ACHTO ke panoskia nejon, nejua nikuelitayaya nikmatis tein yekmelauj tamachtia Biblia. Nomomaj kimakakaj seki amaixmej, uan nejua nikteluelitaya nikinixtajtoltis, okachiok nikitas taixkopimej. Nopopaj amo kinekia maj nomomaj nechtapouiani tein momachtijtoya. Sayoj ke nejua niknekia nikmatis uan nikchiuiliaya netajtanilmej, yejua ika nechmachtiaya keman nopopaj amo yetoya. Ijkon, nikixtalij nimotemaktis iuan Jiova. Nimoauij itech xiuit 1943 keman nikpiaya majtakti xiuit, itech xolal Blackpool (Inglaterra).

Ijkuak, nomomaj uan nejua peuak tisentanojnotsaj. Itech nejon tonalmej ika titanojnotsayaj fonógrafos. Katkaj uejueyi teposmej tein etikej kemej makuil kilo. Xionmonemili keniuj ouij katka maj se okichpiltsin kemej nejua kimamani semej nejon teposmej.

Keman nikpiaya 14 xiujmej, niknekiaya nimochiuas niprecursor. Nomomaj nechiluij ke achto monekia iuan nitajtos tokniuj takalpanojkej. Tokniuj nechyolmajxitij maj nimomachtiani se tekit tein ika ueliskia nimoixpanoltis keman niyeskia niprecursor. Uan yejua nejon nikchiuak. Satepan ke nitekitik ome xiuit, nikiluij okse tokniuj takalpanojkej ke niktelnekia nikchiuas tekit kemej precursor, uan yejua nechiluij: “¡Xikpeualti!”.

 Itech metsti abril xiuit 1949, nomomaj uan nejua tiknamakakej tein tikpiayaj uan seki taman titetayokolijkej, uan timokaltalitoj Middleton, tein moajsia kampa ika xolal Mánchester. Ompa peuak tikchiuaj tekit kemej precursor. Naui metsti satepan, niktemoj se tokniuj akin iuan nitanojnotsaskia. Uan tokniuan akin taixyekanayaj itech sucursal techyoleujkej maj titapaleuitij itech se yankuik nechikol itech xolal Irlam. Nomomaj uan okse tokniuj siuat kichiujtoyaj tekit kemej precursor itech okse nechikol.

Itech yankuik nechikol amo moajsiaj miakej tokniuan takamej akin ueliskiaj kichiuaskej nechikolmej. Yejua ika, techkauilijkej tiomen nejon tekit, maski nejua sayoj nikpiaya 17 xiujmej. Satepan nitapaleuito itech nechikol tein moajsia Buxton kampa monekiaj okachi tanojnotsanij. Nochi nejin nechpaleuij ika tein ualaskia satepan.

Itech xiuit 1951, nitajtanik maj nikseli nemachtil Galaad—Tamachtilis ika Biblia tein kitemakaj iTaixpantijkauan Jiova. Sayoj ke itech metsti diciembre xiuit 1952 nechnotskej maj nipoui iniuan tateuianij. Nitajtanik maj amo nechpouakan porin nejua nitamachtiaya ika Biblia. Sayoj ke tamelauanij amo kinekkej, uan kiixtalijkej maj nechtsakuanij chikuasen metsti. Keman nitsaktoya, nechyoleujkej maj nikseliti tamachtilis tein motemaka Galaad tapoual 22. Nechkixtijkej itech metsti julio xiuit 1953. Tepitsin satepan, niyajki Nueva York itech se barco tein itokay katka Georgic.

Keman niajsik, niyajki ueyi nechikol tein motokaytij “Sociedad del Nuevo Mundo”. Satepan, monekik niajsis South Lansing (Nueva York) kampa motemakaskia tamachtilis. Monekia niyas itech tren uan ompa itech se autobús. Kemej yankuixtok nechkixtijkaj kampa nitsaktoya, amo nikpiaya miak tomin. Yejua ika monekik niktajtanis se taltikpaknenkej akin ompa yaya maj nechpaleuiani ika 25 centavos tein ika se taxtauaya itech autobús.

Tamachtilis tein motemaka Galaad techpaleuij maj ‘timochiutinemikan ijkon kemej cada se tagat’ (1 Cor. 9:22). Paul Bruun, Raymond Leach uan nejua techtitankej maj titapaleuitij Filipinas, sayoj ke monekik timochiaskej miak metsti porin amo niman techmakakej amamej tein ika ueliskia tikalakiskej itech nejon altepet. Satepan tiyajkej itech barco hasta Rotterdam (Países Bajos). Ompa tikpanauijkej mar Mediterráneo, canal Suez uan océano Índico hasta ke tiajsikej Malasia uan satepan Hong Kong. ¡Tiuejkaujkej 47 tonalmej! Tonal 19 metsti noviembre xiuit 1954, tiajsikej Manila (Filipinas).

Ompa monekik tinemiskej kemej ompa nemij, timomatiskej itech se yankuik altepet uan titajtoskej okse tajtol. Yekinika, tieyin titapaleuiayaj itech se nechikol itech xolal Quezón, kampa miakej tajtouayaj inglés. Yejua ika, chikuasen metsti satepan, sayoj tepitsin tajtolmej tiueliaj itech tajtol tagalo. Sayoj ke nejon amo uejkaua mopataskia.

Se tonal itech metsti mayo xiuit 1955, keman timokepkej satepan ke titanojnotsatoj, Raymond uan nejua techejkok seki amamej kampa kijtouaya ke techixtalijkaj kemej takalpanouanij. Nejua sayoj nikpiaya 22 xiujmej. Sayoj ke nejin tekit nechmachtiskia yankuik taman tein nechpaleuiskia maj “nimochiutinemi ijkon keme [...] cada taman se tagat”.

Kemej neskayot, noyekinika tanojnots kemej takalpanojkej nitemakak kalixpan itech se tanamakaloyan tein moajsia itech se xolal. Ompa Filipinas, tanojnotsmej yekmelauj motemakayaj sentaixpan, porin motemakayaj kampa yeski kampa miakej moajsiaj. Keman nitakalpanouaya itech nechikolmej, nitemakaya tanojnotsmej kalixpan kampa tekitiaj tekiuanij, itech tanamakaloyamej, canchas, parques uan miakpa itech ojmej. Se tonal, itech xolal San Pablo, amo uelik nitemakak tanojnots kampa tanamakaj porin tel kioujtoya. Yejua ika nikiniluij tokniuan akin taixyekanayaj itech nechikol ox ueliskia  tikuiskej Kali kampa tiMosentiliaj. Satepan yejuan nechtajtanijkej ox ueliskia kipouaskej kemej se nechikol senteixtenoj maski amo mochiuak kampa miakej moajsiaj.

Keman nitakalpanouaya nimokauaya ininchan tokniuan. Maski amo kipiayaj miak taman, nochipa katka tachipaujkan. Miakpa nikochia talpan itech se petat. Monekia nimopakas kalampa uan nochin ueliskia nechitaskej. Yejua ika amo nimokixtiliaya notilmaj keman nimopakaya. Nochipa niyajtinemia itech autobús. Keman monekia niyas itech talmej tein moajsiaj tatajko ueyiat, niyaya itech barco. Tein melauj, amo keman nikpiani se carro.

Maski amo keman niyajki kampa motamachtiaya tagalo, niuelik nejon tajtol. Niuelik porin nikinkakia tokniuan keman tanojnotsayaj uan itech nechikolmej. Tokniuan kinekiaj nechpaleuiskej maj niuelini, uan niktasojkamatik maj amo yolijsiuinij uan maj ika netasojtalis nechiluianij keman nimopolouaya.

Ijkon kemej panokej xiujmej, monekik nikpatas okseki taman porin nechmakayaj yankuik tekimej. Itech xiuit 1956, tokniuj Nathan Knorr techkalpanoko Filipinas uan moixtalij mochiuas se ueyi nechikol. Nechixtalijkej maj nitajtouani iniuan akin kiteixmatiltiaj tanauatilmej. Amo nikmatia toni monekia nikchiuas, sayoj ke okseki tokniuan nechnextilijkej. Keman ayamo ajsia se xiuit, moixtalij mochiuas okse ueyi nechikol uan nejua nitaixyekanak. Techkalpanoj tokniuj Frederick Franz, akin ualeuaya itech kali kampa kinixyekanaj itaixpantijkauan Jiova, uan tein kichiuak nechmachtij miak taman. Keman  tokniuj Franz kitemakak itanojnots, motalilij se camisa tein kikuij akin nemij Filipinas, tein kiluiaj barong tagalog. Nejin kinyolpaktij tokniuan uan nechmachtij ke monekia nimochikauas ninemis kemej akin ompa nemij.

Keman nechixtalijkej kemej takalpanojkej itech distrito, monekik nikpatas okseki taman. Itech nejon xiujmej nochipa tiktaliayaj película La felicidad de la Sociedad del Nuevo Mundo kampa miakej panouayaj. Kemansa okuiltsitsin techkuejmolouayaj. Tanex kichiuaya maj motokianij uan motsikouayaj itech tepos. Satepan amo ueliaok se kichipauas. Ouij katka se kichiuas nejon nechikolmej, sayoj ke nochi tein timochikauayaj tikchiuaskej amo nenkaj katka porin tikitayaj ke miakej ualayaj uan kiitayaj ke tipouij itech se nechikol tein moajsi itech nochi taltikpak.

Itech seki xolalmej, tiopixkamej católicos kinchikaujkauiayaj tekiuanij maj amo techkauanij maj tikchiuanij uejueyi nechikolmej. Uan no, keman titemakayaj se tanojnots sentaixpan kampa ika moajsia inintiopan, kitsiliniayaj campanas uan ijkon amo akin ueliskia kikakis tanojnots. Maski ijkon, taltikpakneminij uelik kiixmatkej tein melauak uan miakej axkan kitekitiliaj Jiova.

Itech xiuit 1959 nechyoleujkej maj nitapaleuiti itech sucursal ompa Filipinas. Ompa nimomachtij miak taman. Satepan, nechixtalijkej maj nitakalpano itech okseki uejueyi altepemej kemej superintendente de zona. Keman nitakalpanojtoya itech se altepet, nikixmatik tokniuj Janet Dumond, akin tekitia kemej misionera ompa Tailandia. Timotajkuilouilijkej miak tonalmej uan satepan timonamiktijkej. Itech 51 xiujmej tiyolpakinij tiksentekitiliskej Jiova.

Nechyolpaktiani nikinkalpanos tokniuan akin kayomej itech 33 tataman uejueyi altepemej.  Tekimej tein nikpiani nechpaleuianij maj nimochikaua ninemis kemej akin okseko kayomej uan tataman kemej nemij, uan semi niktasojkamati nejon. Keman nitakalpanouani itech nochi nejin altepemej, kuali nikajsikamatini ke Jiova kintasojta nochin taltikpakneminij (Hech. 10:34, 35).

Janet uan nejua tiksentokaj itech sucursal, tein moajsi itech xolal Quezón. Techtelyolpaktia titapaleuiskej itech altepet Filipinas. Keman niejkok, 60 xiujmej achtoya, moajsiaj 20,000 tanojnotsanij. ¡Uan axkan moajsij kemej 200,000! Maski panokya miak xiujmej, monekiok nimochikauas nikpatas tein monekis uan nikchiuas tein Jiova nechiluis. Kemej neskayot, ika miak pakilis tikselijkej tein yankuixtok mopatak itech inechikol Dios.

Timochikauanij tiktojtokaskej itaixyekanalis Jiova, uan nejon techualkuiliani miak yolpakilis. No timochikauanij tikpataskej tein moneki uan ijkon okachi tikinpaleuiskej tokniuan. Komo Jiova techkaua, tikixtalianij ‘timochiutinemiskej ijkon kemej cada se tagat’.