1, 2. 1) ¿Toni moixmati kemej jubileo? (Xikonita recuadro “ ¿Toni katka Jubileo?”). 2) ¿Toni ika tajtoj Jesús itech Lucas 4:16-18?

ITECH seki altepemej, iluichiuaj keman se tonal tein moelnamiki kiajxitia cincuenta xiujmej. Nejon moixmati kemej jubileo. Iluichiuayaj se tonal, se semana oso okachiok, sayoj ke satepan kielkauayaj keyej semi monekia nejon tonal.

² Itech nejin tamachtilis ika titajtotij okse jubileo tein okachi kuali ke tein kichiuayaj israelitas. Nejon Jubileo uejkauaya se xiuit uan ijkuak israelitas oksepa kiseliayaj tein ininaxka. ¿Keyej moneki maj ika timomachtikan? Porin techelnamiktia se taman tein kualtsin tein Jiova toka kichiuani tein ika techmakixtia. Jesús ika tajtoj nejon tein axkan uelisya techpaleuis (xikonixtajtolti Lucas 4:16-18).

3. Kemej kijtoua Levítico 25:8-12, ¿keniuj israelitas kinpaleuiaya Jubileo?

³ Uelis okachi kuali tikajsikamatiskej tein Jesús kijtosnekik keman ika tajtoj nemakixtilis komo timomachtiaj tein Dios kinnauatij israelitas maj kichiuakan itech Jubileo. Yejuatsin kiniluij: “Xiuit cincuenta xikchiuakan mouistik, noyampa itech altepet moneki nankinmajkauaskej akin moajsij nanmomako. Ijkuak yeski Jubileo, uan nansejsemej namechkepiliskej tein nanmoaxka uan oksepa uelis nanmokepaskej iniuan nanmokalyetouanij” (xikonixtajtolti Levítico 25:8-12). Itech okse tamachtilis tikitakej keniuj israelitas kinpaleuiaya moseuiskej itech tonal sábado. Axkan, tikitaskej keniuj kinpaleuiaya Jubileo. Maj tikijtokan ke se israelita motauikaltij  uan monekik motalnamakis uan ijkon taxtauas. Keman ajsia Jubileo kikepiliayaj ital, ijkon uelia kinpanoltiliaya ikoneuan. Oso maj tikijtokan ke se israelita amo kipiaya tomin tein ika kiixtauas tein motauikaltijka, yejua ika monekia kinamakas kemej takeual semej ikoneuan oso yejua monamakas. Keman katka Jubileo, takeual oksepa mokepaya ‘iniuan ikalyetouanij’. Ijkon, se israelita amo nochipa yeskia takeual. ¿Melauj ke Jiova ininka motekipachouaya itekitikauan?

4, 5. ¿Keyej moneki tikmatiskej tein mochiuaya itech Jubileo?

⁴ ¿Keniuj no tapaleuiaya Jubileo? Jiova kijtoj: “Nion semej namejuan moneki kipanos tatasojtilis porin Jiova yekmelauj mitstatiochiuis itech tal tein Jiova moDios mitsmakatok ximoaxkatili kemej netetayokolil” (Deut. 15:4). Semi taman tein axkan mochiua: akin tominpixkej mochiua okachi tominpixkej uan akin amo teyi kipia okachi amo kipia.

⁵ Akin tikchiuaj kemej Cristo amo tiktakamatijok Tanauatil tein Dios kimakak Moisés. Nejon kijtosneki ke amo tikchiuaj tein israelitas kichiuayaj keman kimajkauayaj se takeual, keman amo kitaxtaualtiayajok akin tauikaya uan kikepiliayaj ital aksa (Rom. 7:4; 10:4; Efes. 2:15, TNM). Sayoj ke, ¿keyej moneki tikmatiskej tein mochiuaya itech Jubileo? Porin techelnamiktia tein Jiova toka kichiuani uan ijkon techkixtilia tajtakol.

6. ¿Keyej moneki maj techmakixtikan?

⁶ Tinochin moneki maj techmakixtikan porin tajtakol kemej yeskia techtsikojtok. Yejua ika, tiueuentsintiaj, tikokolispeuaj uan timomikiliaj. Tikitaj keniuj tajtakol techtsikojtok keman moneki tikitatiuij tapajtijkej porin timokokouaj. No semi timotekipachouaj keman titajtakolchiuaj. Tatitanil Pablo kijtoj: “[Tajtakol] nechyolkitskijtinemi uan  nechtsijtsikojtinemi keme yeskia nejua nipreso”. Uan no kijtoj: “Semi nionteiknelti, porin [...] [akoni] uelis nechmakixtis den chikaualis de notalnamikilis de tajtakol ten nechuikas kampa ixpoliuilis” (Rom. 7:23, 24).

7. ¿Toni kijtoj Isaías ke panoskia satepan?

⁷ Jiova kichiuak tein monekia tein ika techkixtilia tajtakol. Jesús tapaleuij maj mochiua nejon. Panoua 700 xiujmej achto ke Jesús ualaskia nikan taltikpak, tanauatijkej Isaías kijtoj ke satepan taltikpakneminij kinmakixtiskiaj, nejon okachi kuali yeskia ke Jubileo. Kijkuiloj: “Iespíritu toTeko Jiova akin okachi Ueyi Taixyekankej nouan yetok, porin Jiova nechixpejpenak maj nikinixmatilti kuali tanauatilmej akin yolnejmachmej. Nechtitanik maj nikinyolseui akin tajyouijtokej, maj nikinmatilti akin tsaktokej ke uelis kinmajkauaskej” (Is. 61:1). Maj tikitakan akoni ika tajtoua nejon tein moijtoj.

8. ¿Akoni kijtoj Isaías ke techmakixtiskia?

⁸ Nejon tein kijtoj Isaías peuak mochiua satepan ke Jesús kipeualtij itekiyo Dios. Keman yajki sinagoga tein yetoya Nazaret kampa moskaltijka, kinixtajtoltilij judíos tein ompa moajsiaj tein Isaías achto kijtojka. Uan kijtoj ke nejin tajtolmej yejua kinamikia: “Dios nechyolpepexokaltijtinemi ika in Yektikatsin Espíritu. [...] Nechonijitak ya para nikinnojnotstinemis [...] nojonkes tagayot ten kiyolmachiliaj ke yejua pobres [...,] para nikinyolseuis nekes ten yoltaxokolilme ika tajtakol. [...] Para nikintapouis nekes ten poutokke keme yeskia presos tech nintajtakolojpan. Uan [...] para nikintachialtis nekes ten ixpojpoyome [...] para nikintakajkaualtis nekes ten tsijtsikautokke ika in kadenas de tajtakol. Uan [...] para nikintapouis in taltikpakuani ke ejkok ya in xiuit kuak Totajtsin Dios ipakilis de kinmakixtis in taltikpakuani” (Luc. 4:16-19). ¿Keniuj kichiuak Jesús nejon tein kijtoj?

9. ¿Itech toni kinekiaj maj kinmakixtikan akin nenkej itech itonaluan Jesús?

⁹ Itech yekinika siglo, taltikpakneminij peuak kinmakixtiaj ijkon kemej kijtojka Isaías. Jesús kitematiltij nejon keman kijtoj: “Axkan ueyi melau ke nijin [...] motamichiuak ya namoixpan” (Luc. 4:21). Miakej akin kikakkej Jesús xa kinekiaj maj kinmakixtiani ininmako tekiuanij romanos. Xa tanemiliayaj kemej ome itatojtokakauan akin kijtojkej: “Tejuan tikchiayaj ke ne Jesús, [...] yeskia in Temakixtijke ten ualaskia para techajchiuaskia inmako in tayekanani romanos” (Luc. 24:13, 21). Sayoj ke tikmatij  ke Jesús amo kiniluij itatojtokakauan maj kinixnamikinij romanos, ta kinnauatij: “Xikmaktilikan in rey César ten kinamiki xikmaktikan César” (Mat. 22:21). Komo ijkon, ¿keniuj Jesús kinmakixtij taltikpakneminij itech nejon tonalmej?

10. ¿Itech toni kinmakixtij Jesús taltikpakneminij?

¹⁰ IKoneuj Dios kinpaleuij taltikpakneminij maj momakixtikan itech ome taman. Yekinika, kinpaleuij maj amo kineltokanijok tein tamachtiayaj tayekananij itech taneltokalis. Miakej judíos kichiuayaj tein tayekananij kinnauatiayaj uan kineltokayaj tein amo melauak tein kinmachtiayaj (Mat. 5:31-37; 15:1-11). Maski kijtouayaj ke kinpaleuiayaj oksekin maj motokikan iuan Dios tein melauj amo kichiuayaj kemej monekia, yejua ika katkaj kemej ixpopoyomej. Ijkon kisentokakej porin kiixtopeujkej Mesías uan tein tamachtij uan kisentokakej itech tajtakol (Juan 9:1, 14-16, 35-41). Jesús kinmachtij akin yolnejmachmej tein melauak uan kinkauilij se kuali neskayot. Ijkon kinpaleuij maj amo kineltokanijok tein kinmachtiayaj tayekananij (Mar. 1:22; 2:23-3:5).

11. ¿Itech toni no techmakixtia Jesús?

¹¹ Ojpatika, Jesús uelik kichiuak maj taltikpakneminij amo kipiakanok tajtakol. Dios ueli kintapojpoluia akin kinextiaj ika tein kichiuaj ke takuaujtamatij itech inemilis Jesús tein kitemakak (Heb. 10:12-18). Jesús kijtoj: “[Nejua] namechtojtontiyas de namotajtakoluan, ijkuakon melau [...] namechajchiuilitiu de ne tajtakol” (Juan 8:36). Nejon okachi kuali katka ke tein mochiuaya itech Jubileo. Kemej neskayot, akin momakixtiaya itech Jubileo oksepa ueliskia mochiuas takeual. Uan no, momikiliaya. Sayoj ke, Jesús senkis techkixtilia tajtakol.

12. ¿Akonimej yekinika kinmakixtijkej kemej kijtoj Jesús?

¹² Itech Pentecostés xiuit 33, Jiova kinixpejpenak tatitanilmej uan oksekin ika iyektikatsin espíritu. Mochiujkej kemej ikoneuan, yejua ika oksepa kinmakaskia nemilis uan tekiuajtiskiaj iuan Jesús ompa iluikak (Rom. 8:2, 15-17). Yejuan akin yekinika kinmakixtijkej kemej kijtoj Jesús itech sinagoga ompa Nazaret. Amo kineltokayajok tamachtilis tein amo melauak nion kichiuayajok tein momattoyaj kichiuaskej tayekananij judíos. Uan no, kemej amo kipiaskiajok  tajtakol iixpan Dios ueliskiaj nemiskej nochipaya. Itech totonaluan, Jubileo peuak keman kinixpejpenkej itatojtokakauan Cristo itech xiuit 33 uan tamis itamian Mil Xiujmej. ¿Toni motamichiuasya ijkuak?

13, 14. ¿Akonimej no ueli momakixtiaj kemej kijtoj Jesús?

¹³ Itech totonaluan, ‘okseki ichkamej’ yejuan millones taltikpakneminij akin yolnejmachmej uan nemij noyampa taltikpak (Juan 10:16). Jiova amo kinixpejpenak maj tekiuajtikan iuan Jesús ompa iluikak, ta kichiaj nemiskej nochipaya nikan taltikpak. ¿Yejua nejon tein tejuan tikchiaj?

¹⁴ Tikselijtokejya seki tatiochiualismej tein no kiseliaj akin tekiuajtiskej iuan Jesús ompa iluikak. Kemej neskayot, ueli tiktajtaniaj Jiova maj techtapojpolui totajtakoluan porin titakuaujtamatij itech inemilis Jesús tein kitemakak. Nejon kichiua maj Dios techseli uan maj amo techkuejmolo totanemilil (Efes. 1:7, TNM; Apoc. 7:14, 15). No techpaleuia porin amo tikneltokajok tein amo melauak. Jesús kijtoj: “Nankajsikamatiyaske de ne Tajtoltsin ten yek melau. Uan [...] yejua ne namechtojtomatiu de namotajtakoluan” (Juan 8:32). Nochi nejon semi techyolpaktia.

15. ¿Keniuj tikchiaj maj techmakixtikan satepan uan toni tatiochiualismej tikseliskej?

 ¹⁵ Satepan senkis techmakixtiskej porin amo uejkaua Jesús kinixpolos taneltokalismej tein amo melaujkej uan taltikpaktekiuajyomej. Dios kinmatampauis “uel miak tagayot” akin kitekitiliaj uan kinmakas miak tatiochiualismej itech xochital nikan taltikpak (Apoc. 7:9, 14). Uan no, Dios kichiuas maj miakej akin momikilijkejya oksepa nemikan uan uelis nemiskej nochipaya porin amo kipiaskejok tajtakol (Hech. 24:15).

16. ¿Toni tein kualtsin kiseliskej taltikpakneminij?

¹⁶ Keman Jesús taixyekantos Mil Xiujmej, yejua uan akin iuan tekiuajtiskej kinpaleuiskej taltikpakneminij maj amo kokolispeuakanok uan maj mochiuakan ikoneuan Dios. Nejon tein mochiuas yeski kemej Jubileo tein mochiuaya ompa Israel. Nochin akin amo kikauaskej Jiova amo kipiaskejok tajtakol.

17. ¿Keniuj kijtoua Isaías 65:21-23 ke tinemiskej tiitekitikauan Dios? (Xikonita taixkopin ipeujyan amaix.)

¹⁷ (Xikonixtajtolti Isaías 65:21-23). Nejin texto kinextia keniuj tinemiskej nikan taltikpak. Tiitekitikauan Dios nochipa tikpiaskej tekit. Biblia kijtoua ke tein tikchiuaskej techyolpaktis. Senkis tikmatij ke keman tamis Mil Xiujmej “nochi ten Dios kichijchiuak, nochi yejua Dios kiajchiuakiu de ne ijtakauilis para oksepa kipixtinemis ne iyankuikakualtsiyo” Dios (Rom. 8:21).

18. ¿Keyej uelis titakuaujtamatiskej ke tikchiaj tein kualtsin?

¹⁸ Jiova kichiuak maj israelitas uelikan tekitikan uan maj moseuikan, uan no ijkon kichiuas iniuan itekitikauan keman Cristo taixyekantos Mil Xiujmej. Yejuan ueliskej kichiuaskej itekiyo Dios. Ijkon kemej axkan, itech yankuik taltikpak monekis kiueyichiuaskej yejuatsin porin nejon kinpaleuis maj yolpakikan. Nochin akin tatakamatiskej yolpakiskej porin kipiaskej se kualtsin tekit uan kiueyichiuaskej Jiova.