1, 2. ¿Keyej seki tetatmej motekipachouaj keman ininkoneuan kinekij motemaktiskej uan moauiskej?

NOCHI xiujmej, tel miakej akin momachtiaj Biblia motemaktiaj iuan Jiova uan moauiaj. Miakej telpochmejok akin inintatuan itaixpantijkauan Jiova uan kiixpejpenkej se tel kuali nemilis (Sal. 1:1-3). Tokniuan tetatmej kichiaj maj ejko tonal keman ininkoneuan moauiskej (no xikonita 3 Juan 4).

² Sayoj ke nejin tetatmej xa kintekipachos seki taman. Xa kinixmatij seki telpochmej akin moauijkej sayoj ke satepan peuak omeyolouaj ox yekmelauj kinpaleuiaya kitakamatiskej itanauatiluan Dios. Sekin hasta kikaujkej Jiova. Yejua ika, tetatmej xa mouij maj ininkoneuan kipatakan inintanemilil satepan ke moauiskej uan maj amo kipatiuitakanok tamachtilis tein melauak. Yejua nejon tein panok itech nechikol tein moajsia Éfeso itech yekinika siglo. Jesús kijtoj: “Amo tinechtasojtinemi ok, keme ne achtopa” (Apoc. 2:4). ¿Keniuj tetatmej uelis kinpaleuiskej ininkoneuan maj amo kinpano nejin uan maj  kiselikan nemakixtilis? (1 Ped. 2:2.) Maj tikitakan ineskayo Timoteo.

3. 1) ¿Kemanian Timoteo mochiuak itatojtokakauj Cristo, uan toni kichiuak ika tein momachtij? 2) ¿Toni eyi taman Pablo kiluij Timoteo?

³ Timoteo xa kiixmatik itamachtilisuan Jesús itech xiuit 47, keman Pablo yekinika takalpanoj itech xolal Listra. Maski ijkuak xa okichpilok katka, kichiuak tein momachtij, uan ome xiuit satepan peuak tanojnotstinemi iuan Pablo. Kemej dieciséis xiujmej satepan, Pablo kijkuilouilij: “Xiktakamatiu nochi tanextililisme ten timomachtij ya uan ten tikyekneltokak ya, porin tejua kuali tikmatok ya akoni mitsnextilijke nijin tajtolme. Uan tejua ipa kuali tikmatok ke kuak tipili ok tikatka, ijkuakon peuke mitsnextiliayaj no nijin Tajkuilolamatsin de Dios [Escrituras Hebreas]. Uan sayo nijin Tajtoltsin de Dios uelis mitsnextilis uan mitsyekantiyas para tikajsis ne nemakixtilis, komo tejua tikpixtinemi se ajsikatakuautamatilis iuan Cristo Jesús” (2 Tim. 3:14, 15). Maj tikitakan nejin eyi taman: 1)“mitsnextiliayaj no nijin Tajkuilolamatsin”, 2)“ten tikyekneltokak ya” uan 3)“mitsyekantiyas para tikajsis ne nemakixtilis, komo tejua tikpixtinemi se ajsikatakuautamatilis iuan Cristo Jesús”.

4. ¿Toni nepaleuilmej ika tikonmachtiani mokoneuan akin nojnelmej? (Xikonita taixkopin ipeujyan tamachtilis.)

⁴ Tokniuan tetatmej kinekij maj ininkoneuan kiixmatikan “Tajkuilolamatsin de Dios”, kampa axkan pouij Escrituras Hebreas uan Escrituras Griegas Cristianas. Hasta konemej akin semi nojnelmejok, ijkon kemej ueliskej, uelis momachtiskej seki taman tein kichiujkej taltikpakneminij akin ininka tajtoua Biblia uan tein mochiuak ne uejkauj. Itech inechikol Jiova mochijchiuanij tataman libros, folletos uan videos itech miak tataman tajtolmej tein tetatmej uelis ika kinpaleuiskej ininkoneuan. ¿Katiyejua onkak itech motajtol? Maj tikelnamikikan ke motelneki se kiixmatis tein tamachtia iTajtol Dios uan ijkon uelis kuali se mouikas iuan Jiova.

5. 1) ¿Toni kineltokak Timoteo? 2) ¿Keyej uelis tikijtoskej ke Timoteo kineltokaya ke Jesús katka Mesías?

⁵ Amo sayoj moneki tikintapouiskej tokoneuan tein kichiujkej akin ininka motajtoua itech Biblia uan tein mochiuak ne uejkauj. Timoteo no ‘kiyekneltokak’ tein momachtij. Yejua peuak kiixmati Escrituras Hebreas ijkuak nojnelok katka. Sayoj ke, xiujmej satepan, tein kiitak kichiuak maj kineltoka ke Jesús katka Mesías, yejua ika moauij uan tanojnotstinemik iuan Pablo.

6. ¿Keniuj se tepopaj uelis kipaleuis ikonetsin maj kineltoka tein momachtia itech Biblia?

⁶ ¿Keniuj uelis tikonpaleuis mokonetsin maj kineltoka tein momachtia, ijkon kemej Timoteo? Yekinika, amo xionyolijsiui. Mokonetsin amo niman kineltokas tein momachtia, uan amo no kineltokas sayoj porin tejuatsin tikonneltoka ke melauak. Sejse konetsin moneki taixejekos uan tanemilis uan ijkon kineltokas tein tamachtia Biblia (xikonixtajtolti 1 Tesalonicenses 5:21). Tetatmej uelis kintelpaleuiskej ininkoneuan maj kichikauakan inintakuaujtamatilis, okachiok keman konemej kinchiuiliskej netajtanilmej. Maj tikitakan se neskayot.

7, 8. 1) ¿Keniuj kinextia se tepopaj ke amo yolijsiui keman kimachtia isiuapil? 2) ¿Kemanian tejuatsin no moneki tikonnextis ke amo tionyolijsiui keman tikonmachtia mokoneuan?

⁷ Thomas kipia se isiuapil akin kipia 11  xiujmej. Yejua kijtoua ke kemansa isiuapil kichiuilia nejin taman netajtanilmej: “¿Amo tiknemilia ke xa Jiova kichiuak maj nochi taman nemilis iselti peua uan ijkon kichijchiuak nochi tein yoltok?” oso “¿Keyej amo tikinixtaliaj tekiuanij uan tikchiuaj okseki taman tein ika titapaleuiskej itech toxolal?”. Kemansa, Thomas moneki motsakuilis uan amo kiluis toni moneki kineltokas. Kimati ke okachi amo ouij se kitaneltoktis aksa komo se kinextilia keyej moijtoua nejon ke komo sayoj se kiluia toni melauak.

⁸ Nochin itatojtokakauan Cristo moneki amo yolijsiuiskej. Uan Thomas kimati ke moneki amo yolijsiuis keman kimachtis isiuapil (Col. 3:12). Kiajsikamati ke moneki tiempo uan miakpa iuan tajtos. Moneki kipaleuis maj tanemili uan maj iselti kiita ke tein momachtia itech Biblia yejua tein melauak. Thomas kijtoua: “Nonamik uan nejua tiknekij tikmatiskej ox tosiuapil yekmelauj kineltoka tein momachtijtok uan ox kiita ke taixejekol, okachiok itech seki taman tein motelneki. Uan semi kuali maj kichiua netajtanilmej. Tein melauj nechtekipachoskia maj kineltoka se taman uan maj amo teyi tajtani”.

9. ¿Keniuj tetatmej uelis kinmachtiskej ininkoneuan tein tamachtia Biblia?

⁹ Keman tetatmej amo yolijsiuij, konemej yolik kiajsikamattiyouij “keniu moueyisoutok [...,] keniu moueyiltijtok uan de keniu uejkatan ajsis uan de keniu uejkapan ajsis” takuaujtamatilis (Efes. 3:18). Moneki kinmachtiskej ijkon kemej xiujmej tein kipiaskej uan tein uelis kiajsikamatiskej. Komo konemej senkis kineltokaj tein momachtiaj, okachi uelis kinmelauiliskej akin iniuan momachtiaj uan oksekin tein kineltokaj (1 Ped. 3:15). Kemej neskayot, ¿ueli kimelauaj ika Biblia tein panoua keman timomikiliaj? ¿Kiitaj ke taixejekol? * Moita ke motelneki amo se yolijsiuis keman se kinmachtis se ikoneuan, sayoj ke amo nenkaj yeski (Deut. 6:6, 7).

10. ¿Toni motelneki maj kichiuakan tetatmej?

¹⁰ Sayoj ke, komo tetatmej kinekij maj ininkoneuan kineltokakan ke melauak tein momachtiaj, no motelneki maj kinkauilikan se kuali neskayot. Stephanie, akin kipia eyi siuapipil, kijtoua: “Keman nojnelmejok katkaj hasta axkan, nimotajtaniani: ‘¿Nikinmelauilia keyej nejua nikneltoka ke Jiova nemi uan ke kichiua tein melauak uan tetasojta? ¿Kiitaj ke yekmelauj nejua niktasojta?’. Amo ueli nikchia maj yejuan kineltokakan komo nejua amo nikneltoka”.

11, 12. ¿Toni tamatilis, uan keyej ueli tikijtouaj ke amo se kinextia sayoj porin se kipia miak xiujmejya?

¹¹ Kemej tikitakejya, Timoteo 1) kiixmatia iTajtol Dios uan 2) kineltokaya tein kijtoua. Sayoj ke ¿toni kijtosnekia Pablo keman kiluij ke iTajtol Dios ueliskia kimakas tamatilis tein kipaleuis maj kiajsi nemakixtilis?

¹² Itech amatajkuilol Perspicacia, volumen 2, momelaua ke itech Biblia tamatilis kijtosneki “maj ueli kuali se kitekitilti taixmatilis uan taajsikamatilis keman se kiyektalis kuejmolmej, se kichiuas maj amo se kipano ouijkayomej, se kichiuas tein se kiixtalia  oso se kinyolchikauas oksekin maj no ijkon kichiuakan. Semi taman ke mijmikiloyot”. Biblia kijtoua ke “mijmikiloyot moajsi itech iyolo okichpil” (Prov. 22:15). Sayoj ke, ika tamatilis, tein semi taman ke mijmikiloyot, se kinextia ke se yekyolmajsitok. Sayoj ke se taltikpaknenkej amo kinextia ke yekyolmajsitok sayoj porin kipia miak xiujmejya, ta porin kimoujkatoka Jiova uan kineki kitakamatis itanauatiluan (xikonixtajtolti Salmo 111:10).

13. ¿Keniuj telpoch uelis kinextis tamatilis tein kipaleuis maj makisa?

¹³ Telpochmej akin kinextijtiyouij ke yekyolmajsitokej amo “motekauiliaj ke ma kinuiyakan tech miak tataman tamachilisme” tein ualeua itech inintanejnekilis oso keman akin iniuan momachtiaj kinchiualtisnekij tein amo kuali (Efes. 4:14). Okachi kuali, yejuan “kuali ueli ya kixejekojtiyaske de toni kuali tamachilis uan de toni amokuali tamachilis” (Heb. 5:14). Yejua ika taixpejpenaj ika tamatilis hasta keman amo kinitaj inintatuan oso oksekin akin uejueykejya (Filip. 2:12). Nejin tamatilis motelneki porin kinpaleuis maj makisakan (xikonixtajtolti Proverbios 24:14). ¿Keniuj tepopaj uelis kinpaleuis ikoneuan maj kipiakan tamatilis? Moneki kuali monejnemiltis. Ika tein kijtoua uan tein kichiua moneki kinnextilis ke mochikaua monejnemiltis kemej tanauatia Biblia (Rom. 2:21-23).

14, 15. 1) ¿Itech toni moneki tanemilis telpoch akin kineki moauis? 2) ¿Keniuj uelis tikonpaleuis mokoneuj maj kinemili keniuj tapaleuia maj se kitakamati tein kijtoua Biblia?

¹⁴ Sayoj ke, amo sayoj moneki maj tetatmej kiniluikan ininkoneuan tein kuali yetok uan tein amo kuali yetok. Semi kuali maj kinpaleuikan maj tanemilikan ika netajtanilmej kemej nejin: “¿Keyej Biblia kijtoua maj amo se kichiua tein uelis moitas ke kuali yetok? ¿Keyej tikneltoka ke tanauatilmej tein moajsij itech Biblia nochipa mitspaleuiaj?” (Is. 48:17, 18).

¹⁵ Keman se konet kijtoua ke kineki  moauis, itatuan moneki kipaleuiskej maj kinemili toni mochia maj se kichiua keman se moauia. ¿Keniuj kiita nejon? ¿Keniuj tepaleuia? ¿Toni ouijkayomej kiualkui? ¿Keyej okachi miak nepaleuil se kiselia ke ouijkayomej? (Mar. 10:29, 30.) Motelneki maj konet itech tanemili nejin achto ke moauis. Komo itatuan kipaleuiaj maj kinemili keniuj tapaleuia maj se tatakamati uan tein kiualkui komo amo se tatakamati, xa okachi kineltokas ke nochipa okachi kuali maj se kitakamati tanauatilmej tein moajsij itech Biblia (Deut. 30:19, 20).

16. ¿Toni moneki kichiuaskej tetatmej komo ininkoneuj peua omeyoloua ox yejua nejin tein melauak satepan ke moauij?

¹⁶ ¿Toni uelis kichiuaskej tetatmej komo ininkoneuj peua omeyoloua ox yejua nejin tein melauak satepan ke moauij? Kemej neskayot, se telpoch uelis kiyolnotsas tein onkak nikan taltikpak oso peuas motajtanis ox se kitakamatis tein kijtoua Biblia yejua tein okachi kuali (Sal. 73:1-3, 12, 13). Tetatmej moneki kimatiskej ke tein kichiuaskej uan tein kiluiskej uelis kichiuas maj ininkoneuj kisentoka kitekitili Jiova oso amo. Moneki mochikauaskej amo iuan motajtolteuiskej, yeski telpochya oso nojnelok. Moneki kichiuaskej maj kimati ke kitasojtaj uan kinekij kipaleuiskej.

17, 18. ¿Keniuj tetatmej uelis kipaleuiskej inintelpoch komo omeyoloua?

¹⁷ Telpoch akin moauijya motenkauak iuan Jiova ke kitasojtas uan kitayekanaltis itanejnekilis (xikonixtajtolti Marcos 12:30). Dios amo kiauilmati nejin netenkaualis, uan no ijkon moneki kiitaskej nochin akin motemaktijkejya (Ecl. 5:4, 5). Tetatmej kitemoskej kemanian uelis kinelnamiktiskej nejin ininkoneuan. Sayoj ke achto moneki momachtiskej tamachtilis tein itech inechikol Jiova kinchijchiuilianij tetatmej. Nejin kinpaleuis maj kinajsikamatiltikan ke amo auil se motemaktis uan se moauis uan no toni tatiochiualismej kiualkui nejin.

¹⁸ Kemej neskayot, tetatmej kiajsiskej kuali tayolmajxitilismej kampa kijtoua “Los padres preguntan” itech amatajkuilol Los jóvenes preguntan, volumen 1. Ompa kinnejmachtia maj amo niman kinemilikan ke inintelpoch kiixtopeuak tamachtilis tein melauak, ta maj kitemokan kimatiskej katiyejua yekmelauj kuejmol. Xa akin iniuan momachtia kiteliluiaj maj kichiua tein amo kuali, momachilia iselti oso kiita ke okseki telpochmej okachi kitekitilijtokej Jiova ke yejua. Nejin amatajkuilol no kimelaua ke nejon amo senkis kijtosneki ke amo kineltokaok tein kimachtijkej itatuan. Miakpa, panoua nejon porin kipanotok se ouijkayot. Ompa kinyolmajxitia tetatmej toni uelis kichiuaskej komo ininkoneuj omeyoloua ika tein kineltoka.

19. ¿Keniuj tetatmej uelis kinpaleuiskej ininkoneuan maj kipiakan tamatilis tein kinpaleuis maj makisakan?

¹⁹ Tetatmej kipiaj se ueyi tekit uan se tatiochiualis: kinmachtiskej ininkoneuan uan kinojtokaltiskej kemej Jiova tanauatia (Efes. 6:4). Kemej tikitakejya, moneki kinmachtiskej tein kijtoua Biblia uan kinpaleuiskej maj kineltokakan tein momachtiaj. Keman inintakuaujtamatilis mochikauas, kinolinis maj motemaktikan iuan Jiova uan maj kitekitilikan ika nochi ininyolo. Maj Biblia, yektikatsin espíritu uan chikaujkayot tein nankichiuaskej kinpaleui nanmokoneuan maj kipiakan tamatilis tein kinpaleuis maj makisakan.