1. ¿Keyej kijtoj Jesús ke imomachtijkauan kemej yeskiaj ichkamej?

JESÚS kijtoj ke yejua uan imomachtijkauan kemej yeskiaj se ichkatajpixkej iuan iichkauan (Juan 10:14). Uan kinamiki maj ijkon kijtouani, porin ichkamej kitenixmatij ininichkatajpixkauj uan kichiuaj tein kinnauatia. Se takat kiitak ke melauj nejin. Yejua kijtoj: “Tiknekiaj tikinfotojkixtiskej seki ichkamej, yejua ika tiktemojkej tikchiuaskej maj motokianij, sayoj ke amo techtojtokakej porin amo techtenixmatiaj. Ompa ajsik se okichpil, akin katka ininichkatajpixkauj, uan keman kinnotsak niman kitojtokakej”.

2, 3. 1) ¿Keniuj kinextiaj imomachtijkauan Jesús ke kikakij? 2) ¿Toni tikitaskej itech nejin tamachtilis uan tein kisentoka?

² Tein kipanok nejon takat techelnamiktia tein Jesús kijtoj ke kichiuaskiaj iichkauan, tein kijtosneki, imomachtijkauan. Yejua kijtoj: “Yejuan [...] kitakamatiske [oso kikakiskej] notajtoluan” (Juan 10:16). Sayoj ke Jesús yetok iluikak. Komo ijkon, ¿keniuj uelis tikakiskej? Komo timomachtiaj tein tamachtij uan tikchiuaj (Mat. 7:24, 25).

³ Itech nejin tamachtilis uan tein kisentoka tikitaskej seki taman tein Jesús tamachtij, seki tein moneki amo tikchiuaskejok uan seki tein moneki tikchiuaskej. Yekinika, maj tikitakan ome taman tein techiluia ke moneki amo tikchiuaskejok.

4. Kemej kijtoua Lucas 12:29, ¿toni uelis kichiuas maj ‘timoyolkuejmolokan mostaj mostaj’?

⁴ (Xikonixtajtolti Lucas 12:29). Jesús kiniluij imomachtijkauan: “Amo xiknemilijtinemikan uan ximoyolkuejmolokan de toni nankikuaske uan de toni nantayiske mosta mosta”. Uan tikmatij ke nejin tayolmajxitilis nochipa tapaleuia. Maski tiknekij tiktakamatiskej, kemansa ouij techkisa. ¿Keyej?

5. ¿Keyej seki tokniuan semi motekipachouaj?

 ⁵ Seki tokniuan xa semi kintekipachoua toni kikuaskej, toni motaliliskej uan kani nemiskej. Xa nemij itech se altepet kampa semi tatasojti uan ouij kinkisa kiajsiskej tekit. Xa tomin tein kitanij amo kinajsi para kinixpanoltiskej ininchankauan. Oso akin kinixpanoltiaya xa momikilij uan amo kipiajok keniuj moixpanoltiskej. Uan no, kokolis COVID-19 kichiuani maj miakej amo kipiakanok tekit (Ecl. 9:11). Komo tikpanouanij semej nejin ouijkayomej oso okse taman ouijkayot, ¿toni techpaleuis maj amo timotekipachokanok kemej Jesús tayolmajxitij?

6. Xikonijto tein kipanok se tonal tatitanil Pedro.

⁶ Se tonal, tatitanil Pedro uan okseki tatitanilmej yajtoyaj itech se barco itech ueyiat ompa Galilea uan semi chikauak kiouia. Ompa, yejuan kiitakej ke Jesús nejnentiaya aixko. Pedro kijtoj: “Totekotsin, komo melau Tejuatsin, xikchiua ke ma no niueli ninejnemi aixko para nimitsajsitiu kampa tionualajtok”. Keman Jesús kiluij: “Xiuiki”, “Pedro pantemok den barco uan peuak nejnemi aixko para kajsitiu kampa Jesús ualaya. Uan kuak moyolnemilij in Pedro kenin chikaukaejekaya, ijkuakon peuak momoutia uan peuak pankalaktiu ya tech in at. Uan de ompa kitsajtsilij  Jesús ijkuin: ‘Notekotsin, xinechpaleui uan xinechmakixti’. Ijkuakon nimantsin momatilanak Jesús uan kimakitskij”. Keman Pedro kiitstoya Jesús uelik nejnemik aixko, sayoj ke keman kiitak chikaujkakiouit, mouik uan peuak pankalaki (Mat. 14:24-31).

7. ¿Toni techmachtia tein kipanok Pedro?

⁷ Tein kipanok Pedro techmachtia se taman. Keman temok uan peuak nejnemi aixko, amo kinemilij ke teisa kitapololtiskia uan ke peuaskia pankalakis itech at. Yejua kinekia ajsis hasta kampa yetoya Jesús, sayoj ke amo uelik porin peuak kiita chikaujkakiouit. Melauj ke tejuan amo ueli tinejnemij aixko, sayoj ke tikpanouaj ouijkayomej tein kichiuaj maj monexti ox chikauak totakuaujtamatilis. Komo amo tikelnamikij Jiova uan tein kijtoua ke kichiuas, totakuaujtamatilis peuas kaxanis kemej yeskia tipankalakiskiaj itech at. Yejua ika, maski tikpiaskej uejueyi ouijkayomej, maj tikelnamikikan ke Jiova uelis techpaleuis. ¿Keniuj uelis tikchiuaskej nejon?

8. ¿Toni techpaleuis maj amo semi ika timotekipachokan keniuj timoixpanoltiskej?

⁸ Maj amo ika timotekipachokan kuejmolmej tein tikpiaj, ta maj titakuaujtamatikan iuan Jiova. Maj tikelnamikikan ke yejuatsin kijtoua ke komo tiktayekanaltiaj itech tonemilis techmakas nochi tein monekis (Mat. 6:32, 33). Yejuatsin nochipa kichiuani nejin (Deut. 8:4, 15, 16; Sal. 37:25). Komo Jiova kinyekpia totomej uan xochimej, amo moneki techtekipachos toni tikuaskej tejuan oso toni timotaliliskej (Mat. 6:26-30; Filip. 4:6, 7). Netasojtalis kinolinia tetatmej maj kinixpanoltikan ininkoneuan. No ijkon, netasojtalis kiolinia toTajtsin Jiova maj kinmaka itekitikauan nochi tein moneki. Kemaj, uelis titakuaujtamatiskej ke Jiova techyekpias.

9. ¿Toni mitsonmachtia tein kinpanok se tokniuj takat uan inamik?

⁹ Maj tikitakan tein kinpanok seki tokniuan, tein kinextia ke Jiova uelis techmakas tein monekis. Achto ke mochiuaskia ininnechikol, se tokniuj takat uan inamik akin precursores, kinkuitoj seki tokniuan siuamej akin nemiaj kampa kinkalotiaj akin ualeuaj okse altepet. Kinkuitoj itech inincarro tein soltikya katka uan uejkaujkej panoua se hora. Tokniuj takat kijtoj: “Keman tamik nechikol, tikiniluijkej tokniuan siuamej maj yanij takuatij tokalijtik. Sayoj ke tikelnamikkej ke amo teyi tikpiayaj”. ¿Toni kichiuaskiaj? Tokniuj kijtoj: “Keman tiajsikej, kaltenoj yetoya ome uejueyi bolsa tein kipiaya miak takual. Amo tikmatiaj akoni kikauato. Jiova techyekpiak”. Satepan, inincarro nejin tokniuan uejueliuik, uan monekia kiyektaliskej porin kikuiaj itech tanojnotsalis, sayoj ke amo kipiayaj tomin. Yejuan tajtanitoj kampa kinyektaliaj carros kanachi kinkisaskia kiyektaliskej. Keman ompa yetoyaj, se takat tajtanik akoni iaxka katka nejon carro. Tokniuj takat kiluij ke yejua iaxka katka uan ke monekia kiyektaliskej. Takat kinankilij: “Nonamik kineki se carro kemej nejin uan kineki nejin color. ¿Kanachi ika tikonkaua?”. Tokniuj kinamakiltij icarro uan tomin kiajsiskia para kikouas okse. Tokniuj kijtoj: “Semi tiyolpakkej nejon tonal. Tikmatiaj ke nejon amo sayoj ijkon panoka, ta Jiova kichiujka maj pano”.

10. ¿Keniuj techpaleuia Salmo 37:5 maj amo ika timotekipachokan keniuj timoixpanoltiskej?

¹⁰ Keman amo semi ika timotekipachouaj keniuj timoixpanoltiskej kemej tayolmajxitij toichkatajpixkauj Jesucristo, uelis titakuaujtamatiskej ke Jiova techmakas nochi tein monekis (xikonixtajtolti Salmo 37:5;  1 Ped. 5:7). Maj itech titanemilikan ouijkayomej tein ika titajtojkej itech  párrafo 5. Hasta axkan, Jiova xa kichiuani maj tikpiakan tein ika timoixpanoltiskej itechkopa tonamik oso topopaj oso akin tiktekitiliaj. Sayoj ke komo tonamik oso topopaj amo ueliok techixpanoltia oso amo tikpiajok tekit, Jiova ipa techmakas tein monekis. Axkan maj tikitakan okse taman tein Jesús techiluia ke moneki amo tikchiuaskejok.

11. Kemej kijtoua Mateo 7:1, 2, ¿toni kijtoj Jesús ke amo moneki tikchiuaskejok, uan keyej xa ouij techkisa?

¹¹ (Xikonixtajtolti Mateo 7:1, 2). Jesús kimatia ke titajtakolejkej uan ke miakpa tikitaj ininnepololuan oksekin. Yejua ika kijtoj: “Amo xikinixkomak[a]tinemikan [...] aksame”. Uan maski tiktemouaj amo tikitaskej ininnepololuan tokniuan, kemansa ouij techkisa. ¿Toni uelis tikchiuaskej? Maj tikakikan Jesús uan maj timochikauakan ‘amo tikinixkomakatinemiskej aksameʼ.

12, 13. ¿Keniuj techpaleuia kemej Jiova kinita oksekin?

¹² Komo itech titanemiliaj keniuj kinita Jiova taltikpakneminij techpaleuis, porin yejuatsin kiita tein kuali. Ijkon kichiuak iuan tekiuaj David, akin miakpa ueyi tajtakoj. Kemej neskayot, auilnemik iuan Bat-Seba uan hasta kichiuak maj kimiktianij inamik (2 Sam. 11:2-4, 14, 15, 24). Ika tein kichiuak amo sayoj yejua motajyouiltij, ta no kintajyouiltij ichankauan, kemej siuamej akin no iniuan monamiktijka (2 Sam. 12:10, 11). Se tonal, tanauatij maj kinpouanij kanachin tateuianij moajsiaj itech xolal Israel. Ijkon kinextij ke amo senkis takuaujtamatia iuan Jiova. Xa moueyimatik uan yejua ika takuaujtamatik itech itateuijkauan. Nejin kichiuak maj se ueyi kokolis oso kokoxkayot kinmiktiani 70,000 israelitas (2 Sam. 24:1-4, 10-15).

¹³ Komo tinemiskiaj itech xolal Israel itech nejon tonalmej, ¿keniuj tikitaskiaj tein kichiuak David? ¿Amo kuali ika titajtoskiaj uan tikijtoskiaj ke amo kinamikia maj Dios kiikneli? Jiova amo ijkon kiitak, ta itech tanemilij ke David miakpa kichiujka tein kuali uan ke satepan ke tajtakoj yekmelauj moyolnonotsak. Yejua ika kitapojpoluij. Kimatia ke David semi kitasojtaya uan ke kinekia kichiuas tein kuali. ¿Melauj ke semi tiktasojkamatij maj Dios kiita tokualneskayouan uan tein kuali tein tikchiuaj? (1 Rey. 9:4; 1 Crón. 29:10, 17).

14. ¿Toni kinpaleuiani seki tokniuan maj amo kiitakan ininnepololuan oksekin?

¹⁴ Jiova amo kichia maj amo timopolokan porin kimati ke titajtakolejkej. Yejua ika tejuan amo monekiskia tikchiaskej maj oksekin amo mopolokan, ta moneki tikitaskej ininkualneskayouan. Amo ouij tekisa se kiitas ininnepololuan oksekin uan se kinijijtos, sayoj ke akin kichiua kemej Jiova, kuali mouika iniuan oksekin maski kimati itech toni mopolouaj. Se diamante tein ayamo tatejtek amo kualtsin moita, sayoj ke taltikpaknenkej akin tamatkej kimati ke satepan ke kitejtekiskej uan kialaxoskej semi kualtsin moitas. Ijkon kemej Jiova uan Jesús, moneki tikitaskej ininkualneskayouan oksekin uan amo ininnepololuan.

15. ¿Keniuj techpaleuis maj amo tikinijijtokan oksekin komo itech titanemiliaj tein kipanotokej?

¹⁵ Tikitaskej ininkualneskayouan oksekin techpaleuis maj amo tikinijijtokan. ¿Toni okse taman no techpaleuis? Maj tiknemilikan toni xa kipanouaj. Maj tikitakan se neskayot. Se tonal keman Jesús yetoya templo, kiitak se siuatsin akin amo nemiaok inamik uan  kipanotoya tatasojtilis. Nejon siuatsin kipantalij ome tomintsin itech semej kaxontsitsin kampa kitemakayaj tomin. Jesús amo tajtanik keyej amo kitemakaka okachi, ta kiitak toni kiolinij maj kitemakani uan tein kipanotoya. Jesús kuali ika tajtoj nejon siuatsin porin kitemakaka nochi tein kipiaya (Luc. 21:1-4).

16. ¿Toni mitsonmachtia tein kipanok Verónica?

¹⁶ Tein kipanok Verónica kinextia keyej moneki se kinemilis toni xa kipanotokej oksekin. Itech inechikol moajsia se tokniuj siuat akin iselti kiiskaltijtoya iokichpil. Verónica kijtoua: “Niknemiliaya ke amo semi yayaj nechikolmej uan ke amo semi tanojnotsayaj, uan yejua ika amo kuali nikinitaya. Sayoj ke se tonal nitanojnotsato iuan tokniuj siuat. Nechtapouij nochi ouijkayomej tein kipiaya porin iokichpil kipiaya se kokolis itech itsontekon. Yejua mochikauaya kiixpanoltis uan kipaleuis maj kuali mouika iuan Jiova. Kemej iokichpil kemansa amo kuali momachiliaya, monekia yas nechikolmej okseko”. Verónica no kijtoua: “Amo keman niknemilij ke semi ouij tein kipanotoya. Axkan semi nikpatiuita uan nikpoujkaita porin semi mochikaua kitekitilis Jiova”.

17. ¿Toni tanauatil moajsi itech Santiago 2:8, uan keniuj uelis tiktakamatiskej?

¹⁷ ¿Toni monekiskia tikchiuaskej komo tikitaj ke tikijijtouanij se tokniuj? Maj tikelnamikikan ke moneki tikintasojtaskej tokniuan  (xikonixtajtolti Santiago 2:8). Uan no, moneki tikchiuaskej netataujtil uan tiktajtaniskej Jiova maj techpaleui maj amo tikijijtokanok nejon tokniuj. Uan uelis tiktemoskej iuan titajtoskej. Ijkon tikchiujtoskej tein tiktajtanijkej Jiova. Keman iuan titajtoskej uelis techpaleuis maj tikixmatikan. No uelis tikyoleuaskej maj touan tanojnotsati oso maj touan takuati. Ijkon kemej tikixmattiaskej tokniuj, uelis tikitaskej toni kualneskayomej kipia, ijkon kemej kichiuaj Jiova uan Jesús. Ijkon tiknextiskej ke amo tikinijijtouajok oksekin kemej tanauatij toichkatajpixkauj Jesucristo.

18. ¿Keniuj tiknextiaj ke tikakij itajtol toichkatajpixkauj Jesucristo?

¹⁸ Ijkon kemej ichkamej kikakij itajtol ininichkatajpixkauj, tiimomachtijkauan Jesús no tikakij itajtol. Komo timochikauaj amo ika timotekipachoskejok keniuj timoixpanoltiskej uan timochikauaj amo titeijijtoskejok, Jiova uan Jesús techtatiochiuiskej. Komo timoajsij iniuan ichkamej ‘tein amo miakej’ oso iniuan ‘okseki ichkamej’, maj tinochin tiksentokakan tikakikan uan tiktakamatikan itajtol toichkatajpixkauj Jesucristo (Luc. 12:32, TNM; Juan 10:11, 14, 16). Itech tamachtilis tein kisentoka, tikitaskej ome taman tein Jesús kijtoj ke moneki tikchiuaskej tiimomachtijkauan.