¿Tikonixtajtoltiani ika nejmachkayot amaixmej Tanejmachtijkej tein yankuixtok kiskej? Xikonita ox ueli tikonnankilia nejin netajtanilmej:

¿Toni kinextia ke Dios kiajsikamati tein tikpanouaj?

Keman israelitas kinteltekitiltiayaj Egipto, Dios kimatia ke tajyouijtoyaj uan kimachiliaya tein kijyouijtoyaj (Éx. 3:7; Is. 63:9). Kemej tichijchiujtokej kemej yejuatsin, no uelis tikinajsikamatiskej oksekin. Yejuatsin techajsikamati hasta keman tiknemiliaj ke amo technamiki maj techtasojta (wp18.3, página 8 uan 9).

¿Keniuj Jesús kinpaleuij taltikpakneminij maj amo techikoitanij?

Itech itonaluan Jesús, miakej judíos techikoitayaj. Cristo tamachtij ke motelnekia yeskij yolyemankej uan ke amo kuali yetoya maj moueyichiuanij porin okseko kayomej katkaj. Kijtoj ke imomachtijkauan monekia moitaskej kemej iknimej (w18.06, página 9 uan 10).

¿Toni techmachtia maj Dios amo kikauani Moisés maj kalakini itech Tal tein motenkaujka kinmakas?

Moisés tel kuali mouikaya iuan Jiova (Deut. 34:10). Keman israelitas yaya kisatijya taluakyan satepan ke cuarenta xiujmej ompa nentinenkej, oksepa kualankej porin amo onkaya at. Dios kiluij Moisés maj kinojnotsani tepejxit. Sayoj ke Moisés kiuitekik. Jiova xa kualanik porin amo kichiuak kemej kinauatij oso porin amo kiueyichiuak keman kichiuak maj kisa at (Núm. 20:6-12). Nejin techmachtia ke motelneki tiktakamatiskej Jiova uan tikueyitaliskej (w18.07, página 13 uan 14).

¿Toni uelis panos komo titechichikouiaj?

Moajsi eyi taman tein kichiua maj mopata kemej miakej kinitaj oksekin: kemej ixtamatij oso kampa kayomej, tomin uan xiujmej tein kipiaj. Motelneki maj amo titechichikouikan, ta maj tikinitakan oksekin kemej Jiova kinita (Hech. 10:34, 35) (w18.08, páginas 8 hasta 12).

¿Keniuj tokniuan akin xiuejkejya uelis tapaleuiskej?

Tokniuj akin xiuejya akin mopatak tekit tein kipiaya uelis kisentokas kinpaleuis oksekin uan Dios kisentoka kipatiuita. Okachi uelis kipaleuiskej ininnamik tokniuan siuamej akin amo itaixpantijkauan Jiova, akin amo monechikouajok, tamachtiskej ika Biblia uan tapaleuiskej itech tataman tanojnotsalis (w18.09, páginas 8 hasta 11).

¿Toni poui itech nepaleuilmej tein ika titamachtiaj?

Seki yejua tarjeta tein ika tikteixmatiltiaj jw.org, tayoleualismej, chikueyi tratados tein tel kuali chijchiujtokej uan revistas Tanejmachtijkej uan ¡Depertad! No tikinpiaj seki folletos, ome amatajkuilolmej uan naui videos tein tel tapaleuiaj, kemej ¿Keyej moneki timomachtiskej Biblia? (w18.10, página 16).

¿Keniuj se tokniuj uelis kikouas tein melauak, kemej kijtoua Proverbios 23:23?

Amo moneki titaxtauaskej uan ijkon uelis tikixmatiskej tein melauak. Sayoj ke kemaj moneki tiktemakaskej totiempo uan tochikaualis (w18.11, página 4).

¿Toni techmachtia tein kichiuak Oseas iuan inamik, Gómer?

Gómer miakpa auilnemik. Sayoj ke Oseas kitapojpoluij uan amo kikauak. Komo aksa auilnemi, inamik uelis kitapojpoluis. Komo akin kikajkayaujkej oksepa moteka iuan inamik, amo uelisok kitsayanas amat ininixpan tekiuanij kemej Biblia kijtoua (w18.12, página 13).