1, 2. ¿Keyej moneki tikakis Jiova keman tikixpejpenas tein tikchiuas satepan? (Xikita taixkopimej ipeujyan tamachtilis.)

KOMO titelpoch oso tiichpoch, xa miakej mitsyolmajxitianij tein moneki tikchiuas satepan. Xa tamachtianij oso oksekin mitsiluianij ke moneki tikselis se ueyi nemachtil uan ijkon satepan uelis tiktanis miak tomin. Sayoj ke Jiova mitsyolmajxitia okse taman. Yejuatsin kemaj kineki kuali ximomachti itech tamachtiloyan porin nejon mitspaleuis ximoixpanolti satepan (Col. 3:23). Sayoj ke, keman tikixpejpenas seki taman tein motelneki, mitsiluia ximokaua maj mitsyekana tein yejuatsin tayolmajxitia. Nejin mitspaleuis xikchiua tein kiyolpaktia itech nejin itamian tonalmej (Mat. 24:14).

² No xikelnamiki ke Jiova kimati toni panos satepan uan kemanian ixpoliuis nochi tein amo kuali (Is. 46:10; Mat. 24:3, 36). Uan no, kuali techixmati. Kimati toni techyolpaktia uan toni techtayokoltia. Yejua ika, maski seki taman tein techyolmajxitiskej kuali mokakis, amo yekmelauj techpaleuis komo amo mokixtiaj itech iTajtol Dios (Prov. 19:21).

3, 4. ¿Toni kinpanok Adán, Eva uan nochin akin satepan yolkej porin kitajtolkakkej Satanás?

³ Amo kuali tayolmajxitilismej uejkaujya onkanij. Satanás yejua akin yekinika kinyolmajxitij taltikpakneminij tein amo kuali. Kiluij Eva ke yejua uan inamik okachi yolpakiskiaj komo ininselti taixpejpenayaj (Gén. 3:1-6). Tein melauj, Satanás sayoj kitayekanaltijtoya itanejnekilis. Kinekia maj Adán uan Eva, uan nochin akin satepan nemiskiaj, maj kitakamatinij uan maj kiueyichiuanij yejua uan amo Jiova. Sayoj ke ¿toni kinmakatoya? Amo teyi. Jiova kinmakatoya nochi tein kipiayaj: ininnamik, kualtsin xochital kampa nemiaj uan ininnakayo tein yektik tein chijchiujtoya kemej ueliskiaj nemiskej nochipaya.

⁴ Sayoj ke, Adán uan Eva amo kitakamatkej Dios uan amo kuali mouikakejok iuan. Nejon kiualkuik tein tel amo kuali. Peujkej ueuentsintiaj uan momikiliaj, ijkon kemej se xochit kuetaui uan uaki keman tikteki. Nochin akin yolkej satepan no tajyouijkej (Rom. 5:12). Maski ijkon, tel miakej kisentokaj amo kitakamatij Dios uan kichiuaj nochi tein kinekij (Efes. 2:1-3). Sayoj ke tein kiualkui nochi nejon kiyeknextia ke “amo onkak tamatilis [...] tein kiixnamiki Jiova”, tein kijtosneki ke tein yeski tayolmajxitilis tein kiixnamiki tein yejuatsin kijtoua amo kualtia (Prov. 21:30).

5. 1) ¿Toni senkis kimatia Jiova? 2) ¿Keniuj tikmatij ke amo mopolojtoya?

⁵ Sayoj ke, Jiova senkis kimatia ke seki taltikpakneminij, kampa no pouiskiaj telpochmej uan ichpochmej, kinekiskiaj kiixmatiskej uan kitekitiliskej (Sal. 103:17, 18; 110:3). Jiova kinteltasojta nochin. ¿No tipoui iniuan? Komo ijkon, tikyekmatij ke tikselijtok miak taman tein kuali tein Jiova mitsmaka uan tein mitsyolpaktia (xikixtajtolti Salmo 103:5; Prov. 10:22). Kemej tikitatij, seki taman yejua tamachtilis tein motemaka itech inechikol Dios, kuali tasojiknimej, tein tikixtaliaj tikchiuaskej tein amo nenkajti uan yekmelauj yolpakilis.

6. ¿Keyej moneki timotokis iuan Jiova, uan keniuj mitspaleuia yejuatsin?

⁶ Tapialmej amo kimachiliaj ke moneki kiixmatiskej Dios, sayoj ke tejuan kemaj (Mat. 4:4). Keman tikakij tein techiluia, tikseliaj taajsikamatilis, tamatilis uan yolpakilis. Jesús kijtoj: “Yolpakij akin kimachiliaj ke moneki motokiskej iuan Dios” (Mat. 5:3, TNM). Ika Biblia uan itechkopa takeual takuaujtamach uan tamatkej, Dios techmaka tataman tamachtilis tein techpaleuia maj tikchikauakan totakuaujtamatilis (Mat. 24:45). Tikitaj nochi nejin kemej takual porin kichikaua totakuaujtamatilis uan techpaleuia maj okachi kuali timouikakan iuan Jiova (Is. 65:13, 14).

7. ¿Keniuj mitspaleuia itamachtilis Dios?

⁷ Itamachtilis Dios mitspaleuis xikpia tamatilis uan kuali xitanemili, tein mitspaleuis itech miak taman (xikixtajtolti Proverbios 2:10-14). Kemej neskayot, mitspaleuis xikita takajkayaualis, kemej tein kijtoua ke Dios amo yekmelauj nemi oso ke sayoj uelis tiyolpakis komo tikpia miak tomin uan miak taman. Uan no, mitspaleuis ximoijkuanili amo kuali tanejnekilis uan amo xikpia vicios tein mitsijtakoskej. Yejua ika, ximochikaua tikselis itamatilis Dios uan kuali titanemilis. Ijkon  tikitas ke Jiova mitstasojta uan kineki kuali xinemi (Sal. 34:8; Is. 48:17, 18).

8. ¿Keyej moneki axkanya timotokis iuan Dios, uan keniuj mitspaleuis satepan?

⁸ Amo uejkaua, ixpoliuis nochi tein Satanás kiixyekana uan sayoj Jiova uelis techmatampauis. Tein melauj, xa ejkos tonal keman monekis titakuaujtamatiskej ke yejuatsin techmakas tein tikuaskej mostika (Hab. 3:2, 12-19). Yejua ika, axkan moneki timotokis iuan toTajtsin uan okachi titakuaujtamatis iuan (2 Ped. 2:9, TNM). Komo ijkon tikchiua, itech tein yeski ouijkayot, timomachilis kemej David, akin kijkuiloj: “Niktalijtok Jiova noixpan nochipa. Porin yejua moajsi noyekmakopa, amo keman teyi nechuetsiltis” (Sal. 16:8).

9. 1) ¿Toni kijtoua Juan 6:44 ke kichiua Jiova? 2) ¿Keyej semi kuali keman tikinixmatij okseki tokniuan?

⁹ Keman tikixmati aksa akin amo itaixpantijkauj Jiova, ¿yekmelauj tikixmati? Xa sayoj tikmatis keniuj monotsa, keniuj ixtamati uan okseki taman. Sayoj ke amo ijkon keman tikixmati se itaixpantijkauj Jiova. Tikmati ke kitasojta Jiova uan no ke yejuatsin kiitak teisa tein kuali itech iyolo uan kiyoleuak maj poui itech ixolal (xikixtajtolti Juan 6:44). Uan maski kayot itech okse ueyi altepet oso taman kemej moskaltij, kuali tikixmatiya uan yejua no kuali mitsixmatiya.

10, 11. ¿Toni kimatij nochin itaixpantijkauan Jiova, uan keniuj techpaleuia nejin?

¹⁰ Niman keman tikixmati okse tokniuj, tikita ke nantajtouaj sayoj se tajtol: “tajtol tein chipauak” ika tein melauak (Sof. 3:9). Nejin kijtosneki ke nankineltokaj Dios, nankitakamatij itanauatiluan uan nantakuaujtamatij itech tein yejuatsin motenkaujtok kichiuas. Nochi nejin mitspaleuia xitakuaujtamati itech nejon tokniuj uan kuali ximouikakan nochipaya.

¹¹ Uelis senkis tikijtoskej ke kemej tikueyichiua Jiova tikinpia okachi kuali tasojiknimej. Tikinpia motasojikniuan noyampa taltikpak, maski ayamo nochin tikinixmati. ¿Se akin amo itekitikauj Dios uelis no kijtos nejon?

12. ¿Toni uelis tikixtalis tikchiuas?

¹² (Xikixtajtolti Eclesiastés 11:9-12:1.) ¿Tikixtalijtok tikchiuas okachi taman itech itekiyo Dios? Xa timochikaujtok tikixtajtoltis Biblia mojmostaj, okachi kuali titanankilis itech nechikolmej oso okachi kuali tikpanoltis motamachtilis, oso timochikaujtok okachi kuali tiktekitiltis Biblia itech tanojnotsalis. ¿Keniuj timomachilia keman tikita ke okachi kuali tikchiujtok oso keman oksekin mitsiluiaj? Xa titelyolpaki. Uan semi kuali, porin tikchiujtok tein kiyolpaktia Dios, ijkon kemej Jesús kichiuak (Sal. 40:8; Prov. 27:11).

13. ¿Keyej okachi kuali maj se kitekitili Dios ke se kitayekanaltis se itanejnekilis?

¹³ Komo tiktayekanaltia tiktekitilis Dios, yekmelauj tiyolpakis. Tatitanil Pablo kijkuiloj: “Nachipa ximoyolchikauakan ika nijin tamachtilis. Uan amo xikuetautiyakan tech namotakuautamatilis. Ta, xiksentokakan xitekititiyakan kachi ok tech ne tekitsin ten Totekotsin Cristo technauatilij [...] porin kuali nankimatij ya ke amo nenkajtis nochi namotekiu ten nankichiutinemiske ika ichikaualis de Totekotsin” (1 Cor. 15:58). Akin kitayekanaltiaj inintanejnekilis, kemej kitaniskej tomin oso kitemoskej maj kintelixmatikan, amo yekmelauj yolpakij (Luc. 9:25). Kemej tikitaskej, tekiuaj Salomón kiitak ke melauak nejon (Rom. 15:4).

14. ¿Toni mitsmachtia tein kipanok Salomón?

¹⁴ Salomón, akin kipiaya miak tomin uan ueyi tanauatil, kiixtalij moyolpaktis ika miak taman uan ijkon kiitaskia keniuj yeskia inemilis (Ecl. 2:1-10). Kinchijchiuak uejueyi kalmej, parques uan miakkan tatojtokak, uan kichiuak nochi tein kinekik. ¿Yekmelauj yolpakik ika nochi nejon? Yejua kijtoj ke keman tanemilij itech nochi tein kichiujka, kiitak ke nochi nenkaj katka uan ke amo onkaya nion teyi tein yekmelauj kipiaya ipatiuj (Ecl. 2:11). ¿Mitspaleuis tein kipanok Salomón?

15. ¿Keyej motelneki xitakuaujtamati, uan keniuj kijtoua Salmo 32:8 ke mitspaleuis?

¹⁵ Sekin kiajsikamatij tein moneki kichiuaskej satepan ke mopolouaj uan tajyouiaj. Jiova amo kineki maj mitspano nejon. Yejuatsin kineki xiktajtolkaki uan xiktakamati. Yejua ika moneki iuan xitakuaujtamati, sayoj ke amo keman timoyolnonotsas porin tikixpejpenak tiktekitilis. Uan Jiova amo keman kielkauas keniuj tiknextia ke tiktasojta itokay (Heb. 6:10). Yejua ika, xikchiua nochi tein tapaleuis maj mochikaua motakuaujtamatilis. Ijkon tikitas ke nochi tein Jiova mitsiluia mitspaleuia (xikixtajtolti Salmo 32:8).

16. ¿Keyej moneki tikpatiuitaskej maj tiuelikan titaixpejpenakan uan keniuj uelis kuali tikchiuaskej?

¹⁶ Pablo kijkuiloj: “Kampa tekititok in [y]ektikatsin [e]spíritu ten ualeuak imako Totekotsin, ompa in [y]ektikatsin [e]spíritu kintojtomilijtok de nojon kinixtsakuiltijtok itaneltokakauan de Dios” (2 Cor. 3:17). Jiova kitelyolpaktia maj nochin ininselti taixpejpenakan, uan techchijchiuak kemej no techyolpaktis. Sayoj ke no, kineki kuali xitaixpejpena, porin nejon mitstelpaleuia. Xa tikinixmati seki telpochmej akin kiitaj auilnemilis, auilnemij, mauiltiaj seki taman tein ika uelis mikiskej, kikuij drogas oso tauanaj. Xa uelis moitas ke moyolpaktiaj, sayoj ke nejon kiualkui miak taman tein amo kuali: amo ueli kikauajok tein kichiuaj, kokolispeuaj oso hasta momikiliaj (Gál. 6:7, 8). Kinemiliaj ke uelis kichiuaskej nochi tein  kinekiskej, sayoj ke mokajkayauaj (Tito 3:3).

17, 18. 1) ¿Keyej uelis yekmelauj tiyolpakiskej komo tiktakamatij Jiova? 2) ¿Keniuj Adán uan Eva okachi ueliaj ininselti taixpejpenayaj ke taltikpakneminij itech nejin tonalmej?

¹⁷ Sayoj ke no, tiktakamatiskej Jiova techpaleuia, porin amo semi tikokolispeuaj uan yekmelauj tiyolpakij (Sal. 19:7-11). Uan keman titaixpejpena ika tamatilis, tein kijtosneki ke tikixpejpena tiktakamatis itanauatiluan Dios tein yektikej, tikinnextilia Jiova uan motatuan ke uelis mouan takuaujtamatiskej. Tein melauj, Dios kiixtalijtok kinkauas itekitikauan maj uelikan senkis ininselti taixpejpenakan. Biblia kijtoua ke “techyankuikatalikiu nochi tejuan tiikoneuan, uan ijkon tikseliske ne iueyikualtsiyo” (Rom. 8:21).

¹⁸ Yejua nejon tein Adán uan Eva kipiayaj yekinika. ¿Kanachi taman Dios amo kinkauak maj kichiuanij itech xochital tein moajsia Edén? Sayoj se: maj amo kikuanij se koujtakilot (Gén. 2:9, 17). ¿Tiknemilia ke ininka mauiltijtoya keman kinnauatij nejon? Amo. Xitanemili itech nochi tanauatilmej tein taltikpakneminij kiixtalianij uan tein kinchikaujkauiaj oksekin maj kitakamatikan. Sayoj ke Jiova kinmakak Adán uan Eva sayoj se tanauatil.

19. ¿Keniuj techpaleuiaj Jiova uan Jesús maj kuali titaixpejpenakan?

¹⁹ Itamatilis Jiova moita itech tein kichiua touan. Amo kiixtalia tel miak tanauatilmej, okachi kuali, technextilia ika nejmachkayot maj tiktakamatikan tanauatil tein kinextia netasojtalis. Techmachtia maj tinemikan kemej techyolmajxitia uan maj tiktauelitakan tein amo kuali (Rom. 12:9). Itech tanojnots tein Jesús kitemakak itech se tepet techpaleuij maj tikajsikamatikan keyej taltikpakneminij kichiuaj tein amo kuali (Mat. 5:27, 28). Uan itech yankuik taltikpak, kemej Tekiuaj itech iTekiuajyo Dios, kisentokas techmachtis maj tikitakan tein kuali uan tein amo kuali kemej yejua kiita (Heb. 1:9). Jesús no kichiuas maj tiyektikej itech tonakayo uan totanemilil. Sayoj xiknemili: amo tiknekisok tikchiuas tein amo kuali nion titajyouisok porin titajtakolej. Ijkuak, yekmelauj tiyolpakis ijkon kemej Jiova motenkaua.

20. 1) ¿Toni kiixpejpena kichiuas Jiova? 2) ¿Keniuj techpaleuia ineskayo Dios?

²⁰ Sayoj ke, amo keman uelis tikchiuaskej nochi tein tiknekiskej, porin nochipa timonejnemiltiskej ika netasojtalis tein tikpialiaj Dios uan oksekin. Tein melauj, Jiova sayoj techiluia maj tikchiuakan kemej yejuatsin. Maski senkis ueli kichiua nochi tein kineki, kiixpejpena nochipa moyekanas ika netasojtalis, hasta itech tein kichiua touan (1 Juan 4:7, 8). Yejua ika taixejekol maj sayoj tiuelikan yekmelauj tiyolpakikan komo tikchiuaj kemej Dios.

21. 1) ¿Toni David kiluij Jiova? 2) ¿Toni tikitaskej itech okse tamachtilis?

²¹ ¿Tikpatiuita nochi tein kuali tein Jiova mitsmakatok? Itech nejin tamachtilis, ika titajtojkej itamachtilis Dios, kuali tasojiknimej, tein tikixtaliaj tikchiuaskej tein amo nenkajti uan yekmelauj yolpakilis (Sal. 103:5). Xa titelyolpaki kemej David keman kiluij Jiova: “Tinechixmatiltia ojti tein temaka nemilis. Moixpan onkak miak yolpakilis; moyekmakopa onkak yolpakilis nochipaya” (Sal. 16:11). Itech okse tamachtilis, tikitaskej okseki kuali tamachtilis tein moajsi itech Salmo 16. Nejin mitspaleuis okachi kuali xikajsikamati keniuj uelis yekmelauj tiyolpakis.