Keman Jehová kiniluij akin nemiaj nikan taltikpak “ximomoyauakan itech taltikpak uan xikixyekanakan”, kiteajsikamatiltij ke se tonal yeskia se xochital (Gén. 1:28). Akin nemiskej nochipaya monekis kichiuaskej tein Jehová tanauatijka. Taltikpak amo niman yeski tel takualtsinkan porin xochital tein moajsia Edén ixpoliuik ne uejkaujya. Satepan ke panos Armagedón monekis semi titekitiskej para titayektaliskej kampa tauejueliujtos. ¡Tel miak tekit tikpiaskej!

Keman israelitas kiskej de Babilonia no monekik tayektaliskej kampa achto nemiaj, porin 70 xiujmej amo akin ompa nemiaok. Sayoj ke, ueliskia kichiuaskej nejon komo Jehová kinpaleuiaya ijkon kemej Isaías kijtojka: “Kichiuas maj kampa tauaktok mochiua kemej katka Edén uan kampa taltamanis kemej xochital tein Jehová kichijchiujka” (Is. 51:3). Israelitas uelik takualtsintilijkej kampa  nemiaj. No ijkon, Jehová kinpaleuis akin nemiskej nikan taltikpak maj kichiuakan se xochital. Uan axkanya uelis tikonchiuas seki taman tein kinextis ke tikonneki tiontapaleuis itech nejon tekit.

Axkan uelis tionmochikauas tiontayektalis uan tiontachipauas mokalijtik uan kampa ika tionnemi. Moneki tikonchiuas nejin maski akin ompakauin nemij amo ijkon kichiuaj. No uelis tiontapaleuis keman motachipaua itech Kali kampa tiMosentiliaj uan itech Kali kampa mochiuaj Uejueyi Nechikolmej. Uan komo tionueli, no xiontapaleui keman mochiua se tetsauit. Ijkon tikonnextis ke yekmelauj tikonneki tikonpaleuis oksekin. Xionmotajtani: “¿Ueliskia nimomachtis nikchiuas seki tekimej tein ika nitapaleuis itech xochital komo Jehová nechkaua maj ompa ninemi?”.

Keman Jesús kichiuak maj isiuapil Jairo oksepa nemi, tanauatij maj kitamakakan (Mar. 5:42, 43). Xa amo ouij katka kitamakaskej se siuapil akin kipiaya 12 xiujmej. Sayoj ke xikonnemili nochi tekit tein onkas keman Jesús kichiuas nejin tein motenkauak: “Nochin akin yetokej itech miketekochmej, kikakiskej itajtol uan ualkisaskej” (Juan 5:28, 29). Maski Biblia amo kijtoua nochi tein mochiuas, taixejekol maj se kinemili ke akin oksepa nemiskej monekis kipiaskej toni kikuaskej, kani nemiskej uan toni motaliliskej. ¿Uelis tikonnextis axkan ke tikonneki ompa tionyetos para tiontapaleuis? Itech xiontanemili nejin netajtanilmej.

Keman itech monechikol tanauatiaj ke ajsiti tokniuj akin takalpanoua, ¿tikonyoleua maj takuati mochan? Xa se tokniuj akin tekitia Betel kititankej maj tapaleuiti itech se nechikol oso xa se tokniuj akin takalpanouaya itech nechikolmej amo ueliok kichiua nejon tekit. ¿Uelis tikonpaleuis maj kiajsikan kani nemiskej? Komo kampa tionnemi mochiuati se ueyi nechikol, ¿uelis tiontapaleuis achto oso satepan ke mochiuas, oso uelis tikonselis akin uitsej de uejka?

Tein kijtoua Hechos 24:15 kichiua maj tiknemilikan ke tel miakej yeskij akin oksepa nemiskej. Miakej amo uelik kiixmatkej Jehová achto ke momikiliskiaj, sayoj ke itech xochital uelis kiixmatiskej. a Akin kitekitilianij Jehová miak xiujmej kinmachtiskej akin oksepa nemiskej (Is. 11:9). Charlotte, se tokniuj siuat akin tanojnotsani Europa, Sudamérica uan África, kitelneki maj ejko nejon tonal. Yejua yolpaki uan kijtoua: “Semi nikneki nikinmachtis akin oksepa nemiskej. Keman nikixtajtoltia tein kipanok aksa akin nemik ne uejkauj, miakpa niknemilia: ‘Komo yejua kiixmatiskia Jehová, semi taman kemej nemiskia’. Niktelneki nikintapouisya akin oksepa nemiskej akoni Jehová uan keniuj okachi kuali nemiskej komo kitekitiliaj”.

Hasta itekitikauan Jehová akin nenkej achto ke Jesús ualaskia nikan taltikpak monekis tikinmachtiskej miak taman. Semi techyolpaktis uan yeski se ueyi tatiochiualis maj tikmelauilikan Daniel keniuj mochiuak tein yejua kijkuiloj tein amo kiajsikamatik (Dan. 12:8). ¡Xikonnemili keniuj semi kualtsin yeski tiktapouiskej Rut uan Noemí ke Mesías katka se ininchankauj! Semi kualtsin yeski titapaleuiskej itech nejin tekit uan amo onkasok nion teyi tein techtsakuilis oso techtapololtis ijkon kemej axkan.

¿Keniuj uelis tikonnextis ke tikonneki tikonmachtis akin oksepa nemiskej? Uelis tikonnextis komo axkan tionmochikaua okachi kuali tiontamachtis uan okachi tiontanojnotsas (Mat. 24:14). Maski amo semi ueli tiontanojnotsa porin tionxiuejya oso porin mitsontsakuilia okseki taman, komo tionmochikaua tikonchiuas tein tionueli, tikonnextis ke tikonneki tikonmachtis akin oksepa nemiskej.

Semi moneki maj timotajtanikan nejin: ¿yekmelauj nikneki ninemis itech xochital?, ¿nechyolpaktia niknemilis ke uelis nitapaleuis maj nejin taltikpak mochiua se xochital, nikinpaleuis akin oksepa nemiskej uan nikinmachtis? Uelis tiknextiskej ke tiknekij titapaleuiskej komo axkanya tikchiuaj seki tekimej kemej tein mochiuas itech xochital.