1. ¿Keniuj kinankilia Jehová inetataujtiluan se tokniuj?

 KEMAN se tokniuj kitataujtia Jehová maj kipaleui, yejuatsin uelis kichiuas maj tejuan tikpaleuikan. Uan nejin nochin uelis kichiuaskej, uelis yeski tayekananij, tapaleuianij, precursores, tanojnotsanij, telpochmej uan ichpochmej, akin xiuejkejya, takamej oso siuamej. Keman aksa akin kitasojta Jehová kitataujtia maj kipaleui, yejuatsin uelis kichiuas maj tayekananij oso okseki itekitikauan ‘kiyolchikauakan’ (Col. 4:11). Semi techyolpaktia ijkon tiktekitiliskej Jehová uan tikinpaleuiskej tokniuan. Uelis tikchiuaskej nejin keman onkas se ueyi kokolis, keman mochiuas se tetsauit oso keman techtajyouiltiskej.

2. ¿Keyej ouij techkisa tikinpaleuiskej tokniuan keman mochiua se ueyi kokolis?

² Keman mochiua se ueyi kokolis xa okachi ouij techkisas timosenpaleuiskej. Xa tiknekiskej tikinitatiuij tokniuan sayoj ke amo ueli. Oso xa tikuelitaskiaj tikinyoleuaskej tokniuan akin amo semi kipiaj tomin maj takuatij tochan, sayoj ke amo no ueli. Xa tikuelitaskiaj tikinpaleuiskej oksekin, sayoj ke tochankauan no tajyouijtokej. Maski ijkon, tiknekij tikinpaleuiskej tokniuan uan Jehová semi yolpaki keman kiita ke tikchiuaj nochi tein tiuelij (Prov. 3:27; 19:17). ¿Toni uelis tikchiuaskej?

3. ¿Toni techmachtia tein kichiujkej tayekananij itech inechikol Desi? (Jeremías 23:4).

³ Tein uelis kichiuaskej tayekananij. Komo tejuatsin tiontayekankej, kuali xikonixmati tokniuan (xikonixtajtolti Jeremías 23:4). Desi, akin ika titajtojkej itech tamachtilis 51, kijtoua: “Tayekananij akin yetokej itech nogrupo tanojnotsayajya  nouan uan iniuan okseki tokniuan, uan no kichiuayaj okseki taman touan”. b Nejin tapaleuij maj tayekananij amo ouij kinkisani kipaleuiskej Desi keman peuak kokolis COVID-19 uan momikilijkej seki ichankauan.

4. ¿Keyej tayekananij uelik kipaleuijkej Desi uan toni kinmachtia tayekananij nejin?

⁴ Desi kijtoua: “Tayekananij katkajya notasojikniuan, yejua ika amo ouij nechkisak nikiniluis keniuj nimomachiliaya uan tein nechtekipachouaya”. ¿Toni kinmachtia tayekananij nejin? Moneki nankinyekpiaskej tokniuan uan namochiuaskej inintasojikniuan achto ke kipanoskej se ouijkayot. Komo amo ueli nankinkalpanouaj porin onkak se kokolis tein temaua, xiktemokan keniuj uelis namonojnotsaskej iniuan. Desi kijtoua: “Kemansa, itech se tonal, miakej tayekananij nechnotsayaj oso nechtajkuilouiliayaj. Textos tein nechixtajtoltiliayaj oso nechijkuilouiliayaj semi nechyolchikauaya, maski ipa kuali nikinixmatiaya”.

5. ¿Keniuj uelis kimatiskej tayekananij toni kinpoloua tokniuan uan keniuj uelis kinpaleuiskej?

⁵ Tayekananij uelis kinpaleuiskej tokniuan komo amo kintajtaniaj teisa tein uelis kinpinaujtis (Prov. 20:5). ¿Kipiaj tein ika moixpanoltiskej oso tein ika mopajtiskej? ¿Ueliskia kipoloskej inintekiuj oso ininchan? ¿Moneki maj tikinpaleuikan para maj no kiselikan tein tekiuaj ika tapaleuia? Keman Desi kipanotoya se ouijkayot, tokniuan kimakakej tein kipolouaya. Sayoj ke okachi kipaleuij keman tayekananij kinextilijkej ke kitasojtayaj uan kiyolchikaujkej ika Biblia. Desi kijtoua: “Tayekananij nouan motataujtiayaj. Amo nikelnamiki nochi tein kijtouayaj, sayoj ke kemaj nikelnamiki keniuj nimomachiliaya. Kemej yeskia Jehová nechiluijtoya ‘Amo tietok moselti’” (Is. 41:10, 13).

6. ¿Keniuj uelis timosenpaleuiskej itech nechikol? (Xikonita taixkopimej).

⁶ Tein uelis kichiuaskej tokniuan itech nechikol. Tikmatij ke tayekananij ipa kinyekpiaj tokniuan. Sayoj ke Jehová kineki maj tinochin tikinyolchikauakan uan maj tikinpaleuikan oksekin (Gál. 6:10). Keman tiknextiaj ke tiktasojtaj aksa akin mokokoua, maski amo tikchiuaskej teisa tein ueyi, uelis semi kiyolchikauas. Konemej uelis kijkuiloskej se tarjeta oso kichijchiuaskej se dibujo uan kimakaskej se tokniuj. Oso sekin  uelis kitakualchiuiskej aksa akin mokokoua uan kikauilitiuij ichan. Keman miakej momauaj ika se kokolis, tinochin moneki maj techyolchikauakan. Yejua ika, semi kuali komo keman tiouij nechikol oso timosentiliaj ika videoconferencia, timokauaj tepitsin keman tami nechikol para titajtoskej iniuan tokniuan. Tayekananij no moneki maj kinyolchikauakan. Seki tokniuan kinijkuilouiliaj tayekananij teisa tein ika kintasojkamatiliaj tein kichiuaj, porin keman onkak se ueyi kokolis okachi kipiaj tekit. Semi kuali maj tinochin timochikauakan tikchiuaskej tein kijtoua nejin texto: “Xiksentokakan ximoyolchikauakan uan ximopaleuijtiakan se iuan okse” (1 Tes. 5:11).

7. ¿Toni uelis panos keman mochiua se tetsauit?

⁷ Se tetsauit uelis kichiuas maj sepasan mopata kemej nemi aksa. Xa uelis kipolos tein kipia oso ichan. Xa no uelis momikilis aksa akin kitasojta. Uan nejin no kinpanoua tokniuan. ¿Keniuj uelis tikinpaleuiskej?

8. ¿Toni moneki kichiuaskej tayekananij uan tetatmej achto ke mochiuas se tetsauit?

⁸ Tein uelis kichiuaskej tayekananij. Tayekananij, xikinpaleuikan tokniuan maj kimatikan toni kichiuaskej achto ke mochiuas se tetsauit. Xikitakan maj nochin tokniuan itech nechikol kimatikan toni kichiuaskej para mopaleuiskej uan para uelis namechnotsaskej. Margaret, akin ika titajtojkej itech tamachtilis 51, kijtoua: “Itech se tanojnots kampa techiluiaj tein moneki tikchiuaskej kemej nechikol, tayekananij techelnamiktijkej ke kampa ika tinemiaj ueliskiaok motatikuis uan ke maj niman tikisanij komo tekiuanij ijkon tanauatiayaj oso komo tikitayaj ke okachi motatikuia”. Nejon tanojnots semi tapaleuij porin makuil semanas satepan semi motatikuik. Tetatmej, keman nantaueyichiuaskej kemej kalyetouanij ika xitajtokan tein moneki nankichiuaskej keman mochiuas se tetsauit. Komo tejuatsin uan namokoneuan nankimatijya toni nankichiuaskej, namechpaleuis amo semi ximomoujtikan keman mochiuas se tetsauit.

9. ¿Toni moneki kichiuaskej tayekananij achto uan satepan ke mochiuas se tetsauit?

⁹ Komo tejuatsin tikonixyekana se grupo itech tanojnotsalis, amo xikonchia hasta maj mochiua se tetsauit para tikonitas ox tikonpia ininnúmero uan tikonmati kani nemij tokniuan akin tikonixyekana. Xikonijkuilo nochi uan xikonpata keman monekis. Ijkon, keman mochiuas se tetsauit, uelis tikonnotsas sejse tokniuj uan tikonitas keniuj uelis nankinpaleuiskej. Keman tiontajtosya iniuan tokniuan xikonmatilti tein mitsoniluiskej, tokniuj akin kinixyekana oloch tayekananij itech nechikol uan yejua kinotsas tokniuj takalpanojkej. Keman nochin sentekitij semi tapaleuia. Satepan ke motatikuik, tokniuj akin takalpanouaya itech inechikol Margaret, amo kochik 36 horas porin kiitstoya maj tayekananij kinnotsanij uan kinpaleuianij kemej 450 tokniuan akin kiskaj de ininchan (2 Cor. 11:27). Nejon semi tapaleuij, porin tokniuan akin amo kipiayaj kani mokauaskej uelik kinajxilijkej.

10. ¿Keyej semi moneki maj tayekananij kinyekpiakan tokniuan itech nechikol? (Juan 21:15).

¹⁰ Jehová kinnauatia tayekananij maj kinyekpiakan uan maj kinyolchikauakan ika Biblia tokniuan akin tajyouijtokej (1 Ped. 5:2). Keman mochiua se tetsauit, yekinika moneki kiitaskej maj sejse tokniuj kuali yeto, maj kipia toni kikuas, toni motalilis uan kani mokauas. Sayoj ke xa monekis maj miak metsti kisentokakan kinpaleuikan uan maj kiyolchikauakan ika Biblia  (xikonixtajtolti Juan 21:15). Harold, semej akin taixyekana itech se kali Betel uan tajtouani iniuan tokniuan akin tajyouianij porin mochiuak se tetsauit, kijtoua: “Amo ueli niman kielkauaj tein mochiuak. Tokniuan xa mochikauaskej nemiskej kemej achto, sayoj ke komo momikilij aksa akin kitasojtayaj, kipolojkej teisa tein kipatiuitayaj oso yaya momikilitij, ipa oksepa kielnamikiskej. Keman kielnamikij tein kinpanok, uelis oksepa motayokoltiskej. Nejin amo kijtosneki ke amo takuaujtamatijok, ta ipa ijkon se momachilia”.

11. ¿Keniuj monekis kinpaleuiskej kalyetouanij akin kipanouanij se tetsauit?

¹¹ Semi moneki maj tayekananij kichiuakan tein kijtoua nejin texto: “Xichokakan iniuan akin chokaj” (Rom. 12:15). Akin kipanouanij se tetsauit, moneki maj kinelnamiktikan ke Jehová uan tokniuan kisentokaj kintasojtaj. Tayekananij uelis kinpaleuiskej kalyetouanij maj kisentokakan kiueyichiuakan Jehová, maj motataujtikan, maj momachtikan, maj yakan nechikolmej uan maj tanojnotsakan. No uelis kinyolchikauaskej tetatmej maj kinpaleuikan ininkoneuan maj kielnamikikan tein okachi moneki. Tetatmej, xikinelnamiktikan namokoneuan ke Jehová nochipa yeski namotasojikniuj uan nochipa yetos namouan. Xikiniluikan ke tokniuan akin moajsij itech nochi taltikpak nochipa yeskij kemej ininchankauan uan nochipa kinpaleuiskej (1 Ped. 2:17).

12. ¿Keniuj tokniuan itech nechikol uelis tapaleuiskej keman mochiua se tetsauit? (Xikonita taixkopin).

¹² Tein uelis kichiuaskej tokniuan itech nechikol. Komo kampa ika tionnemi mochiuak se tetsauit, xikontajtani tayekananij keniuj uelis tiontapaleuis. Xa uelis tiontetaneujtis mochan para maj ompa mokauakan tokniuan akin kiskej de ininchan oso akin tapaleuiaj keman mochiua se tetsauit. Xa uelis tiontapaleuis maj motemaka tein kikuaskej uan okseki taman tein moneki. Uan komo tetsauit mochiuak uejka, no uelis tiontapaleuis. ¿Keniuj? Ininka xionmotataujti akin tajyouijtokej uan xiontapaleui ika tomin (2 Cor. 1:8-11; 8:2-5). Uan komo ueli tionyoui kampa mochiuak se tetsauit, xikontajtani tayekananij keniuj uelis tiontapaleuis. Uan komo mitsonyoleuaj xiontapaleuiti, xa achto mitsonmachtiskej para ijkon tiontapaleuis keman okachi monekis uan kampa okachi monekis.

13. ¿Toni ouijkayomej kipanouaj tokniuan akin nemij kampa tekiuanij amo kinkauaj maj kiueyichiuakan Jehová?

¹³ Tokniuan okachi tajyouiaj komo nemij kampa tekiuanij amo kinkauajok maj kiueyichiuakan Jehová. Nejin tokniuan kisentokaj amo kipiaj tomin, kokoxkakuij oso kokolispeuaj uan momikilia aksa akin kitasojtaj. Tayekananij xa amo ueli kisaj kemej achto oso xa amo semi ueli kinnojnotsaj tokniuan para kinyolchikauaskej. Yejua nejon tein kipanok Andréi, akin ika titajtojkej itech tamachtilis 51. Se tokniuj siuat itech inechikol amo semi kipiaya tein ika moixpanoltis uan satepan semi mokokoj keman yaya itech carro. Miakpa monekik kitekiskej uan amo uelia tekitia. Maski tekiuanij amo kinkauayaj maj kichiuakan seki taman uan momoyaujtoya kokolis COVID 19, tokniuan kichiujkej nochi tein uelkej para kipaleuiskej. Jehová kiitaya tein tokniuj siuat kipanotoya, yejua ika kichiuak maj kipaleuianij.

14. ¿Keniuj tayekananij kinextiaj ke takuaujtamatij iuan Jehová?

¹⁴ Tein uelis kichiuaskej tayekananij. Andréi kitataujtij Jehová uan kichiuak nochi tein uelik. ¿Uan keniuj kinankilij Jehová? Yejuatsin kichiuak maj okseki tokniuan akin okachi uelia kisayaj kipaleuianij nejon tokniuj siuat. Sekin kiuikayaj iuan tapajtijkej uan oksekin kipaleuiayaj ika tomin. Jehová kintiochiuak porin mosenpaleuijkej uan porin kinextijkej ke katkaj yolchikaujkej (Heb. 13:16). Tokniuan tayekananij, keman tekiuanij amo techkauaskej maj tikueyichiuakan Jehová, xikiniluikan oksekin maj namechpaleuikan (Jer. 36:5, 6). Sayoj ke, okachi xiktemokan maj Jehová namechpaleui. Yejuatsin kichiuas maj ueli xikinpaleuikan tokniuan.

15. ¿Toni moneki tikchiuaskej para kuali timouikaskej iniuan tokniuan keman techtajyouiltiskej?

¹⁵ Tein uelis kichiuaskej tokniuan itech nechikol. Keman techtajyouiltiskej, xa amo mimiakej timosentiliskej. Yejua ika, okachi moneki maj kuali timouikakan iniuan oksekin. Maj tikixnamikikan Satanás, amo tokniuan. Maj tikintapojpoluikan tokniuan keman mopolouaj uan maj niman tikyektalikan tein yeski kuejmol tein tikpiaskej iniuan (Prov. 19:11; Efes. 4:26). Maj tiktemokan timopaleuiskej se iuan okse (Tito 3:14). Semi kinpaleuij nochin keman Andréi uan okseki tokniuan kipaleuijkej nejon  tokniuj siuat. Peuak okachi kuali mouikaj kemej yeskia kalyetouanij (Sal. 133:1).

16. Kemej kijtoua Colosenses 4:3, 18, ¿keniuj uelis tikinpaleuiskej tokniuan akin kinixnamikij?

¹⁶ Tel miakej tokniuan kitekitiliaj Jehová maski tekiuanij kinixnamikij. Seki tokniuan tsaktokej porin kiueyichiuaj Jehová. Maj ininka timotataujtikan yejuan uan ininchankauan. Maj no ininka timotataujtikan tokniuan akin kinpaleuiaj maj kuali mouikakan iuan Jehová, maj kipiakan nochi tein kinpoloua uan kintajtouiaj ininixpan tekiuanij, maski keman kichiuaj nejin no uelis kintsakuaskej (xikonixtajtolti Colosenses 4:3, 18). c Maj amo keman tikelkauakan ke tonetataujtiluan uelis semi kinpaleuis nejin tokniuan (2 Tes. 3:1, 2; 1 Tim. 2:1, 2).

17. ¿Toni moneki tikchiuaskej axkan tein techpaleuis keman techtajyouiltiskej?

¹⁷ Tejuatsin uan mochankauan moneki nankiitaskej toni nankichiuaskej keman namechixnamikiskej (Hech. 14:22). Amo xiknemilikan tein amo kuali tein uelis panos, ta xiktemokan okachi kuali namouikaskej iuan Jehová uan xikinpaleuikan namokoneuan maj no ijkon kichiuakan. Komo kemansa semi namotekipachouaj, xiktapouikan Jehová keniuj namomachiliaj (Sal. 62:7, 8). Kemej kalyetouanij, ika xitajtokan keyej uelis nantakuaujtamatiskej iuan Jehová. d Komo tikonmatiya toni tikonchiuas keman mochiuas se tetsauit uan tiontakuaujtamati iuan Jehová, uelis tikonpaleuis mokoneuan maj yolchikaujkej uan maj amo momoujtikan.

18. ¿Keniuj tinemiskej satepan?

¹⁸ Keman Dios techyolseuia techpaleuia maj amo timomoujtikan (Filip. 4:6, 7). Ijkon, ueli tiyolseujtokej keman momoyaua se ueyi kokolis, keman mochiua se tetsauit oso keman techtajyouiltiaj. Jehová kichiua maj tayekananij techyekpiakan uan maj ueli timosenpaleuikan. Komo axkan tiyolseujtokej keman tikpanouaj ouijkayomej, uelis tiyolseujtoskej satepan keman tikpanoskej okachi uejueyi ouijkayomej, uan keman mochiuas “tetsaujkatajyouilis” (Mat. 24:21). Ijkuak, semi monekis maj amo timomoujtikan uan maj tikinpaleuikan oksekin maj amo no momoujtikan. Sayoj ke, satepan ke panos tetsaujkatajyouilis, amo tikpanoskejok ouijkayomej tein techtekipachoskej. Uelis tiyolseujkanemiskej nochipaya ijkon kemej Jehová kiixtalijka (Is. 26:3, 4).