1, 2. 1) ¿Keniuj netasojtalis mouika iuan takuaujtamatilis? 2) ¿Toni netajtanilmej tiknankilitij?

TOTAJTSIN Jiova motenkaua kintatiochiuis itekitikauan akin amo kikauaj. Nejin se taman kemej kinextia ke techtasojta. Uan tejuan tiktasojtaj porin “Yejuatsin achto techtasojtak” (1 Juan 4:19). Netasojtalis semi mouika iuan takuaujtamatilis. Komo okachi tiktasojtaj Dios, okachi iuan titakuaujtamatiskej uan okachi tikneltokaskej ke kintatiochiuis akin kintasojta (xikonixtajtolti Hebreos 11:6).

² Jiova kineki kintatiochiuis itekitikauan. Nejin se taman tein kiixnextia kemej tamati uan tein kichiua. Komo tiknekij maj totakuaujtamatilis ajsito, moneki senkis tikneltokaskej ke Jiova kintatiochiuis akin kitemouaj ika nochi ininyolo. ¿Keyej tikijtouaj nejon? Porin “kuak titakuautamatij iuan Dios, ijkuakon timoyekmatiltiaj ya ke se tonal tikselijtiue nochi ne ten axkan tikyolikachixtokke”  (Heb. 11:1). Se takuaujtamatis kijtosneki senkis se kineltokas ke Dios kintatiochiuis akin amo kikauaj. ¿Keniuj techpaleuia tikchiaskej maj Dios techtatiochiui satepan? ¿Keniuj Jiova kintatiochiuij itekitikauan ne uejkauj? ¿Keniuj techtatiochiuia axkan? Maj tikitakan.

3. ¿Toni netenkaualis tikajsij itech Malaquías 3:10?

³ Jiova motenkauani ke kintatiochiuis itekitikauan akin amo kikauaj. Yejuatsin motenkaua ke techtatiochiuis komo tikmakaj tein okachi kuali. Jiova techyoleua: “Xinechyejyekokan, ika kualtakayot”. Uan no kijtoua: “Uan nankiitaskej komo amo namechtapouilia iluikak uan niktoyaua namopan se tatiochiualis hasta maj amo onkaok tatasojtilis” (Mal. 3:10). Keman tikseliaj nejin itayoleualis Dios, tiknextiliaj ke timotasojkamatij.

4. ¿Keyej uelis titakuaujtamatiskej itech tein Jesús kijtoj itech Mateo 6:33?

⁴ Jesús motenkauak iniuan imomachtijkauan ke Dios kinmakaskia nochi tein kinpoloskia komo kitayekanaltiayaj iTekiuajyo (xikonixtajtolti Mateo 6:33, TNM). Kiniluij nejon porin kimatia ke Dios nochipa kichiua tein motenkaua (Is. 55:11). Uan tejuan no uelis titakuaujtamatiskej itech nejon. Komo senkis titakuaujtamatij iuan Jiova, yejuatsin kichiuas nejin tein motenkaua: “Amo keman nimitssekokauas uan nion no nimitssenkauas” (Heb. 13:5).  Nejin netenkaualis techpaleuia maj titakuaujtamatikan itech tein Jesús kijtoj itech Mateo 6:33.

5. ¿Keyej techyolchikaua tinochin tein Jesús kinankilij Pedro?

⁵ Tatitanil Pedro kitajtanij Jesús: “Tejuan tikauke ya nochi ten tikpiayaj uan timitstoktiliaj [...]. ¿Uan toni tejuan tikseliske?” (Mat. 19:27). Jesús amo kimelauak Pedro porin kitajtanij nejon, ta kiniluij imomachtijkauan ke Jiova kintatiochiuiskia porin motemakayaj kikauaskej seki taman. Melauak ke satepan tatitanilmej uan okseki tokniuan tekiuajtiskej iuan Jesús ompa iluikak. Sayoj ke Jesús kijtoj ke axkan no onkaskiaj tatiochiualismej: “Se tagat taneltokke komo yejua nechyoltasojtas uan kinkautiyas ya ninchan, uan ikniuan taka, uan ikniuan siuame, uan itajtsin uan inantsin, uan nisiuau, uan nipiluan uan nitaluan ten niaxka [...], yejuan nojonkes kiseliske se makuilpoalpa tatiochiualisme, uan no kiseliske in yek nemilis ten amo keman tamis” (Mat. 19:29). Axkan, tinochin tikajsij itech nechikolmej akin kemej yeskiaj totatuan, tomomauan, tokoneuan uan tokniuan takamej uan siuamej. Nejin tatiochiualismej okachi kipiaj ipatiuj ke tein yeski taman tein tikauaskej porin tiktayekanaltiaj iTekiuajyo Dios.

6. ¿Keniuj techpaleuia tikmatiskej ke Jiova kintatiochiuis akin amo kikauaj?

⁶ Tikmatiskej ke Jiova kintatiochiuis itekitikauan akin amo kikauaj techpaleuia maj titaxikokan keman tikpiaj kuejmolmej. Amo sayoj tikpiaj miak tatiochiualismej axkan, ta satepan no tikchiaj tikseliskej okachi uejueyi tatiochiualismej (1 Tim. 4:8). Techpaleuis maj nochipa tiktakamatikan Jiova komo senkis tikneltokaj ke yejuatsin “kinpaleuis nekes ten kiyoltemoske” (Heb. 11:6).

7. ¿Keyej tikijtouaj ke nechialis tamati kemej se ancla?

⁷ Itech tamachtilis tein Jesús kitemakak itech se tepet, kijtoj: “Ximoyolpaktikan uan ximouelitakan porin se tonal nankiseliske se ueyi ne tetayokolil nepa eluiyaktsinko. Uan ijkon keme namechtauelitaj axkan, no ijkon kintauelitatiualajke nitanauatijkauan de Dios” (Mat. 5:12). Seki itekitikauan Dios kiseliskej se netetayokolil ompa iluikak. Uan oksekin kiseliskej netetayokolil nemiskej nochipaya itech Xochital. Akin kichiaj nejon no tel yolpakij (Sal. 37:11; Luc. 18:30). Nechialis tein tikpiaj “takitskijtok ya tech totalnamikilis, ijkon keme se tepos ancla kitsajtsakuilijtok in barco para ma amo eliuis yetinemi” (Heb. 6:17-20). Ijkon kemej se ancla kipaleuia se barco maj at amo kiuika keman tetsaujkakioui, nechialis techpaleuia maj tikpiakan chikaualis uan maj ueli tikxikokan kuejmolmej.

8. ¿Keniuj nechialis techpaleuia maj tiyolseujtokan?

 ⁸ Nechialis no uelis techpaleuis maj amo semi timotekipachokan. Ijkon kemej se pajti kichiua maj kuali timomachilikan, tein Dios motenkaua kichiuas satepan techyolseuia. No techyolseuia tikmatiskej ke Jiova techyekpias keman tikauiliskej totamamal oso tein techtekipachoua (Sal. 55:22). Uelis tikyekmatiskej ke Jiova “kichiuas kachi ok ne ten tejuan ayamo tiknemiliaj tikontajtaniliske” (Efes. 3:20). Nejin kijtosneki ke Jiova toka kichiuas okachi miak taman ke tein tiktajtaniskej.

9. ¿Toni moneki tikchiuaskej komo tiknekij maj Jiova techtatiochiui?

⁹ Komo tiknekij tikseliskej itatiochiualis Jiova, moneki senkis iuan titakuaujtamatiskej uan tiktakamatiskej. Moisés kiniluij israelitas: “Jiova yekmelauj mitstatiochiuis itech tal tein Jiova moDios mitsmakatok ximoaxkatili kemej netetayokolil, sayoj komo senkis tiktakamati itajtol Jiova moDios uan ika nejmachkayot tiktakamati nochi nejin tanauatil tein nimitsmakatok axkan. Porin Jiova moDios mitstatiochiuis ijkon kemej motenkauak mouan” (Deut. 15:4-6). ¿Senkis tikneltokaj ke Jiova techtatiochiuis komo tiksentokaj tiktakamatij? Onkak miak taman tein techpaleuia maj titakuaujtamatikan ke ijkon kichiuas.

10, 11. ¿Keniuj Jiova kitatiochiuij José?

¹⁰ Biblia moijkuiloj maj techpaleui. Ompa tikixtajtoltiaj keniuj Jiova kintatiochiuij miakej itekitikauan ne uejkauj (Rom. 15:4). Se neskayot yejua José. Yekinika, iikniuan kinamakakej kemej takeual. Satepan, ompa Egipto, inamik iteko kipantij se taman tein amo kichiujka uan yejua ika kitsakkej. ¿Jiova kisenkaujka José? Amo. Biblia kijtoua: “Jiova kisentokak iuan José uan kisentokak kinextilij ueyi netasojtalis”. Uan satepan kijtoua: “Jiova yetoya iuan José uan Jiova kichiujka maj kuali kikisa tein yeski tein kichiuaya” (Gén. 39:21-23). Hasta keman kipanotoya nejon uejueyi ouijkayomej, José amo yolijsiuik uan kichiak maj Jiova kipaleuiani.

¹¹ ¿Keniuj Jiova kitatiochiuij José? Seki xiujmej satepan, Faraón kikixtij kampa tsaktoya. Axkan, José amo katkaok se takeual, ta katkaya ojpatika taixyekankej okachi ueyichiujkej ompa Egipto (Gén. 41:1, 37-43). Yejua uan inamik kipiakej ome konemej. Yekinika ikonetsin kitokaytij Manasés, “porin yejua kijtoj: ‘Dios nechelkaualtij nochi noouijkayouan uan nochi ichan nopopaj’”. Uan ojpatika kitokaytij Efraín, “porin yejua kijtoj: ‘Dios kichiuak maj nimomiakili itech tal kampa nitajyouij’” (Gén. 41:51, 52). Jiova kitatiochiuij José porin amo kikauak. Yejua ika, José uelik kinpaleuij israelitas uan egipcios itech tonalmej keman onkaya mayan. José kimatia ke nochi nejon mochiujtoya porin Jiova kitatiochiuijtoya (Gén. 45:5-9).

12. ¿Toni kipaleuij Jesús maj nochipa kitakamatini Dios?

 ¹² Jesucristo no kitakamatik Jiova maski kipanok miak ouijkayomej uan yejua ika yejuatsin kitatiochiuij. ¿Toni kipaleuij Jesús maj nochipa kitakamatini Jiova? Biblia technankilia: “Yejuatsin kipouak ke amo teyi pinaualis kuak kikuoupampilojke. Ta [...] kipia ueyi yolpakilis” (Heb. 12:2). Senkis tikmatij ke Jesús yolpakik porin kiueyitalij itokay Dios. Jiova kiyolpaktij tein Jesús kichiuak uan no kimakak miak tatiochiualismej. Biblia kijtoua ke Jesús “motalito iyekmakopaka Totajtsin Dios”. Uan no kijtoua ke “Dios kimouiskatokaytij Cristo ika se tokay ten kachi ueyi chiuke inpan nochi oksekin chiuanime” (Filip. 2:9).

13, 14. ¿Keniuj Jiova kiita nochi tein tikchiuaj porin tiknekij tiktekitiliskej?

¹³ Uelis tikyekmatiskej ke Jiova semi kipatiuita nochi tein tikchiuaj porin tiknekij tiktekitiliskej. Yejuatsin techajsikamati keman tiomeyolouaj oso tiknemiliaj ke amo uelis tikchiuaskej teisa. No techiknelia keman timotekipachouaj porin amo tikpiaj tekit oso porin amo tikmatij keniuj tikinixpanoltiskej tochankauan. Uan techajsikamati komo amo ueli tiktekitiliaj kemej achto porin xa amo kuali timomachiliaj oso porin timokokouaj. Uelis senkis titakuaujtamatiskej ke Jiova kipatiuita maj amo tikauakan maski tikpanouaj ouijkayomej (xikonixtajtolti Hebreos 6:10, 11).

¹⁴ Maj no tikelnamikikan ke Jiova yejua ‘Akin kikaki netataujtil’. Uelis tikyekmatiskej ke techkaki keman tiktataujtiaj (Sal. 65:2). “Totajtsin Dios [akin] nachipa techyoliknelijtinemi uan [...] techyoltalijtinemi” techmakas nochi tein techpaleuis maj amo tikauakan. Xa techpaleuis inintechkopa tokniuan (2 Cor. 1:3). Jiova yolpaki keman titeikneliaj uan tikinpaleuiaj oksekin. Biblia kijtoua: “Akin kinextilia kualtakayot akin kipanotok tatasojtilis kitaneujtia Jiova, uan yejuatsin kiixtauilis tein kichiua” (Prov. 19:17; Mat. 6:3, 4). Yejua ika, keman tikinpaleuiaj tokniuan, Jiova kiita kemej yeskia tiktaneujtiaj teisa uan motenkaua ke techtatiochiuis.

15. ¿Toni tatiochiualismej tikonchia tikonselis tejuatsin? (Xikonita taixkopin ipeujyan tamachtilis.)

¹⁵ Tokniuan taixpejpenalmej kichiaj kiseliskej “se kualtsin nemaktil eluiyaktsinko”, se netetayokolil tein Jesús kinmakas (2 Tim. 4:7, 8). Sayoj ke komo amo tikchiaj tinemiskej ompa iluikak, amo kijtosneki ke amo teyi tiktanij. Millones ‘okseki ichkamej’ akin iaxkauan Jesús kichiaj kiseliskej netetayokolil nemiskej nochipaya itech se xochital nikan taltikpak, kampa “yekmelauj yolpakiskej porin kipiaskej ueyi yolseuilis” (Juan 10:16; Sal. 37:11).

16. ¿Keniuj techyolseuia tein kijtoua 1 Juan 3:19, 20?

¹⁶ Kemansa xa tiknemiliskej ke amo semi tiktekitilijtokej Jiova. Oso xa timotajtaniskej ox Jiova kiyolpaktia tein tikchiuaj. Hasta xa tiknemiliskej ke amo technamiki tikseliskej se netetayokolil. Sayoj ke maj amo keman tikelkauakan ke “Dios ojkachi ok ueyi uan ke ne teluililis den toyolo porin Yejuatsin nochi kimati” (xikonixtajtolti 1 Juan 3:19, 20). Komo tiktekitiliaj Jiova porin iuan titakuaujtamatij uan tiktasojtaj, uelis tikyekmatiskej ke yejuatsin techtatiochiuis maski  tiknemiliskej ke tein tikchiuaj amo semi kipia ipatiuj (Mar. 12:41-44).

17. ¿Keniuj Jiova techtatiochiuia axkan?

¹⁷ Jiova no kintatiochiuia itekitikauan axkan, maski nemij itech nejin itamian tonalmej kampa Satanás taixyekantok. ¿Keniuj? Yejuatsin techmaka miak tamachtilis uan yolseuilis. Uan no, techtatiochiuia ika tokniuan akin nemij itech nochi taltikpak akin tikinitaj kemej tochankauan uan techtasojtaj, ijkon kemej Jesús motenkauak (Is. 54:13; Mar. 10:29, 30). Dios no kinmaka ueyi yolseuilis uan yolpakilis akin mochikauaj kitemoskej (Filip. 4:4-7).

18, 19. ¿Keniuj timomachiliaj tiitekitikauan Jiova keman itech titanemiliaj tatiochiualismej tein techmaka?

¹⁸ Se kimoujkaita kemej toTajtsin Jiova kintatiochiuiani itekitikauan itech nochi taltikpak. Kemej neskayot, se tokniuj kayot Alemania akin monotsa Bianca kijtoua: “Amo nikpia tajtolmej tein ika niktasojkamatilis Jiova porin nechpaleuiani ika nokuejmoluan uan porin mojmostaj nouan yetok. Itech nejin taltikpak semi tauejueliujtok uan semi ouijkan. Sayoj ke, kuali nimomachilia niyetos imako Jiova keman iuan nitekiti. Keman nimotemaka nikauas se taman uan ijkon uelis niktekitilis, yejuatsin nechmaka cien tatiochiualismej”.

¹⁹ Paula, se tokniuj kayot Canadá, kipia 70 xiujmej uan amo semi ueli kichiua miak taman porin kipia se ueyi kokolis itech ipanomiyo. Amo semi ueli moolinia, sayoj ke kijtoua ke nejon amo kijtosneki ke amo uelis tanojnotsas. Yejua kijtoua: “Nitanojnotsa ika teléfono uan kampa nikinajsi taltikpakneminij. Tein nechpaleuia maj nimoyolchikaua, nikpia se cuaderno kampa nikijkuiloua tajkuilolmej itech Biblia uan tanemililmej tein moajsij itech toamaixuan, tein kemansa nikixtajtoltia. Niktokaytia ‘Nocuaderno tein nechmakixtia’. Keman se yolkuetaui amo semi uejkaua komo okachi se tanemilia itech tein Jiova motenkaua. Yejuatsin nochipa kinektok techpaleuis, maski tikpanotoskej tein yeski taman”. Uelis yeski ke tein tikpanotokej amo ijkon kemej tein kipanotokej Bianca uan Paula. Sayoj ke xa no itech titanemiliaj miak tatiochiualismej tein Jiova techmakani tejuan uan oksekin. Tinochin tiitekitikauan Dios semi techyolchikaua tiknemiliskej keniuj yejuatsin techtatiochiuia axkan uan keniuj techtatiochiuis satepan.

20. ¿Itech toni uelis titakuaujtamatiskej komo tiksentokaj timochikauaj tiktekitiliskej Jiova nochi tein tiueliskej?

²⁰ Maj amo keman tikelkauakan ke Jiova semi techtatiochiuis keman tiktataujtiskej ika nochi toyolo. Uelis tikyekmatiskej ke tikseliskej “nochi tatiochiualis ten Dios moyektenkauak ya” techmakas komo tikchiuaj “ten Dios kimonekiltia” (Heb. 10:35, 36). Yejua ika, maj tiksentokakan tikchikaujtokan totakuaujtamatilis uan maj timochikauakan tiktekitiliskej Jiova. Komo ijkon tikchiuaj, uelis titakuaujtamatiskej ke yejuatsin techtatiochiuis (xikonixtajtolti Colosenses 3:23, 24, TNM).