“¿NOCHI niktasojkamati?”. Tinochin moneki timotajtaniskej nejon. Biblia kijtoj ke itech totonaluan miakej amo motasojkamatiskiaj (2 Tim. 3:2). Xa tikinixmatij akin kinemiliaj ke moneki maj oksekin kinpaleuikan oso maj kinmakakan teisa uan amo kiitaj ke moneki motasojkamatiskej. Amo akin kiuelita mouikas iniuan akin ijkon tanemiliaj.

Sayoj ke, Jiova kiniluia itekitikauan maj kinextikan ke motasojkamatij uan maj nochi kitasojkamatikan (Col. 3:15; 1 Tes. 5:18). Uan no, timotasojkamatiskej semi techpaleuia. ¿Keyej? Maj tikitakan.

Se taman keyej moneki timotasojkamatiskej yejua porin kichiua maj kuali timomachilikan. Keman tiktasojkamatij tein toka kichiuaj kuali timomachiliaj uan no kuali momachilia akin tiktasojkamatiliaj. ¿Keyej? Maj titanemilikan itech nejin. Komo toka kichiuaj teisa yejua porin kinemiliaj ke technamiki uan porin toka motekipachoua. Nejon kichiua maj kuali timomachilikan. Xa yejua nejon tein kipanok Rut. Keman Boaz ika motekipachoj, Rut xa semi yolpakik porin kiitak ke ika motekipachouayaj (Rut 2:10-13).

Okachi moneki timotasojkamatiskej iuan Dios. Miakpa titanemilianij itech miak taman tein kuali tein Dios toka kichiuani uan kisentoka kichiua (Deut. 8:17, 18; Hech. 14:17). Maj amo sayoj titanemilijtiuetsikan itech tein Dios toka kichiuani, ta maj tikxelokan tiempo uan maj titanemilikan itech tein Dios techmakani tejuan uan akin tikintasojtaj. Ijkon okachi timotasojkamatiskej iuan Jiova uan okachi tikneltokaskej ke semi techtasojta uan techpatiuita (1 Juan 4:9).

Amo sayoj maj titanemilikan itech tein kuali tein Jiova techmakani uan keniuj techtatiochiuiani, ta no maj tiktasojkamatilikan (Sal. 100:4, 5). Moijtoua ke “se motasojkamatis tapaleuia maj se yolpaki”.

Okse taman keyej moneki timotasojkamatiskej yejua porin kichiua maj okachi timouikakan iniuan oksekin. Tinochin moneki maj technextilikan ke techtasojtaj. Keman tiktasojkamatij tein toka kichiuaj, okachi kuali iniuan timouikaj (Rom. 16:3, 4). Uan akin motasojkamatij xa okachi kinekiskej kinpaleuiskej oksekin. Keman kiitaj keniuj kinpaleuiaj, yejuan no mochikauaj kinpaleuiskej oksekin. Uan tikinpaleuiskej oksekin kichiua maj tiyolpakikan, ijkon kemej Jesús kijtoj: “Kachi yolpaktok in tagat ten tapaleuijtinemi [...] ke ne tagat ten sayo kiselia tapaleuilis” (Hech. 20:35).

Itech Ueyi Kaltamachtiloyan ompa California motemoj toni teolinia maj se motasojkamati. Robert Emmons akin tapaleuij itech nejon, kijtoj: “Sayoj timotasojkamatiskej komo tikitaj ke moneki timopaleuiskej se iuan okse. Kemansa moneki maj techpaleuikan uan no moneki maj tikinpaleuikan oksekin”. Kemaj, tinemiskej uan kuali tiyetoskej sayoj komo oksekin techpaleuiaj itech miak taman. Kemej neskayot, uelis techmakaskej tein tikuaskej oso tein ika techpajtiskej (1 Cor. 12:21). Akin motasojkamatij kiitaj tein oksekin ininka kichiuaj. Komo ijkon, ¿timomattokej titetasojkamatiliskej?

Okse taman keyej moneki timotasojkamatiskej yejua porin kichiua maj okachi titanemilikan itech tein kuali. Totanemilil kiselia  seki taman uan okseki taman kiixtopeua. Yejua ika, akin motasojkamatij okachi tanemiliaj itech tein kuali uan amo semi itech ininkuejmoluan. Ijkon kemej okachi timotasojkamatij, okachi tikitaj tein kuali uan nejon kichiua maj okachiok timotasojkamatikan. Komo okachi itech titanemiliaj tein uelis tiktasojkamatiskej, kichiuas maj ‘nachipa timoyolpaktijtinemikan porin tipoutinemij iuan Totekotsin Jesús’, ijkon kemej kijtoj tatitanil Pablo (Filip. 4:4).

Komo timotasojkamatij, amo titanemiliskej itech tein amo kuali. Amo uelis timotasojkamatiskej uan no titanexikoluiskej, titayokoxtoskej oso tikualantoskej. Uan no, akin motasojkamatij amo kitemouaj motomintiskej porin yolpakij ika tein kipiaj uan amo kitemouaj okachi kipiaskej (Filip. 4:12).

Akin tikchiuaj kemej Cristo tikmatij ke Satanás kiuelitaskia maj ouijkayomej tein axkan tikixnamikij kichiuakan maj timosenkauakan uan maj timotayokoltikan. Kiuelitaskia maj amo titanemilikan kemej moneki uan maj amo teyi tikuelitakan porin nejon kichiuaskia maj amo kuali titanojnotsakan. Komo timotasojkamatij no tiknextiaj okseki itakilo espíritu. Kemej neskayot, tiyolpakij porin tikitaj tein kuali tein Dios techmakani uan titakuaujtamatij itech tein yejuatsin motenkaua kichiuas (Gál. 5:22, 23).

Tiitekitikauan Dios tikitaj ke semi moneki tein kijtoua nejin tamachtilis. Sayoj ke no tikmatij ke kemansa ouij se motasojkamatis uan se tanemilis itech tein kuali porin titajtakolejkej, sayoj ke maj amo tikauakan maj nejon techtsakuili. Uelis okachi tiknextiskej ke timotasojkamatij uan nochipa ijkon tikchiuaskej. ¿Keniuj? Maj mojmostaj tiknemilikan toni taman uelis tiktasojkamatiskej. Ijkon kemej okachi tikchiuaskej, okachi amo ouij timotasojkamatiskej. Uan okachi tiyolpakiskej ke akin sayoj itech tanemiliaj ininkuejmoluan. Maj titanemilikan itech tein Dios uan oksekin toka kichiuaj tein ika techyolchikauaj, nochi tein kichiua maj tiyolpakikan. Hasta no uelis mojmostaj tikijkuiloskej ome oso eyi taman tein uelis tiktasojkamatiskej.

Tamatinij kiitanij ke komo nochipa timotasojkamatij kichiua maj totanemilil kuali tekiti uan maj kuali timomachilikan. Akin motasojkamati okachi yolpaki. Yejua ika maj okachi tikitakan tein kuali tein tikpiaj, maj timoyolpaktikan ika tein kuali tein techpanoua uan maj nochipa timotasojkamatikan. Maj amo tikelkauakan tein kuali tein techpanoua, ta maj tikchiuakan nejin tein Biblia kijtoua: “Xiktasojkamatilikan Jiova porin semi yolkuali”. Kemaj, maj nochi tiktasojkamatikan (1 Crón. 16:34; 1 Tes. 5:18).