Itech 2 Corintios 12:2, 3, Pablo ika tajtoj se takat akin “Dios kajokuik [...] uan kiajxitito hasta ne ika eyi eluiyaktsinko”. ¿Akoni katka? Itech nejin amat tein kintitanilij tokniuan akin nemiaj Corinto, yejua kiyeknextij ke Dios kiixtalijka kemej tatitanil (2 Cor. 11:5, 23). Ompa, kijtoj ke ‘tajtachiak kemej ijkuak takochitstoskia’ uan ke ‘Totekotsin kinextilij itamachilisuan’. Itech nejin tajkuilol, Pablo amo ininka tajtoj okseki tokniuan. Yejua ika, taixejekol maj se kinemili ke nejon takat yejua katka (2 Cor. 12:1, 5). *

Moajsikamati ke takat akin kiitak “ika eyi eluiyaktsinko” uan “paraíso” katka Pablo (2 Cor. 12:2-4). Keman kijtoj ke ‘Totekotsin kinextilij itamachilisuan’ kiteajsikamatiltia ke kiluij teisa tein onkas satepan.

¿Toni “ika eyi eluiyaktsinko” tein kiitak Pablo?

Itech Biblia, tajtol iluikak uelis kijtosnekis miak taman. Kemej neskayot, uelis kijtosnekis iluikak tein tikitaj (Gén. 11:4; 27:28; Mat. 6:26). Kemansa, kijtosneki taltikpaktekiuajyomej (Dan. 4:20-22). Uan no uelis kijtosnekis itaixyekanalis Dios, kemej neskayot ika iTekiuajyo (Apoc. 21:1).

Komo ijkon, ¿toni kijtosnekia Pablo ika tajtolmej “ika eyi eluiyaktsinko”? Kemansa, Biblia expa kijtoua teisa porin kineki kiyeknextis (Is. 6:3; Ezeq. 21:27; Apoc. 4:8). Nesi ke keman Pablo ika tajtoj “ika eyi eluiyaktsinko”, ika tajtojtoya se taixyekanalis tein okachi kuali: Tekiuajyot tein moajsi imako Jesucristo uan 144,000 taixpejpenalmej akin iuan taixyekanaskej (xikonita Perspicacia para comprender las Escrituras, volumen 1, página 473, 476). Tatitanil Pedro ika tajtojtoya nejin Tekiuajyot keman kijkuiloj ke tikchixtokej “yankuik eluiyak” tein Dios motenkauak (2 Ped. 3:13).

¿Uan toni “paraíso” oso xochital tein Pablo ika tajtoj?

Tajtol xochital no uelis kijtosnekis miak taman. Yekinika, kemej yekinika taltikpakneminij nenkej ompa, taixejekol maj se kinemili ke kijtosneki Xochital tein onkas nikan taltikpak. Ojpatika, uelis kijtosnekis yolseuilis uan kuali uikalis tein itekitikauan Dios senkis kipiaskej itech yankuik taltikpak. Uan expatika, uelis kijtosnekis kualtsitsin tatiochiualismej tein onkak ne iluikak, “kampa yetika Totajtsin Dios” tein ika tajtoua Apocalipsis 2:7 (xikonita amaix Tanejmachtijkej, 15 metsti julio, 2015, página 5, párrafo 8).

Pablo xa ika tajtojtoya nejin eyi taman tein kijtosneki keman kijtoj tein kipanok itech 2 Corintios 12:4.

Ika amo miak tajtolmej:

“Ika eyi eluiyaktsinko” tein ika motajtoua itech 2 Corintios 12:2 xa yejua Tekiuajyot tein moajsi imako Jesucristo uan 144,000, tein kijtosneki “yankuik eluiyak” (2 Ped. 3:13).

Monotsa “ika eyi eluiyaktsinko” porin nejon Tekiuajyot yejua taixyekanalis tein okachi kuali.

“Paraíso” oso xochital kampa Dios “kiajxitito” Pablo itech se tajtachialis xa yejua: 1) Xochital tein amo uejkaua onkas nikan taltikpak, 2) yolseuilis uan kuali uikalis tein senkis onkas ijkuak, uan 3) “kampa yetika Totajtsin Dios”. Nochi nejin eyi onkas itech yankuik taltikpak.

Yejua ika, Xochital yeski nejin ome taman: “yankuik eluiyak” uan “yankuik taltikpak”. Nejin yeski se taman tein senkis yankuik kampa pouis Tekiuajyot tein moajsi iluikak uan taltikpakneminij akin kitekitiliskej Jiova itech Xochital.