1, 2. 1) ¿Keyej moteltekipachouaj seki itekitikauan Dios? (Xikonita taixkopin ipeujyan tamachtilis.) 2) ¿Toni tikitaskej itech nejin tamachtilis?

AXKAN, Satanás techyoualojtinemi “keme yeskia se kuoutajtekuani ten kitemotinemi akoni kixixikos” (1 Ped. 5:8; Apoc. 12:17). Yejua ika, tinochin, hasta tiitekitikauan Dios, miak taman semi techtekipachoua uan techkuasioujtia. Itekitikauan Dios ne uejkauj no kemansa moteltekipachojkej. Kemej neskayot, Biblia kijtoua ke tekiuaj David kemansa moteltekipachouaya (Sal. 55:2). Uan tatitanil Pablo kijtoj: “Mosta mosta nikyolmachilijtinemi in tekit de keniu nikinpaleuijtiyas nochi in tokniuan” (2 Cor. 11:28). Sayoj ke ¿toni uelis tikchiuaskej komo tikmachiliaj ke timoteltekipachouaj?

² ToTajtsin kinyolseuij itekitikauan ne uejkauj akin moteltekipachojtoyaj. Uan no kineki techyolseuis axkan. Biblia techyoleua maj tikauilikan Dios nochi tein  techtekipachoua, porin yejuatsin toka motekipachoua (1 Ped. 5:7). Itech nejin tamachtilis tikitaskej naui taman tein uelis techpaleuis maj amo semi timotekipachokanok. Yekinika, maj tikchiuakan netataujtil. Ojpatika, maj tikixtajtoltikan iTajtol Dios uan maj itech titanemilikan. Expatika, maj tikauakan maj iyektikatsin espíritu Jiova techpaleui. Uan naujpatika, maj tiktapouikan aksa akin itech titakuaujtamatij keniuj timomachiliaj. Keman tikitaskej nejin naui taman, maj titanemilikan itech tein moneki okachi kuali tikchiuaskej.

3. ¿Keniuj uelis tikauiliskej Jiova totamamal?

³ Yekinika taman tein uelis tikchiuaskej yejua maj tikauilikan Jiova totamamal keman tiktataujtiskej ika nochi toyolo. Keman teisa techtekipachoua, toTajtsin kineki maj tiktapouikan keniuj senkis timomachiliaj. David kitataujtij Jiova: “Dios, xikaki nonetataujtil”. Uan ompa kijtoj: “Xikauili Jiova motamamal, uan yejuatsin mitspaleuis” (Sal. 55:1, 22). Komo tikchiujkejya nochi tein tapaleuis maj moyektali kuejmol, maj amo ika timotekipachojtokanok. Semi techpaleuis komo tiktataujtiaj Jiova ika nochi toyolo. Sayoj ke ¿keniuj uelis techpaleuis netataujtil maj amo timoteltekipachokan? (Sal. 94:18, 19.)

4. ¿Keyej motelneki maj tikchiuakan netataujtil keman timoteltekipachouaj?

⁴ (Xikonixtajtolti Filipenses 4:6, 7.) ¿Keniuj technankilia Jiova keman miakpa tiktataujtiaj ika nochi toyolo? Yejuatsin uelis techpaleuis maj tiyolseujtokan uan maj amo tiknemilikan nion maj tikmachilikan tein techijtakoua. Keman tiktataujtiaj porin teisa techtekipachoua oso techmoujtia, Dios techmaka okachi ueyi yolseuilis tein uelis tikpiaskej. Miakej tokniuan kimachilianij nejin yolseuilis, uan tejuan no uelis tikmachiliskej. Yolseuilis tein Dios temaka uelis techpaleuis maj tikxikokan tein yeski kuejmol. Jiova techiluia maj amo timouikan, porin yejuatsin motenkaujtok ke touan yetos uan techyolchikauas uan techpaleuis (Is. 41:10). Uelis senkis titakuaujtamatiskej itech nejin tein motenkaujtok.

5. ¿Keniuj uelis techpaleuis iTajtol Dios maj tiyolseuikan?

⁵ Ojpatika taman kemej uelis tiyolseuiskej yejua keman tikixtajtoltiaj Biblia uan itech titanemiliaj. ¿Keyej motelneki? Porin yejua iTajtol Dios uan ika tamatilis techmaka tayolmajxitilismej tein tel tapaleuiaj. Yejua ika, nochipa keman timoteltekipachoskej, maj itech titanemilikan itanemililuan Dios uan keniuj uelis techpaleuis  tein techyolmajxitia. Ijkon uelis tikelkauaskej tein techtekipachoua, tiyolseuiskej oso hasta amo tikpiaskej netekipacholis. Jiova kijtoua ke komo tiknekij timoyolchikauaskej uan amo timouiskej moneki tikixtajtoltiskej iTajtol (Jos. 1:7-9).

6. ¿Keniuj axkan techpaleuiaj itajtoluan Jesús?

⁶ Itech iTajtol Dios no tikitaj keniuj Jesús kinnojnotsaya oksekin. Taltikpakneminij kiteluelitayaj kikakiskej porin kinyolchikauaya uan kinyolseuiaya ika itajtoluan, okachiok akin yolkuetaujtoyaj uan akin tel tayokoxtoyaj (xikonixtajtolti Mateo 11:28-30). Yejua semi kitekipachouaya keniuj momachiliayaj oksekin (Mar. 6:30-32). Kinpaleuij itatitaniluan, uan no techpaleuis tejuan. Melauak ke yejuan yetoyaj iuan uan tejuan amo. Sayoj ke amo moneki iuan tiyetoskej uan ijkon tikseliskej nepaleuil tein yejua motenkauak techmakas. Yejua toTekiuaj uan kisentoka technextilia netasojtalis maski moajsi ne iluikak. Yejua ika, keman teisa techteltekipachos maj tikyekmatikan ke Jesús touan yetos uan techpaleuis keman monekis. Yejua techiluia ke uelis tikchiaskej tein kuali satepan uan techyolchikaua, uan nejon techpaleuia maj amo timoteltekipachokan (Heb. 2:17, 18; 4:16).

7. ¿Keniuj techpaleuia iyektikatsin espíritu Dios?

⁷ Maj tikitakan expatika taman tein techpaleuia maj amo timoteltekipachokan. Jesús motenkauak ke toTajtsin techmakas iespíritu komo tiktajtaniaj (Luc. 11:10-13). ToDios akin nochi ueli kichiua techpaleuia maj tiknextikan kualtsitsin kualneskayomej tein yejuatsin kipia ika iyektikatsin espíritu, chikaualis tein ika kichiua uejueyi taman (Col. 3:10). Itech Biblia moixmatij nejin kualneskayomej kemej itakilo espíritu (xikonixtajtolti Gálatas 5:22, 23). Keman tiknextiaj nejon kualneskayomej, okachi kuali timouikaj iniuan oksekin uan amo tikchiuaj tein uelis techtekipachos. Maj tikitakan seki taman kemej itakilo espíritu techpaleuia.

8-12. ¿Keniuj uelis techpaleuis itakilo espíritu?

⁸ “Ma se tetasojtatinemi; uan ma se yolpaktinemi; uan ma se yolseukanentinemi.” Keman tikinpoujkaitaj oksekin uan tikintasojtaj, okachi kuali timomachiliaj. ¿Keyej? Porin keman tiknextiaj nejon kualneskayomej, amo tikchiuaj miak taman tein ika uelis tikualaniskej, tikmachiliskej ke amo teyi ueli tikchiuaj uan tikuasiouiskej. Ijkon uelis okachi kuali timouikaskej iniuan oksekin (Rom. 12:10).

⁹ “Ma se kipixtinemi paciencia; uan ma se teyoliknelijtinemi; uan ma se kichiutinemi ten kuali.” Biblia kijtoua: “Ximopaleuikan ika tetasojtalis se uan okse.  Uan xikiniknelikan se uan okse. Uan no ximotapojpoluikan” (Efes. 4:32). Keman tiktakamatij nejin tayolmajxitilis, kuali timouikaj iniuan oksekin uan amo tikchiuaj tein uelis techtekipachos. No okachi amo ouij techkisas tikyektaliskej kuejmolmej tein uelis tikpiaskej porin titajtakouanij.

¹⁰ “Ma se takuautamakatagat.” Itech nejin tonalmej, miakpa ika timotekipachouaj tomin uan okseki taman (Prov. 18:11). ¿Toni techpaleuis maj amo ika timotekipachokan? Maj tiktakamatikan tein Pablo tayolmajxitij: “Ximoyolpaktijtinemikan sayo ika ten nankipiaj ya”. Komo senkis titakuaujtamatij iuan Jiova, tikmatiskej ke yejuatsin techmakas tein techpoloua. Yejuatsin motenkaua: “Amo keman nimitssekokauas uan nion no nimitssenkauas”. Yejua ika no ueli tikijtouaj tein Pablo kijtoj: “[Jiova] nechpaleuijtinemi. lka ya nojon amo nimoyolmoutis tenika tensa uelis nechchiuilis in tagayot” (Heb. 13:5, 6).

¹¹ “Ma se yolyemankanemi; uan ma se moyekantinemi ika nejmach.” ¿Keniuj techpaleuiaj nejin kualneskayomej? Techpaleuiaj maj amo tikchiuakan oso maj tikijtokan teisa tein uelis kichiuas maj timoteltekipachokan. Uan no, amo tiyeskij titauelmej uan amo tikintsatsajtsiliskej nion tikinuijuikaltiskej oksekin (Efes. 4:31).

¹² Moneki tiyeskij tiyolyemankej porin nejon techpaleuis maj timotemaktikan “imako Dios porin Yejuatsin nochi kipixtok chikaualis” uan maj tikauilikan nochi tein techtekipachoua (1 Ped. 5:6, 7). Komo tiyolyemankej, Jiova techyekpias. Keman tikajsikamatij ke seki taman ueli tikchiuaj uan okseki taman amo, tiknextiaj ke amo totech titakuaujtamatij. Nejon techpaleuia maj amo semi timotekipachokan porin titakuaujtamatij iuan Jiova (Miq. 6:8).

13. ¿Toni kijtosnekia Jesús keman tayolmajxitij: “Amo ximoyolkuejmolokan”?

¹³ Jesús kitemakak ika tamatilis nejin tayolmajxitilis: “Amo ximoyolkuejmolokan [oso ximotekipachokan]” (xikonixtajtolti Mateo 6:34). ¿Toni kijtosnekia Jesús? Amo kijtosnekia ke itekitikauan  Dios amo motekipachoskiaj. Tikitakejya ke tekiuaj David uan tatitanil Pablo kemansa motekipachojkej. Jesús kinekia maj imomachtijkauan kiajsikamatinij ke amo teyi ika tepaleuia maj se moteltekipacho. Mojmostaj tikpiaskej kuejmolmej, yejua ika maj amo okachi timotekipachokan keman titanemiliaj itech kuejmolmej tein tikpiakej achto oso tein uelis tikpiaskej satepan. ¿Keniuj uelis techpaleuis itayolmajxitilis Jesús?

14. Ijkon kemej David, ¿toni techpaleuis maj amo timoteltekipachokan?

¹⁴ Kemansa, techtekipachoua tein panokya. Xa totanemilil techkuejmolouaok ika tein tikchiujkej achto, maski miak xiujmejya panok. Kemansa, tekiuaj David no ijkon momachiliaya keman tanemiliaya itech tajtakolmej tein kichiujka. Yejua kijtoj ke semi motekipachojtoya uan yolkuetaujtoya (Sal. 38:3, 4, 8, 18). Sayoj ke kichiuak tein okachi kuali, uan tejuan no ijkon uelis tikchiuaskej. Takuaujtamatik ke Jiova kiikneliskia uan kitapojpoluiskia. Yejua semi yolpakik keman kimatik ke Jiova kitapojpoluijkaya (xikonixtajtolti Salmo 32:1-3, 5).

15. 1) ¿Toni okse taman techmachtia tein kichiuak David? 2) ¿Toni uelis tikchiuaskej tein techpaleuis maj amo semi timotekipachokanok? (Xikonita kampa kijtoua “ Tein tapaleuia maj amo semi se motekipacho”).

¹⁵ Kemansa, xa techtekipachos tein tikpanotokej. Kemej neskayot, keman David kijkuiloj Salmo 55, mouia porin kinekiaj kimiktiskej (Sal. 55:2-5). Sayoj ke amo kikauak maj netekipacholis kichiuani maj amo takuaujtamatiniok iuan Jiova. David kitataujtij maj kipaleuiani. Sayoj ke no kimatia ke monekia kichiuas teisa tein ika kiyektalis ikuejmoluan (2 Sam. 15:30-34). Tein kichiuak techmachtia okse taman. Maj amo timoteltekipachokan, ta okachi kuali maj tikchiuakan tein tiueliskej tein ika tikyektaliskej kuejmol uan maj titakuaujtamatikan ke Jiova techpaleuis.

16. ¿Keniuj kichikaua totakuaujtamatilis tein kijtosneki itokay Dios?

¹⁶ Uan kemansa, xa techtekipachos tein uelis techpanos satepan. Sayoj ke moneki amo ika timotekipachoskej tein ayamo panoua. Tein melauj, miak taman tein tiknemiliayaj ke tel amo kuali yeskia, amo yekmelauj ijkon mochiuak. Uan no, maj tikelnamikikan ke Jiova ueli kipata  tein yeski taman. Tein kijtosneki itokay kichikaua totakuaujtamatilis. Tikajsikamatij ke itokay Dios kijtosneki “Yejuatsin Kichiua maj Mochiua” (Éx. 3:14). Nejin kinextia ke yejuatsin kichiuas nochi tein motenkaujtok techmakas. Yejua ika maj amo timotekipachokan ika tein panos satepan. Uelis titakuaujtamatiskej ke Dios kintatiochiuis itekitikauan akin amo kikauaj uan kinpaleuis maj amo kinteltekipacho kuejmolmej tein panokejya, tein kipanotokej, uan tein uelis panos satepan.

17, 18. Keman timotekipachojtokej, ¿keniuj uelis techpaleuis keman iuan titajtoskej akin itech titakuaujtamatij?

¹⁷ Naujpatika taman tein techpaleuis maj amo timoteltekipachokan yejua maj tiktapouikan aksa akin itech titakuaujtamatij tein techtekipachoua uan keniuj timomachiliaj. Xa tonamik, se totasojikniuj oso se tayekankej techpaleuis maj tikajsikamatikan tein tikpanotokej. Biblia kijtoua: “Netekipacholis itech iyolo se takat kitajyouiltia, sayoj ke se kuali tajtol kiyolpaktia” (Prov. 12:25). Uan no kijtoua ke teisa amo kuali kisa komo amo tikinixejekoltiaj oksekin (Prov. 15:22).

¹⁸ Nechikolmej no uelis techpaleuiskej maj amo timoteltekipachokan. Ompa iniuan timosentiliaj tokniuan, akin toka motekipachouaj uan kinekij techyolchikauaskej (Heb. 10:24, 25). Keman timosenyolchikauaj techpaleuia maj tikpiakan chikaualis uan maj ueli tikixnamikikan tein yeski kuejmol (Rom. 1:12).

19. ¿Keyej senkis tikonmati ke komo kuali tionmouika iuan Dios mitsonpaleuis keman tikonpanos ouijkayomej?

¹⁹ Se tayekankej itech se nechikol ompa Canadá kiitak ke motelneki maj tikauilikan Jiova nochi tein techtekipachoua. Nejin tokniuj se tamachtijkej, uan nejon tekit semi kisioujtia. Uan no, kipia se kokolis tein kichiua maj moteltekipacho. ¿Toni kipaleuia maj amo mosenkaua? Mochikaua okachi kuali mouikas iuan Jiova. No kipaleuia keman kitapouia inamik keniuj momachilia uan keman itasojikniuan kipaleuiaj. Okseki tayekananij uan tokniuj takalpanojkej kipaleuianij maj kiita tein kipanoua kemej Jiova kiita. Uan no, se tapajtijkej kipaleuij maj kiajsikamati ikokolis. Tokniuj kiitak ke monekia kipatas seki taman tein kipaleuiskia maj okachi moseui uan maj kichikaua inakayo. Yolik peuak amo semi motekipachouaok. Axkan kikaua imako Jiova tein amo ueli kichiua.

20. 1) ¿Keniuj uelis tikauiliskej Jiova tein techtekipachoua? 2) ¿Toni tikitaskej itech okse tamachtilis?

²⁰ Itech nejin tamachtilis tikitakej ke motelneki maj tikauilikan Jiova tein techtekipachoua ika netataujtil, keman tikixtajtoltiaj iTajtol uan keman itech titanemiliaj. No motelneki maj tikauakan maj iyektikatsin espíritu Dios techpaleui, maj titajtokan iuan aksa akin itech titakuaujtamatij uan maj tiyakan nechikolmej. Itech okse tamachtilis tikitaskej keniuj techpaleuia keman Jiova motenkaua techtatiochiuis (Heb. 11:6).