Deuteronomio 22:25-27 kinextia ke tein okachi monekia monextis yejua ox no katka itajtakol ichpoch, porin takat ipa moitakaya ke katka itajtakol. Maj tikitakan okseki tajkuilolmej.

Seki versículos achto, ika tajtouaj se takat akin iuan moteka se siuat akin taijtanilya ompa itech xolal. Se siuat israelita akin taijtanilya kiitayaj kemej yeskia monamiktijkaya, yejua ika se takat auilnemia komo iuan motekaya. ¿Uan siuat no auilnemik? Komo yejua tsajtsiskia chikauak oksekin kikakiskiaj uan kipaleuiskiaj. Sayoj ke komo amo kichiuak no auilnemik. Yejua ika omen tajtakolchiujkaj (Deut. 22:23, 24).

Tanauatil no kijtouaya okse taman: “Sayoj ke, komo ompa milaj takat kiajsik ichpoch akin taijtanilya uan kichikaujkauij maj iuan moteka, sayoj moneki mikis takat, uan ichpoch amo teyi moneki nankichiuiliskej. Ichpoch amo kinamiki mikis porin amo tajtakolchiuak. Nejin kemej ijkuak se taltikpaknenkej kimiktia okse. Porin takat kiajsik ichpoch ompa milaj, uan ichpoch akin taijtanil tsajtsik chikauak, sayoj ke amo akin kikakik” (Deut. 22:25-27).

Yejua ika, tamelauanij kineltokiliayaj siuat. Kinemiliayaj ke “tsajtsik chikauak, sayoj ke amo akin kikakik”. Yejua ika amo auilnenka. Sayoj ke, takat kemaj auilnenka uan kiteluiliayaj ke ika mauiltij porin kichikaujkauij maj iuan moteka.

Maski okachi motemouaya monextis ox no katka itajtakol siuat, no kinextiaya ke akin katka itajtakol yejua takat porin kichikaujkauij ichpoch maj iuan moteka uan auilnemik. Uelis senkis tikneltokaskej ke tamelauanij kitemoskiaj kimatiskej tein yekmelauj panok uan tein kiixtaliskiaj kichiuaskej moyekanaskia ika tanauatilmej tein Dios kinmakaka (Éx. 20:14; Deut. 13:14; 17:4).