1. ¿Keniuj techpaleuia itech titanemiliskej tein Jehová motenkaua?

 JEHOVÁ motenkaua ke akin kitakamatij ‘nemiskej nochipaya’ (Rom. 6:23). Keman itech titanemiliaj nejin tein semi kualtsin, okachi tiktasojtaj Jehová. Maj tiknemilikan nejin: kemej toTajtsin semi techtasojta, techmaka nejin kualtsin netetayokolil porin kineki maj nochipa kuali iuan timouikakan.

2. ¿Keniuj techpaleuia tikmatiskej ke Jehová motenkaua ke tinemiskej nochipaya?

² Tein Jehová motenkaua techpaleuia maj tikxikokan ouijkayomej. Uan hasta komo akin techixnamikij kinekij techmiktiskej, tiksentokaskej tiktekitiliskej Jehová. ¿Keyej? Se taman yejua porin komo timomikiliaj uan amo tikauaj Jehová, yejuatsin kichiuas maj oksepa tinemikan uan uelis tinemiskej nochipaya (Juan 5:28, 29; 1 Cor. 15:55-58; Heb. 2:15). ¿Keyej senkis tikneltokaj ke uelis tinemiskej nochipaya? Maj tikitakan seki taman.

3. ¿Keyej senkis tikneltokaj ke Jehová uelis kichiuas maj tinemikan nochipaya? (Salmo 102:12, 24, 27).

³ Tikmatij ke Jehová uelis kichiuas maj tinemikan nochipaya porin yejuatsin kichiua maj tiyoltokan uan nemi nochipaya (Sal. 36:9). Maj tikitakan seki versículos itech Biblia tein kinextiaj ke Jehová nochipa nemini uan nochipa nemis. Salmo 90:2 kijtoua ke yejuatsin ‘achto ipa nemia uan nochipa nemis’. Salmo 102 no ijkon kijtoua (xikonixtajtolti Salmo 102:12, 24, 27). Uan keman tanauatijkej Habacuc ika tajtoj toTajtsin, kijtoj: “Jehová, tejua nochipa tinemini, noDios, akin Yektik, tejua amo timiki” (Hab. 1:12).

4. ¿Keyej amo moneki timotekipachoskej komo ouij techkisa tikajsikamatiskej ke Jehová nochipa nemini?

 ⁴ ¿Ouij mitsonkisa tikonajsikamatis ke Jehová se Dios akin “nemi nochipaya”? (Is. 40:28). Amo sayoj tejuatsin ijkon mitsonpanoua, ta keman Elihú ika tajtoj Dios kijtoj: “Amo ueli tikajsikamatij kanachi xiujmej nemini” (Job 36:26). Sayoj ke, maski teisa amo tikajsikamatij amo kijtosneki ke amo melauj. Kemej neskayot, xa amo tikyekajsikamatij keniuj tekiti tit oso luz, sayoj ke nejon amo kijtosneki ke amo yekmelauj onkak. No ijkon, tejuan xa amo keman senkis tikajsikamatiskej keniuj Jehová achto ipa nemini uan nochipa nemis. Sayoj ke nejon amo kijtosneki ke amo melauj. Komo amo tikyekajsikamatij teisa de Dios amo kijtosneki ke amo melauak (Rom. 11:33-36). Uan no, Dios ipa nemiaya achto ke kichijchiuaskia nochi tein onkak, kemej Tonaltsin uan okseki sitalimej. Biblia kijtoua: “Yejua akin kichijchiuak taltikpak, tein kichijchiuak ika ichikaualis”. Uan no kijtoua: “Kichijchiuak iluikak” (Jer. 51:15; Hech. 17:24). Maj tikitakan okse taman tein techpaleuia maj tikneltokakan ke uelis tinemiskej nochipaya.

5. ¿Toni ueliskia kiseliskej Adán uan Eva?

⁵ Jehová kichijchiuak miak taman tein yoltok uan de nochi tein kichijchiuak sayoj taltikpakneminij amo keman mikiskiaj. Yejuan kinchijchiuak kemej ueliskia nemiskej nochipaya. Sayoj ke Jehová kinejmachtij Adán: “Amo xikua itakilo kouit tein kichiua maj se kiixmati tein kuali uan tein amo kuali, porin itech tonal keman tikuas yekmelauj timomikilis” (Gén. 2:17). Komo Adán uan Eva kitakamatiskiaj Jehová amo momikiliskiaj. Taixejekol maj tiknemilikan ke Dios satepan kinkauaskia maj kikuakan itakilo kouit tein kichiua maj se nemi. Nejon senkis kinmatiltiskia ke nemiskiaj nochipaya (Gén. 3:22). b

6, 7. 1) ¿Toni okseki taman kinextia ke tichijchiujtokej para uelis tinemiskej nochipaya? 2) ¿Toni tikonuelitaskia tikonchiuas keman tionnemis nochipaya? (Xikonita taixkopimej).

⁶ Se kimojkaita keniuj seki taixmatinij kiajsinij tein kinextia ke tokuatixyo ueliskia kieuas okachi miak taman ke tein kieua itech nochi tonemilis. Itech xiuit 2010, se amaix kijtoj ke moixejekoua ke tokuatixyo ueli kieua tein moita itech  se video tein uejkaua eyi millones de horas. Monekiskia 300 xiujmej para ueliskia se kitamiitas nejon video. Uan nejin sayoj moixejekoua porin tokuatixyo uelis kieuas okachiok. Sayoj ke, kinextia ke Jehová kichijchiuak tokuatixyo kemej ueliskia kieuas okachiok ke tein kieua itech 70 oso 80 xiujmej tein tinemij (Sal. 90:10).

⁷ Jehová no techchijchiuak kemej tiknekiskej tiksentokaskej tinemiskej. Kemej Biblia kijtoua, Dios “kitalij itech ininyolo taltikpakneminij maj kinekikan nemiskej nochipaya” (Ecl. 3:11). Yejua nejin se taman tein kichiua maj tikitakan ke mikilis se taman tein tel amo kuali (1 Cor. 15:26). Maj itech titanemilikan nejin. ¿Toni tikchiuaj keman tikokolispeuaj? Amo ijkon timokauaj, ta tiktemouaj keniuj timopaleuiskej. Tiouij tikitatij tapajtijkej uan tikuaj pajti tein techmakaj. Tikchiuaj nochi tein uelis para amo timomikiliskej. Uan keman momikilia aksa akin tiktasojtaj, maski xiuejya oso amo, semi timoyolkokouaj uan uejkaua ijkon timomachiliaj (Juan 11:32, 33). Tikmatij ke toTachijchiujkauj semi techtasojta, yejua ika amo techchijchiuaskia kemej tiknekiskiaj tinemiskej nochipaya komo amo ijkon kiixtalijtoskia. Sayoj ke onkak okseki taman tein techpaleuia maj tikneltokakan ke uelis tinemiskej nochipaya. Maj tikitakan seki taman tein Jehová kichiuani uan kichiujtok tein kinextia ke amo mopatani tein kiixtalijtok.

8. ¿Toni senkis techmatiltia Isaías 55:11?

⁸ Maski Adán uan Eva tajtakojkej uan kichiujkej maj ininkoneuan no momikilikan,  Jehová amo kipatani tein kiixtalijtok (xikonixtajtolti Isaías 55:11). Yejuatsin kisentoka kineki maj nemikan nochipaya akin kitakamatij. Tikmatij nejin porin kijtouani uan kichiuani miak taman para uelis kichiuas tein kiixtalijtok.

9. ¿Toni motenkauani Dios? (Daniel 12:2, 13).

⁹ Jehová motenkauani ke kichiuas maj oksepa nemikan akin momikilijkejya uan uelis nemiskej nochipaya (Hech. 24:15; Tito 1:1, 2). Job, akin amo keman kikauak Jehová, kimatia ke yejuatsin kitelneki kichiuas maj oksepa nemikan akin momikilijkejya (Job 14:14, 15). Tanauatijkej Daniel kimatia ke akin momikilijkejya oksepa nemiskiaj uan ueliskia nemiskej nochipaya (Sal. 37:29; xikonixtajtolti Daniel 12:2, 13). Judíos akin nemiaj keman Jesús yetoya nikan taltikpak, no kimatiaj ke Jehová ueliskia kichiuas maj ‘nemikan nochipaya’ itekitikauan akin amo kikauaj (Luc. 10:25; 18:18). Jesús miakpa ika tajtoj nejin tein Jehová motenkauak, uan hasta yejua oksepa nemik porin iTajtsin ijkon kichiuak (Mat. 19:29; 22:31, 32; Luc. 18:30; Juan 11:25).

10. ¿Toni kinextia keman sekin oksepa nenkej ne uejkauj? (Xikonita taixkopin).

¹⁰ Jehová yejua akin kichiua maj tiyoltokan uan sayoj yejua ueli kichiua maj oksepa nemikan akin momikilijkejya. Ika ichikaualis yejuatsin, tanauatijkej Elías kichiuak maj oksepa nemi iokichpil siuatsin akin momikilijkaya itakatsin uan nemia Sarepta (1 Rey. 17:21-23). Satepan, Dios kipaleuij tanauatijkej Eliseo para maj kichiua maj oksepa nemi iokichpil siuatsin akin nemia Sunem (2 Rey. 4:18-20, 34-37). Keman Biblia ininka tajtoua sekin akin oksepa nenkej, kinextia ke Jehová kipia chikaualis para kichiuas maj oksepa nemikan akin momikilijkejya. Uan keman Jesús yetoya nikan taltikpak senkis kinextij ke iTajtsin kimakak chikaualis para no ijkon kichiuas (Juan 11:23-25, 43, 44). Axkan Jesús moajsi ompa iluikak uan kimaktilijkej “nochi tanauatil ne iluikak uan nikan taltikpak”. Yejua ika uelis kichiuas maj “nochin akin yetokej itech miketekochmej” oksepa nemikan uan maj ueli nemikan nochipaya (Mat. 28:18; Juan 5:25-29).

11. Kemej Jehová kitemakak iKonetsin, ¿keniuj nejon techpaleuia maj ueli tinemikan nochipaya?

¹¹ ¿Keyej Jehová kikauak maj iKonetsin tajyouiani uan maj kimiktianij? Jesús kinextij keyej keman kijtoj: “Dios semi kintasojtak akin nemij nikan taltikpak, yejua ika kitemakak iKoneuj akin yojtsin uan ijkon akin itech takuaujtamatis amo ixpoliuis, ta nemis nochipaya” (Juan 3:16). Keman kitemakak iKonetsin para techtapojpoluis totajtakoluan, Dios kichiuak maj ueli tikchiakan tinemiskej nochipaya (Mat. 20:28). Tatitanil Pablo kimelauak nejin keman kijtoj: “Kemej peuak timomikiliaj itechkopa sayoj se takat, akin momikilijkejya no oksepa nemiskej itechkopa sayoj se takat. Porin ijkon kemej itechkopa Adán nochin momikilijtokej, no ijkon itechkopa Cristo nochin oksepa nemiskej” (1 Cor. 15:21, 22).

12. ¿Keniuj iTaixyekanalis Dios tapaleuis maj mochiua tein yejuatsin kineki?

¹² Jesús kinmachtij itatojtokakauan maj tajtanikan maj taixyekanaki iTaixyekanalis Dios uan maj mochiua tein yejuatsin kineki nikan taltikpak (Mat. 6:9, 10). Se taman tein Jehová kineki yejua maj nochin nemikan nochipaya. Yejua ika kiixtalij iKonetsin maj taixyekana, uan kinixpejpenani 144 mil para maj kipaleuikan Jesús maj kichiua tein yejuatsin kineki (Apoc. 5:9, 10).

13. ¿Toni kichiujtok Jehová axkan, uan toni moneki tikonchiuas tejuatsin?

 ¹³ Itech nejin tonalmej, Jehová kinsentilijtok “tel miakej” para nemiskej keman iTaixyekanalis taixyekantosya nikan taltikpak (Apoc. 7:9, 10; Sant. 2:8). Yejuan mochikauaj amo tetauelitaskejok, maski itech nejin taltikpak miakej xexeliujtokej porin motauelitaj uan moteuiaj. Ika tein kichiuaj, kemej yeskia kichiujtokejya maj ininespadas mochiuakan teposmej tein ika talkaxaniaj (Miq. 4:3). Amo tapaleuiaj keman sekin youij tateuitij uan miakej kinmiktiaj, ta kinmachtiaj oksekin akoni Jehová uan tein kiixtalijtok kichiuas, uan ijkon kinpaleuiaj maj kichiuakan tein moneki para ‘yekmelauj kuali nemiskej’ (1 Tim. 6:19). Kemej kipaleuiaj iTaixyekanalis Dios, ininchankauan xa kinixnamikij oso kemansa xa amo semi kinajsi tomin, sayoj ke Jehová nochipa kinpaleuia maj kipiakan tein ika moixpanoltiskej (Mat. 6:25, 30-33; Luc. 18:29, 30). Nochi nejin kinextia ke iTaixyekanalis Dios yekmelauj moajsi uan ika nejon Taixyekanalis yejuatsin kisentokas kichiuas nochi tein kiixtalijtok.

14, 15. ¿Keniuj senkis ixpoliuis mikilis ijkon kemej Jehová motenkaua?

¹⁴ Jesús taixyekantokya itech iTaixyekanalis Dios ompa iluikak uan kichiuas nochi tein Jehová motenkaujtok (2 Cor. 1: 20). Itech xiuit 1914 uan hasta axkan, Jesús kintaniniya akin kitauelitaj (Sal. 110:1, 2). Amo uejkaua, yejua uan 144 mil senkis tataniskej uan kinixpoloskej nochin akin amo yolkualmej (Apoc. 6:2).

¹⁵ Itech Mil Xiujmej keman Jesús taixyekantos, kichiuas maj oksepa nemikan akin momikilijkejya uan kinpaleuis akin tatakamatiskej maj senkis amo tajtakolejkejok. Satepan, akin senkis kinextiskej ke amo kikauaj Jehová, yejuatsin kinitas ke yolmelaujkej, “ininaxkatis taltikpak uan ompa nemiskej nochipaya” (Sal. 37:10, 11, 29). Uan “mikilis no ixpoliuis” (1 Cor. 15:26). ¡Semi tiyolpakiskej!

16. ¿Toni moneki techolinis maj tiktekitilikan Jehová?

¹⁶ Kemej tikitakejya, uelis tikneltokaskej ke tinemiskej nochipaya porin Biblia senkis ijkon kinextia. Tikchiaskej tinemiskej nochipaya techpaleuia maj amo tikauakan Jehová uan Jesús itech nejin tonalmej tein semi ouijkej. Sayoj ke, komo tiknekij tikyolpaktiskej Jehová, amo sayoj moneki tikintakamatiskej porin tiknekij tinemiskej nochipaya, ta porin tikintasojtaj (2 Cor. 5:14, 15). Kemej tiktasojtaj Jehová uan Jesús, tiknekij tikchiuaskej kemej yejuan uan no tikintapouiskej oksekin tein tikchiaj tikseliskej (Rom. 10:13-15). Komo timochikauaj okachi tikinpaleuiskej oksekin uan amo sayoj totech titanemiliskej, Jehová okachi kinekis mouikas touan nochipaya (Heb. 13:16).

17. ¿Toni moneki tikchiuaskej tisejsemej? (Mateo 7:13, 14).

¹⁷ ¿Uan tejuan? ¿Tinemiskej nochipaya? Jehová ijkon kineki. Sayoj ke tejuan moneki tiksentokaskej tikchiuaskej tein techpaleuis maj tinemikan nochipaya (xikonixtajtolti Mateo 7:13, 14). ¿Uan keniuj yeski keman tinemiskej nochipaya? Nejon tikitaskej itech okse tamachtilis.