (1 Tesalonicenses 4:3, 4).

¹⁰ Amo xikchiua tein amo kuali tein tiknejneki. Keman aksa telpoch oso ichpoch,  xa okachi kinejneki motekas iuan aksa. Xa oksekin mitschikaujkauiskej xiauilnemi uan Satanás kineki xikchiua nejon. ¿Toni mitspaleuis xikixtopeua? (Xikixtajtolti 1 Tesalonicenses 4:3, 4). Keman tiktataujtis Jiova, xikilui keniuj timomachilia uan xiktajtani maj mitspaleui xiyolchikauak (Mat. 6:13). Xikelnamiki ke Jiova kineki mitspaleuis, amo sayoj kichixtok ximopolo (Sal. 103:13, 14). Biblia no uelis mitspaleuis. Melissa, akin achto ika titajtojkej, monekik mochikauas amo itech tanemilis auilnemilis. Yejua kijtoua: “Amo nimosenkauak porin mojmostaj nikixtajtoltiaya Biblia. Nejon nechelnamiktiaya ke nikixtalijka nochipa niktekitilis Jiova uan ke nikneki maj nochipa nouan yeto” (Sal. 119:9).

¹¹ Amo moneki moselti tikyektalis mokuejmoluan. Xikintapoui motatuan tein tikpanotok. Maski tipinauas semi moneki xikchiua. Melissa kijtoua: “Niktajtanij Jiova maj nechpaleui maj niyolchikauak uan nikiluij nopaj tein nechpanotoya. Semi niyolseuik, nikmatia ke Jiova kuali nechitaya”.

12. ¿Toni mitspaleuis kuali xitaixpejpena?

¹² Xikaua maj mitspaleui tein Biblia tayolmajxitia. Ijkon kemej panotias xiujmej uelisya moselti titaixpejpenas. Sayoj ke xikelnamiki ke onkakok miak taman tein ayamo tikmati. ¿Toni mitspaleuis amo xikchiua teisa tein uelis kichiuas amo kuali ximouikaok iuan Jiova? (Prov. 22:3). Se tokniuj siuat akin monotsa Kari kielnamiki toni kipaleuij maj kuali taixpejpena. Kiitak ke tokniuan akin kuali kitekitilijtokej Jiova, kuali taixpejpenaj uan amo moneki maj kinnauatijtokan sejse taman tein moneki kichiuaskej. Kari kijtoua: “Monekia nikitas keniuj kiita Jiova teisa uan amo niktemos maj ijkuiliujto nochi tein moneki nikchiuas”. Keman tikixtajtoltis Biblia, ximotajtani: “¿Toni nechmachtia nejin kemej tanemilia Jiova? ¿Nikajsi teisa tein uelis nechpaleuis maj nikchiua tein kuali? ¿Keniuj uelis nechpaleuis komo nikchiua tein nikan kijtoua?” (Sal. 19:7; Is. 48:17, 18). Komo tikixtajtoltia Biblia uan itech titanemilia tein tayolmajxitia, amo ouij mitskisas tikixpejpenas tein kiyolpaktis Jiova. Okachi tikajsikamatis kemej tanemilia uan tikitas ke amo moneki maj ijkuiliujto nochi tein moneki tikchiuas. Nejin kinextis ke okachi kuali timouika iuan Jiova.

13. ¿Keniuj uelis mitspaleuiskej akin kuali iniuan timouika? (Proverbios 13:20).

¹³ Xiktemo timouikas iniuan akin kitasojtaj Jiova. Kemej tikitakej itech párrafo 7, akin kuali iniuan timouika mitspaleuiskej kuali xiktekitili Jiova (xikixtajtolti Proverbios 13:20). Maj tikitakan tein kipanok se tokniuj siuat akin monotsa Sara. Yejua amo semi kiyolpaktiayaok kitekitilis Jiova, sayoj ke panok teisa tein kipaleuij. Sara kijtoua: “Peuak kuali iniuan nimouika akin nechpaleuijkej keman okachi monekia. Se ichpoch uan nejua timosenmachtiayaj amaix Tanejmachtijkej nochi semanas, uan okse ichpoch nechyolchikauak maj nitanankili itech nechikolmej. Tein kichiujkej nechpaleuij maj nikixtaliani nochipa nimomachtis noselti uan niktataujtis Jiova, nejon kichiuak maj okachi kuali nimouikani iuan uan oksepa niyolpakik”.

14. ¿Toni kipaleuij Julien maj peua kuali mouika iniuan oksekin?

¹⁴ ¿Toni mitspaleuis peua kuali ximouika iniuan oksekin? Se tokniuj takat akin itokay Julien akin axkan tayekankej,  kijtoua: “Keman katka nitelpoch nikinajsik akin kuali iniuan nimouikas keman nitanojnotsaya iniuan, yejuan semi yolpakiaj uan nechpaleuijkej maj nikita ke uelis semi teyolpaktis se tanojnotsas. Niknemilij ke ueliskia nimochiuas precursor. Sayoj ke satepan nikitak ke kemej sayoj nimouikaya iniuan akin nouampoyuan, amo nimouikaya iniuan oksekin akin ueliskia semi nechpaleuiskej. Keman niajki Betel, no peuak nimouika iniuan okseki tokniuan. Yejuan nechpaleuijkej maj kuali nikixpejpena tein ika nimoixpetanis, nejon nechpaleuij maj okachi kuali nimouika iuan Jiova”.

15. ¿Toni Pablo kinejmachtij Timoteo? (2 Timoteo 2:20-22).

¹⁵ Komo tikita ke aksa itech nechikol amo mitspaleuis kuali ximouika iuan Jiova, ¿toni uelis tikchiuas? Itech yekinika siglo, tatitanil Pablo kimatia ke itech nechikol amo nochin kichiuayaj tein Cristo tamachtij. Yejua ika kiluij Timoteo maj kuali kinixpejpenani akin iniuan mouikaskia (xikixtajtolti 2 Timoteo 2:20-22). Miak xiujmejya timochikauanij timotokiskej iuan Jiova, yejua ika amo tiknekij maj nion teyi kichiua maj amo kuali timouikakanok iuan (Sal. 26:4).

16. ¿Toni uelis tikixtalis tikchiuas?

¹⁶ Xikixtali tikchiuas tein yekmelauj mitspaleuis. ¿Kemej toni? Tein kichiuas okachi xitakuaujtamati iuan Dios uan okachi xikchiua kemej Cristo (Efes. 3:16). Kemej neskayot xa uelis okachi timomachtis moselti uan tikixtajtoltis Biblia (Sal. 1:2, 3). Oso xa uelis tikixtalis okachi tiktataujtis Jiova uan tikiluis nochi tein tikmachilia. Xa monekis kuali tikixpejpenas tein ika timoixpetania uan okachi kuali tikuis motiempo (Efes. 5:15, 16). Jiova semi yolpaki keman kiita ke semi timochikaua tiktekitilis.

17. ¿Keniuj mitspaleuis komo tikinpaleuia oksekin?

¹⁷ Keman tikinpaleuia oksekin, mitspaleuia okachi kuali ximouika iuan Jiova. Jesús kijtoj: “Okachi se yolpaki keman se kitemaka ke ijkuak temakaj” (Hech. 20:35, TNM). Komo tikui motiempo uan mochikaualis para tikinpaleuis oksekin,  semi tiyolpakis. ¿Toni uelis tikchiuas? Kemej neskayot, uelis tikixtalis tikinpaleuis akin mokokouaj oso akin xiuejkejya. Xa uelis tikchiuas teisa ininchan oso tikinpaleuis maj ueli kitekitiltikan inincelular oso inintableta. Komo titelpoch uan timoauijya, uelis tikixtalis timochiuas titapaleuijkej itech nechikol uan ijkon okachi tikinpaleuis tokniuan (Filip. 2:4). No uelis tiknextis ke tikintasojta akin amo kiixmatij Jiova komo tikinmatiltia tein Biblia tamachtia (Mat. 9:36, 37). Uan komo tiueli, xikixtali timochiuas precursor, titekitis Betel, oso titapaleuis keman mochijchiuaj kalmej kampa titaueyichiuaj.

18. ¿Keniuj mitspaleuis okachi kuali ximouika iuan Jiova komo okachi tiktekitilia?

¹⁸ Komo tikixtalia okachi tiktekitilis Jiova mitspaleuis okachi kuali iuan ximouika. Komo timochiua precursor, uelis tikselis Tamachtilis tein kiseliaj akin kiteixmatiltiaj iTekiuajyo Dios, tias Betel oso titapaleuis kampa mochijchiuaj kalmej kampa titaueyichiuaj. Xikita tein kijtoua se precursora akin monotsa Kaitlyn: “Satepan ke nimoauij, peuak nitanojnotsa iniuan tokniuan takamej uan siuamej akin miak xiujmejya kitekitilijtokej Jiova, nejon semi nechpaleuij maj okachi kuali nimouika iuan. Nikitas tein kichiuayaj nechpaleuij maj nimochikauani okachi kuali nimomachtis Biblia uan maj okachi kuali nitamachti”.

19. ¿Toni tein kuali tikselis komo tiksentoka kuali tiktekitilia Jiova?

¹⁹ Komo tiksentoka kuali tiktekitilia Jiova, yejuatsin semi mitstatiochiuis. Amo tikchiuas teisa tein nenkaj yeski (1 Juan 2:17). Amo titajyouis porin kuali titaixpejpenas, tiyolpakis uan kuali kisas nochi tein tikixtalis (Prov. 16:3). Tein tikchiuas kinyolchikauas okseki tokniuan, telpochmej uan ichpochmej uan akin xiuejkejya (1 Tim. 4:12). Uan tein okachi kuali, tiyolseujtos uan tiyolpakis porin tein tikchiua kiyolpaktia Jiova uan porin kuali iuan timouika (Prov. 23:15, 16).