1, 2. 1) ¿Toni kijtoj Jiova ke panoskia itech totonaluan? 2) ¿Katiyejua netajtanilmej tiknankiliskej itech nejin tamachtilis? (Xikonita taixkopin ipeujyan tamachtilis.)

JIOVA kijtoj ke itech totonaluan, “majtakti takamej” akin tajtouaj nochi tataman tajtolmej itech nochi altepemej kikitskiskiaj itaken se “judío” uan kijtoskiaj: “Tiknekij tiyaskej namouan, porin tikakinij ke Dios yetok namouan” (Zac. 8:23). “Judío” kinixnextia tokniuan akin Dios kinixpejpena ika iyektikatsin espíritu. Biblia no kintokaytia “Israel ten Yejuatsin moinaxkatilij” (Gál. 6:16). Uan “majtakti takamej” kinixnextiaj akin kichiaj nemiskej nochipaya nikan taltikpak. ¿Keyej kinekij yaskej iniuan tokniuan taixpejpenalmej? Porin kimatij ke Jiova kinselia uan porin kiitaj kemej se ueyi tatiochiualis iniuan kiueyichiuaskej Dios.

² Ijkon kemej Zacarías, Jesús tamachtij ke itekitikauan Dios kuali mouikaskiaj. Yejua kintokaytij “amo ueyi oloch ichkamej” akin kichiaj nemiskej ompa iluikak. Uan kintokaytij ‘okseki ichkamej’ akin kichiaj nemiskej nikan taltikpak. Jesús kijtoj ke nochin yejuan yeskiaj “sayo se sen oloch” ichkamej uan ke kitojtokaskiaj yejua kemej “sayo se  tapixke” (Luc. 12:32, TNM; Juan 10:16). Sayoj ke xa timotajtaniskej: ¿Moneki tikmatiskej inintokay nochin tokniuan taixpejpenalmej itech totonaluan? ¿Toni tanemilil moneki kipiaskej tokniuan taixpejpenalmej? Komo aksa itech tonechikol peua kikua pan uan tayi vino keman tikelnamikij imikilis Jesús, ¿keniuj moneki tikitaskej? Uan komo okachi momiakiliaj akin kijtouaj ke taixpejpenalmej, ¿moneki techtekipachos nejon? Itech nejin tamachtilis tiknankiliskej nejin naui netajtanilmej.

3. ¿Keyej amo uelis tikmatiskej akonimej senkis yaskej iluikak uan pouiskej iniuan 144,000?

³ ¿Moneki tiktemoskej tikmatiskej inintokay tokniuan taixpejpenalmej akin mokauajok nikan taltikpak? Amo. ¿Keyej? Porin tein melauj amo ueli tikyekmatij ox yekmelauj yaskej iluikak. ^[1] Melauak ke Dios kinixpejpenak maj yakan iluikak, sayoj ke uelis yaskej ompa komo amo keman kikauaj Jiova. Satanás kimati nejon uan kinkui “miakke takajkayauani” uan ika kitemoua kichiuas maj kikauakan Jiova (Mat. 24:24). Tokniuan taixpejpenalmej sayoj uelis kiyekmatiskej ke yaskej iluikak keman Jiova senkis kinselisya. Yejuatsin senkis kinselia tepitsin achto ke momikiliskej oso tepitsin achto ke peuas okachi ueyi tajyouilis (Apoc. 2:10; 7:3, 14).

4. Komo okseki ichkamej amo kimatij inintokay nochin tokniuan taixpejpenalmej akin moajsijok nikan taltikpak, ¿keyej ueli kiniluiaj: “Tiknekij tiyaskej namouan”?

⁴ Komo okseki ichkamej amo kimatij inintokay nochin tokniuan taixpejpenalmej akin moajsijok nikan taltikpak, ¿keyej ueli kiniluiaj: “Tiknekij tiyaskej namouan”? Biblia kijtoua ke “majtakti takamej” kikitskiskiaj itaken se “judío” uan kijtoskiaj: “Tiknekij tiyaskej namouan, porin tikakinij ke Dios yetok namouan”. Kemej tikitaj, itech nejin tajkuilol ika motajtoua se “judío”, sayoj ke satepan kijtoua “namouan”. Yejua ika “judío” amo kiixnextia sayoj se taltikpaknenkej, ta nochin oloch taixpejpenalmej. Okseki ichkamej kimatij nejin, uan yejua ika ueli kijtouaj ke kemej yeskia youij iniuan taixpejpenalmej, tein kijtosneki, ke iniuan kisenueyichiuaj Jiova. Amo moneki kimatiskej inintokay nochin tokniuan taixpejpenalmej uan ijkon kintojtokaskej sejsemej. ¿Keyej? Porin Biblia kijtoua ke sayoj moneki tiktojtokaskej Jesús (Mat. 23:10).

5. 1) ¿Toni tanejmachtilis moneki kiyekitaskej taixpejpenalmej? 2) ¿Keyej amo auil nejin tanejmachtilis?

⁵ Tokniuan taixpejpenalmej moneki kiyekitaskej tanejmachtilis tein moajsi itech 1 Corintios 11:27, 28 (xikonixtajtolti). Komo se tokniuj taixpejpenal amo kisentoka kuali mouika iuan Jiova uan maski ijkon kikua pan uan tayi vino keman moelnamiki imikilis Jesús, “amo kichiua ika ne yolchipaualis”, oso amo kinextia poujkaitalis (Heb. 6:4-6; 10:26-29). Nejin tanejmachtilis amo auil,  porin komo se taixpejpenal kikaua Jiova amo kiselis “kualtsin tetayokolil ten Totajtsin Dios [kinmakas]” ne iluikak (Filip. 3:13-16).

6. ¿Toni tanemilil moneki kipiaskej tokniuan taixpejpenalmej?

⁶ Pablo kiniluij taixpejpenalmej: “Xichipaukanemikan ijkon keme kinnamiki ma chipaukanemikan nekes ten Totajtsin Dios kinnotsak”. ¿Keniuj monekia kichiuaskej nejin? Pablo kinmelauilij: “Xinentinemikan ika ne yolyemanalis uan amo ximoueyinektinemikan. Uan xikinpialijtiu paciencia in tokniuan taneltokani. Uan ika por ne tetasojtalis ten Yejuatsin namechmakatok, ximoxikouilijtiyakan ne yolxokolilis ten namechiuiliaj oksekin”. No kinelnamiktij ke monekia mochikauaskej kuali mouikaskej uan tapaleuiskej maj onka yolseuilis (Efes. 4:1-3). Yektikatsin espíritu kinpaleuia itekitikauan Dios maj yolyemankej, amo maj moueyinekikan (Col. 3:12). Yejua ika, tokniuan taixpejpenalmej amo kinemiliaj ke okachi ueyichiuanimej ke oksekin. Amo kinemiliaj ke porin taixpejpenalmej kipiaj okachi yektikatsin espíritu ke okseki tokniuan, sayoj porin taixpejpenalmej. Amo no kinemiliaj ke okachi kiajsikamatij Biblia ke oksekin. Uan amo kiluiaj aksa ke kinemiliaj ke yejua no taixpejpenal uan ke monekiskia kikuas pan uan tayis vino. Okachi kuali, kinextiaj yolyemanilis uan kineltokaj ke sayoj Jiova ueli kiixpejpena aksa maj youi iluikak.

7, 8. ¿Toni amo kichiuaj tokniuan taixpejpenalmej, uan keyej?

⁷ Maski tokniuan taixpejpenalmej kiitaj kemej se ueyi tatiochiualis maj Dios kinixpejpena maj yakan iluikak, amo kichiaj maj okseki tokniuan kinueyitalikan (Efes. 1:18, 19; xikonixtajtolti Filipenses 2:2, 3). Kimatij ke keman Jiova kinixpejpenak, amo kichiuak maj nochin kimatinij nejon. Yejua ika se tokniuj taixpejpenal amo kimoujkaita komo se tokniuj amo niman kineltoka ke taixpejpenal. Yejua kimati ke Biblia techiluia maj amo niman tikneltokilikan aksa komo kijtoua ke Jiova kimakak se tel ueyi tatiochiualis (Apoc. 2:2). Uan no, keman se taixpejpenal kinixmati oksekin, amo kiniluia ke taixpejpenal. ¿Keyej? Porin amo kineki maj kiueyitalikan. Uan hasta xa amo kiluis nion akin. Amo no kijtojtinemi nochi uejueyi tekimej tein kichiuas keman yetos ompa iluikak (1 Cor. 1:28, 29; xikonixtajtolti 1 Corintios 4:6-8).

⁸ Tokniuan taixpejpenalmej amo kinemiliaj ke moneki sayoj mouikaskej iniuan okseki taixpejpenalmej, kemej yeskia yetoskiaj kampa pouij sayoj ueyichiuanimej. Amo kintemouaj okseki taixpejpenalmej uan sayoj iniuan tajtouaj oso mosenmachtiaj Biblia (Gál. 1:15-17). Komo taixpejpenalmej kichiuaskiaj nejin, kichiuaskiaj maj tokniuan itech nechikol moxexelokan uan kiixnamiktoskiaj yektikatsin espíritu, chikaualis tein tapaleuia maj itech ixolal Dios onka yolseuilis uan maj kuali mouikakan (xikonixtajtolti Romanos 16:17, 18).

9. ¿Keyej moneki timoyekpiaskej kemej tikinitaj tokniuan taixpejpenalmej? (Xikonita kampa kijtoua “ ‘Naken tetasojtatinemi, yejua ne amo kinpinautia’ oksekin”.)

⁹ Jesús kiniluij imomachtijkauan: “Namejuan nochi naniknime”. Uan ompa kiniluij: “Naken mouejueyichiuas, yejua  ne Dios kitsikitsintiltis; uan naken motsikitsintiltis, yejua ne Dios kiueyichiuas” (Mat. 23:8-12). Nejin kinextia ke amo kuali yetok maj tikueyitalikan aksa oso maj okachi tiktakachiuakan ke oksekin, maski yeski taixpejpenal. Biblia techiluia maj no tiknextikan takuaujtamatilis kemej tein kinextiaj tayekananij, sayoj ke amo kijtoua maj tiktojtokakan se taltikpaknenkej kemej totaixyekankauj (Heb. 13:7). Melauak ke Biblia kijtoua ke sekin kinnamiki maj okachi tikinpoujkaitakan, amo porin taixpejpenalmej, ta porin chikauak tekitij itech tanojnotsalis uan tamachtilis (1 Tim. 5:17, TNM). Komo okachi tikintakachiuaj taixpejpenalmej, uelis tikchiuaskej maj mopinaujmatikan. Oso uelis tikchiuaskej maj moueyinekikan, uan nejon tel amo kuali yeskia (Rom. 12:3). ¡Amo tiknekij tikchiuaskej nion teyi tein kinuikas tokniuan taixpejpenalmej maj tajtakokan! (Luc. 17:2.)

10. ¿Keniuj tiknextiaj ke tikinpoujkaitaj tokniuan taixpejpenalmej?

¹⁰ ¿Keniuj tiknextiaj ke tikinpoujkaitaj tokniuan akin Dios kinixpejpenak maj yakan iluikak? Ika miak taman. Yekinika, amo tikintajtaniaj keniuj kimatkej ke taixpejpenalmej, porin itech nejin moneki amo timokalakiskej. Biblia kijtoua ke ‘amo totekiuj’ (1 Tes. 4:11; 2 Tes. 3:11). Uan no, amo tiknemiliaj ke ininnamik, inintatuan uan okseki ininchankauan no taixpejpenalmej. Nejin tatiochiualis amo se taman tein kalyetouanij mopanoltiliaj (1 Tes. 2:12, TNM). Uan amo no tiktajtaniaj aksa tein uelis kichiuas maj amo kuali momachili. Kemej neskayot, amo tiktajtaniaj se tokniuj siuat akin inamik taixpejpenal keniuj momachilia keman kinemilia ke inamik amo iuan yetos itech Xochital. Titakuaujtamatij ke Jiova techmakas nochi tein tiknekiskej keman timoajsiskej itech Xochital (Sal. 145:16).

11. ¿Keyej moneki amo tikinueyitaliskej okseki tokniuan?

¹¹ Keman tikinitaj tokniuan taixpejpenalmej kemej tikinitaj okseki tokniuan semi techpaleuia. ¿Keyej? Porin Biblia kijtoua ke itech nechikol uelis moajsiskej “takajkayaukataneltokani” akin hasta no kijtoskej ke taixpejpenalmej (Gál. 2:4, 5; 1 Juan 2:19). Uan no, seki taixpejpenalmej uelis kikauaskej Jiova (Mat. 25:10-12; 2 Ped. 2:20, 21). Moneki amo tikinueyitaliskej oso tikintojtokaskej okseki tokniuan itech nechikol, xa porin taixpejpenalmej, porin kintelixmatij oso porin kitekitilianij Jiova miak xiujmej. Ijkon, komo nejin tokniuan kikauaj Jiova, amo tikpoloskej totakuaujtamatilis nion tikauaskej Dios.

12, 13. ¿Keyej moneki amo techtekipachos kanachi taixpejpenalmej kikuaj pan uan tayij vino keman tikelnamikij imikilis Jesús?

¹² Itech miak xiujmej, keman kinpouayaj kanachi tokniuan kikuayaj pan uan tayiaj vino keman moelnamiki imikilis Jesús, xijxiujtika moitaya ke okachi amo miakej katkaj. Sayoj ke itech xiujmej tein panouanij, nejin tokniuan okachi momiakilianij. ¿Moneki techtekipachos nejin? Amo. Maj tikitakan naui taman tein kinextia keyej moneki amo techtekipachos.

¹³ Jiova “kuali kinixmati naken pouij iuantsin” (2 Tim. 2:19). Dios kimati akoni taixpejpenal uan akoni amo. Sayoj ke tokniuan akin kinpouaj kanachi kikuajkej  pan uan tayikej vino keman tikelnamikij imikilis Jesús amo ueli kimatij. Yejua ika, itech tapoual tein kinextia kanachimej kikuaj pan uan tayij vino no ompa pouij akin kinemiliaj ke Dios kinixpejpenak maski amo melauak. Kemej neskayot, sekin kikuayaj pan uan tayiaj vino, sayoj ke satepan amo ijkon kichiujkejok. Uan oksekin uelis kipiaskej se kokolis tein kinuikas maj kinemilikan ke yatij iluikak. Ika nochi nejin, amo tikyekmatij kanachi taixpejpenalmej moajsijok nikan taltikpak.

14. ¿Kanachi taixpejpenalmej kijtoua Biblia ke nemiskejok itech taltikpak keman peuas okachi ueyi tajyouilis?

¹⁴ Keman Jesús kinkuikiuj taixpejpenalmej uan kinuikas iluikak, yejuan moajsiskej noyampa taltikpak. Biblia kijtoua ke Jesús “kintitanis iángeles keman chikauak kakistitos trompeta, uan yejuan kinsentiliskej itaixpejpenaluan akin moajsij noyampa itech taltikpak, sekopa itech iluikak hasta oksekopa” (Mat. 24:31, TNM). Biblia tamachtia ke itech itamian tonalmej amo miakej taixpejpenalmej moajsiskejok nikan taltikpak (Apoc. 12:17). Sayoj ke amo kijtoua kanachin nemiskejok keman peuas okachi ueyi tajyouilis.

15, 16. ¿Toni ome taman moneki tikajsikamatiskej ika tatiochiualis tein kipiaj taixpejpenalmej?

¹⁵ Jiova kiixtalia kemanian kiixpejpena aksa (Rom. 8:28-30). Dios peuak kinixpejpena seki taltikpakneminij ika iyektikatsin espíritu satepan ke kiajokuik Jesús. Nesi ke itech nejon tonalmej nochin akin kichiuayaj kemej Cristo katkaj taixpejpenalmej. Satepan, tel miak xiujmej tel miakej akin kijtouayaj ke kichiuayaj  kemej Cristo amo melauak ijkon monejnemiltiayaj. Maski ijkon, itech nejon xiujmej Jiova kinixpejpenak ika iyektikatsin espíritu akin yekmelauj kichiuayaj kemej Cristo akin amo semi miakej katkaj. Nejin tokniuan tamatiaj kemej trigo tein Jesús kijtoj ke moskaltiskia iuan amo kuali xiuit (Mat. 13:24-30). Itech itamian tonalmej, Jiova kisentokani kinixpejpenani taltikpakneminij maj pouikan iniuan 144,000. ^[2] Komo tepitsin achto ke ejkos poliuilis Jiova kinixpejpena sekin, senkis tikmatij ke yejuatsin kichiujtok tein okachi kuali (Is. 45:9; Dan. 4:35; xikonixtajtolti Romanos 9:11, 12, 16). ^[3] Amo tiknekij tiyeskij kemej tekitinij akin Jesús ininka tajtoj itech se neskayot. Nejin tekitinij kijijtojkej ininteko porin nochin kinmakak sayoj se taxtauil maski oksekin sayoj tekitikej se hora (xikonixtajtolti Mateo 20:8-15).

¹⁶ Amo nochin taixpejpenalmej pouij itech takeual takuaujtamach uan tamatkej (Mat. 24:45-47). Ijkon kemej itech inintonaluan yekinika akin kichiuayaj kemej Cristo, itech totonaluan Jiova uan Jesús kinmachtiaj tel miakej taltikpakneminij inintechkopa sayoj sekin. Itech inintonaluan yekinika itatojtokakauan Cristo, sayoj seki taixpejpenalmej kijkuilojkej Escrituras Griegas Cristianas. Uan itech totonaluan, sayoj seki tokniuan taixpejpenalmej kinixtalijtokej “ma kintamakakan kuak ne hora de takualis” nochin itekitikauan Dios.

17. ¿Toni tikitakej itech nejin tamachtilis?

¹⁷ ¿Toni tikitakej itech nejin tamachtilis? Jiova kiixtalij maj tel miakej itekitikauan nemikan nochipaya nikan taltikpak uan akin tekiuajtiskej iuan Jesús maj nemikan ompa iluikak. Jiova kintatiochiuia nochin itekitikauan, “majtakti takamej” uan “judío”. Uan kichia maj nochin kitakamatikan itanauatiluan uan maj amo kikauakan. Nochin moneki yeskij yolyemankej. Nochi nejin tokniuan moneki kisentekitiliskej Jiova uan kuali mouikaskej. Uan nochin yejuan moneki tapaleuiskej maj nochin kuali mouikakan itech nechikol. Achto ke ejkos poliuilis, maj tiksentokakan tiktekitilijtokan Jiova uan maj tiktojtokakan Jesús kemej “sayo se sen oloch” ichkamej.