¿Tikonixtajtoltiani ika nejmachkayot amaixmej Tanejmachtijkej tein yankuixtok kiskej? Xikonita ox ueli tikonnankilia nejin netajtanilmej:

¿Keyej tetatmej akin mokaltalitoj itech okse ueyi altepet moneki kiitaskej toni tajtol kiajsikamatij ininkoneuan uan ijkon uelis kinpaleuiskej maj kuali mouikakan iuan Jiova?

Konemej xa ueliskej tajtol tein mokui itech altepet kampa mokaltalitoj keman yetoskej kaltamachtiloyan oso iniuan oksekin. Komo uelij okachi tajtolmej uelis kinpaleuis. Tetatmej moneki kiixpejpenaskej ox mosentiliskej itech se nechikol kampa motajtoua tajtol tein mokui kampa mokaltalitoj oso se itech inintajtol. Moneki kiitaskej kani okachi kuali kiajsikamatij tamachtilis ininkoneuan uan kani okachi niman peuas kitekitiliskej Jiova. Moneki amo kitayekanaltiskej tein yejuan kinekij, ta tein kinpoloua ininkoneuan (w17.05, páginas 10 hasta 12).

Jesús kitajtanij Pedro: “¿Kachi tinechyoltasojta uan ke nijinkes[?]”. ¿Toni kijtosnekia keman kijtoj “nijinkes”? (Juan 21:15.)

Nesi ke Jesús ika tajtojtoya amichimej tein ompa yetoyaj oso tekit tein Pedro kipiaya kemej amichkitskijkej. Satepan ke kimiktijkej Jesús, Pedro oksepa peuak amichkitskia. Itekitikauan Dios moneki kiitaskej ox kitayekanaltiaj tekit (w17.05, páginas 21 hasta 23).

¿Keyej Abrahán kiluij inamik maj kijtouani ke katka iikniuj? (Gén. 12:10-13.)

Tein melauj, Sara katka itakpaikniuj Abrahán. Komo Sara kijtoskia ke katka inamik, Abrahán ueliskia kimiktiskej, uan amo ueliskia kipias konetsin tein Dios motenkaujka kimakas (wp17.3, página 14 uan 15).

¿Keniuj Elias Hutter kinpaleuij imomachtijkauan maj uelinij hebreo?

Kinekia maj imomachtijkauan amo kinouijmakani kiajsikamatiskej kani ualeuayaj tajtolmej itech tajtol hebreo uan maj niman kiitanij toni mopataya tein youi achto uan satepan itech se tajtol. Yejua ika, keman kiamakixtij, tajtolmej kitalij ika letras tein okachi tiltikej, uan tein youi achto uan satepan itech se tajtol, ika letras tein amo tiltikej. Traducción del Nuevo Mundo de las Santas Escrituras (con referencias) no kikui nejon taman itech notas tein kipia tatsintan (wp17.4, página 11 uan 12).

¿Toni moneki kiitas se tokniuj keman kiixejekos ox moneki kipias se tepos tein ika mopaleuis?

Jiova semi kipatiuita ininnemilis taltikpakneminij. Jesús amo kiniluij imomachtijkauan maj kiuikanij se espada tein ika mopaleuiskiaj (Luc. 22:36, 38). Itekitikauan Dios kichiuaj ininespadas kemej “tameualonimej”. Tonemilis okachi kipia ipatiuj ke okseki taman. Moneki amo tikchiuaskej tein kikuejmolos inintanemilil oksekin uan timochikauaskej tikauaskej se kuali neskayot (2 Cor. 4:2) (w17.07, página 31 uan 32).

¿Keyej tataman tein kijkuilojkej Mateo uan Lucas keman ika tajtouaj ijkuak Jesús okichpilok katka?

Mateo okachi ika tajtoua José. Kemej neskayot, kijtoua toni kichiuak keman kimatik ke María kokoxkayetoya uan keman se ángel kiluij maj cholouani Egipto uan satepan maj mokepani. Lucas okachi ika tajtoua María. Kemej neskayot, kijtoua toni panok keman kiitato Elisabet uan toni kichiuak keman Jesús mokauak itech templo (w17.08, página 32).

¿Toni ueliskia kichiuas maj ixpoliui Biblia ijkon kemej panouaj xiujmej?

Tein kijtosnekij tajtolmej tein mokuikej itech Biblia mopataj ijkon kemej panouaj tonalmej. Tataman tekiuajyomej kichiuanij maj mopata tajtol tein kikuij miakej. Taixyekananij kitemouanij kitsakuiliskej maj motajtolkepa Biblia (w17.09, páginas 19 hasta 21).

¿Tikpiaj se ángel akin techyekpia?

Amo. Jesús kijtoj ke ángeles akin kinyekpiaj imomachtijkauan “yetokke nepa ixpantsinko” Dios (Mat. 18:10). Sayoj ke nejon amo kijtosneki ke sejse taltikpaknenkej kipia se ángel akin kiyekpixtinemi, ta ke ángeles ininka motekipachouaj nochin itekitikauan Dios (wp17.5, página 5).

¿Katiyejua netasojtalis okachi moneki se kinextis?

Netasojtalis agápe. Nejin netasojtalis moyekana ika tein kuali. Amo sayoj tein se kimachilia, ta okachi se kinextia ika tein se kichiua tein ika se kinpaleuia oksekin uan amo se kichia taxtauil (w17.10, página 7).