1, 2. Kemej kinextia tein kipanok Angelito, ¿toni moneki tikchiuaskej tisejsemej?

¿ITAIXPANTIJKAUAN Jiova motatuan? Komo kemaj, xikelnamiki ke amo porin yejuan kuali iuan mouikaj Dios, kijtosneki ke tejua no ijkon. Yeskij itaixpantijkauan Jiova oso amo, tisejsemej moneki timochikauaskej kuali iuan timouikaskej.

² Maj tikitakan tein kipanok tokniuj Angelito, akin itatuan itaixpantijkauan Jiova. Keman katka telpoch kimachiliaya ke amo semi mouikaya iuan Dios. Yejua kijtoua: “Niktekitiliaya Jiova sayoj porin niknekia nikchiuas tein kichiuayaj nochankauan”. Sayoj ke peuak okachi kiixtajtoltia Biblia, itech tanemilia uan no peuak okachi motataujtia. ¿Toni panok? Yejua kijtoua: “Nikajsikamatik ke okachi kuali nimouikaskia iuan Jiova sayoj komo kuali nikixmatia”. Tein kipanok kichiua maj timotajtanikan ome taman: ¿Keniuj taman sayoj tepitsin se kiixmatis Jiova uan kuali se kiixmatis? Uan ¿toni techpaleuis maj kuali tikixmatikan?

3. ¿Keniuj taman sayoj tepitsin se kiixmatis Jiova uan kuali se kiixmatis?

³ Xa tiknemiliaj ke tikixmatij Jiova porin tikmatij itokay oso seki taman tein kijtouani uan kichiuani. Sayoj ke nejon amo kijtosneki ke kuali tikixmatij. Moneki  timomachtiskej tein kinemilia, tein kimachilia uan nochi tein kuali tein kichiua. Sayoj ijkuak peuas tikajsikamatiskej keyej kijtoua uan kichiua teisa. Nejon techpaleuis maj tikmatikan ox kiuelita tein tiknemiliaj uan tein tikchiuaj. Keman tikajsikamatij toni Jiova kineki maj tikchiuakan, moneki maj tikchiuakan.

4. ¿Keniuj techpaleuis komo timomachtiaj ininneskayo sekin akin ininka tajtoua Biblia?

⁴ Xa seki taltikpakneminij techkejkelouaj porin tiknekij tiktekitiliskej Jiova uan xa okachi techixnamikij keman peua tiyouij nechikolmej. Sayoj ke Dios amo keman techkauas komo iuan titakuaujtamatij. Ijkon peuas kuali iuan timouikaskej uan ijkon yeski nochipaya. ¿Yekmelauj uelis kuali tikixmatiskej Jiova? Kemaj. Ineskayo Moisés uan tekiuaj David kinextia ke kemaj uelis. Axkan ika titajtotij tein kichiujkej uan tikitatij keniuj kuali kiixmatkej Jiova uan toni techmachtia ininneskayo.

5. ¿Toni kiixtalij kichiuas Moisés?

⁵ Moisés kiixpejpenak kitekitilis Dios. Keman kipiaya 40 xiujmej, kiixpejpenak kinpaleuis hebreos akin katkaj itekitikauan Dios uan amo maj kiixmatinij kemej “tekoneu den isuapil den rey Faraón” (Heb. 11:24). Moisés amo kinekik yeski se ueyichiujkej. Keman kinpaleuij hebreos akin katkaj takeualmej ompa Egipto, kimatia ke faraón semi kualaniskia. Yejua katka se tekiuaj ueyichiujkej uan egipcios kiitayaj kemej se dios. Kemej tikitaj, Moisés kinextij ke takuaujtamatia iuan Jiova. Nejon kipaleuij maj nochipa kuali iuan mouika (Prov. 3:5).

6. ¿Toni techmachtia ineskayo Moisés?

⁶ ¿Toni techmachtia ineskayo Moisés? Ke ijkon kemej yejua, tinochin moneki tikixpejpenaskej ox tiktekitiliskej Dios uan ox tiyetoskej itech ixolal. Xa monekis tikauaskej seki taman uan ijkon tiktekitiliskej uan xa no akin amo kiixmatij yejuatsin techtajyouiltiskej. Sayoj ke, komo titakuaujtamatij iuan toTajtsin senkis tikmatij ke techpaleuis.

7, 8. ¿Toni kisentokak momachtij Moisés?

⁷ Moisés kisentokak momachtij ikualneskayouan Jiova uan kichiuak tein kinejneki. Kemej neskayot, keman Jiova kiluij maj kinmakixtiani israelitas, Moisés miakpa kijtoj ke amo ueliskia kichiuas nejon. Sayoj ke Jiova kinextilij ke semi kiikneliaya uan kipaleuij (Éx. 4:10-16). Yejua ika, Moisés moyolchikauak uan uelik kiluij faraón ke Dios kitatsakuiltiskia. Satepan, Moisés kiitak ichikaualis Jiova keman kinmakixtij israelitas uan kiixpoloj faraón uan itateuijkauan itech ueyi at Chichiltik (Éx. 14:26-31; Sal. 136:15).

⁸ Satepan ke Moisés kinkixtij israelitas ompa Egipto, yejuan peujkej amo kiuelitaj miak taman. Itech nochi nejon xiujmej, Moisés kiitak keniuj Jiova semi amo yolijsiuik iniuan israelitas akin kinmakixtijka (Sal. 78:40-43). No kiitak keniuj Jiova semi yolyemanik porin kipatak tein kinemiliaya kichiuas keman Moisés kiluij (Éx. 32:9-14).

9. Kemej kijtoua Hebreos 11:27, ¿keniuj mouikayaj Moisés uan Jiova?

⁹ Satepan ke kisak Egipto, Moisés peuak semi kuali mouika iuan Jiova  porin kemej yeskia kiitaya (xikonixtajtolti Hebreos 11:27). Hasta Biblia kijtoua: “Jiova kiixitaya Moisés keman kinojnotsaya, ijkon kemej tajtoskia se takat iuan okse” (Éx. 33:11).

10. ¿Toni moneki tikchiuaskej tein ika kuali tikixmatiskej Jiova?

¹⁰ ¿Toni techmachtia nejon? Ke kuali tikixmatiskej Jiova komo tikmatij keniuj kinextia ikualneskayouan uan no komo tikchiuaj itanejnekilis. Uan ¿katiyejua itanejnekilis axkan? Biblia kijtoua: “Nochi in taltikpakuani ma makisakan de nintajtakoluan para ma ijkon kajsikamatikij in melauak Tajtoltsin de Dios” (1 Tim. 2:3, 4). Se taman kemej tikchiuaj itanejnekilis yejua keman tikinmachtiaj oksekin akoni yejuatsin.

11. ¿Keyej keman tikinmachtiaj oksekin akoni Jiova techpaleuia maj okachi kuali tikixmatikan?

¹¹ Miakpa, okachi kuali tikixmatij Jiova keman tikinmachtiaj oksekin akoni yejuatsin. Kemej neskayot, tikitaj ke Jiova kiniknelia taltikpakneminij porin techpaleuia maj tikinajsikan akin no kinekij iuan mouikaskej (Juan 6:44; Hech. 13:48). Tikitaj keniuj iTajtol Dios kipia chikaualis porin kinpaleuia akin tikinmachtiaj maj amo kichiuakanok tein amo kuali uan maj monejnemiltikan kemej Dios kineki (Col. 3:9, 10). Uan tikitaj ke Jiova amo yolijsiui porin kisentoka kinpaleuia taltikpakneminij maj kiixmatikan uan maj momakixtikan (Rom. 10:13-15).

12. Kemej kijtoua Éxodo 33:13, ¿toni tajtanik Moisés uan keyej?

¹² Moisés kipatiuitak kuali mouikas iuan Jiova. Maski Dios kipaleuijka maj kichiua miak mouiskatekimej, Moisés kitajtanij maj kipaleui maj okachi kuali kiixmati (xikonixtajtolti Éxodo 33:13). Ijkuak, Moisés kipiayaya panoua 80 xiujmej, sayoj ke kimatia ke kipolouaya okachi kiixmatis Jiova.

13. ¿Keniuj tiknextiaj ke tikpatiuitaj kuali timouikaskej iuan Dios?

¹³ ¿Toni techmachtia nejon? Ke nochipa moneki tikpatiuitaskej kuali timouikaskej iuan Jiova, maski miak xiujmejya tiktekitilianij. Se taman kemej tikchiuaj yejua keman iuan timotataujtiaj.

14. ¿Keyej timotataujtiskej techpaleuia maj okachi kuali tikixmatikan Jiova?

¹⁴ Moneki nochipa iuan titajtoskej iuan akin timouikaj sayoj ijkon kuali timouikaskej. Yejua ika, maj nochipa tiktataujtikan Jiova uan maj tiktapouikan nochi tein tiknemiliaj uan tein tikmachiliaj (Efes. 6:18). Krista se tokniuj siuat akin kayot Turquía, kijtoua: “Nochipa keman nikiluia Jiova tein niknemilia uan nikita keniuj nechpaleuia, okachi niktasojta uan okachi iuan nitakuaujtamati. Keman nikita keniuj kinankilia nonetataujtiluan nechpaleuiani maj nikita kemej noPopaj uan akin kuali iuan nimouika”.

15. ¿Keniuj Jiova kiitaya David?

¹⁵ Keman tekiuaj David yolik, itatuan uan akin ompakauin nemiaj kiueyichiuayaj Jiova. Sayoj ke yejua amo kiueyichiuak Jiova porin ichankauan kiueyichiuayaj, ta yejua kitemoj kuali mouikas iuan Dios uan yejuatsin semi kitasojtaya. Hasta kijtoj ke David katka se takat akin kiyolpaktiaya (Hech. 13:22). ¿Toni kipaleuij David maj kuali mouika iuan Jiova?

16. ¿Keniuj keman David kiitak tein Jiova kichijchiuak kipaleuij maj okachi kiixmati?

 ¹⁶ David kiixmatik Jiova ika itachijchiualis. Keman katka telpoch miak horas kinyekpiak iichkauan ipopaj ompa ixtauat. Xa ijkuak peuak itech tanemilia tein Jiova kichijchiuak. Kemej neskayot, keman youak ajkotachiaya amo sayoj kinitaya miakej sitalimej, ta no tanemiliaya keniuj toTajtsin kinextiaya tein kuali itech itachijchiualis. Yejua ika, kijkuiloj: “Iluikak kiteixmatiltijtok iueyiyo Dios; iluikak kiteixmatiltia tein kichiuani ika imauan” (Sal. 19:1, 2). No kiitaya keniuj Jiova semi tamatkej keman tanemiliaya kemej chijchiujtokej taltikpakneminij (Sal. 139:14). Keman David tanemiliaya keniuj chijchiujtok tein Dios kichijchiuani, yejua moitaya semi tsikitsin (Sal. 139:6).

17. ¿Keniuj techpaleuis komo itech titanemiliaj tein Dios kichijchiuak?

¹⁷ ¿Toni techmachtia? Maj tikitakan tein Dios kichijchiuak. Maj amo sayoj tinemikan itech nejin taltikpak tein Jiova kichijchiuak, ta maj ika timoyolpaktikan. Keman teisa tikchiujtoskej maj tiknemilikan keniuj tein tikitaj kemej: koujmej, tapialmej uan taltikpakneminij, techpaleuia maj okachi tikixmatikan yejuatsin. Ijkon, mojmostaj okachi tikixmatiskej toTajtsin (Rom. 1:20). Uan tikitaskej keniuj ijkon kemej panotiyaskej tonalmej okachi tiktasojtaskej.

18. ¿Toni kijtoj David itech Salmo 18?

¹⁸ David kimatia ke Jiova kipaleuiaya. Kemej neskayot, keman kinmakixtij iichkauan ipopaj maj amo kinkuani se tekuani uan se oso, kijtoj ke uelik kinmiktij nejon koujtajtapialmej porin Jiova kipaleuij. Keman kimiktij ueyi takat Goliat, kiitak ke Jiova kiixyekantoya (1 Sam. 17:37). No kiitak ke Jiova kipaleuij maj tekiuaj Saúl amo kimiktiani (Sal. 18, encabezamiento). Akin moueyineki ueliskia kijtos ke iselti kichiuak nochi nejon. Sayoj ke David amo moueyinekia, yejua ika nochipa kimatik ke Jiova kipaleuiaya (Sal. 138:6).

19. ¿Toni techmachtia ineskayo David?

¹⁹ ¿Toni techmachtia ineskayo David? Ke amo sayoj moneki tiktajtaniskej Jiova maj techpaleui, ta maj tikitakan keniuj techpaleuia uan kemanian kichiua. Komo amo timoueyinekij uan tikelnamikij ke toselti amo ueli tikchiuaj miak taman, tikitaskej ke Jiova nochipa techmaka tein techpoloua. Uan keman tikitaskej keniuj techpaleuia okachi kuali iuan timouikaskej. Ijkon kipanok Isaac, se tokniuj kayot Fiyi akin miak xiujmejya kitekitiliani Jiova. Yejua kijtoua: “Keman ika nitanemilia tein nikchiuani, nikita keniuj Jiova nechpaleuiani keman peuak nimomachtia Biblia uan hasta axkan. Nejon kichiua maj nikita ke yejuatsin yekmelauj nemi”.

20. ¿Keniuj kipaleuij David kuali mouikas iuan Dios uan toni techmachtia nejon?

²⁰ David no kinextij ikualneskayouan Jiova. Dios techchijchiuak kemej uelis tiknextiskej tein yejuatsin kinextia (Gén. 1:26). Ijkon kemej okachi tikixmatij Dios, okachi uelis tikchiuaskej kemej yejuatsin. David kintasojtaya taltikpakneminij ijkon kemej kichiuaskia toTajtsin porin kuali kiixmatia. Maj titanemilikan itech se taman tein kipanok  tekiuaj. Tajtakolchiuak iixpan Jiova keman auilnemik iuan Bat-Seba uan satepan kichiuak maj kimiktianij inamik siuat. Maski ijkon, Jiova kiiknelij (2 Sam. 11:1-4, 15). ¿Keyej? Porin David no kiniknelijka oksekin. Kemej David semi kuali mouikak iuan Jiova, israelitas semi kitasojtayaj uan Jiova kijtoj ke David katka se kuali neskayot tein kinpaleuiskia okseki tekiuanij ompa Israel (1 Rey. 15:11; 2 Rey. 14:1-3).

21. Kemej kijtoua Efesios 4:24 uan 5:1, ¿toni tein kuali tikseliaj komo timochikauaj tiktakamatiskej Jiova?

²¹ ¿Toni techmachtia? Moneki maj tikchiuakan kemej Dios kichiua. Nejon amo sayoj techpaleuis itech seki taman, ta no techpaleuis maj kuali tikixmatikan. Keman timochikauaj tiktakamatiskej Jiova, tiknextiaj ke tiikoneuan (xikonixtajtolti Efesios 4:24; 5:1).

22, 23. ¿Toni panos komo tikchiuaj tein Jiova kichiua?

²² Kemej tikitakejya, Jiova moteixmatiltia ika tein kichijchiuak uan ika iTajtol. Itech Biblia tikajsij ininneskayo miakej itekitikauan Dios kemej Moisés uan David uan tejuan uelis tikchiuaskej kemej yejuan. Jiova moteixmatiltianiya uan axkan tejuan moneki timochikauaskej tikixmatiskej.

²³ Nochipa tiksentokaskej tikixmatiskej Jiova (Ecl. 3:11). Sayoj ke, amo semi moneki ox semi tikixmatij, ta ox tikchiuaj tein tikmatijya. Komo tikchiuaj ijkon kemej timomachtiaj uan kemej Jiova kichiua, yejuatsin kisentokas motokis touan (Sant. 4:8). Itech iTajtol, techmatiltia ke amo keman kinkauas akin kitemouaj kiixmatiskej.